Hiki he Tohi Tapu e Tau Momoui

KO E heigoa ne omoomoi e fifine fuata ke liu ke he tau aga fakalotu ne tiaki e ia? Kia totou ke he tau talahauaga haana.

“Fai kakano mooli e moui haaku mogonei.”—LISA ANDRÉ

TAU NE FANAU: 1986

MOTU NE FANAU AI: LUXEMBOURG

MOUI FAKAMUA: TAMA FANO HOLO

MOUI HAAKU KUA MOLE: Ne tupu hake au i Bertrange, ko e maaga tote ne meā, hagahaga mitaki, muhukoloa mo e tata ke he taone lahi ko Luxembourg. Ko au ko e tama fakahiku he tau tama tokolima. Ko e Tau Fakamooli a Iehova e tau mamatua haaku, ti gahua lahi a laua ke feaki ke he tau lafu haaku mo au e tau aga Kerisiano.

He hoko au ke he mataulu he fuata mui haaku, ne kamata au ke fakauaua lahi ke he tau mena ne fakaako he Tau Fakamooli a Iehova. He fakamua, ne fakaheu e au e tau fakauaua nei, ti kamata fakahaga e tua haaku ke lolelole lahi. Ne gahua lahi e tau matua haaku ke taute e tau mena oti ne maeke ia laua ke takitaki au ke he puhala tonu, ka e tiaki ai e au e lagomatai ha laua. He nakai iloa e laua, ne lafi au mo e tau fuata ne nakai fakalilifu lahi ke he pule. Manako au ke he tokanoaaga he puhala moui ha lautolu. Ko mautolu ne patī (party) tumau, mahani feuaki fakalialia, mo e fakaaoga hehē e tulaki mo e kava. Fakamua, ne fiafia au ke feoaki mo e tau tagata ne tuga kua moua e moui fiafia lahi.

Mooli ai, ne nakai fiafia katoatoa au. Nakai fai kakano e moui mo e tau kapitiga nā; nakai fai ia lautolu ne manamanatu lahi ke he ha mena. He taha faahi, ne tupetupe au ke he tau matakupu tuga e holofa he nakai fakafili tonu he lalolagi. Fai magaaho, ne fakaatukehe lahi au.

PUHALA NE HIKI HE TOHI TAPU E MOUI HAAKU: Taha aho ne 17 e tau he moui haaku, ne fakaatukehe lahi mahaki au. He mailoga e nakai fiafia haaku, ko e matua fifine ne ole mai ki a au ke liu fakaako e Tohi Tapu. Ne fakamalolō e ia au ke kumikumi e tau fakaakoaga ha ha i ai ti fifili mogoia ka manako au ke moui fakatatau ki ai po ke nakai. Ko e fakatutalaaga mai he loto ne hiki mooli au mogoia. Ne talia e au ke fakaako e Tohi Tapu mo e taokete fakamua haaku ko Caroline mo e taane haana ko Akif. Ne nakai feaki a ia ko e taha he Tau Fakamooli a Iehova ka e ne eke mo taha he lahi hake. Ha ko e moui kua mole ha Akif, ne manatu au ke tutala fakamooli ki a ia, ne aoga ai ki a au.

Iloa e au kua nakai latatonu e moui haaku ma e Fakamooli, ka e fakamua, ne manatu au ko e mena ne taute he moui haaku ko e mena fakatagata. Ka e mai he fakaakoaga Tohi Tapu, ne mailoga e au ko e mahani haaku kua lauia e tau logonaaga ha Iehova. (Salamo 78:40, 41; Tau Fakatai 27:11) Ne maama foki e au kua lauia ai e falu tagata.

He kumikumi foki e au e Tohi Tapu, ne mailoga e au ha ha i ai e tau kakano tonu mo e mauokafua ke talitonu ai ko e Kupu he Atua. Ma e fakatai, ne fakaako au ke he loga lahi he tau perofetaaga he Tohi Tapu ne fakamooli—mo e ofoofogia lahi e tonutika. Ko e iloilo pihia ne lagomatai au ke fakatotoka e tau fakauaua fakamua haaku.

Kavi ke he taha e tau he mole e kamata e au e fakaako he Tohi Tapu, ne ahiahi e au mo e tau mamatua haaku e tugaane lahi ne gahua ke he lā ofisa he Tau Fakamooli a Iehova i Sihamani. He kitia e au e fiafia lahi he tugaane haaku, ne omoomoi lahi au. Ko e fiafia tonu ia ne kumi au ki ai! Ne nava foki au ke he falu he Tau Fakamooli ne gahua i ai. Ne kehekehe mamao a lautolu mai he tau tagata nakai mahani fakamooli, tutuli-fakamaini ne lafi au ki ai. Nakai leva he mole, ne liogi mai au he loto ki a Iehova, he mavehe ke fekafekau ki a ia ke he vala ne toe he moui haaku. He 19 e tau he moui, ne fakamailoga e au haaku a tukuleleaga ki a Iehova he papatiso.

PUHALA NE AOGA KI A AU: Fai kakano mooli au he moui mogonei. Ne moua e au e fiafia he fakaako e Tohi Tapu ke he falu, he lagomatai a lautolu ke iloa a Iehova mo e haana a tau maveheaga ke he vahā anoiha. Ne aoga foki haaku a magafaoa—nakai liliu a lautolu ke tupetupe hagaao ki a au.

Mailoga e au e tau hehē haaku i tuai, ka e lali au ke nakai manamanatu ki ai. Kua hagaaki ni au ke he fakamagaloaga ha Iehova mo e haana a fiafia fakaalofa ki a au. Ne talia loto katoa e au e tau kupu he Tau Fakatai 10:22, ne pehē: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.”

[Blurb he lau 12]

“Ne patī tumau, mahani feuaki fakalialia, mo e fakaaoga hehē e tulaki mo e kava”

[Blurb he lau 13]

“Mailoga e au e tau hehē haaku i tuai, ka e lali au ke nakai manamanatu ki ai”