Okiokihaga he Atua—Kua Hao Atu Nakai a Koe ki Ai?
“Ko e kupu he Atua kua moui ia, mo e gahua malolo.”—HEPE. 4:12.
1. Ko e heigoa e taha puhala ka hao atu a tautolu ke he okiokihaga he Atua mogonei, ka ko e ha kua liga mukamuka lahi e mena ia ke talahau ka e uka ke taute?
KE HE vala tala fakamua, ne kitia e tautolu kua maeke ia tautolu ke hao atu ke he okiokihaga he Atua he omaoma he gahua fakatatau mo e tau finagalo haana. Liga mukamuka lahi e mena ia he talahau ka e uka ke taute. Ma e fakatai, ka iloa e tautolu kua nakai talia e Iehova e mena kua olioli e tautolu, ko e tali mua ha tautolu kua liga ke totoko. Kua fakakite he mena ia kua lata a tautolu ke fakaholo ki mua e fakatokaaga he [“mautali ke omaoma,” NW]. (Iako. 3:17) He vala tala nei, to liu fakatutala a tautolu ke he falu faahi kua makai a tautolu ke felauaki mo e finagalo he Atua—ke omaoma mai he loto—ne kua kamatamata ai.
2, 3. Ko e heigoa e tau laliaga kua lata ia tautolu ke matutaki ke taute ke maeke ke fakatumau e tuaga manako ki ai mai he onoonoaga a Iehova?
2 Fēfē a koe he talia e fakatonuaga ne fakavē ke he Tohi Tapu? Kua tala mai he Tohi Tapu ki a tautolu ko e finagalo he Atua ke fakapotopoto ki a ia e “tau mena kua manako ki ai e tau motu oti.” (Hakai 2:7) Mooli, laulahi ia tautolu ne mamao he tuaga manako ki ai he mogo ne fakaako fakamua e tautolu e kupu mooli. Ka ko e fakaalofa ma e Atua mo e haana a Tama fakahele ne fakalagalaga a tautolu ke taute e tau hikiaga lalahi he tau mahani mo e tau aga ha tautolu ke maeke ke fakafiafia katoatoa e Atua. Fakahiku ai, he mole e tau liogi loga mo e tau laliaga ha tautolu, kua hoko mai e aho fiafia he mogo ne maeke ia tautolu ke foaki a tautolu ke he papatisoaga faka-Kerisiano.—Totou Kolose 1:9, 10.
3 Ka ko e taufetului ke he nakai mitaki katoatoa kua nakai oti he ha tautolu a papatisoaga. To taufetului tumau ni a tautolu ha kua nakai mitaki katoatoa. Ka e fakamalolō mooli ki a tautolu kaeke ke fakatumau a tautolu ke taufetului mo e eketaha ke manako lahi ki ai he onoonoaga he Atua, to fakamonuina e Iehova e tau laliaga ha tautolu.
Magaaho kua Lata e Fakatonuaga
4. He puhala tolu fe kua liga moua e tautolu e fakatonuaga faka-Tohi Tapu?
4 Ato kamata e tutala ha tautolu hagaao ke he tau nakai mitaki katoatoa ha tautolu, kua lata ia tautolu ke iloa ai. Ko e lauga kumikumi ke he loto, he Fale he Kautu po ke vala tala fakalagalaga manatu he taha he tau tohi ha tautolu ka fakakite e hehē kelea lahi mahaki. He taha faahi, ka nakai maama e tautolu e manatu ka fakakite mai he lauga po ke kaumahala ke fakagahua fakatagata ai e fakatonuaga ne tohia, ne liga fakaaoga e Iehova e matakainaga Kerisiano ke mailoga e tautolu e tau kūkū ha tautolu.—Totou Kalatia 6:1.
5. Talahau falu puhala nakai manako ne liga taute e tautolu ke he fakatonuaga ne foaki, ti fakamaama e kakano ne lata e tau leveki mamoe Kerisiano ke lali eketaha a lautolu ke lagomatai a tautolu.
5 Nakai mukamuka ke talia e fakatonuaga mai he tagata nakai mitaki katoatoa, pete kua fakakite e fakatonuaga ke he puhala lotomatala mo e fakaalofa. Ka e, fakakite he Kalatia 6:1, kua poaki a Iehova ki a lautolu ne lotomatala fakaagaaga ke ‘lali ke liuaki mai’ ke maeke a tautolu ke hiki, he taute pihia mo e “loto he mahani molu.” Ka talia fiafia e tautolu, to manako lahi foki a tautolu ki mua he fofoga he Atua. Ke he lahi ai, ka liogi a tautolu, to atāina a tautolu ke talahau kua nakai mitaki katoatoa a tautolu. Ka e, ka fai tagata ka fakakite e hehē ki a tautolu, ko e hihiga ke lali ke talahau tututonu a tautolu ni, fakatote e lekua, hūhū toko e logonaaga he tagata fakatonutonu, po ke totoko e puhala ne talahau aki e fakatonuaga. (2 Patu. 5:11) Ti ka lauia e fakatonuaga ke he vala taputelegia pauaki—ko e tau gahua he tau tagata he magafaoa, ko e tau tapulu mo e tau tauteuteaga, ko e mahani meā fakatagata, po ke puhala fakafiafia kua olioli e tautolu ka e vihiatia e Iehova—to liga tali fakakelea a tautolu, ke he ofogia ni ha tautolu mo e pihia foki ke he ha tautolu a tagata fakatonutonu! Ka e mole e totoka hifo ha tautolu, ne fa mailoga e tautolu kua latatonu e fakatonuaga.
6. Fakakite fēfē he kupu he Atua e “tau manatu mo e tau fakafiliaga he tau loto”?
6 Ko e tau kupu he fakatino he vala tala nei ne fakamanatu ki a tautolu kua “gahua malolo” e kupu he Atua. E, ko e kupu he Atua kua gahua malolo ke hiki e tau momoui. Lauia mitaki foki he lagomatai a tautolu ke taute e tau hikiaga kua lata he mole e papatiso ha tautolu tuga ni fakamua ato taute e tautolu e lakaaga ia. He tohi haana ke he tau Heperu, ne tohi foki e Paulo e kupu he Atua “kua matila fakafahiua, kua tuina foki ato vevehe tuai ai e loto mo e agaga, ko e tau fatia mo e tau uho hui, kua fakafili foki e tau manatu mo e tau fakafiliaga he tau loto.” (Hepe. 4:12) Ke he falu kupu, ka maama mitaki e tautolu e finagalo he Atua ma tautolu, ko e puhala kua tali atu a tautolu ke he tau mena ia ne fakakite e mena ne toka he tau fatuakiloto ha tautolu. Fai kehekeheaga kia he falu mogo ke he kitiaaga ha tautolu ke he kili i fafo mo e ki loto ha tautolu? (Totou Mataio 23:27, 28.) Manamanatu ke he puhala ka tali atu a koe ke he tau tuaga nā.
Fakalagotatai Tumau mo e Fakatokatokaaga a Iehova
7, 8. (a) Ko e heigoa ka omoomoi e falu Kerisiano Iutaia ke pipiki mau ke he falu gahua he Fakatufono faka-Mose? (e) Lautatai fēfē e tau laliaga ha lautolu mo e finagalo a Iehova hane holo ki mua?
7 Tokologa ia tautolu ka talahau manatu e Tau Fakatai 4:18: “Ko e puhala he tau tagata tututonu, kua lata ia mo e maama he aho, kua tupu tolomaki atu hana maama ke hoko ke he tupoula.” Kakano e mena ia ko e mahani mo e maama ha tautolu ke he tau finagalo he Atua to tupu fakahaga ai.
8 He fakatutala a tautolu he vala tala fakamua, ne mole e mate a Iesu ti uka e tokologa he tau Kerisiano Iutaia ke vevehe kehe mai he Fakatufono faka-Mose. (Gahua 21:20) Pete he totoko fakailoilo e Paulo ne nakai ha ha i ai e tau Kerisiano i lalo he Fakatufono, falu ne tiaki e tau fakamaamaaga omoomoi. (Kolo. 2:13-15) Liga logona hifo e lautolu ka fakatumau a lautolu ke fakamanatu e tau vala he Fakatufono, to hao a lautolu mai he favaleaga. He ha puhala ni, ne tohi a Paulo ke he tau Kerisiano Heperu mo e tala age fakatonu ki a lautolu kua nakai hao atu a lautolu ke he okiokihaga he Atua ka nakai talia e lautolu ke gahua fakatatau mo e Haana finagalo hane fakamooli.a (Hepe. 4:1, 2, 6; totou Heperu 4:11.) Ke moua e taliaaga a Iehova, to fehagai a lautolu mo e mena mooli kua takitaki e ia e tau tagata haana he puhala kehe.
9. Ko e heigoa e aga kua lata ke moua e tautolu ka taute e tau hikiaga ha tautolu ke he maamaaga he tau mena faka-Tohi Tapu?
9 He tau vahā foou, ha ha i ai e tau hakahakaaga ke he maama ha tautolu he falu fakaakoaga he Tohi Tapu. Nakai lata e mena nei ke fakatupetupe a tautolu; kua lata ai ke fakamalolō e mauokafua ha tautolu ke he vahega fakamoli mo e loto matala. Ka mailoga he tau tagata ne hukui e “fekafekau” ko e onoonoaga ha tautolu ke he falu manatu he kupu mooli kua lata ke fakahako po ke fakatonu, kua nakai mataofi a lautolu he taute e hikihikiaga. Kua fiafia pauaki e vahega fekafekau he kaufakalataha mo e finagalo he Atua hane fakamooli ka e nakai he puipui mai ai he tuhituhi ke he maamaaga ne hiki. Fēfē e tali atu haau ka fakakite e hikiaga he maamaaga ha tautolu ke he tau Tohiaga Tapu?—Totou Luka 5:39.
10, 11. Ko e heigoa e tau fakaakoaga ka fakaako mai he tali he falu ke he tau puhala foou he fakamatala e tala mitaki?
10 Fakatutala foki la tautolu ke he taha fakataiaga. He matahiku he senetenari 19 aki mo e mataulu he senetenari 20 aki, ko e falu Tagata Fakaako Tohi Tapu ne eke mo tau tagata lauga mitaki lahi mahaki ne logona hifo kua lata ia lautolu ke taute e poakiaga ke fakamatala he fakatoka mai e tau lauga kua tauteute fakamitaki ke he toloaga loto fakaaue. Ne fiafia a lautolu he lauga ke he tau tagata, ti ko e falu ia lautolu ne moua e talahauaga mafanatia mai he tau tagata fanogonogo. Pete ia, kua kitia ai fakamui kua manako a Iehova ke he tau tagata haana ke lavelave he tau puhala kehekehe he fakamatala, putoia e gahua he taha fale ke he taha fale. Ko e falu tagata lauga lotomatala ne nakai talia ke lali ke taute e mena foou. He ono atu i fafo, kua tuga e tau tagata taane fakaagaaga a lautolu nukua tapuaki katoatoa ke he Iki. Ka ko e mogo ne fehagai mo e fakamooliaga maaliali he finagalo he Atua hagaao ke he gahua fakamatala, ko e ha lautolu a tau manatu, tau fatuakiloto, mo e tau logonaaga mooli kua kitia ai. Fēfē e logonaaga a Iehova ki a lautolu? Nakai fakamonuina e ia a lautolu. Ne o kehe a lautolu he fakatokatokaaga.—Mata. 10:1-6; Gahua 5:42; 20:20.
11 Nakai pehē ai kua mukamuka ma lautolu kua fakamooli tumau ke he fakatokatokaaga ke fakamatala ke he tau tagata. Tokologa ne logona e uka he gahua, mua atu he kamataaga. Ka kua omaoma a lautolu. Nakai leva, ne kautū a lautolu ke he ha lautolu a fakaatukehe, ti fakamonuina lahi e Iehova a lautolu. Fēfē e tali atu haau ka uiina a koe ke he falu puhala he gahua fakamatala ne tokotoko mitaki ke he tuaga haau mogonei? Makai nakai a koe ke lali ke he taha puhala foou?
Ka Toka he Tagata ne Ofania e Tautolu a Iehova
12, 13. (a) Ko e heigoa e finagalo a Iehova he tuku ki tua e tau tagata mahani kelea ne nakai fakatokihala? (e) Ko e heigoa e kamatamata ne fehagai mo e falu matua Kerisiano, ti ko e heigoa ati uka lahi e kamatamata?
12 Kua talia mooli e tautolu oti e matapatu fakaakoaga na lata ia tautolu ke meā fakatino, ke he tau mahani, mo e fakaagaaga ke maeke ke fakafiafia e Atua. (Totou Tito 2:14.) Ka e fai magaaho ka kamatamata lahi e mahani fakamooli ha tautolu ke he vala nei he finagalo he Atua. Ma e fakatai, liga kua toka he tama taane fuataha he hoa Kerisiano fifitaki mitaki e kupu mooli. He “fiafia ke he hala kua mole vave” ke he fakafetuiaga fakatagata mo Iehova mo e tau matua faka-Atua haana, ne tuku ki tua e tama taane fuata.—Hepe. 11:25.
13 Ne fakamamahi lahi ke he tau matua! He matakupu ke he tuku ki tua, kua iloa mooli e laua kua pehē e Tohi Tapu ke ‘aua neke feoaki mo e taha ne talahaua ko e matakainaga ko ia ko e feuaki, po ke velevelemena, po ke hufeilo ke he tau tupua, po ke tagata vagahau kelea, po ke konahia, po ke fofo mena, aua foki neke kai mena fakalataha mo e tagata pihia.’ (1 Kori. 5:11, 13) Mailoga foki e laua ko e kupu “taha” po ke ko ia, he kupu tohi nei ne putoia ai e tau tagata he magafaoa ne nakai nonofo he kaina taha mo laua. Ka e ofania lahi mahaki e laua e tama ha laua! Ko e tau logonaaga malolō kua liga fakatupu a laua ke talahau: ‘Liga lagomatai fēfē e taua e tama taane ha taua ke liu mai ki a Iehova ka fakakaupā ni e fakalataha ha taua mo ia? Nakai kia lahi e mena ka taute e taua he fakatumau e matutakiaga mo ia?’b
14, 15. Ko e heigoa e fifiliaga mooli kua lata ke taute he tau matua ne tuku ki tua e tau fanau?
14 Kua momoko lahi a tautolu ke he tau mamatua ia. Ka e mole ia, ko e fifiliaga he tama ha laua, ti fifili a ia ke matutaki ke he mahani kelea ka e nakai matutaki ke olioli e feoakiaga tata mo e tau matua haana mo e falu matakainaga Kerisiano. He taha faahi, ne nakai fai talahauaga e tau matua ki ai. Ko e mena ia ati nakai maeke ia laua ke taute ha mena!
15 Ka ko e heigoa he tau matua fakahele ia ka taute? To omaoma nakai a laua ke he takitakiaga maaliali a Iehova? Po ke fifili ni a laua ke fakalataha tumau mo e tama tuku ki tua ha laua mo e talahau ai ko e “tau fakatokaaga fakamagafaoa kua lata”? He taute e fifiliaga ha laua, kua nakai lata ia laua ke kaumahala ke manamanatu ke he logonaaga a Iehova ke he mena kua taute e laua. Ko e finagalo haana ke fakatumau e meā he fakatokatokaaga ti ka maeke, ke omoomoi e tau tagata mahani hehē ke matala e tau manamanatuaga ha laua. Maeke fēfē e tau matua Kerisiano ke lalago e finagalo ia?
16, 17. Ko e heigoa ka fakaako e tautolu he manamanatu fakahokulo ke he fifitakiaga a Arona?
16 Ko e matakainaga ha Mose ko Arona ne fehagai mo e tuaga uka hagaao ke he tau tama taane tokoua haana. Manamanatu la ke he logonaaga haana he mogo ne taute he tau tama taane haana ko Natapu mo Avia e afi kehe ki a Iehova ti tamate e Ia a laua. Mooli, ne fakaoti he mena ia e feoakiaga he tau tagata taane tokoua ia mo e tau matua ha laua. Ka e fai mena foki. Ne hataki e Iehova a Arona mo e tau tama taane mahani fakamooli haana: “Aua neke toka kehe ha mutolu a tau potiki, ti aua neke hēhē ha mutolu a tau tapulu [he maanu] neke mamate a mutolu, neke hoko mai foki e ita [a Iehova] ke he fakapotopotoaga katoa.” (Levi. 10:1-6) Maaliali e ogo. Kua lata ke mua atu e malolō e fakaalofa ha tautolu ki a Iehova he fakaalofa ha tautolu ke he tau tagata nakai mahani fakamooli he magafaoa.
17 He vahā nei, ne nakai tamate mafiti e Iehova a lautolu kua moumou e tau fakatufono haana. Kua age fakaalofa e ia ki a lautolu e magaaho ke fakatokihala he tau gahua nakai tututonu ha lautolu. Ka e fēfē e logonaaga a Iehova kaeke ke kamatamata tumau he tau matua he tagata taute mahani hehē ne nakai fakatokihala ki a Ia he feoaki nakai lata mo e tama taane po ke tama fifine tuku ki tua ha laua?
18, 19. Ko e heigoa e tau monuina ka gahua fakalataha e tau tagata he magafaoa mo e tau fakatonuaga a Iehova hagaao ki a lautolu ne tuku ki tua?
18 Tokologa ne tuku ki tua he taha magaaho ne talahau fakamooli mogonei ko e tumauokafua he tau kapitiga mo e tau tagata he magafaoa ha lautolu ne lagomatai a lautolu ke matala e tau manamanatuaga. He moua e fakaatā ke liu talia e taha fifine fuata, kua tohi he tau motua na fakameā e ia e moui haana “ha kua fakalilifu foki he tugaane haana e fakatokaaga tuku ki tua.” Pehē a ia ko e “haana a pipiki mau ke he tau takitakiaga faka-Tohi Tapu kua lagomatai ki a ia ke manako ke liu mai.”
19 Ko e heigoa e fakahikuaga kua lata ke moua e tautolu? Lata ia tautolu ke tau atu ke he tau loto nakai mitaki katoatoa ha tautolu ke totoko e fakatonuaga faka-Tohi Tapu. Kua lata ia tautolu ke mauokafua katoatoa ko e puhala he Atua ke fehagai mo e tau lekua ha tautolu kua mitaki lahi tumau.
“Ko e Kupu he Atua kua Moui”
20. Ko e heigoa e tau puhala ua ka fakagahua e Heperu 4:12? (Kikite e matahui tala.)
20 He tohi e Paulo “ko e kupu he Atua kua moui,” kua nakai hagaao pauaki a ia ke he Kupu tohia he Atua ko e Tohi Tapu.c Kua fakakite he vala tala kua hagaao a ia ke he maveheaga he kupu he Atua. Ko e manatu ha Paulo kua nakai taute he Atua e maveheaga ti nimo ai. Fakatū e Iehova e mena nei puhala he perofeta ko Isaia: “Haku a kupu . . . nakai liu noa mai a ia kia au . . . to monuina foki ia ke he mena ne fakafano atu ai e au.” (Isaia 55:11) Ti nakai lata ke ohooho a tautolu ka nakai holo mafiti ki mua e tau mena nukua manako a tautolu ki ai. Ko Iehova kua ‘gahua agaia’ mo e manatu ke tamai e finagalo haana ke he kautūaga.—Ioane 5:17.
21. Maeke fēfē e Heperu 4:12 ke fakamalolō ke he tau tagata momotua fakamooli he “moto tagata tokologa”?
21 Ko e tau tagata momotua fakamooli he “moto tagata tokologa” ne fekafekau ki a Iehova ke he tau tau loga. (Fakakite. 7:9) Nakai amanaki e tokologa ke fuakau he fakatokaaga nei. Ka e nakai mahala a lautolu ke he fakaloleloleaga. (Sala. 92:14) Mailoga e lautolu kua nakai matetula e maveheaga he kupu he Atua—kua moui ai, ti hane gahua atu a Iehova ke fakamooli ai. Ha kua ofania he Atua e finagalo Haana, kua tamai e tautolu e fiafia ki a ia ka eketaha a tautolu ke tokaloto ai. He aho nei ke fituaki, nukua okioki a Iehova, ti mauokafua to fakamooli he matakau he tau tagata haana e finagalo haana mo e to lalago ai. Ka e kua a koe? Kua hao atu nakai a koe ke he okiokihaga he Atua?
[Tau Matahui Tala]
a Tokologa e takitaki he tau Iutaia ne fakamanatu fakamatafeiga e Fakatufono faka-Mose, ka ko e mogo ne hau e Mesia, ne kaumahala a lautolu ke mailoga a ia. Ne nakai fakatatau a lautolu mo e finagalo he Atua hane holo ki mua.
b Kikite e “Keep Yourselves in God’s Love,” lau 207-209.
c He vahā nei kua vagahau e Atua ki a tautolu he puhala he Kupu tohia haana ne ha ha ai e malolo ke hufia e tau momoui ha tautolu. Ti fakalaulahi atu, ko e tau kupu ha Paulo ne fakamau ia Heperu 4:12 ka hagaao fakamitaki ke he Tohi Tapu.
Ua Galo e Kakano
• Ko e heigoa kua lata ke maeke ia tautolu ke hao atu ke he okiokihaga he Atua mogonei?
• Ko e heigoa e matutakiaga he finagalo he Atua mo e makai ha tautolu ke talia e fakatonuaga faka-Tohi Tapu?
• Ko e heigoa e tau vala ne liga uka e omaoma ke he takitakiaga he Tohi Tapu, ka ko e ha kua latatonu ia tautolu ke omaoma?
• Ko e heigoa e tau puhala ua ka fakagahua e Heperu 4:12?
[Fakatino he lau 31]
Ne fakamamahi lahi ke he tau matua!