TAU HŪHŪ HE TAU TAGATA TOTOU

Latatonu nakai he tau matua Kerisiano ke nonofo mo e tama tuku ki tua he tau feleveiaaga he fakapotopotoaga?

Nakai fai kakano ke tupetupe lahi ke he mena ke nofo ai e tagata tuku ki tua he Fale he Kautu. Kua lali fakalahi e mekasini nei ke fakamalolō e tau matua Kerisiano ke foaki e lagomataiaga fakaagaaga ke he tama tuku ki tua ha laua ne nofo agaia i kaina kaeke kua lata. He fakakite he fufuta he The Watchtower, ia Novema 15, 1988, lau 19 mo e 20, maeke he tau matua ke fakaako e Tohi Tapu mo e tama ne haia agaia i lalo he levekiaga ha laua ne nofo agaia mo laua. Amanaki ai to moua he tama e fakamalolōaga kua lata ke fakahako aki e puhala haana.a

Ka hagaao ke he fakatokaaga he mena ke nofo ai he Fale he Kautu, liga kua tonu ke he tama tuku ki tua ke nofo fakatekiteki foki mo e tau matua haana. Ha kua nakai lata he tagata tuku ki tua ke nofo i tua he Fale he Kautu, kua lata ke nakai totoko ka nofo e tama tuku ki tua he tapa he tau matua haana, ke he ha mena ne nonofo a laua. He leveki fakaagaaga he tau matua e tama ha laua, to manako mooli a laua ke mailoga kua lahi e mena ne moua e ia mai he tau feleveiaaga. He nofo e tama mo laua ka e nakai toka tokotaha a ia he taha mena ka lagomatai ke he puhala nei.

Ka e kua ka nakai nofo e tama tuku ki tua mo e tau matua haana? To kehe kia e tuaga nei? He tau magaaho kua mole, ne talahau fakamahino he mekasini nei e aga tonu kua lata e Kerisiano ke fakatumau ka lauia e feoakiaga mo e magafaoa tuku ki tua ne nakai nofo i kaina.b Pete ia, ko e tuaga he tagata tuku ki tua ke nofo fakatekiteki he nofoa tata ke he tau magafaoa haana ke he magaaho he feleveiaaga kua kehe mamao mai he tuaga he tau magafaoa he kumi magaaho pauaki ke lafi mo ia. Ka ha ha he tau tagata tua fakamooli he magafaoa e aga hako ke he tagata tuku ki tua ha lautolu ti kua lali a lautolu ke fakalilifu e fakatonuaga he Tohi Tapu hagaao ke he feoakiaga mo ia, kua nakai lata ke manamanatu lahi ki ai.​—1 Kori. 5:11, 13; 2 Ioa. 11.

Ka nofo e tagata tuku ki tua he tapa he taha he magafaoa po ke tapa he falu he fakapotopotoaga kua nakai lata ke manamanatu lahi ki ai kaeke kua nofo fakatekiteki a ia. Ko e pāpā maō ke he nofoaga he tagata ka fakatupu e tau lekua kehekehe, fakavē ke he tau tutūaga. Ka ha ha i ai oti, putoia e tau magafaoa tua fakamooli, kua eketaha ke fakalilifu e tau matapatu fakaakoaga he Tohi Tapu hagaao ke he tuku ki tua, ti nakai eke mo mena fakatupetupe ke he tau matakainaga, kua nakai lata ke eke mo matalekua e mena ke nonofo ai a lautolu kua o atu ke he tau feleveiaaga Kerisiano.c