Fakamooli ha Tautolu a Matagahua ke he Atua

KUA manamanatu nakai a koe, ‘Ko e heigoa e kakano he moui?’ Ne foaki mai e Iehova ki a tautolu e lotomatala ke hūhū ai ti pihia foki e manako hokulo ke iloa e tali. Fakaaue ai, nakai tokanoa he Atua fakaalofa ha tautolu a tautolu ke tali manatu. Ko e tali ne manako lahi a tautolu ki ai kua haia i loto he haana a Kupu, ko e Tohi Tapu. Manamanatu la ke he tau kupu he Patuiki ko Solomona he Fakamatalaaga 12:13.

Ko Solomona haia he tuaga pauaki. Maeke a ia ke talahau e puhala ke moua e fiafia mo e kakano he moui. Fakamonuina aki e pulotu ofoofogia, muhukoloa lahi mahaki, mo e pule fakapatuiki, ne maeke ia ia ke kumikumi fakamitaki e tau tutuliaga he tagata, putoia e kumiaga he tau koloa mo e talahaua. (Fakamatalaaga 2:4-9; 4:4) Ti, i lalo he omoomoi faka-Atua, ne fakamaama fakakū e ia e tau manatu haana, he pehē: “Kia fanogonogo . . . ke he fakahikuaga he tau mena oti ia, Kia matakutaku a ke he Atua, mo e omaoma ke he hana tau fakatufono; ha ko e mena ia kua lata ke eke he tau tagata oti kana.” Ko e tau kupu nā ne fakakite e foliaga ne mua atu e palepale mo e mitaki he tagata.

“Kia matakutaku a ke he Atua [mooli].” Ko e manatu fakamua ke matakutaku ke he Atua kua liga nakai mitaki. Ka ko e matakutaku nei ko e tuaga mitaki he loto. Liga nakai manamanatu a tautolu ke he tupa ne matakutaku neke fakaita e iki favale ka e ke he tama tote kua makai ke fakafiafia e matua taane ofania haana. Taha talahauaga ne pehē ko e matakutaku ke he Atua ko e “aga he fakalilifu mo e matakutakuina kua fakakite he tau tagata Haana ki a Ia ha ko e fakaalofa ha lautolu ki a Ia mo e fakalilifu ke he Haana malolō mo e mua ue atu Haana.” Ko e aga pihia kua fakalagalaga a tautolu ke muitua ke he finagalo he Atua ha kua fakaalofa a tautolu ki a ia ti iloa e tautolu kua fakaalofa a ia ki a tautolu. Ko e matakutaku mitaki nei nakai ni ko e logonaaga; kua fakakite ai ke he tau gahua. Puhala fe?

“Omaoma ke he hana tau fakatufono.” Omoomoi he matakutaku ke he Atua a tautolu ke omaoma ki a ia. Kua hako ai ke foaki ki a Iehova e omaoma ha tautolu. Ko e Tufuga ha tautolu, kua iloa e ia e puhala mitaki lahi mahaki ke momoui ai a tautolu, tuga ni e tagata talaga ne iloa mitaki lahi mahaki e puhala ke fakaaoga aki e koloa. Lafi ki ai, kua fiafia lahi mahaki a Iehova ki a tautolu. Kua manako a ia ki a tautolu ke fiafia, mo e tau poakiaga haana kua taute ke aoga ai a tautolu. (Isaia 48:17) Ko e aposetolo ko Ioane ne talahau pehē: “Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.” (1 Ioane 5:3) Fakatātā he omaoma ha tautolu a fakaalofa ke he Atua, mo e kua fakaata he haana a tau poakiaga e fakaalofa haana ma tautolu.

“Ko e mena ia kua lata ke eke he tau tagata oti kana.” Peehi he tau kupu nei e kakano aoga ke matakutaku ke he Atua mo e omaoma ki a ia. He taute pihia ko e ha tautolu a matagahua, ha tautolu a kotofaaga. Ko Iehova ko e Tufuga ha tautolu, ti foaki e tautolu ha tautolu a tau momoui ki a ia. (Salamo 36:9) Ti foaki foki e tautolu e omaoma ha tautolu ki a ia. Ka momoui a tautolu ke he puhala kua loto a ia ke momoui ai, kua fakamooli e tautolu e matagahua ha tautolu.

Ti ko e heigoa e kakano he moui? Ke fakamukamuka ai, ko e mena ē: Kua ha ha hinei a tautolu ke taute e finagalo he Atua. Nakai fai puhala mitaki foki ke fakapuke e moui haau ka e he puhala fai kakano. Ko e ha he kumikumi fakalahi hagaao ke he finagalo ha Iehova mo e puhala ka fakalagotatai e moui haau ki ai? To fiafia e Tau Fakamooli a Iehova ke lagomatai a koe.