Ko e Fonoaga Uho Lahi he Fakamauaga Tala

“KA OTI e fonoaga nei, to pehē a koe, ‘Ko e fonoaga lagataha nei he tau kua eke mooli mo fakamauaga tala tuai fakateokarasi!’” Ke he tau kupu ia, ko Stephen Lett he Kau Fakatufono he Tau Fakamoli a Iehova ne fakalahi e logonaaga hakahakau he amaamanakiaga ke he toloaga lahi. Ne fakapotopoto a lautolu ke he fonoaga lagataha he tau ke 126 aki he Watch Tower Bible and Tract Society of Pennsylvania, ne fakahoko ia Oketopa 2, 2010, he Fale he Toloaga he Tau Fakamoli a Iehova i Jersey City, New Jersey, i U.S.A. Ko e heigoa e falu fakatōtōaga he magaaho uho lahi nei he fakamauaga tala?

Ko e lauga hafagi he Matakainaga ko Lett ko e fakatutalaaga hakahakau ke he kariota ha Iehova he lagi tuga ne fakamaama he tohi ha Esekielu he Tohi Tapu. Ko e kariota makimaki ne lilifu anei kua fakatino e fakatokatokaaga he Atua, ne pule katoatoa a Iehova. Ko e vala he lagi, ne ha ha i ai e tau mena momoui fakaagaaga, kua lupahila e holo mafiti—ko e mafiti he tau manatu ni ha Iehova he talahau he Matakainaga ko Lett. Ko e vala he fakatokatokaaga ha Iehova ko e Atua he lalolagi kua holo pihia foki. Ne talahau he Matakainaga ko Lett e falu mena tutupu fiafia he vala he fakatokatokaaga he Atua ne kitia he tau tau kua mole laia.

Tuga anei, ha ha i ai e tau la kua lafi mo e tamai fakalataha, ke fakaatā e tokologa ne fekafekau he tau kaina Peteli he mogo fakamua he tau motu ia ke hagaaki ke he gahua fakamatala. Ne tomatoma he Matakainaga ko Lett e toloaga ke liogi tumau ma e Kau Fakatufono ko e hukui he vahega fekafekau ke matutaki ke nakai ni fakamooli ka e pihia foki ke pulotu, po ke loto matala.—Mata. 24:45-47.

Tau Hokotaki Fakamalolō mo e Tau Hūhū Tala Mafanatia

Ko Tab Honsberger, ne fekafekau he La Komiti i Haiti, ne talahau e hokotaki omoomoi ke he mafuike ne tō ia Ianuari 12, 2010, ne tamate kavi ke he 300,000 tagata he motu ia. Ne talahau e ia, kua tala age e tau akoako ke he tau tagata kua fakahala he Atua e tau tagata ia he nakai tua ka e puipui a lautolu ne mitaki. Ka kua totou afe e tau tagata kolokolovao ne tuku he fale puipui ne magalo noa he magaaho ne malolo e tau kaupā he mafuike. Tokologa e tagata Haiti ne loto fakamooli kua moua e mafanatia he iloa e kupu mooli ke he kakano ne lekua lahi e vahā ha tautolu. Ko e Matakainaga ko Honsberger ne fatiaki e matakainaga taane Haiti ne tua fakamooli ne mate e haana hoana he matematekelea kua pehē: “Mokulu agaia e tau hihina mata haaku ke hoko ke he aho nei. Nakai iloa e au to maanu au ato a fe, ka e olioli au ke logona hifo e fakaalofa he fakatokatokaaga ha Iehova. Kua amaamanaki au, ti eketaha au ke fai vala i ai.”

Ko Mark Sanderson, ko e matakainaga mogonei he magafaoa Peteli i Brooklyn, ne talahau e hokotaki ke he tau tagata Filipaina. Ko e tagata he La Komiti i ai fakamua, ne olioli lahi a ia he talahau ko e 32 e tapunu he motu he tau tagata fakailoa he Kautu mo e puhala ne tokoluga hake e numera he tau fakaakoaga Tohi Tapu ke he tau tagata fakailoa. Ti talahau e ia hagaao ke he mokopuna taane he matakainaga taane ko Miguel ne kua kelipopo. Ne eketaha a Miguel ke fakahala e tagata kelipopo mo e tuku he fale puipui. Fakamui, he mogo ne fakamatala a Miguel he fale puipui ne feleveia a ia mo e tagata kelipopo. Pete he hopoate, ne tutala fakatokolalo mo e totonu a Miguel ki a ia. Ne fakahiku a ia ke fakaako Tohi Tapu mo e tagata taane, ne talia fiafia ti fakaalofa foki ki a Iehova. Mogonei kua papatiso tuai a ia. Ko Miguel e kapitiga tata haana ti kua lali ke maeke ke fakatoka tuai mai e matakainaga foou haana he fale puipui.a

Ko e fakaholoaga ne mui mai ko e hūhū tala ke iloa mitaki ne taute e Mark Noumair, ko e faiaoga he Faahi he Tau Aoga Fakateokarasi. Ne hūhū tala a ia ke he tolu e hoa mau—ko Alex mo Sarah Reinmueller, David mo Krista Schafer, mo Robert mo Ketra Ciranko. Ko Alex Reinmueller, ne lagomatai ke he Komiti Fakailoaaga, ne talahau e puhala ne taute e ia e kupu mooli ma haana ni he mogo ne paionia a ia i Kanatā he 15 laia e tau he moui, ti fa gahua tokotaha. He hūhū ko hai ne lauia lahi ki a ia he Peteli, ne totoku he Matakainaga ko Reinmueller tokotolu e matakainaga taane tua fakamooli, ne talahau e tau puhala ne igatia a lautolu mo e lagomatai a ia ke tupu fakaagaaga. Ko e haana hoana ko Sarah, ne tutala hagaao ke he kapitiga haana mo e matakainaga fifine ne fakauka ke he loga e tau tau i loto he tau fale puipui i Saina ha ko e tua haana. Ti pehē a Sarah ne fakaako a ia ke falanaki ki a Iehova puhala he liogi fakatagata.

Ko David Schafer, ne lagomatai ke he Komiti Fakaako, ne nava ke he matua fifine haana he malolō e tua ti tutala foki hagaao ke he tau matakainaga taane ne gahua hele akau ti lagomatai a ia ke paionia fakakū he vahā fuata. Ko e haana hoana ko Krista, ne vagahau mafanatia he fakaohooho a ia he tau matakainaga momotua he magafaoa Peteli ne “fakamoli ke he mena tote,” tuga ne talahau e Iesu.—Luka 16:10.

Ko Robert Ciranko, ne lagomatai ke he Komiti Tohia Tohi, ne tutala he liu manatu e tau tupuna tokofā haana ne omai i Hungary ti ko e tau Kerisiano fakauku. He mogo ne tote ai, ne nava lahi a ia he finatu ke he tau fonoaga lalahi he tau atu tau 1950 ti iloa ko e fakatokatokaaga ha Iehova kua lahi mahaki atu ke he fakapotopotoaga haana. Ko e haana hoana ko Ketra, ne tutala ke he puhala ne fakaako e ia e mahani fakamooli he mogo ne fekafekau ko e paionia he fakapotopotoaga ne lauia he tiaki taofiaga mo e falu lekua. Ne fakauka a ia ti fakahiku kotofa ke fekafekau ko e paionia pauaki he fakapotopotoaga ne mafanatia e loto haana ha ko e kaufakalataha.

Ko Manfred Tonak, ne talahau e hokotaki ki Ethiopia. Ko e motu nei ne liu taha ke he tau vahā Tohi Tapu, ti kua monuina mogonei he molea e 9,000 e tagata fakailoa he tala mitaki. Laulahi ia lautolu ne nonofo i ai po ke tata ke he taone lahi, ko Addis Ababa. Ko e tau matakavi mamao mogoia kua lata lahi ke moua e lagomatai. Ke hagaaki ke he manako nei, ko e Tau Fakamoli Ethiopia ne nonofo he falu motu kua uiina ke aahi atu ke maeke ke fakamatala he falu matakavi mamao he motu. Tokologa ne omai mo e fakamalolō e Tau Fakamoli he matakavi ti moua e tau tagata kua fiafia ke fanogonogo.

Ko e vala uho he fakaholoaga ko e tau fufuta lauga hagaao ke he Tau Fakamoli a Iehova i Rusia mo e tau taufetului matafakatufono ha lautolu. Ko Aulis Bergdahl he La Komiti i Rusia ne talahau e fakamauaga he favaleaga he Tau Fakamoli i Rusia, mua atu i Moscow. Ko Philip Brumley he Faahi Gahua Matafakatufono he la i United States ne tutala hagaao ke he tau mena tutupu ofoofogia he tau mahina e kua mole he magaaho ne fanogonogo e European Court of Human Rights (ECHR) ke he hiva e hokotaki ne totoko ke he Tau Fakamoli. Ko e Hopoaga ne talia katoatoa kua nakai fai he tau hokotaki ne hiva kua lata, pihia foki falu he tau fakafiliaga ne fakamaama fakamatafeiga ke fakahui e tau totokoaga ne hokotaki. He nakaila kitia e tau fua ka tupu, ne vagahau mo e amaamanaki lahi e Matakainaga ko Brumley ke he fifiliaga he Hopoaga ka liga lauia e tau fakafiliaga he falu motu.

Mui mai he tala fiafia nei, ne fakailoa he Matakainaga ko Lett kua hihiga e ECHR ke fakaatā e fakafiliaga tukuhau kua leva e putoia e fakatufono ha Falani mo e Tau Fakamoli a Iehova. Kua fakaatā he Hopoaga talahaua nei e tau hokotakiaga gahoa lahi ke ta atu ki ai. Hoko mai mogonei, kua manamanatu tuai e ECHR ke he 39 e fakafiliaga he katoa ne putoia e Tau Fakamoli a Iehova, ti kau ai mo tautolu ke he 37 e fakafiliaga. Ne fakamalolō he Matakainaga ko Lett e tau tagata oti he Atua ke fakatumau ke tuku e mena ne tupu he liogi ki a Iehova ko e Atua.

Ko e hokotaki fakahiku ne talahau e Richard Morlan, ko e faiaoga ke lata mo e fonua he Aoga ma e Tau Motua he Fakapotopotoaga. Ne vagahau hakahakau a ia hagaao ke he aoga mo e tali loto fakaaue mai he tau motua ne fakalataha atu.

Tau Lauga Foki he Tau Tagata he Kau Fakatufono

Ko Guy Pierce he Kau Fakatufono ne taute e lauga mafanatia ne hagaaki ke he lauga he tau ma e 2011, ‘Malu ke he higoa a Iehova.’ (Sefa. 3:12) Ne pehē a ia ko e magaaho fiafia anei ke he loga e puhala ma e tau tagata ha Iehova, ti ko e magaaho ke manamanatu fakahokulo foki ki ai. Kua tata mai e aho lahi ha Iehova; ka e matutaki agaia e tau tagata ke kumi hūaga he lotu fakavai, tau fakatokaaga politika, maukoloa fakatino, kalo he tuaga kelea, mo e tau mena pihia. Ke moua e hūaga mooli, lata ia tautolu ke ui ke he higoa ha Iehova, ne putoia e iloa, fakalilifu hokulo, mo e falanaki ki a Ia ne hukui he higoa ia, he ofania a ia mo e tau mena oti kana ha tautolu.

Ko David Splane he Kau Fakatufono ne fakatoka mai mogoia e fakatutalaaga hokulo ne fakalagalaga ne mataulu “Kua Hao Atu Nakai a Koe ke he Okiokihaga he Atua?” Talahau e ia ko e okiokihaga he Atua ne nakai kakano kua nakai gahuahua, ha ko Iehova mo e haana Tama kua ‘gahua agaia’ he aho okiokihaga fakatai ia ke maeke e finagalo he Atua ke tamai e tau mena ne tufuga hagaao ke he lalolagi ke he kautūaga. (Ioane 5:17) Ka e hao atu fēfē a tautolu ke he okiokihaga he Atua? He fakaoti e agahala mo e tau gahua ne talia ni he tagata e taha vala he tali. Lata ia tautolu ke fakagahuahua e tua mo e momoui fakatatau he tokaloto e finagalo he Atua he taute e tau mena kua maeke ia tautolu ke lata mo e finagalo ia. He falu magaaho, liga ko e paleko pauaki a ia, ka e lata ia tautolu ke talia e fakatonuaga mo e kaufakalataha ke he takitakiaga mai he fakatokatokaaga ha Iehova. Ne olelalo e Matakainaga ko Splane ke he toloaga ke taute e tau mena oti kua maeke ke hao atu ke he okiokihaga he Atua.

Ko e lauga fakahiku ne taute e Anthony Morris he Kau Fakatufono ne mataulu “Ko e Heigoa ha Tautolu kua Fakatali ki Ai?” He fakamafiti mo e mafanatia fakamatua, ne fakamanatu he Matakainaga ko Morris ke he toloaga e tau tutupuaga fakaperofeta i mua ha tautolu, ko e tau magaaho kua fakatali fakamakai a lautolu oti ne tua fakamooli ki ai. Putoia he tau mena nei e tagi ke he ‘Mafola mo e nakai haofia!’ mo e moumou he lotu fakavai. (1 Tesa. 5:2, 3; Fakakite. 17:15-17) Ne hataki he Matakainaga ko Morris ke nakai pehē, “Liga ko Amaketo anei,” he tali atu ke he tau mena tutupu he tau vala tala ne nakai fakamooli e tau perofetaaga pihia. Ne fakalagalaga e ia e aga fiafia, fakauka mo e fakatali ne fakamaama ia Mika 7:7. Ka e he magaaho taha, ne tomatoma e ia e tau tagata oti ke “fakatata fakalahi” mo e Kau Fakatufono, ke fakalataha auloa tuga e tau kautau ne ō ke tau. ‘To fakamalolo ha mutolu a tau loto,’ he talahau e ia, ‘ko mutolu oti kana kua fakatali kia Iehova.’—Sala. 31:24.

Fakahiku aki, ne ha ha i ai falu fakailoaaga ofoofogia kua hiki he fakamauaga tala. Ko Geoffrey Jackson he Kau Fakatufono ne fakailoa e tau fakatokaaga ke taute ke kitia mua e fufuta fakaako fakamukamuka he The Watchtower ma lautolu ne temotemoai e tau maamaaga he totou faka-Peritania. Ti fakailoa e Stephen Lett to fakatokatoka he Kau Fakatufono e tau aahi leveki ma e tau leveki faahimotu mo e tau hoana ha lautolu i United States. Matutaki atu a ia ke fakailoa e Aoga Fakaako Fekafekau to eke mo Aoga Tohi Tapu ma e Tau Matakainaga Taane Nofo Tokotaha. To nakai leva ti putoia ai e Aoga Tohi Tapu ma e Tau Hoa Kerisiano. Ko e aoga nei to fakaako fakalaulahi e tau hoa ke maeke ia lautolu ke fakaaoga fakalahi ke he fakatokatokaaga ha Iehova. Ko e Matakainaga ko Lett foki ne fakailoa ko e Aoga ma e Tau Leveki Faifano mo e ha Lautolu a Tau Hoana mo e Aoga he Tau Tagata he La Komiti mo e ha Lautolu a Tau Hoana to fakalaulahi ke he ua e vahega he tau tau takitaha i Patterson, mo e tau foakiaga ma lautolu ne kua oatu fakamua ke oatu ke lagauaaki.

Ko e fakahikuaga mafanatia ke he fakaholoaga ko e mogo ne taute e John E. Barr ne 97 e tau he moui, ko e matakainaga kua leva he Kau Fakatufono, e liogi fakatokolalo mo e mai he loto.b He fakaotiaga he fonoaga ne logona he tau tagata oti ko e aho uho lahi anei he fakamauaga tala.

[Tau Matahui Tala]

[Blurb he lau 19]

Ko e tau hūhū tala ke iloa mitaki kua olioli he tau tagata oti i ai

[Blurb he lau 20]

Fakamonuina e Iehova e gahua fakamatala i Ethiopia