Fakaako Mai he Kupu he Atua
Ko Hai a Iesu Keriso?
Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau hūhū nei mo koe.
1. Ko hai a Iesu Keriso?
Nakai tuga e falu tagata, ne nofo a Iesu he lagi ko e mena moui fakaagaaga ato fanau a ia ke he lalolagi. (Ioane 8:23) Ko ia ko e tufugatia fakamua he Atua, ti lagomatai a ia ke tufuga e tau mena oti ne toe. Ko ia ni tokotaha ne tufuga e Iehova ti ui ko e Tama “fuataha” he Atua. Ne eke a Iesu mo Gutuvagahau he Atua, ti ui foki a ia ko e “Loko.”—Ioane 1:1-3, 14; totou Tau Fakatai 8:22, 23, 30; Kolose 1:15, 16.
2. Ko e ha ne hau a Iesu ke he lalolagi?
Ne fakafano mai he Atua e Tama haana ke he lalolagi he hiki e moui haana mai he lagi ke he manava he tamāfine tote Iutaia ne higoa ko Maria. Ti nakai fai matua taane a Iesu. (Luka 1:30-35) Ne hau a Iesu ke he lalolagi (1) ke fakaako e kupu mooli hagaao ke he Atua, (2) ke fakatoka e fifitakiaga ke taute e finagalo he Atua, mo e (3) ke foaki e moui mitaki katoatoa haana “mo lukutoto.”—Totou Mataio 20:28; Ioane 18:37.
3. Ko e ha kua lata a tautolu mo e lukutoto?
Ko e lukutoto ko e totogi ke fakatoka mai e tagata he līlīaga. Ko e mate mo e vahā fuakau ne nakai ko e vala fakamua he finagalo he Atua ma e tau tagata. Iloa fēfē e tautolu e mena ia? Ne tala age e Atua ke he tagata taane fakamua ko Atamu, ka taute e ia e mena ne talahau he Tohi Tapu ko e agahala, to mate a ia. Ane mai nakai agahala a Atamu, to nakai mate a ia. He nakai mate a Atamu ato fai senetenari he mole, ne kamata a ia ke mate mai he aho ne liuliu a ia ke he Atua. (Kenese 2:16, 17; 5:5) Ne fakaholo age e Atamu ke he tau hologa oti haana e agahala mo e fakahala mate. Ati “hoko mai” e mate ke he lalolagi he tau tagata puhala ia Atamu. Kakano haia kua lata a tautolu mo e lukutoto.—Totou Roma 5:12; 6:23.
4. Ko e ha ne mate a Iesu?
Ko hai ka totogi e lukutoto ke fakatokanoa mai a tautolu he mate? Ka mamate a tautolu, kua totogi e tautolu e fakahala ma e tau agahala ni ha tautolu. Nakai maeke he tagata nakai mitaki katoatoa ke totogi e tau agahala he falu.—Totou Salamo 49:7-9.
He nakai moua e Iesu e nakai mitaki katoatoa mai he matua taane, ne mate a ia nakai ha ko e tau agahala ni haana, ka ko e tau agahala he falu. Ne fakafano mai he Atua e Tama haana ke mate ma tautolu ko e fakakiteaga he fakaalofa mua ue atu Haana ma e tau tagata. Ne fakakite foki e Iesu e fakaalofa ma tautolu he omaoma ke he Matua haana mo e foaki e moui haana ma e tau agahala ha tautolu.—Totou Ioane 3:16; Roma 5:18, 19.
5. Ko e heigoa ha Iesu hane taute mogonei?
He fakamalolō a lautolu ne gagao, fakatū hake a lautolu ne mamate, mo e laveaki e tau tagata mai he matematekelea, ne fakatātā e Iesu e mena ka taute e ia he magaaho fakamui ma e tau tagata oti ne omaoma. (Luka 18:35-42; Ioane 5:28, 29) He mole e mate ha Iesu, ne liuaki mai he Atua a ia ke he moui ko e mena moui fakaagaaga. (1 Peteru 3:18) Ti fakatali a Iesu he faahi matau he Atua ato age e Iehova ki a ia e malolō ke pule ko e Patuiki ke he lalolagi katoa. (Heperu 10:12, 13) Kua pule a Iesu mogonei ko e Patuiki he lagi, ti ko e tau tutaki haana he lalolagi hane fakapuloa e tala mitaki ke he lalolagi katoa.—Totou Tanielu 7:13, 14; Mataio 24:14.
Nakai leva, to fakaaoga e Iesu e malolō haana ko e Patuiki ke fakaotioti e tau matematekelea oti kana mo lautolu ne fakatupu ai. Totou miliona ne fakagahuahua e tua ki a Iesu mo e omaoma ki a ia to olioli e moui he parataiso he lalolagi.—Totou Salamo 37:9-11.