Aoga Fēfē a Tautolu he Tau Fakatufono he Atua?

Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau hūhū nei mo koe.

1. Ko e ha kua lata ia tautolu ke omaoma ke he Atua?

Ko e mena hako ni ke omaoma ke he Atua ha kua tufuga e ia a tautolu. Kua omaoma tumau foki a Iesu ke he Atua. (Ioane 6:38; Fakakiteaga 4:11) Ko e tau fakatufono he Atua kua foaki ki a tautolu e puhala ke fakamooli na ofania e tautolu a ia.—Totou 1 Ioane 5:3.

Kua mitaki e tau fakatufono oti ha Iehova ko e Atua ma tautolu. Kua fakaako mai ai ki a tautolu e puhala moui ne mitaki lahi mahaki mogonei mo e fakakite e puhala ki a tautolu ke moua e tau palepale tukulagi he vahā anoiha.—Totou Salamo 19:7, 11; Isaia 48:17, 18.

2. Aoga fēfē e tau fakatufono he Atua ke he malolō tino ha tautolu?

Ko e fakatufono he Atua ke he konahia kua puipui a tautolu mai he gagao mo e tau pakia hagahaga kelea lahi. Kua hufia lahi e molea he inu lahi ti takitaki ke he mahani goagoa. (Tau Fakatai 23:20, 29, 30) Kua fakaatā e Iehova a tautolu ke inu e kava ka e fakalatalata ni.—Totou Salamo 104:15; 1 Korinito 6:10.

Kua hataki foki e Iehova a tautolu ke he mahani mahekeheke, nakai tautaofi e ita, mo e falu aga moumou foki. Ke fakagahua e tautolu e fakatonuaga haana, to aoga e malolō tino ha tautolu.—Totou Tau Fakatai 14:30; 22:24, 25.

3. Maeke fēfē e fakatufono he Atua ke puipui a tautolu?

Fakatapu he fakatufono he Atua e mahani fakataane mo e fifine i fafo he fakamauaga. (Heperu 13:4) Ko e tau hoa kua omaoma e fakatufono nei kua logona hifo e haohao lahi mo e fakatupu e takatakaiaga mitaki ma e tau fanau ha lautolu. He taha faahi, ko e mahani fakataane mo e fifine i fafo he fakamauaga kua fa fua mai e gagao, tau vevehe, favale, pite e tau logonaaga, mo e tau magafaoa matua tokotaha.—Totou Tau Fakatai 5:1-9.

He kalo kehe he tau tuaga kua kamatamata a tautolu ke taute e mahani fakataane mo e fifine i fafo he fakamauaga, kua puipui e tautolu e tuaga kapitiga ha tautolu mo e Atua. Kua kalo kehe foki a tautolu he fakahagahaga kelea e falu.—Totou 1 Tesalonia 4:3-6.

4. Aoga fēfē e fakalilifu he moui ki a tautolu?

Ko e tau tagata kua fakalilifu e mena fakaalofa he moui mai he Atua kua aoga ke he malolō tino ka tiaki e lautolu e tau aga tuga e ula tapaka mo e falu hufiaaga kelea lahi he moui. (2 Korinito 7:1) Kua tokiofa foki he Atua e moui he tama mukemuke ne tupu i loto he nofoaga tama. (Esoto 21:22, 23) Ti kua nakai lata ia tautolu ke tamate pauaki e tama nakaila fanau. Ko lautolu foki kua loto fakaaue ke he onoonoaga he Atua ke he moui kua taute e tau fakatokaaga haohao mitaki he gahuaaga, i kaina, mo e he motokā. (Teutaronome 22:8) Lafi ki ai, nakai fakahagahaga kelea e lautolu e tau momoui ha lautolu ma e tau sipote, ha ko e moui ko e mena fakaalofa mai he Atua.—Totou Salamo 36:9.

5. Aoga fēfē e tapuina he toto ki a tautolu?

Kua tapu e toto he pehē e Atua kua hukui ai e moui he tau mena momoui. (Kenese 9:3, 4) Ko e fakatufono he Atua kua tatai ke he uho he toto ke he moui ti aoga ai ki a tautolu. Fēfē? Kua maeke ai ke fakamagalo e tau agahala.—Totou Levitika 17:11-13; Heperu 9:22.

Ko e toto ha Iesu kua uho pauaki ha kua mitaki katoatoa a ia. Ne foaki e Iesu ke he Atua e mena ne hukui haana moui—ko e haana toto. (Heperu 9:12) Ko e liligi he toto haana kua maeke ai e moui tukulagi ma tautolu.—Totou Mataio 26:28; Ioane 3:16.

Ma e falu vala tala foki, kikite e tau veveheaga 12 mo e 13 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.