Tau Hūhū he Tau Tagata Totou

Maama fēfē e tautolu e tau numera he hokotaki he fekafekauaga he tau?

He tau tau takitaha, kua amaamanaki lahi a tautolu ke he hokotaki he fekafekauaga ne tohi he Yearbook. Kua fiafia ke kitia e mena ne taute he matakau he tau tagata ha Iehova he fakamatala e Kautu mo e gahua fakaako atu he lalolagi katoa. Ka ke moua e aoga lahi mahaki mai he hokotaki, lata ia tautolu ke hako e maamaaga ke he katoatoaaga ti pihia foki mo e onoonoaga lagotatai ke he tau numera. Kitekite ke he falu fakataiaga.

Tau he fekafekauaga. Matutaki e mena nei mai ia Sepetema ke hoko ki a Aokuso he tau hake. Ha ha he Yearbook e hokotaki he tau he fekafekauaga kua mole. Ti ha ha he 2011 Yearbook e hokotaki ma e tau he fekafekauaga he 2010 mai ia Sepetema 1, 2009 ki a Aokuso 31, 2010.

Tapunu he tau tagata fakailoa mo e avelesi he tau tagata fakailoa. Ko e “tau tagata fakailoa” kua putoia e Tau Fakamoli ne papatiso ha Iehova pihia foki a lautolu ne nakaila papatiso kua latatonu ke eke mo tau tagata fakamatala he Kautu. Ko e “tapunu he tau tagata fakailoa” ko e numera tokoluga lahi mahaki ne hokotaki he taha mahina he tau he fekafekauaga ti maeke ke putoia e tau hokotaki mule ne kua nakai lafi ke he hokotaki he mahina kua mole. He puhala nei kua liga fakamau lagaua e falu tagata fakailoa. Ko e tapunu mogoia he numera kua nakai putoia e numera he tau tagata fakailoa ne gahua he fonua ka e nimo ke hokotaki. Peehi he mena nei e aoga ma e tau tagata fakailoa takitaha ke tuku fakamafiti e hokotaki he tau mahina takitaha. Ko e “avelesi he tau tagata fakailoa” ko e numera tumau he tau tagata kehekehe ne hokotaki e tau magaaho he gahua he fonua he tau mahina takitaha.

Katoa he tulā. Hagaao ke he 2011 Yearbook, ne fakaaoga he Tau Fakamoli a Iehova molea e 1.6 e piliona tulā ke he gahua he fonua. Ko e katoatoa nei mogoia kua nakai putoia e tau tulā oti ne fakaaoga e tautolu he tapuakiaga ha tautolu, ha kua nakai lauia e magaaho ne taute tumau e tautolu ke he tau gahua tuga e aahi leveki, ō he tau feleveiaaga, mo e taute e tau fakaako Tohi Tapu fakatagata mo e manamanatu fakahokulo.

Tupe fakaaoga. Ke he tau he fekafekauaga he 2010, ne fakaaoga he Tau Fakamoli a Iehova molea e $155 e miliona ke leveki aki e tau paionia pauaki, tau misionare, mo e tau leveki faifano ke he tau kotofaaga ha lautolu he fekafekauaga he fonua. Ka ko e numera nei kua nakai putoia e totogiaga he lolomi e tau tohi fakavē ke he Tohi Tapu ne taute e tautolu; po ke putoia ai e tupe ne fakaaoga ke leveki e molea he 20,000 he tau tagata gahua foaki noa he Peteli he tau la ofisa he lalolagi katoa.

Lautolu ne kai he fakamanatuaga. Ko e numera anei he tau matakainaga papatiso ne kai ke he tau mena fakatai he Fakamanatuaga he lalolagi katoa. Hukui kia he katoatoaaga nei e numera he tau tagata fakauku he lalolagi? Nakai pihia. Loga e kakano—putoia e tau taofiaga fakalotu kua mole po ke liga nakai lagotatai e manamanatuaga po ke logonaaga—ka liga fakatupu e falu ke manatu hehē kua moua e lautolu e uiaga ke he lagi. Nakai maeke ia tautolu ke iloa e numera mooli ha lautolu ne fakauku he lalolagi; ti nakai lata foki ia tautolu ke iloa. Kua nakai fakamau he Kau Fakatufono a lautolu oti ne kai, he nakai ha ha a lautolu ne fakauku he matakau taha he lalolagi katoa.a

Ko e mena ne iloa e tautolu to ha ha he lalolagi e falu he tau fekafekau fakauku he Atua ha tautolu he magaaho ka fakatoka mai e tau matagi moumou he matematekelea lahi. (Fakakite. 7:1-3) Ato hoko e mogoia, to takitaki e lautolu ne fakauku e mena ne fakamau fakamitaki he ha tautolu a hokotaki he fekafekauaga he tau—ko e gahua fakamatala mo e fakaako atu ne lahi mahaki he fakamauaga tala he tagata.

[Matahui Tala]