“Ko e Leveki Mitaki Lahi Mahaki mo e Kapitiga Fakahele”

KO JOHN (JACK) BARR, ne fekafekau ko e matakainaga he Kau Fakatufono he Tau Fakamoli a Iehova, ne oti e fekafekauaga haana ke he lalolagi he pogipogi Faiumu ia Tesemo 4, 2010. Ne 97 e tau haana he moui. Kua fakamaama ki a ia “ko e leveki mitaki lahi mahaki mo e kapitiga fakahele.”

Ko e Matakainaga ko Jack Barr ne fanau i Aberdeen, i Sikotelani, ko e tama fakahiku he tau tama tokotolu. Ko e tau matakainaga fakauku tokoua e tau matua haana. Ne fa vagahau e Matakainaga ko Barr mo e loto fiafia hagaao ke he moui magafaoa haana he vahā tote; loto fakaaue a ia ke he fifitakiaga mitaki lahi mahaki ne fakatoka he matua taane mo e matua fifine fakahele haana ke lata mo ia.

He hoko atu a ia ke he vahā fuata mui haana, ne uka lahi mahaki e fuata ko Jack ke vagahau ke he tau tagata kehe. Ka e gahua fakalahi a ia ke kautū ke he matalekua, ti ko e taha afiafi Tapu he 1927, he 14 e tau he moui, ne fakailoa e ia ke he matua taane haana kua mautali a ia ke o mo ia ke he gahua fakamatala ke he taha fale mo e taha fale. Ko e kamataaga a ia. Tali mai he aho ia ato mate ai, ne fakatumau e Matakainaga ko Barr ke eke mo tagata fakamatala makutu he tala mitaki.

Ko e pakia kelea lahi ne teitei mate e matua fifine fakahele ha Jack, ne taute a ia ke manamanatu hokulo hagaao ke he kakano he moui, he 1929 ne tukulele e ia a ia ki a Iehova, ti fakamailoga e tukuleleaga haana he moua e ia e magaaho he 1934. He 1939, ne eke a ia mo taha he magafaoa Peteli i London, i Igilani. Ati kamata ai e fekafekauaga tumau ne hokotia ke he 71 e tau.

Ia Oketopa 29, 1960, ne taute he Matakainaga ko Barr e mena ne ui e ia “ko e fakafetuiaga uho pauaki” he mogo ne mau e ia a Mildred Willet, ko e paionia mo e misionare makutu nukua leva. Ko e Matakainaga Taane mo e Matakainaga Fifine ko Barr kua talahaua ko e hoa mau fakamooli ne fifitaki mitaki, ti fakatumau pihia a laua ato oti e fekafekauaga ha Mildred he lalolagi ia Oketopa, 2004. Ko e Matakainaga Taane mo e Matakainaga Fifine ko Barr ne totou tokoua e vala he Tohi Tapu he tau aho oti he moui nonofo tokoua ha laua.

Ma lautolu ne iloa a ia, ko e higoa Jack Barr to fakamanatu ki a lautolu e tagata ne foaki e tau fakatonuaga uho lahi—lagotatai tumau, totonu tumau, mo e mauokafua ke he Tohiaga Tapu. Ko ia ko e tagata gahua malolō mo e leveki manamanatu mo e fakaalofa ti ko e kapitiga fakamooli foki. Ko e tau talahauaga, tau lauga, mo e tau liogi haana kua fakakite e hokulo he tuaga fakaagaaga haana mo e fakafetuiaga tata haana mo Iehova.

Pete to galo e tautolu e fakahele ha tautolu ko e Matakainaga ko Barr, kua olioli a tautolu mo ia he moua e ia e mena fakaalofa he tino nakai mate—ko e lilifu ne amanaki lahi a ia ki ai mo e fa tutala hagaao ki ai. Ko e mena ia ni ne manako lahi a ia ki ai.—1 Kori. 15:53, 54.a

[Matahui Tala]