Fifitaki e Fakaalofa Hofihofi he Atua he Vaha Nei

“Fakamolemole, kia veveli atu a taua, ki loto he lima ha Iehova, ha kua loga lahi hana tau fakaalofa hofihofi.”—2 SAMUELA 24:14, “NW.”

1. Fefe e manatu ha Tavita ke he fakaalofa hofihofi he Atua, mo e ko e ha?

NE ILOA he Patuiki ko Tavita mai he manamanatuaga kua mua atu e fakaalofa hofihofi ha Iehova mai he tau tagata. Mafanatia lahi ha ko e tau puhala, po ke tau hala he Atua kua mua atu he mitaki, ne manako a Tavita ke iloa Hana tau puhala mo e, ke fano he Hana a kupu moli. (1 Nofoaga he Tau Patuiki 21:13; Salamo 25:4, 5) Logona nakai e koe tuga ne logona e Tavita?

2. Ko e heigoa e fakatonuaga ne foaki mai e Iesu he Mataio 18:15-17 hagaao ke he tauteaga he hala kelea lahi?

² Kua foaki mai he Tohi Tapu ki a tautolu e maamaaga i loto he manamanatuaga he Atua, pihia foki ke he tau vahega mena ne kua lata ia tautolu ke taute kaeke kua hala mai taha ki a tautolu. Ne tala age e Iesu ke he hana tau aposetolo, ko lautolu ka eke mo tau leveki Kerisiano fakamui: “Kaeke ke mahani kelea mai hau a matakainaga kia koe, kia fano a koe, ti akonaki a ia hoko mua ni. Kaeke ke fanogonogo mai a ia kia koe, kua moua tuai e koe hau a matakainaga.” Ko e hehe nei ne tutala ki ai nakai ko e hehe tote he tagata, ka ko e hala kelea lahi tuga e mahani fakavai po ke fatipiko. Ne pehe a Iesu kaeke ke nakai taute he lakaaga nei e lekua ka e ha ha i ai e tau fakamoli, kia uta he tagata ne nakai hala a lautolu ke fakamoli e hehe. Ko e lakaaga fakahiku ni kia a nei he mena nei? Nakai. “Ka nakai fanogonogo a ia [tagata hala] kia laua, ti talahau atu e koe ke he ekalesia; ka nakai fanogonogo a ia ke he ekalesia, kia eke a ia kia koe ke tuga e tagata kehe po ke telona.”—Mataio 18:15-17.

3. Ko e heigoa e kakano he talahauaga ha Iesu ne pehe ke taute e tagata taute mena hehe ne nakai tokihala ke “tuga e tagata kehe po ke telona”?

³ Ha ko e tau Iutaia a lautolu, ne maama he tau aposetolo e kakano he taute e tagata hala “tuga e tagata kehe po ke telona.” Na vihiatia lahi he tau Iutaia e feoaki mo e tau tagata motu kehe, mo e fa onoono fakateaga lahi a lautolu ke he tau Iutaia ne gahua telona ma Roma.a (Ioane 4:9; Gahua 10:28) Ko e mena ia, kua poaki e Iesu ke he tau tutaki kaeke ke tiaki he fakapotopotoaga e tagata hala, kua lata foki ke fakaoti e feoaki mo ia. Ti felauaki fefe mogoia e mena ia mo e fakafehagai mitaki ha Iesu mo e tau telona he falu magaaho?

4. Ke he kitekiteaga he hana tau kupu he Mataio 18:17, ko e ha ne fakafehagai mitaki ai a Iesu mo e falu he tau telona mo e tau tagata hala?

⁴ Kua pehe mai e Luka 15:1: “Kua fakatata mai kia ia e tau telona oti mo e tau tagata hala, ke fanogonogo kia ia.” Kua nakai ha ha i ai oti e tau telona po ke tau tagata hala, ka ko e “oti” ko e hana kakano, ko e tokologa. (Fakatatai Luka 4:40.) Ko e tau tagata fe? Ko lautolu ne fiafia ke fakamagalo ha lautolu a tau hala. Ko e falu ia lautolu ia ne o mai fakamua ke he ogo ha Ioane Papatiso ke he fakatokihala. (Luka 3:12; 7:29) Ti ko e magaaho ne o mai ai e falu ki a Iesu, ko e hana fakaako atu ki a lautolu kua nakai moumou aki hana fakatonuaga he Mataio 18:17. Kua kitia ai “na tokologa foki e tau telona mo e tau tagata hala [ne fanogonogo ki a Iesu] . . . ti mumui atu a lautolu kia ia.” (Mareko 2:15) Nakai ko lautolu ne manako ke matutaki ke he puhala kelea he moui, mo e fakatikai e tau lagomataiaga. Ka, ko lautolu ne logona e fekau ha Iesu mo e aamohia ke he ha lautolu a tau loto. Pete ni he hala agaia a lautolu, pete he tuga e lali ke taute he tau hikiaga, ka ko e “leveki mamoe mitaki” mo e hana fakamatala atu ki a lautolu kua fifitaki ni ke he fakaalofa hofihofi he hana Matua.​—Ioane 10:14.

Fakamagaloaga, ko e Kotofaaga he Kerisiano

5. Ko e heigoa e fakamatapatuaga he tuaga he Atua ke he fakamagaloaga?

⁵ Kua moua e mautolu e tau fakamoliaga mafanatia nei mai he ha mautolu a Matua kua talia fiafia ke fakamagalo: “Kaeke ke fakakite e tau hala ha tautolu, kua fakamoli a ia mo e mahani tututonu ke fakamagalo ai e tau hala he tautolu, mo e fakamea a tautolu he tau mahani hepehepe oti kana.” “Kua tohi atu e au e tau mena ia kia mutolu, kia nakai hala a mutolu; kaeke foki kua hala taha, ha ia tautolu e Lagomatai ki mua he Matua, ko Iesu Keriso ko e tututonu a ia.” (1 Ioane 1:9; 2:1) Ti aoga nakai e fakamagaloaga ma e tagata kua fakaoti e fakalatahaaga?

6. Maeke fefe e tagata ne fakaoti e fakalatahaaga ke fakamagalo mo e liu talia mai?

⁶ E. Ko e magaaho ka fakaoti ai e fakalatahaaga he taha ha kua nakai fakatokihala mai he hala, ko e tau momotua ne hukui e fakapotopotoaga ka fakamaama atu ki a ia pehe kua lata ni ia ia ke tokihala ke moua e fakamagaloaga he Atua. Kua lata ke fano a ia he tau fakalatahaaga he Fale he Kautu, ha ko e mena haia ke logona ai e ia e tau fakatonuaga he Tohi Tapu ke lagomatai aki foki a ia ke tokihala. (Fakatatai 1 Korinito 14:23-25.) Ti hoko ai ke he magaaho ke kumi e ia e liu talia mai ke he fakapotopotoaga mea. Ti ka feleveia atu e tau momotua ki a ia, to lali a laua ke fifili po kua tokihala moli nakai a ia mo e tiaki hana mahani agahala. (Mataio 18:18) Kaeke kua pihia, ti liu talia a ia, ke tatai mo e fakatokaaga he 2 Korinito 2:5-8. Kaeke ko e fakaoti ai a ia he fakalatahaaga ke he loga he tau tau, kua lata ia ia ke fakatoka ke lali ke fakamalolo ke holo ki mua. Kua lata foki a ia ke fai lagomataiaga lahi he magaaho fakamui ke ati hake aki hana iloilo ke he Tohi Tapu mo e fakaaue ke maeke a ia ke eke mo Kerisiano malolo fakaagaga.

Liu Atu ki a Iehova

7, 8. Ko e heigoa e puhala ne fakatoka he Atua hagaao ke he hana tau tagata ne fakapaea?

⁷ Ka e, kua lata nakai ia lautolu ko e tau momotua ke o atu fakamua ke he tagata kua fakaoti e fakalatahaaga? E. Kua fakakite mai he Tohi Tapu ke fakakite e fakaalofa hofihofi, nakai ke taofi kehe ni e fakahala ka e taute tumau ke he puhala mitaki. Kua ha ha ia tautolu e fakafifitakiaga a Iehova. Ato fakafano e ia hana tau tagata nakai tua ke he paeaaga, ne fakatoka fakaperofeta e ia e monuina ke he ha lautolu a liliu mai: “Kia manatu e koe ke he tau mena nai Iakopo na e; ko Isaraela foki ha ko e haku a fekafekau a koe; . . . Kua holoholo kehe e au tuga ne aolagi uli hau a tau holifono, mo e hau a tau hala tuga ne aolagi; liu mai ā koe kia au ha kua laveaki mai e au a koe.”​—Isaia 44:21, 22.

⁸ Ko e magaaho ne ha ha i ai ke he paeaaga, ne fai lakaaga atu foki ne taute e Iehova, kua taute e ia e puhala mitaki. Ne fakafano atu e ia hana tau perofeta, ko e hana tau hukui, ke uiina atu ki a Isaraela ‘ke kumi a ia mo e ke moua a ia.’ (Ieremia 29:1, 10-14) He Esekielu 34:16, ne fakatai e ia a ia ke he leveki mamoe, mo e tau tagata he motu ko Isaraela ke he tau mamoe hehe: “To kumi foki e au a ia ne galo, to liuaki mai e au a ia ne vega kehe.” He Ieremia 31:10, ne fakaaoga foki e Iehova e manamanatuaga ha kua eke a ia mo leveki mamoe ke he tau Isaraela. Nakai, ne nakai fakatai e ia a ia ke he leveki mamoe he fuifui mamoe ne fakatali ke liu mai a ia ne hehe; ka kua fakakite e ia a ia ko e leveki mamoe kua kumi ki a lautolu ne hehe. Mailoga, ha kua pete ni he nakai tokihala e tau tagata ati fakapaea ai, ka e tuku fakamua agaia ni he Atua e malolo ke lali ke kumi ma e ha lautolu a liliu mai. Ka fakatatai atu ke he puhala he Malaki 3:6, ne nakai hiki he Atua hana puhala ne taute aki e ia e fakatokaaga ma e tau Kerisiano.

9. Mui tua fefe ke he fakafifitakiaga he Atua e fakapotopotoaga Kerisiano?

⁹ Kua nakai kia talahau mai he mena nei kua ha ha i ai he kakano he tau lakaaga fakamua hagaao ke he falu ne fakaoti e fakalatahaaga ti kua liu fakatokihala he magaaho nei? Manatu na fakakite he aposetolo ko Paulo e puhala ke uta kehe e tagata mahani kelea mai he fakapotopotoaga i Korinito. Ka e fakamui, ne tomatoma e ia e fakapotopotoaga ke tumau ha lautolu a fakaalofa ke he tagata ha ko e hana a liu fakatokihala, ne puhala atu ke he hana liu talia mai ke he fakapotopotoaga.​—1 Korinito 5:9-13; 2 Korinito 2:5-11.

10. (a) Ko e heigoa e tau manamanatuaga kua lata ke fakaohooho aki e ha fakamaloloaga ke matutaki mo e falu he tau tagata ne fakaoti e fakalatahaaga? (e) Ko e ha e tau faoa Kerisiano ne nakai ko e tau tagata ka kamata fakamua ke matutaki atu ki ai?

¹⁰ Ne liu fatiaki mai he tohi fakamaama fakamua ia pehe: ‘Ko e matapatu he puhala iloilo ne taute ma e nakai matutaki fakamua, ke puipui aki e tau tutuaga he matakau: “ko e mena tote kua fakaea, kua fakaea aki e ia e lakuaga falaoa katoa.” (1 Korinito 5:6). Kua maama mitaki e manatu nei he laulahi he tau fahi kupu he Tohi Tapu mo e falu tohi ne lafi ki luga he Tohi Tapu, ka e onoono fakalahi ke he tau tagata takitokotaha, pete kua oti he tuku kehe, ko e matapatu he ole lalo ha Paulo he 2 Kori. 2:7-10’ (tautolu ne fakalilifa.) Ko e mena haia, ko e vahega onoono fakalahi pehe nei kua lata ke fakakite fakapapahi he tau leveki mamoe he fuifui mamoe he vaha nei. (Gahua 20:28; 1 Peteru 5:2) To liga amaamanaki e tau kapitiga fakamua mo e tau faoa he tagata ne fakaoti e fakalatahaaga ke liu mai a ia; ka ko e fakalilifu ke he poakiaga he 1 Korinito 5:11, kua nakai lata a lautolu ke feoaki mo e tagata kua tuku ki tua.b To toka ni e lautolu ke he tau leveki mamoe kua kotofa ke kitia fakamua po kua fiafia moli nakai e tagata pihia ke liu mai.

11, 12. Ko e tau vahega tagata tuku ki tua fefe ka nakai manako foki e tau momotua ke matutaki atu ki ai, ka ko e heigoa e vahega kua liga lata a lautolu ke ahiahi atu ki ai?

¹¹ Kua nakai lata, ke hoko foki ke he tau momotua ke fai mena ke taute fakamua atu ke he tau tagata pihia ne tuku ki tua, tuga e tau tagata ne tiaki e tapuakiaga moli, ‘ne vagahau e tau mena fakakeukeu ke futiaki e tau tutaki ke mumui atu ki a lautolu.’ Ko lautolu nei ko e ‘tau faiaoga fakavai ne lali ke tamai fakaeneene e tau tapuakiaga muitua tagata ko e moumouaga lahi mo e to fakaaoga hehe e fakapotopotoaga ke he tau kupu fakavai.’ (Gahua 20:30; 2 Peteru 2:1, 3, NW) Kua nakai tala mai foki he Tohi Tapu ha fakaveaga ke kumi e tau tagata ne fakaoti e fakalatahaaga, lautolu ne fia latau po ke fakaohooho ke taute mena hehe.​—2 Tesalonia 2:3; 1 Timoteo 4:1; 2 Ioane 9-11; Iuta 4, 11.

¹² Ka e taha e mena, tokologa e tau tagata tuku ki tua ne nakai pihia. Kua maeke he taha ke tiaki e tau mena hehe kelea lahi ne taute e ia ti fakaoti ai e fakalatahaaga. Ko e taha ne fa fakaaoga tapaka, po ke fa molea lahi e inu kava fakamua, ka kua nakai lali a ia ke futiaki e falu ke taute mena hehe mogonei. Liu la manamanatu, na pihia ni fakamua to liliu e tau Isaraela ne fakapaea ke he Atua, ne fakafano atu e ia e tau hukui ke olelalo ki a lautolu ke liliu mai. Po kua fai tiviaga fakamua a Paulo po ke tau momotua he fakapotopotoaga i Korinito ke he tagata ne fakaoti e fakalatahaaga, kua nakai talahau he Tohi Tapu. Ko e magaaho ne tokihala ai e tagata ia mo e fakaoti hana mahani kelea, ne poaki atu e Paulo ke he fakapotopotoaga ke liu talia a ia.

13, 14. (a) Ko e heigoa kua fakakiteaki kua maeke he falu ne tuku ki tua ke omaoma ke he fakaalofa hofihofi ne kamata noa? (e) To maeke fefe he kau he tau momotua ke taute e fakatokaaga ke matutaki atu ki ai?

¹³ Ko e tau magaaho ku kua mole ne ha ha i ai e tau mena tutupu ha kua maeke he taha motua ke feleveia mo e tagata ne fakaoti e fakalatahaaga.c Kaeke ko e mena kua lata, kia taute fakaku he leveki mamoe e tau lakaaga ka taute ma e liu talia mai. Ko e falu he tau tagata pihia ne tokihala mo e liu talia mai. Ko e fakaotiaga fiafia pihia kua fakakite kua ha ha i ai e tau tagata ne fakaoti e fakalatahaaga po ke fakaoti e feoaki ne omaoma ke he leo he fakaalofa hofihofi ne taute he tau leveki mamoe. Ka e maeke fefe he tau momotua ke taute e lekua pehe nei? Na fa mahani ke taute lagataha he tau, ke fakatutala e kau he tau momotua po kua fai tagata pihia nakai ne nonofo he tau matakavi ha lautolu.d To kitekite fakalahi e tau momotua ki a lautolu kua molea e tau taha he tuku ki tua. Hagaao ke he tau tutuaga, kaeke ko e mena kua lata, to kotofa e lautolu tokoua e momotua (amaamanaki lahi ko e taha kua mahani lahi mo e tuaga ia) ke ahi atu ke he tagata tokotaha pihia. Ka e nakai fai ahi atu ka taute ke he ha tagata ne fakakite moli e mahani loma po ke mahani hagahaga kelea po ke tagata ne fakailoa pehe kua nakai manako a lautolu ke lagomatai.​—Roma 16:17, 18; 1 Timoteo 1:20; 2 Timoteo 2:16-18.

¹⁴ To hea telefoni atu he tau leveki mamoe tokoua ke huhu ko e mitaki nakai ke ahi atu fakaku, po ke tutu fakatote he taha magaaho kua hagahaga mitaki. He magaaho e kua ahi atu, kua nakai lata a laua ke kaka lahi po ke momoko ka kua lata ke fakakite e mafanatia he ha laua a manamanatu fakaalofa hofihofi. Ke kehe mai he nakai liu fakamanatu atu e lekua kua mole, kua lata ia laua ke fakatutala ni ke he tau kupu he Tohi Tapu tuga e Isaia 1:18 mo e Isa 55:6, 7 mo e Iakopo 5:20. Ka fiafia e tagata ke liu mai ke he fuifui mamoe he Atua, to fakamaama mo e totonu atu e laua e tau lakaaga kua lata ia ia ke taute, tuga e totou e Tohi Tapu mo e tau tohi fakailoa he Kaufakalatahaaga Kolo Toko, mo e fano ke he tau fakalatahaaga he Fale he Kautu.

15. Ko e heigoa kua lata he tau momotua ke toka loto ka ahi atu ke he tagata ne fakaoti e fakalatahaaga?

¹⁵ Kua lata he tau momotua nei ke moua e pulotu mo e maama mitaki ke fifili ko e fai fakakiteaga nakai he tokihala mo e kua lata moli nakai ke liu ahi atu. Kua lata ia laua ke manatu foki, ko e falu tagata ne fakaoti e fakalatahaaga ne nakai ‘liu fakafou ke tokihala.’ (Heperu 6:4-6; 2 Peteru 2:20-22) Ka mole e ahi atu, to tamai e laua tokoua e hokotaki gutu fakaku ke he Komiti Lagomatai he Fakapotopotoaga. Ko lautolu mogoia, ka fakailoa ke he kau he tau momotua he fakatahaaga ha lautolu ka hau. Ko e fakaalofa hofihofi fakamua he tau momotua to fakakite e kitekiteaga he Atua: “Kia liliu mai a a mutolu kia au, ti liu atu ai au kia mutolu, kua pihia mai a Iehova Sapaota.”​—Malaki 3:7.

Falu a Lagomatai he Fakaalofa Hofihofi

16, 17. Kua lata ke fefe e kitekiteaga ha tautolu ke he tau faoa Kerisiano he tagata ka fakaoti e fakalatahaaga?

¹⁶ Ka e kua e falu ia tautolu ne nakai ko e tau leveki mo e to nakai moua ha tauteaga fakamua pihia ke he tau tagata ne fakaoti e fakalatahaaga? Ko e heigoa ha tautolu ka taute ke o fakatatai mo e fakatokaaga nei mo e fifitaki ki a Iehova?

¹⁷ Pete ni he fai tagata kua fakaoti e fakalatahaaga po ke fakaoti e feoaki, kua lata ni a tautolu ke mumui tua ke he tau hatakiaga: “Kaeke kua talahaua taha ko e matakainaga, ka ko ia ko e feuaki, po ke velevelemena, po ke hufeilo ke he tau tupua, po ke tagata vagahau kelea, po ke konahia, po ke fofo mena, aua neke feoaki, aua foki neke kai mena fakalataha mo e tagata pihia.” (1 Korinito 5:11) Ka ko e fakatonuaga faka-Tohi Tapu nei kua nakai lauia ha tautolu a kitekiteaga ke he tau tagata he magafaoa Kerisiano ne nonofo fakalataha mo e tagata ne fakaoti e fakalatahaaga. Ko e tau Iutaia i tuai ne gahua malolo lahi ke he tau telona ti ko e ha lautolu a vihiatia kua tupu lahi ti hoko ni ke he magafaoa he telona. Ne nakai omoi e Iesu e mena ia. Ne pehe a ia ko e tagata hala ne nakai talia ke lagomatai kua lata ke taute a ia “ke tuga e tagata kehe po ke telona”; ne nakai pehe a ia ke taute pihia foki ke he tau tagata Kerisiano he magafaoa.​—Mataio 18:17.

18, 19. Ko e heigoa falu puhala ke fakakiteaki e tautolu ha tautolu a mahani Kerisiano ke he tau faoa fakamoli he tagata ne tuku ki tua?

¹⁸ Kua lata a tautolu ke fai lagomataiaga mua atu ke he tau tagata he magafaoa, kia lautolu ko e tau Kerisiano fakamoli. Na liga kua fita a lautolu he feleveia mo e mamahi mo e tau mena fakatauhele ha kua nonofo fakalataha he kaina mo e tagata ne tuku ki tua mo e liga ko e fakalolelole e ia ha lautolu a tutuli fakaagaga. Na liga nakai manako a ia ke fai Kerisiano ke ahi mai ki kaina; po ke ka o mai a lautolu ke feleveia mo e tau tagata fakamoli he magafaoa, liga to nakai moua e ia ha fakalilifu ke fano kehe mai he tau tagata ahiahi. To liga taofi foki e ia e malolo he hana magafaoa ke o ke he tau fakalatahaaga mo e tau toloaga Kerisiano oti. (Fakatatai Mataio 23:13.) Ko e mena ia ko e tau Kerisiano ne nakai tutu mitaki e tau tutuaga kua lata moli ki a lautolu ia ha tautolu a fakaalofa hofihofi.​—2 Korinito 1:3, 4.

¹⁹ Ko e taha puhala ke fakakiteaki e tautolu e fakaalofa hofihofi ko e ‘vagahau fakamafana’ mo e tau tutala noa fakamalolo mo e tau tagata fakamoli pihia he kaina. (1 Tesalonia 5:14, NW) Ha ha i ai foki e falu magaaho hagahaga mitaki ke tuku age e lagomatai he magaaho fakamua to kamata mo e ka oti e tau fakalatahaaga, ka o he tau lagomataiaga he fonua, po ke ka nonofo auloa he falu a magaaho. Kua nakai lata ke totoku e fakaoti e fakalatahaaga ka e maeke ke tutala ke he loga he tau mena ati hake. (Fakatai 25:11; Kolose 1:2-4) Ha kua leveki tumau e tau momotua ke he tau Kerisiano he magafaoa, ti liga kitia ai e tautolu kua lata foki a tautolu ke ahi atu, ka e nakai fai tauteaga mo e tagata ne tuku ki tua. Kaeke ke tali he tagata ne fakaoti e fakalatahaaga a tautolu ka ahiahi atu po ke hea telefoni, to ole ni a tautolu ke he faoa Kerisiano ne kumi a tautolu ki ai. Ko e falu a magaaho to liga talia he tau tagata Kerisiano he magafaoa e uiina ke fakalataha mai ke he kaina ha tautolu. Ko e kakano: Ko lautolu​—fuata po ke fuakau—ko e matakainaga tupa ha tautolu, ko e tau tagata fakahelehele he fakapotopotoaga he Atua, kua nakai lata ke toka kehe.​—Salamo 10:14.

20, 21. Kua lata ke fefe ha tautolu a logona mo e tauteaga kaeke ko e taha kua liu talia mai?

²⁰ Ko e taha vala ke fakakite e fakaalofa hofihofi kua hafagi ai, he magaaho ka liu talia mai e tagata ne tuku ki tua. Kua fakamahino mai he tau fakatai a Iesu e fiafia he lagi ‘ka tokihala e tagata hala tokotaha.’ (Luka 15:7, 10) Ne tohia e Paulo ke he tau tagata i Korinito hagaao ke he tagata tane ne fakaoti e fakalatahaaga: “Kia fakamagalo atu a mutolu mo e fakamafana atu ke he tagata na, neke mahala a ia ke he momoko kua lahi ue atu. Ko e mena ia kua ole atu au kia mutolu ke fakamau ha mutolu a fakaalofa kia ia.” (2 Korinito 2:7, 8) O mai a a tautolu ke taute fakailoilo mo e fakaalofa e poakiaga ia he tau aho mo e tau fahi tapu ka mole e liu talia mai he tagata.

²¹ Kua tahake mai he fakatai ha Iesu ke he tama tane moumou koloa e matematekelea, ne kua lata a tautolu ke kalo kehe. Ne nakai fiafia e taokete he liu mai e patu moumou koloa ka e mamahi hana a loto. Aua neke pihia a tautolu, ke ekefakakelea atu ke he tau hehe kua mole po ke fakavihiatia e tagata ka liu talia mai. Ka ko e ha tautolu a foliaga, kia tuga e matua, ke fakakite e fiafia ha Iehova. Ne fiafia e matua ha ko e hana tama tane ne galo mo e tuga kua mate, kua liu moua, po ke liu moui mai tuai. (Luka 15:25-32) Kia taute pihia, to ataina a tautolu ke tutala ke he matakainaga kua liu talia mai mo e fakamafana atu a ia. E, kia fakamoli a tautolu kua fakakite e tautolu e fakaalofa hofihofi, tuga he taute he ha tautolu a Matua fakamagalo mo e fakaalofa hofihofi he lagi.​—Mataio 5:7.

22. Ko e heigoa ne putoia ai he ha tautolu a fifitaki ki a Iehova ko e Atua?

²² Kua nakai fai huhu kaeke kua manako a tautolu ke fifitaki ke he ha tautolu a Atua, kua lata a tautolu ke fakakite e fakaalofa hofihofi ke tatai mo e hana a tau poakiaga mo e hana a fakafiliaga tonu. Kua fakamaama he tau salamo a ia he puhala pehe: “Kua fakaalofa noa mai a Iehova, mo e fakaalofa hofihofi noa; kua fakatuai hana ita, ti lahi ni hana fakaalofa. Kua mahani mitaki mai a Iehova ke he tau mena oti, ko e hana fakaalofa hofihofi foki kua hoko ia ke he hana tau mena oti kana ne eke e ia.” (Salamo 145:8, 9) Ko e fakatokaaga fakaalofa lahi ha a ia ma e tau Kerisiano ke fifitaki ki ai!

[Tau Matahui Tala]

Manatu Nakai e Koe e tau Mena Nei?

◻ Taute fefe he tau Iutaia e tau telona mo e tau tagata hala, ka ko e ha ne fakafehagai mitaki ai a Iesu mo e falu ne pihia?

◻ Ko e heigoa e matapatu he Tohiaga Tapu ne ha ha i ai ma e tauteaga fakamua he fakaalofa hofihofi ke he tokologa he tau tagata ne hehe?

◻ Maeke fefe he kau he tau momotua ke taute fakamua e tau mena pihia, mo e ki a hai?

◻ Fakakite fefe e tautolu e fakaalofa hofihofi ki a lautolu ne liu talia mai mo e ke he tau magafaoa ha lautolu ne fakaoti e fakalatahaaga?

[Puha he lau 17]

Ko e ha tagata ni ne kua ha ha i ai fakamua he fakapotopotoaga mea mo e fiafia he Atua ka ko e magaaho nei kua fakaoti e fakalatahaaga po ke fakaoti e feoaki kua nakai lata ke nofo tumau ke he tuaga pihia. Ka e, kua maeke he tagata ia ke tokihala mo e taute fakamua e matutakiaga mo e tau momotua he fakapotopotoaga. Ko e puhala ke liu mai kua hafagi.

[Fakatino Credit Line he lau 18]

Garo Nalbandian