Fiafia Mooli Nakai a Koe ke he Kupu he Atua?

“HE KAMATA au ke totou tumau e Tohi Tapu, kua eke ai mo matagahua ka e nakai ko e mena fiafia,” he talahau e Lorraine. “Kua uka ai ke maama, ti fa mahani au ke mohemiti.”

Talahau he falu na kamata foki a lautolu ke totou e Tohi Tapu ka e ai moua e fiafia. Ka kua fakatumau a lautolu ha kua iloa e lautolu ko e totou e tau Tohiaga Tapu ko e mena hako ke taute. Pehē a Marc: “Mukamuka ke fakaatā e tau fakatauhele ke nakai taute e totou Tohi Tapu mo e fakaako fakatagata. Kua lagaloga e liogi mo e lali ke eke e totou Tohi Tapu mo vala he fakatokaaga haaku.”

Ko e heigoa kua maeke ia koe ke taute ke feaki e loto fakaaue lahi ma e Kupu tohia he Atua ko e Tohi Tapu? Maeke fēfē ia koe ke fiafia he totou ai? Manamanatu ke he tau lagomatai ne mui mai.

Tau Foliaga mo e Tau Puhala

Kamata e magaaho totou Tohi Tapu haau ke he liogi mo e hafagi e tuaga he manamanatuaga. Ole ki a Iehova ke lagomatai a koe ke feaki e fakamakai ke fakaako e Kupu haana. Olelalo ki a ia ke hafagi e manamanatuaga mo e loto haau ke maama katoatoa e pulotu haana. (Sala. 119:34) He nakai fai kamataaga pehēnei, to mafiti ke taute fakateaga e fakaako Tohi Tapu ti liga galo ia koe e manako ke matutaki ke fakaako. Pehē a Lynn: “Falu magaaho ne mafiti lahi e totou haaku ti nakai maama katoatoa e falu manatu atihake. Fa mahani, kua nakai maama katoatoa e au e tau matapatu manatu. Ka e liogi au ma e manako fakalatalata, ti lagomatai he mena nei ke taofi e manamanatuaga haaku he evaeva fano.”

Tokiofa e mena ne fakaako e koe. Manatu ko e maama mo e fakagahua e kupu mooli he Tohi Tapu ko e moui haau. Ko e mena ia kia taute e laliaga fakamakamaka ke moua e tau manatu aoga mo e fakagahua ai. “Ne kumi au ke he tau mena kua lagomatai au ke mailoga e tau aga mo e tau logonaaga hepe ia au ni,” he talahau e Chris. “Kua fakahauhau ke kitia e puhala he tau vala tala he Tohi Tapu mo e loga he tau tohi ha tautolu kua aoga fakatagata ki a au, pete kua nakai la feleveia e tau tagata tohia mo au.”

Fakatoka e tau foliaga kua maeke ke moua e koe. Lali ke iloa taha mena foou hagaao ke he tau tagata he Tohi Tapu. Maeke ia koe ke iloa e tau tala atihake ke he tokologa ia lautolu he totou e Insight on the Scriptures po ke Watch Tower Publications Index. He iloa ai e koe e tau tagata taane mo e tau fifine he Tohi Tapu ko e tau tagata mooli ne fai aga fakatagata mo e fai logonaaga, to lauia mitaki a lautolu ke he manamanatuaga haau.

Kumi puhala foou ke fakamaama e tau Tohiaga Tapu. (Gahua 17:2, 3) Kua fakaako a Sophia mo e manatu ia. “Ko e manako haaku ke fakaako mo e fakatoka e tau fakamaamaaga foou ke fakaaoga he gahua he fonua haaku mo e he falu mogo, ti maeke ia au ke fakamaama fakamitaki e tau kupu mooli he Tohi Tapu. Ko e kanavaakau mitaki lahi mahaki he The Watchtower ke taute aki e mena nei,” he talahau e ia.—2 Timo. 2:15.

Manamanatu ke he tau tala he Tohi Tapu. “Ko e kupu he Atua kua moui ia,” he tohi he Heperu 4:12. He totou e koe e tau Tohiaga Tapu, kia toka e fekau he Atua ke gahuahua he manamanatuaga haau ti mailoga e tau mena ne kitia he tau tagata he Tohi Tapu. Lali ke logona e tau mena ne logona e lautolu mo e hufia e tau mena ne hufia e lautolu. Fakaaoga e tau mena tutupu ha lautolu ke he tau tuaga pauaki he moui haau. Fakaako mai he puhala ne fehagai a lautolu ke he tau tuaga. To fakatupu he mena nei haau a maamaaga mo e manatu e tau tala he Tohi Tapu.

Foaki fakalahi e magaaho ma e tau kupu tohi uka mo e tau fakamaamaaga i ai ke maama mitaki e koe. Fakaatā e magaaho lahi ma haau ma e tau fakaakoaga takitaha. Liga to kitia e koe e tau hūhū fakalagalaga lahi kua lata ke kumikumi fakalahi. Kumikumi e tau kupu nakai mahani, mo e ka fai Tohi Tapu foki a mutolu he taha vagahau ti fakaaoga ai ke fakakia aki e tau kupu ne tatai. Ka lahi e maama mo e fakagahua e koe e mena ne totou e koe, to lahi e fiafia haau ke he Kupu tohia he Atua. To maeke mogoia ia koe ke talahau, tuga he salamo: “Kua eke mo mena toka mau haku hāu [Iehova] a tau fakatufono tukulagi; ha ko e tau mena ia kua fiafia ai hoku loto.”—Sala. 119:111.

Kalo kehe he fakaako mafiti e vala tala. Kia fakatoka fakamitaki e koe e magaaho ma e fakaako fakatagata. Lagotatai ai mo e magaaho ne fakaaoga e koe ke tauteute ma e tau feleveiaaga he fakapotopotoaga. “Loga e magaaho ne logona e au e tupetupe lahi ti nakai maeke au ke manamanatu fakatonu,” he talahau e Raquel. “Ti moua e au kua aoga e tau magaaho kūkū ke fakaako. Lagomatai he tau puhala nei au ke moua e aoga lahi mahaki mai he fakaakoaga haaku. Pehē a Chris: “Ka logona e au e fakatepetepe, ne tauhele e loto manamanatu haaku he tote e mena ne manatu e au. Nakai fa hoko e mena ne fakaako ke he loto haaku.” Ko e mena ia, ua fakatepetepe.

Feaki e manako lahi ma e kupu he Atua. Ne pehē e aposetolo ko Peteru: “Kia manako lahi a mutolu, tuga e tau tama mukemuke kito fanau, ke he puke huhu he kupu nakai fakavai, kia tutupu ai a mutolu [“ke he fakamouiaga,” NW].” (1 Pete. 2:2) Nakai feaki he tau tama mukemuke e manako lahi ke he huhu. Ko e logonaaga pauaki a ia. Ka e talahau he tau Tohiaga Tapu kua lata ia tautolu ke moua e manako lahi ma e kupu he Atua. Kaeke ke totou e koe taha ni e lau he Tohi Tapu he tau aho takitaha, to nakai leva ti moua e koe e manako lahi ia. Ko e mena ne tuga e uka he mogo fakamua to nakai leva ti eke mo mena fiafia lahi.

Manamanatu fakahokulo ke he tau vala he Tohi Tapu. Kua moua foki e aoga lahi mai he manamanatu fakahokulo ke he mena ne totou e koe. To lagomatai he mena nei a koe ke tutaki fakalataha e tau matakupu fakaagaaga ne kumikumi e koe. Nakai leva to moua e koe e filifili he tau penina fakaagaaga he iloilo—ko e koloa fulufuluola.—Sala. 19:14; Fakatai 3:3.

Fakaaoga Fakamitaki e Magaaho

Ko e laliaga lahi e pipiki mau ke he tau puhala fakaako mitaki, ka ko e tau monuina kua loga ue atu. Ko e maamaaga fakaagaaga haau to holo ki mua. (Hepe. 5:12-14) Ko e iloaaga mo e pulotu ne moua e koe mai he tau Tohiaga Tapu omoomoi kua tamai e fiafia, totokaaga, mo e mafola. Ko e pulotu ne moua he Kupu omoomoi he Atua ko e “akau he moui” ma lautolu ne moua mo e fakagahua ai.—Fakatai 3:13-18.

Ko e fakaako hokulo ke he Kupu he Atua ka fakatupu ia koe e loto manamanatu. (Fakatai 15:14) To lagomatai he mena ia a koe ke foaki e fakatonuaga mauokafua ne fakavē tumau ke he Tohi Tapu. Ka fakaatā e koe e tau fifiliaga haau ke takitaki he tau mena ne totou e koe he tau Tohiaga Tapu mo e tau tohi he “fekafekau fakamoli mo e loto matala,” to logona e koe e hauhauaga mo e tūmauokafua he fakaohoohoaga he Kupu omoomoi ha Iehova. (Mata. 24:45) To lahi e fakaohooho he aga mitaki, manamanatu mitaki, mo e tuaga fakaagaaga haau. Mua atu, ko e tau mena oti ne putoia ke he fakafetuiaga haau mo e Atua to kautū ai.—Sala. 1:2, 3.

Ko e loto kua puke he fakaalofa ma e Atua to fakaohooho a koe ke fakailoa e tua haau. Ko e mena nei foki kua palepale mitaki lahi. Kua eketaha a Sophia ke manatu mo e fakaaoga e tau kupu tohi kehekehe ke futiaki mai e onoonoaga he tau tagata he fale mo e taute ai haana a gahua faka-Kerisiano he fonua ke lauia mitaki mo e fakalagalaga lahi. “He kitia e fiafia he tau tagata ke he tau kupu he Tohi Tapu kua fakahauhau lahi,” he talahau e ia.

Ko e aoga ne mua atu he fiafia ke he Kupu he Atua mogoia, ko e fakafetuiaga tata mo Iehova. Ko e fakaako Tohi Tapu kua fakamalolō a koe ke iloa e tau tuaga haana mo e loto fakaaue ke he fakaalofa, fakamokoi, mo e fakafili tonu haana. Nakai fai puhala foki kua mua atu e aoga po ke palepale mitaki. Hufia a koe ke fakaako e Kupu he Atua. He taute pihia kua fakaaoga fakamitaki e magaaho.—Sala. 19:7-11.

[Puha/Fakatino he lau 5]

TOTOU E KUPU HE ATUA: TAU FOLIAGA MO E TAU PUHALA

▪ Kamata e magaaho totou Tohi Tapu haau ke he liogi mo e hafagi e tuaga he manamanatuaga.

▪ Tokiofa e mena ne fakaako e koe.

▪ Fakatoka e tau foliaga kua maeke ke moua e koe.

▪ Kumi puhala foou ke fakamaama e tau Tohiaga Tapu.

▪ Manamanatu ke he tau tala he Tohi Tapu.

▪ Foaki fakalahi e magaaho ma e tau kupu tohi uka mo e tau fakamaamaaga i ai ke maama mitaki e koe.

▪ Kalo kehe he fakaako mafiti e vala tala.

▪ Feaki e manako lahi ma e kupu he Atua.

▪ Manamanatu fakahokulo ke he tau vala he Tohi Tapu.

[Fakatino he lau 4]

Ka totou e tala Tohi Tapu, tuku e koe a koe he tuaga pihia