Ha Ha ia Koe e Mena ke Fiafia

MAI he tau tegatega moui itikuhila ke he fakatokaaga fetū lahi mahaki he tau fuhifuhi mamahaki, ne fakakite he tufugatia e maopoopoaga. Ai ko e mena ke ofo anei, ha ko e Tufuga “nakai ko e Atua ha i ai e fakaagitau [po ke, maopoopo].” (1 Kori. 14:33) Ko e fakatokaaga he Atua ma e tapuakiaga kua ofoofogia foki. Kitekite la ke he mena ne taute e Iehova. Ne fakatū e ia ke he taha e fakatokatokaaga he lagi mo e lalolagi katoa e teau he tau miliona he tau mena momoui lotomatala—fakatino mo e fakaagaaga foki—he moua e atāina ke fifili, ti kaufakalataha ke he tapuakiaga meā. Ko e fulufuluola ha ia!

I Isaraela i tuai, ko e vala he fakatokatokaaga he Atua he lalolagi ne hukui e Ierusalema, ne toka ai e faituga ha Iehova mo e nofo ai e patuiki fakauku haana. Taha e tagata fakapaea ha Isaraela i Papelonia ne fakakite e tau logonaaga haana ke he maaga tapu he puhala nei: “Kaeke ke nakai manatu e au a koe, kia piki haku alelo ke he aloalogutu haku, kaeke ke nakai eke e au a Ierusalema mo mataulu he haku a fiafia.”—Sala. 137:6.

Pihia nakai e logonaaga haau ke he fakatokatokaaga he Atua he vahā nei? Lahi atu nakai e fiafia haau ki ai ke mua atu ke he falu mena foki? Maama nakai he fanau haau e tupumaiaga mo e gahuahuaaga he vala he fakatokatokaaga he Atua he lalolagi? Loto fakaaue nakai a lautolu he eke mo vala he tau matakainaga he lalolagi katoa he Tau Fakamoli a Iehova? (1 Pete. 2:17) He ha he lafi e tau manatu ka mui mai ke he ha mutolu a Tapuakiaga he Magafaoa he afiafi ke maeke ke fakatolomaki e loto fakaaue he magafaoa haau ma e fakatokatokaaga ha Iehova?

Liu Manatu e ‘Vaha ne Aho Mua’

He tau tau takitaha, ne fakapotopoto e tau magafaoa Isaraela ke fakamanatu e Paseka. He magaaho ne fakatū e galue, ne hataki e Mose e tau tagata: “Ka huhu mai e tama hau kia koe a taha aho, kua pehe mai, Ko heigoa kia hanai? ti tala age a koe kia ia, Ko e lima malolo ne ta mai ai e Iehova a mautolu i Aikupito, ko e mena ne nonofo fakatupa ai.” (Esoto 13:14) Ko e tau fehagaiaga ha Iehova mo e tau Isaraela ko e tala nakai ke nimo ai. Mooli, tokologa e tau matua taane Isaraela ne muitua ke he poaki ha Mose. He tau atuhau fakamui, ne liogi taha tagata Isaraela: “Ko e Atua na e, kua fanogonogo e tau teliga ha mautolu, kua talatalahau he tau matua ha mautolu kia mautolu e gahua ne eke e koe ke he vaha ha lautolu ne aho mua.”—Sala. 44:1.

Ke he tama tote he vahā nei, ko e tupumaiaga he Tau Fakamoli a Iehova he molea e 100 tau kua mole ne liga tuga e ‘vaha ne aho mua.’ Maeke fēfē ia koe ke taute e tau tala nei ke mooli ke he tau tama haau? Ke taute pihia, kua fakaaoga he falu matua e Jehovah’s Witnesses—Proclaimers of God’s Kingdom, ko e Yearbook, tau tala tutupu mooli ne tohi he tau senolo ha tautolu, mo e falu hokotaki foki ke he tupumaiaga fakateokarasi, putoia e DVD foou ha tautolu hagaao ke he tau tagata he Atua he vahā foou. Ko e tau vitiō ne fakakite e favaleaga ke he tau matakainaga ha tautolu he Kautaha Soviete fakamua mo Nasi i Sihamani kua fakaako ke he tau magafaoa ke falanaki ki a Iehova he tau magaaho kamatamata. Fakaaoga e tau vala tala pihia ke he ha mutolu a Tapuakiaga he Magafaoa he afiafi. To fakamalolō he mena ia e tua he fanau ha mutolu neke fehagai a lautolu mo e tau paleko ke he mahani fakamooli ha lautolu.

Ti ko e fakaakoaga ke he tupumaiaga kua liga ahumate mafiti ke he tau manamanatuaga ha lautolu ne ikiiki. Kia ta mai e tau fanau haau ke gahua auloa. Ma e fakatai, liga hūhū e koe ke he tama taane haau ke fifili e motu ne fiafia a ia ki ai, kumikumi e tupumaiaga fakateokarasi he motu ia, ti tala age falu mena ne iloa e ia ke he magafaoa haana. He fakapotopotoaga ha mutolu, liga fai Kerisiano kua leva e fekafekau fakamooli ka matutaki mo mutolu ke he taha afiafi he tapuakiaga he magafaoa. Liga hūhū tala e tama fifine haau ki a lautolu mo e fakakite e manatu ha lautolu, ti maeke ia lautolu ke talahau e tau mena tutupu ha lautolu. Po ke tala age ke he tama haau ke tā e tau fakatino he tau lakaaga fakateokarasi, tuga e talaga he la, fonoaga he lalolagi katoa, po ke fakaaogaaga he tau lapakofe he gahua he fonua ke he taha fale ke he taha fale.

Iloa e Puhala ne ‘Ati Hake Ai e Ia a Ia Ni’

Ne fakatatai he aposetolo ko Paulo e fakapotopotoaga Kerisiano ke he “tino katoa kua fakamau, mo e tutaki fakalataha, kua tupu ai e tino ha ko e lagomatai mai he tau fatia takitaha; ke lata mo e gahua he fafatiaga he tau fahi tino takitaha, kia ati hake ai he tino e ia a ia ni ke he fakaalofa.” (Efeso 4:16) He fakaako hagaao ke he gahuahuaaga he tino he tagata ka fakatupu e loto fakaaue mo e fakalilifu ha tautolu ma e ha tautolu a Tufuga. Pihia foki, ka kumikumi a tautolu ke he gahuahuaaga he fakapotopotoaga he lalolagi katoa, kua nava a tautolu ke he “pulotu kehekehe loga he Atua.”—Efeso 3:10.

Kua fakamaama e Iehova e gahuahuaaga he fakatokatokaaga haana, pihia foki ke he lagi. Ma e fakatai, ne talahau e ia ki a tautolu kua age fakamua e ia e fakakiteaga ki a Iesu Keriso, “ne fekau mai foki e ia hana agelu ke fakailoa mai ai ke he hana fekafekau ko Ioane, ko ia ne talahau mai.” (Fakakite. 1:1, 2) Ka fakakite he Atua e tau gahuahuaaga he vala he fakatokatokaaga haana he lagi, nakai kia manako a ia ke maama e tautolu e puhala kua ‘ati hake ai e ia a ia ni’ he lalolagi?

Tuga anei, ka amanaki e leveki he takaiaga ke ahiahi atu ke he fakapotopotoaga ha mutolu, he ha he fakatutala mo e magafaoa haau e tau matagahua mo e tau kotofaaga he tau leveki faifano? Lagomatai fēfē e lautolu a tautolu takitokotaha? Falu hūhū kua liga fakatutala ki ai: Ko e ha kua aoga ai ke hokotaki e gahua he fonua? Fakatupe fēfē e fakatokatokaaga he Atua? Fakatokatoka fēfē e Kau Fakatufono, ti foaki fēfē ai e tau mena kai fakaagaaga?

Ka maama e tautolu e puhala ne fakatokatoka e tau tagata ha Iehova, kua aoga ki a tautolu ke he tolu e puhala: Kua tupu ki mua e loto fakaaue ha tautolu ki a lautolu hane gahua malolō ke lata mo tautolu. (1 Tesa. 5:12, 13) Kua omoomoi a tautolu ke lalago e tau fakatokaaga fakateokarasi. (Gahua 16:4, 5) Fakahiku, kua atihake e falanakiaga ha tautolu ki a lautolu ne takitaki he kitia e tautolu e fakavēaga faka-Tohi Tapu ma e fifiliaga mo e tau fakaholoaga kua taute.—Hepe. 13:7.

“Manatu Fakatonu Hana Tau Fale Iki”

“Kia takai ā a Siona, mo e evaeva takai kia ia, kia totou la hana tau kolo. Kia manamanatu fakatonu ke he hana pa, mo e manatu fakatonu hana tau fale iki; kia fakamatala atu ai e [mu]tolu ke he hau i tua.” (Sala. 48:12, 13) Ne tomatoma he salamo i ai e tau Isaraela ke kitia tata a Ierusalema. Maeke nakai a koe ke manamanatu ke he tau manatu uho ne taute he tau magafaoa Isaraela ne fenoga ke he maaga tapu ma e tau galue he tau tau takitaha ti kitia e faituga homo ue atu i ai? Kua liga omoomoi a lautolu ke ‘fakamatala atu ai ke he hau i tua.’

Manamanatu ke he patuiki fifine ha Sihipa, ne fakauaua fakamua ke he tau hokotaki ke he pule homo ue atu mo e pulotu lahi ha Solomona. Ko e heigoa ne omoomoi a ia kua mooli e tau mena ne logona e ia? “Nakai talia e au e tala ha lautolu,” he ui e ia, “ato hau au mo e kitia ai ke he tau mata haku.” (2 Nofo. 9:6) E, ko e tau mena kua kitia he “tau mata” ni ha tautolu to lauia lahi a tautolu.

Maeke fēfē ia koe ke lagomatai e fanau haau ke kitia he “tau mata” ha lautolu e tau mena ofoofogia he fakatokatokaaga ha Iehova? Ka fai la ofisa e Tau Fakamoli a Iehova ne tata atu ke he kaina haau, kia eketaha ke ahiahi atu ki ai. Ma e fakatai, ko Mandy mo Bethany ne tutupu hake kavi ke he 900 maila (1,500 kilomita) mai he kaina Peteli he motu ha laua. Ka e pulega he tau matua ha laua e tau fenoga tumau ke kitekite e kaina Peteli, mua atu he lalahi fakahaga e fanau fifine ha laua. “To ō atu a maua ke kitekite e Peteli, manatu a maua kua kikili lahi mahaki ai ti lata ni mo e tau fuakau,” he talahau e laua. “Ka e feleveia a maua mo e tau tagata fuata hane gahua malolō ma Iehova mo e fiafia lahi ai! Kitia e maua ko e fakatokatokaaga ha Iehova kua lahi atu he matakavi tote ne nonofo ai a laua, ti ko e tau ahiahi takitaha ke he Peteli kua foaki mai ki a maua e malolō fakaagaaga.” He kitia tata e fakatokatokaaga he Atua ne omoomoi a Mandy mo Bethany ke kamata e paionia, ti uiina foki a laua ke gahua he Peteli ko e tau tagata gahua fakakū.

Fai puhala foki a tautolu ke “kitia” e fakatokatokaaga ha Iehova, ko e puhala ne nakai kitia he tau Isaraela i tuai. He tau tau ē kua mole, kua moua he tau tagata he Atua e tau vitiō mo e tau DVD ne fakakite e tau vala kehekehe he fakatokatokaaga he Atua, tuga e: Jehovah’s Witnesses—Organized to Share the Good News, Our Whole Association of Brothers, To the Ends of the Earth, mo e United by Divine Teaching. Ka kitia e mutolu mo e magafaoa ha mutolu e gahua malolō he tau tagata he Peteli, tau tagata lagomatai, tau misionare, mo e tau matakainaga taane ne tauteute mo e fakatokatoka e tau fonoaga, to tupu he loto haau e fakaaue mooli ma e tau matakainaga he lalolagi katoa.

Igatia e fakapotopotoaga he tau tagata he Atua mo e taute e matagahua aoga he fakamatala e tala mitaki mo e lalago e tau Kerisiano he matakavi ia. Ka kia fai magaaho mo e magafaoa haau ke manatu e “tau matakainaga ha mutolu ha he lalolagi.” To lagomatai he mena nei a koe mo e fanau haau ke fakatumau ke ‘mauokafua ke he tua,’ he mailoga kua ha ha ia mutolu e tau mena ke fiafia.—1 Pete. 5:9.

[Puha/Fakatino he lau 18]

Fakatokatokaaga he Atua Ko e Matakupu Uho Lahi ke Fakaako

Ha ha ia tautolu e tau foakiaga loga ke lagomatai e tau tagata oti ke fakaako fakalahi e tupumaiaga mo e gahuahuaaga he fakatokatokaaga ha Iehova. Ko e tau hūhū i lalo ka lagomatai a koe ke kamata:

☞ Kamata fēfē e gahua he tau leveki faifano he vahā nei?—Jehovah’s Witnesses—Proclaimers of God’s Kingdom, lau 222-227.

☞ Ko e heigoa e aoga ke he “Aho he Tau Tama” he Takaiaga Teokarasi he 1941?—Jehovah’s Witnesses—Proclaimers of God’s Kingdom, lau 86, 88.

☞ Taute fēfē he Kau Fakatufono e tau fifiliaga?—“Bearing Thorough Witness” About God’s Kingdom, lau 108-114.