Fakakite e Fakamoli Faka-Kerisiano ka Tuku ki Tua e Tagata he Magafaoa
1. Ko e heigoa e tuaga kua kamatamata e fakamoli he Kerisiano?
1 Ko e pipiaga he vahaloto he tau tagata he magafaoa kua maeke ke malolo lahi. Kua kamatamata e mena nei ke he Kerisiano ka tuku ki tua po ke vevehe kehe e hoa mau, tama, matua, po ke taha tagata tata he magafaoa mai he fakapotopotoaga. (Mata. 10:37) Fefe e puhala ka taute aki he Kerisiano fakamoli a ia nai? Taute fakakehe kia a ia ka nofo he kaina hau? Fakamua, o mai la ke fakamanatu e talahauaga he Tohi Tapu ke he matakupu nei, ko e matapatu fakaakoaga nukua tatai ki a lautolu ne tuku ki tua mo lautolu ne vevehe kehe ne lautolu a lautolu.
2. Hagaao ke he Tohi Tapu, taute fefe he tau Kerisiano a lautolu ne tuku kehe mai he fakapotopotoaga?
2 Taute Fefe a Lautolu ne Tuku Kehe: Kua hataki he Kupu he Atua e tau Kerisiano ke nakai fio po ke feoaki mo e tagata ne tuku kehe mai he fakapotopotoaga: “Kaeke kua talahaua taha ko e matakainaga, ka ko ia ko e feuaki, po ke velevelemena, po ke hufeilo ke he tau tupua, po ke tagata vagahau kelea, po ke konahia, po ke fofo mena, aua neke feoaki, aua foki neke kai mena fakalataha mo e tagata pihia. . . . Kia tuku kehe e mutolu e tagata mahani kelea nā ia mutolu.” (1 Kori. 5:11, 13) Ne aoga foki e manatu he tau kupu ha Iesu ne fakamau he tohi ha Iesu ia Mataio 18:17: “Kia eke [e tagata ne tuku kehe] kia koe ke tuga e tagata kehe po ke telona.” Ne iloa mitaki he tau tagata fakateliga ha Iesu ko e mena nakai fakagofua e tau Iutaia he vaha ia ke lafi mo e tau Tagata Motu Kehe ti ko e mena ia ne vevehe kehe a lautolu he tau telona. Ati hataki ai e Iesu hana tau tutaki ke nakai fio mo lautolu ne tuku kehe.—Kikite The Watchtower ia Sepetema 15, 1981, lau 18-20.
3, 4. Ko e faga feoaki fefe mo e tau tagata tuku ki tua mo e vevehe kehe ne nakai fakagofua?
3 Kakano e mena nei kua nakai fai feoakiaga fakaagaga e tau Kerisiano fakamoli mo lautolu ne tuku kehe mai he fakapotopotoaga. Ka e lahi atu e mena kua putoia ai. Kua talahau mai he Kupu he Atua “aua foki neke kai mena fakalataha mo e tagata pihia.” (1 Kori. 5:11) Ti, aua foki neke fiafia fakalataha mo e tagata tuku kehe. To nakai lata ke fakalataha mai foki a ia ke o ke pikiniki, fiafiaaga, pele polo, po ke o ke fakatau, po ke kifaga po ke kai auloa i kaina po ke he fale kai.
4 Ka e kua e tutala ke he tagata tuku ki tua? Pete ni e nakai totoku katoa he Tohi Tapu e tau tutuaga takitaha, kua lagomatai he 2 Ioane 10 a tautolu ke iloa e onoonoaga ha Iehova ke he tau mena nei: “Kaeke kua fina age kia mutolu taha, ka e nakai ta age e kupu nai, aua neke talia a ia ke he fale ha mutolu, aua foki neke tala age a mutolu kia monuina.” He talahau ke he mena nei, pehe The Watchtower ia Sepetema 15, 1981, lau 25: “Ko e ui ‘Fakaalofa atu’ ke he taha tagata kua eke mo lakaaga fakamua ke fakalaga e fakatutalaaga mo e liga fakakapitiga foki. To manako nakai a tautolu ke taute e lakaaga fakamua mo e tagata tuku ki tua?”
5. Ka tuku ki tua, ko e heigoa he tagata kua fakagalo?
5 Moli, tuga ni he talahau he lau 31 he fufuta taha ia he The Watchtower: “Ka hihiga atu e Kerisiano ke he agahala ti kua lata ke tuku ki tua, kua fakagalo tuai e ia: hana tuaga talia mo e Atua; . . . feoakiaga fulufuluola mo e tau matakainaga, lauia lahi e fioaga hana mo e tau magafaoa Kerisiano.”
6. Kua lata kia he Kerisiano ke vevehe kehe katoatoa mai he tau fioaga oti mo e tagata ne tuku ki tua he magafaoa taha mo e nonofo he fale taha? Fakamaama.
6 Nonofo Auloa he Kaina Taha: Kakano kia e mena ia ko e tau Kerisiano ne nonofo he kaina taha mo e tagata he magafaoa ne tuku ki tua kua nakai tutala ki ai, kai auloa, mo e fio mo ia ti pihia foki ke he tau matagahua ha lautolu he tau aho takitaha? Kua talahau he Ko e Kolo Toko ia Me 1, 1991, he matahui tala he lau 16: “Kaeke kua ha i ai he kaina Kerisiano e taha he faoa kua fakaoti e fakalatahaaga, ka e tumau agaia ni a ia ko e taha he kaina tuga fa mahani, ke he tau fakafehagaiaaga mo e tau gahua he tau aho takitaha.” Fifili ni he tau tagata he magafaoa e laulahi he fakalatahaaga hana ne tuku ki tua ke he ha lautolu a kaiaga po ke taute ke he falu matagahua fakakaina he tau aho takitaha. He magaaho taha, kia nakai manako a lautolu ke fakakite ke he tau matakainaga ne feoaki mo lautolu e manatu na tatai agaia ni e tau mena oti tuga fakamua ato tuku a ia ki tua.
7. Hiki fefe e feoakiaga fakaagaga he kaina ka tuku ki tua e tagata he magafaoa?
7 Pete ia, kua tuhi mai he The Watchtower ia Sepetema 15, 1981, lau 28, hagaao ke he tau tagata tuku ki tua po ke vevehe kehe: “Ko e tau matutakiaga fakaagaga fakamua nukua toka kehe katoatoa. Hagaao pihia foki e mena nei ke he tau magafaoa tata hana, putoia foki e magafaoa hana he kaina. . . . To kakano ai e mena ia ke hikihiki e feoakiaga fakaagaga ne ha ha ai he kaina. Ma e fakatai, ka tuku ki tua e tane, to nakai hagahaga mitaki ke he hana hoana mo e fanau ke taute e ia e fakaako Tohi Tapu he magafaoa po ke takitaki e totouaga he Tohi Tapu mo e liogi. Ka manako a ia ke taute e liogi, tuga ke he magaaho kai, ha ha ia ia e tonuhia ke taute ai he hana ni a kaina. Ka e maeke ke igatia e tau tagata he magafaoa ke talahau fakatekiteki ni e lautolu ha lautolu a liogi ke he Atua. (Fakatai 28:9; Sala. 119:145, 146) Ka e kua ka manako e tagata tuku ki tua i loto he kaina ke totou auloa mo e magafaoa e Tohi Tapu po ke fakaako Tohi Tapu? Liga fakaata he falu a ia ke fakalataha ke fanogonogo kaeke ke nakai lali a ia ke fakaako a lautolu po ke fai vala he tau manatu fakalotu.”
8. Ko e heigoa e matagahua he tau matua Kerisiano ke he tama ne tuku ki tua nukua nofo he kaina?
8 Kaeke ko e tama ne nofo he kaina kua tuku ki tua, kua lago agaia ke he tau mamatua Kerisiano ke leveki e feakiaga hana. Kua talahau he The Watchtower ia Novema 15, 1988, lau 20: “Tuga ni he fakatumau a laua ke fagai, fakatui, mo e fakamalu a ia, kua lata ia laua ke fakaako mo e akonaki a ia fakatatau ke he Kupu he Atua. (Tau Fakatai 6:20-22; 29:17) Maeke he tau matua fakaalofa ke fakatoka ke fai fakaako Tohi Tapu mo ia he kaina, pete ni kua tuku ki tua a ia. Liga to moua e ia e aoga lahi he fakahakoaga mai he fakaako a laua ni mo ia tokotaha. Po ke fifili a laua ke matutaki a ia ke fakalataha mo e fakatokaaga he fakaako fakamagafaoa.”—Kikite foki Ko e Kolo Toko ia Oketopa 1, 2001, lau 27-28.
9. Laulahi fefe e matutakiaga he Kerisiano mo e tagata he magafaoa ne tuku ki tua ti kua nofo kehe mai he kaina?
9 Tagata he Magafaoa ne Nakai Nofo he Kaina: “Kehe e tuaga kaeke ke nakai nofo e tagata he magafaoa ne tuku ki tua po ke tagata vevehe kehe he kaina,” he talahau he The Watchtower ia Aperila 15, 1988, lau 28. “Liga teitei ni ke nakai fai matutakiaga mo e magafaoa. Pete foki ka fai matakupu fakamagafaoa kua lata ke matutaki atu ki ai, kia fai fakakaupaaga e mena nei,” ke felauaki mo e poakiaga faka-Atua ke ‘aua neke feoaki mo ia’ kua kelea ha ko e agahala nakai fakatokihala. (1 Kori. 5:11) Kia lali e tau Kerisiano fakamoli ke nakai fio fakahanoa mo e magafaoa pihia, mo e fakakaupa katoatoa e fakafetuiaga fakapisinisi mo ia.—Kikite foki The Watchtower ia Sepetema 15, 1981, lau 29-30.
10, 11. Ko e heigoa ka manamanatu e Kerisiano ki ai ato talia mai e tagata tuku ki tua ke he kaina?
10 Ne fakatonu mai foki he Watchtower taha tuaga ka maeke ke tupu: “Ka e kua kaeke ko e magafaoa tata, tuga e tama tane po ke matua ne nakai nofo he kaina, kua tuku ki tua ti manako ke liu mai ki kaina? Maeke he magafaoa ke fifili e mena ke taute he falanaki ke he tuaga. Ma e fakatai, kua liga gagao e matua tuku ki tua po ke nakai maeke ke leveki ne ia a ia fakatupe po ke fakatino. Ha ha he tau fanau Kerisiano e kotofaaga faka-Tohi Tapu ke lagomatai ai. (1 Timo. 5:8) . . . Ko e mena taute nukua falanaki ni ke he tau manako moli he matua, hana aga mo e manamanatu ke he tuaga he ulu he kaina ke lata mo e tuaga fakaagaga he magafaoa.”—The Watchtower ia Sepetema 15, 1981, lau 28-9.
11 Ke lata mo e tama, kua matutaki atu e vala tala taha nei: “Falu magaaho na talia he tau matua Kerisiano a ia ko e tama ne tuku ki tua ke liu fakaku ki kaina ha kua gagao fakatino po ke fakaagitau ai. Ka e he ha tuaga ni, kua lata he tau matua ke filifilia e tau tuaga he tama. Na nofo tokotaha kia e tama tane tuku ki tua, ti kua nakai maeke ia ia ke nofo tokotaha mogonei? Po ke manako a ia ke liu mai kakano ni ke fakamukamuka e moui? Ka e kua hana tau mahani mo e aga? To tamai kia e ia e ‘fakaea’ ke he kaina?—Kala. 5:9.”
12. Ko e heigoa falu fua mitaki ke he fakatokaaga tuku ki tua?
12 Tau Aoga he Fakamoli ki a Iehova: He kaufakalataha mo e fakatokaaga faka-Tohiaga Tapu ke tuku ki tua mo e fakamamao mai he tau tagata mahani kelea ne nakai fakatokihala kua aoga lahi. Kua fakahao e mea he fakapotopotoaga mo e fakakehe a tautolu ko e tau tagata toto mau he tau poakiaga tokoluga he Tohi Tapu ke he mahani. (1 Pete. 1:14-16) Kua puipui a tautolu mai he tau fakaohoohoaga kolokolovao. (Kala. 5:7-9) Kua foaki foki e magaaho ke he tagata mahani kelea ke aoga katoatoa mai he akonakiaga kua foaki, nukua maeke ke lagomatai a ia ke fua mai e “fua he tututonu ke monuina ai.”—Hepe. 12:11.
13. Ko e heigoa e hikihikiaga ne taute he taha magafaoa, ti ko e heigoa e fua?
13 He mole atu e logona he lauga he toloaga he takaiaga, ko e tugaane mo e mahakitaga ke he tino ne mailoga nukua lata ia laua ke taute e tau hikihikiaga ke he puhala ke fehagai mo e matua fifine ha laua, ne nofo kehe mo e kua ono ia e tau he tuku ki tua. He mole atu agataha e toloaga, ne vilo e tama tane ke he matua fifine hana, mo e oti e tala age ki a ia e fakaalofa ha laua, ne fakamaama e ia kua nakai maeke ia laua ke liu tutala atu ki a ia ato fai mena aoga he magafaoa kua lata ato matuaki ai. Nakai leva, ne kamata e matua fifine hana ke finatu ke he tau feleveiaaga mo e fakahiku ai liu talia mai. Ti kamata foki hana a tane nakai tua ke fakaako ti nakai leva mo e papatiso.
14. Ko e ha kua lata ke lalago fakamoli e tautolu e fakaholoaga tuku ki tua?
14 Ko e muitua fakamoli ke he fakaholaga tuku ki tua ne fakatoka mai he tau Tohiaga Tapu kua fakakite aki e fakaalofa ha tautolu ma Iehova mo e foaki e tali ki a ia ne fai fi atu ki a Ia. (Fakatai 27:11) Hiku ai, maeke ia tautolu ke iloa moli e fakamonuinaaga ha Iehova. Ne tohi he Patuiki ko Tavita hagaao ki a Iehova: “Nakai tuku kehe foki ia au hana tau fakatufono. Kua mahani [“fakamoli,” NW] a koe kia ia kua [“fakamoli,” NW].”—2 Samu. 22:23, 26.