Tau Hūhū he Tau Tagata Totou

Maeke nakai ke talahau mooli ko e fiha e perofetaaga faka-Mesia kua toka i loto he tau Tohiaga Tapu Heperu?

Ko e kumikumi fakamatafeiga he tau Tohiaga Tapu Heperu kua maeke ia tautolu ke kitia e loga he tau perofetaaga ne fakamooli ia Iesu Keriso. Kua talahau oti tuai he tau perofetaaga nei e feakiaga, magaaho ne hau, tau gahua, tau mahani ki ai, mo e tuaga he Mesia ke he fakatokaaga ha Iehova ko e Atua. Kua tuku fakalataha ai ke he taha e fakatino homo ue atu kua lagomatai a tautolu ke kitia ko Iesu ko e Mesia. Ka e lata ke fakaeneene kaeke ke lali a tautolu ke iloa mooli ko e fiha e perofetaaga faka-Mesia kua moua ke he tau Tohiaga Tapu Heperu.

Nakai talia he tau tagata oti na fai po ke nakai fai perofetaaga faka-Mesia. He tohi ha Alfred Edersheim The Life and Times of Jesus the Messiah, ne talahau e ia na tuku fakavahega he tau tohiaga fakarapai i tuai, 456 e vala he tau Tohiaga Tapu Heperu ke he faka-Mesia, pete kua laulahi ai ne nakai talahau fakatonu ke he Mesia. He onoono fakamakutu ke he tau vala nei ne 456 ne fakatupu e tau hūhū po ke fakaperofeta mooli e falu vala nei ki a Iesu Keriso. Ma e fakatai, ne pehē a Edersheim, kua matutaki he tau Iutaia e Kenese 8:11 ke he faka-Mesia. Ne talitonu a lautolu “ko e lau olive, ne tamai he lupe he Mouga he Mesia.” Ne totoku foki he tagata tohia e Esoto 12:42. He fakamaama e maamaaga hehē he tau Iutaia ke he kupu tohi nei, ne tohi e ia: “Tuga he hau a Mose he tutakale, ti to hau foki e Mesia i Roma.” Tokologa e tagata pulotu mo e falu ka uka mooli ke matutaki e tau kupu tohi ua nei mo e tau fakamaamaaga hehē ki a Iesu Keriso.

Pihia foki ka fakakaupā e onoonoaga ha tautolu ke he tau perofetaaga ia ne fakamooli ia Iesu Keriso, to uka ia tautolu ke talia e numera mooli. Tuga ma e fakatai, ia Isaia veveheaga 53, kua ha ha i ai e tau manatu fakaperofeta loga hagaao ke he Mesia. Ne perofeta he Isaia 53:2-7: “Nakai tino mitaki a ia . . . Kua vihiatia a ia mo e tiaki he tau tagata . . . Kua uta fano e ia ha tautolu a tau matematekelea . . . Kua tuina a ia ha ko e tau holifono ha tautolu . . . Tuga ne punua mamoe [a ia] kua takitaki ke tamate.” Kua lata kia e vala katoa nei he Isaia veveheaga 53 ke talahau ko e taha e perofetaaga faka-Mesia, po ke lata e tau aga takitaha nei he Mesia ke onoono ki ai ko e perofetaaga kehe ke he tuaga ia ni kua tonu?

Kitekite foki ke he Isaia 11:1, ne totou: “To tupu ai e hoe he tagutugutu akau ko Iese, to fua foki e huli ke tupu hake ai he hana tau vaka.” He kupu 10, kua liu e perofetaaga nei kitia foki ne teitei e tau kupu ke tatai. Kua lata kia ke tuku fakalataha e tautolu e tau kupu tohi ua nei ko e tau perofetaaga kehekehe po ke taha e perofetaaga ne liu fatiaki? Ko e fakahikuaga ke he Isaia veveheaga 53 mo e Isaia veveheaga 11 ka lauia mitaki e numera katoa he tau perofetaaga faka-Mesia.

Ti kua lata ia tautolu ke kalo mai he fakamahino e numera katoa he tau perofetaaga faka-Mesia he tau Tohiaga Tapu Heperu. Ko e fakatokatokaaga ha Iehova ne lomi e fakamauaga ke fakakite e tau perofetaaga loga hagaao ki a Iesu mo e fakamooliaga ki ai.a Maeke he fakamauaga nei ke lagomatai mo e fakamalolō a tautolu ke he ha tautolu a fakaako fakatagata mo e fakamagafaoa mo e ha tautolu a gahua he fonua. Mua atu, ko e loga he tau perofetaaga faka-Mesia, mo e fiha e numera i ai, kua foaki ki a tautolu e fakamooliaga mauokafua ko Iesu e Keriso, po ke Mesia.

[Matahui Tala]