Hane Fakamoli Kia e Koe e Matagahua Katoatoa Hau ke he Atua?
“Ko e mena to fakafili he Atua e tau gahua oti, katoa mo e tau mena galo oti ni, ko e tau mena mitaki katoa mo e tau mena kelea.”—FAKAMATALAAGA 12:14.
1. Ko e heigoa e tau foakiaga ne taute e Iehova ma e hana tau tagata?
KUA lalago e Iehova a lautolu kua tumau ke manatu a ia ko e ha lautolu a Tufuga Lilifu Lahi. Kua foaki he Kupu mai he agaga hana ki a lautolu e iloilo ne lata ke fakafiafia katoa ki a ia. Kua takitaki he agaga tapu he Atua a lautolu he taute e finagalo faka-Atua mo e “fua mai ai . . . ke he tau gahua mitaki oti.” (Kolose 1:9, 10) Lafi ki ai, kua foaki e Iehova e tau mena kai fakaagaga mo e hatakiaga fakateokarasi puhala mai he “fekafekau fakamoli mo e loto matala.” (Mataio 24:45-47) He tau puhala loga, mogoia, ko e tau tagata he Atua kua moua e tau monuina he lagi he fekafekau a lautolu ki a Iehova mo e taute e gahua aoga he fakamatala e tala mitaki he Kautu.—Mareko 13:10.
2. Hagaao ke he fekafekauaga ki a Iehova, ko e heigoa e tau huhu kua mafutafuta mai?
2 Kua fiafia e tau Kerisiano moli ke lavelave ke he fekafekauaga tapu ki a Iehova. Ka e, falu kua fakalolelole mo e manatu ko e tau laliaga ha lautolu kua nakai fai kakano. Falu magaaho, tuga anei, kua liga manamanatu e tau Kerisiano tukulele kaeke kua aoga moli ha lautolu a tau laliaga eketaha. Ka fakaata ke he fakaakoaga fakamagafaoa mo e falu matagahua, ko e tau huhu pehenei kua liga mafutafuta mai he manamanatuaga he ulu magafaoa: ‘Kua fiafia moli kia a Iehova ke he mena hane taute e tautolu? Hane fakamoli kia e tautolu e matagahua katoatoa ha tautolu ke he Atua?’ Ko e tau kupu pulotu he tagata fakamatala kupu kua lagomatai a tautolu ke tali e tau huhu pihia.
Fakateaga Kia e Tau Mena Oti?
3. He taofi ke he Fakamatalaaga 12:8, ko e heigoa e kakano he fakateaga lahi?
3 Kua manamanatu e falu ko e tau kupu he tagata pulotu kua nakai fakamalolo lahi ke he ha tagata—fuata po ke fuakau. “Kua pehe mai a ia kua fakamatala kupu, Ko e tau mena fakateaga lahi, kua fakateaga e tau mena oti ni.” (Fakamatalaaga 12:8) Moli, ko e fakateaga lahi ke fakaheu e Tufuga Lilifu Lahi he vaha fuata, ke fuakau ka e nakai fekafekau ki a ia, mo e ko e vaha fuakau ni ke fakakite e moui loa hana. Ko e tau mena oti kua fakateaga, po ke gatigati, ma e tagata pihia, pete ni kua mate a ia mo e muhu koloa mo e talahaua he lalolagi nei kua ha ha he pule hana ne kelea, ko Satani ko e Tiapolo.—1 Ioane 5:19.
4. Ko e ha ne talahau ai kua nakai fakateaga e tau mena oti?
4 Nakai fakateaga e tau mena oti ma lautolu kua tanaki e tau koloa he lagi tuga e tau fekafekau fakamoli a Iehova. (Mataio 6:19, 20) Kua lahi e mena ha lautolu kua taute he gahua palepale mitaki he Iki, mo e ko e tau gahua pihia kua moli ni ke nakai fakateaga. (1 Korinito 15:58) Kaeke ko e tau Kerisiano tukulele a tautolu, kua fakatumau nakai a tautolu ke lavelave ke he gahua ne kotofa he Atua he tau aho fakamui nei? (2 Timoteo 3:1) Po kua moua e tautolu taha puhala moui kua kehe fakatote mai he tau katofia ha tautolu? Liga kua feoaki a lautolu mo e tau lotu kehekehe mo e liga kua malolo lahi he o atu tumau ke he tau fale he tapuakiaga mo e lali ke taute e puhala ha lautolu he tapuakiaga ne kua lata mo lautolu. Moli, nakai ko e tau tagata fakapuloa a lautolu he fekau he Kautu. Nakai ha ha ia lautolu e iloilo tonu ko e “vaha ke fakahiku ai” anei mo e nakai fai fakamafitiaga hagaao ke he vaha kua nonofo ai a tautolu.—Tanielu 12:4.
5. Kaeke ko e matapatu kapeletu e tau tutuliaga fa mahani he tau momoui ha tautolu, ko e heigoa kua lata ia tautolu ke taute?
5 Ne pehe a Iesu Keriso hagaao ke he tau aho fakamui ha tautolu: “Ka e tuga e vaha kia Noa, to eke pihia foki ka hau e Tama he tagata. Ha ko e mena tuga ne eke ke he vaha ka e nakaila hoko e fakapuke, ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, ti nakai iloa e lautolu ato hoko mai e fakapuke, mo e uta kehe a lautolu oti; to pihia foki ka hau e Tama he tagata.” (Mataio 24:37-39) Fakalatalata ai, nakai fai mena kelea e kai mo e inu, mo e ko e fakamauaga na fakatoka fakamua ni he Atua. (Kenese 2:20-24) Ka e, ka mailoga e tautolu ko e tau tutuliaga fa mahani he moui kua eke mo matapatu kapeletu ha tautolu, he ha he manamanatu e mena nei ke he liogi? To lagomatai e Iehova a tautolu ke tuku fakamua tumau e tau mena he Kautu, taute e mena kua hako, ti fakamoli e matagahua ha tautolu ki a ia.—Mataio 6:33; Roma 12:12; 2 Korinito 13:7.
Tukuleleaga mo e Matagahua ha Tautolu ke he Atua
6. Ke he puhala aoga fe ne kaumahala e falu tagata papatiso ke fakamoli ha lautolu a matagahua ke he Atua?
6 Ko e falu Kerisiano papatiso kua lata ke liogi fakamakai ha kua nakai fakatumau a lautolu ke he tau kotofaaga lagomatai ne talia e lautolu he magaaho ne tukulele a lautolu ke he Atua. He tau tau takitaha, kua molea muatua e 300,000 ne papatiso ke he loga e tau mogonei, ka ko e numera katoatoa he Tau Fakamoli a Iehova ne makaukau agaia kua nakai tatai. Ko e falu ne eke mo tau tagata fakailoa he Kautu kua nakai tuai fakapuloa e tala mitaki. Ka e, kua lata e tau tagata takitaha ke fai kakano lahi he fekafekauaga Kerisiano ato papatiso a lautolu. Ti kua mailoga e lautolu e poakiaga ne age e Iesu ke he tau tutaki oti hana: “Kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu. Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20) Ato pehe ai ni ke ha ha ia lautolu e tau fakakaupaaga lalahi ha ko e malolo tino po ke falu mena foki ne nakai maeke ia lautolu ke taofi, ko lautolu ne papatiso ne kua nakai tuai fekafekau ko e Tau Fakamoli kua nakai hakahakau he Atua mo Keriso ne kua nakai fakamoli ke he matagahua katoatoa ha lautolu ki mua he Tufuga Lilifu Lahi ha tautolu.—Isaia 43:10-12.
7. Ko e ha kua fakapotopoto fakalataha tumau a tautolu ma e tapuakiaga?
7 Ko Isaraela i tuai ko e motu ne tukulele ke he Atua, mo e i lalo hifo he maveheaga he Fakatufono, na fai kotofaaga e tau tagata ne ha ha i ai ki mua a Iehova. Tuga anei, ko e tau tagata tane oti kua lata ke fakapotopoto ke he tolu e galue he tau, mo e tagata tane ne nakai fakamanatu pauaki e Paseka kua “vevehe kehe” he mate. (Numera 9:13; Levitika 23:1-43; Teutaronome 16:16) Ke fakakatoatoa e matagahua ha lautolu ke he Atua ko e hana tau tagata tukulele, ne lata e tau Isaraela ke fakapotopoto ma e tapuakiaga. (Teutaronome 31:10-13) Nakai fai mena he Fakatufono ne talahau, ‘Taute e mena nei kaeke ke felauaki mo e moui hau.’ Ma lautolu kua tukulele mogonei ki a Iehova, ko e poakiaga nei kua peehi malolo moli ke he tau kupu a Paulo: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki. Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) E, he fakapotopoto tumau mo e tau tagata talitonu ko e vala haia he matagahua he Kerisiano tukulele ke he Atua.
Fokifoki Fakamitaki e Tau Fifiliaga Hau!
8. Ko e ha kua lata e tagata fuata tukulele ke manamanatu he liogi ke he fekafekauaga tapu hana?
8 Liga ko e tagata fuata a koe ne tukulele ki a Iehova. Ko e tau fakamonuinaaga loga hau kaeke ke tuku fakamua e koe e tau mena he Kautu he moui hau. (Tau Fakatai 10:22) Fakalataha e liogi mo e pulega fakamitaki, ti liga maeke ia koe ke fakaaoga e vaha fuata hau ke he taha puhala fekafekauaga tumau—ko e puhala mitaki ke fakakite kua manatu e koe e Tufuga Lilifu Lahi hau. Neke nakai pihia, ti kamata agataha e tau mena fakatino ke fakapuke aki e lahi he magaaho mo e kitekiteaga hau. Tuga ni e laulahi, kua liga fai tokoua tuai a koe he moui mo e muhu kaitalofa ai ke moua e tau koloa tino. Ko e feua tupe lahi kua kaiha lahi e magaaho mo e malolo hau. Ka fai fanau a koe, to fua e koe e tau matagahua fakamagafaoa ke he tau hogofulu tau. (1 Timoteo 5:8) Kua liga nakai nimo e koe e Tufuga Lilifu Lahi hau, ka kua pulotu ni ke mailoga ko e pulega tuai hau, po ke nakai fai pulega, ka fakatoka e puhala ma e moui fuata lahi hau. He tau tau fakamui hau, to liu a koe ke ono ki tua mo e manatu kua fakaaoga fakalahi tuai e moui fuata hau ke he fekafekauaga tapu ke he Tufuga Lilifu Lahi ha tautolu. He ha he manamanatu e tau amaamanakiaga hau ke he liogi he magaaho tonu nei, ke maeke ia koe ke moua e makona he fekafekauaga tapu hau ki a Iehova he vaha fuata hau?
9. Ko e heigoa kua liga maeke ma e taha ne kua fuakau lahi mo e he taha vaha ne fua e matagahua mamafa he fakapotopotoaga?
9 Manamanatu la ke he taha fakatokaaga he tau tutuaga—he tagata tane ne eke mo leveki he “fuifui mamoe he Atua” he taha vaha. (1 Peteru 5:2, 3) Ma e falu kakano, kua tiaki noa e ia e tau matagahua pihia. Moli, kua fuakau a ia mogonei, ti liga uka lahi ia ia ke hahamo e fekafekauaga he Atua. Ka e nakai kia kua lata foki ia ia ke liu foli atu ke he tau kotofaaga fakateokarasi? Ko e tau monuina ha ia ma e tagata tane pihia kua liga ta mai ke he falu kaeke ke maeke ia ia ke hahamo loga e kotofaaga he fakapotopotoaga! Ha kua nakai moui taha ia tautolu ha ko ia ni, ko e tau kapitiga mo lautolu e tau fakahelehele to fiafia ka maeke ia ia ke fakalahi hana fekafekauaga, ke he fakahekeaga he Atua. (Roma 14:7, 8) Lafi ki ai, to nakai nimo e Iehova ha mena kua taute he ha tagata he hana fekafekauaga. (Heperu 6:10-12) Ti, ko e heigoa ka taute e tautolu ke manatu e Tufuga Lilifu Lahi ha tautolu?
Tau Lagomataiaga ke Manatu e Tufuga Lilifu Lahi ha Tautolu
10. Ko e ha e tagata fakamatala kupu kua haia he tuaga mitaki lahi mahaki ke foaki e tau takitakiaga ke manatu e Tufuga Lilifu Lahi ha tautolu?
10 Ko e tagata fakamatala kupu ne ha ha ai ke he tuaga mitaki lahi mahaki ke foaki e tau takitakiaga ma tautolu ke manatu e Tufuga Lilifu Lahi ha tautolu. Ne fita e tali e Iehova e tau liogi mai he loto hana he foaki ki a ia e pulotu mua ue atu. (1 Tau Patuiki 3:6-12) Ne taute e Solomona e kumikumiaga fakamakutu ke he moui katoa he tau mena he tagata. Lafi ki ai, ne omoomoi faka-Atua a ia ke taute e tau mouaaga hana ke tohi ke maeke ke aoga ai e falu. Ne tohi e ia: “Ne mua e iloilo Hana ne fakamatala kupu, ko e mena ia ne homo atu a ia he fakaako atu ke he tau tagata ke iloilo ai; ti manamanatu a ia, mo e kumi, mo e taute ai e tau fakatai loga. Ne kumi a ia ne fakamatala kupu ke moua e tau kupu ke fiafia ai e tau tagata; ko e tau mena foki kua tohi ko e tonu ia, ko e tau kupu moli ni.”—Fakamatalaaga 12:9, 10.
11. Ko e talia he ha e tautolu e tomatomaaga pulotu ha Solomona?
11 Ko e tohiaga he Septuagint Heleni ke he tau kupu nei kua totou: “Ti lafi ki ai, ha kua pulotu e tagata fakamatala, ha kua fakaako e ia e pulotu ke he tau tagata; ke liga maeke he teliga ke fulufuluola e logonaaga mai he tau fakataiaga, kua kumi fakahokulo e tagata fakamatala ke moua e tau kupu mitaki mo e tohi hakotonu—ko e tau kupu moli.” (The Septuagint Bible, fakaliliu e Charles Thomson) Ne fakamakutukutu a Solomona ke hokotia ke he tau loto he tau tagata totou hana e tau kupu mitaki mo e fulufuluola moli mo e aoga. Ha kua eke e tau kupu hana he tau Tohiaga Tapu ke fakalagalaga he agaga tapu, kua maeke ia tautolu ke nakai fakauaua he talia hana tau kumikumiaga mo e tomatomaaga pulotu.—2 Timoteo 3:16, 17.
12. He tau kupu ni hau, fakamaama fefe e koe e mena ne talahau e Solomona ne fakamau he Fakamatalaaga 12:11, 12?
12 Pihia foki ni he nakai ha ha i ai e tau puhala lolomi fou, ne loga lahi e tau tohi kua moua ke he vaha ha Solomona. Fefe e onoonoaga ke he tau tohi ia? Ne pehe a ia: “Ko e tau kupu he tau tagata iloilo kua tuga ne tau huki ia ne ta hoka aki e tau povi, po ke tau fao kua fakamau ai e tau patu he tau fakapotopotoaga kua kotofa ia he leveki mamoe ne tokotaha. Hanai, haku tama na e, kia fakaako ai a koe ia lautolu; nakai fai fakahikuaga he tohi e tau tohi loga; ko e kumi lahi foki ke he tau kupu kua lolelole ai e tino.”—Fakamatalaaga 12:11, 12.
13. Fakamoli fefe e lautolu kua moua e pulotu faka-Atua ke eke mo tau huki ne ta hoka aki e tau povi, mo e ko hai a lautolu kua tuga e “tau fao kua fakamau”?
13 Ko e tau kupu ha lautolu kua moua e pulotu faka-Atua kua moli ni ke tuga e tau huki ne ta hoka aki e tau povi. Pihia fefe? Ne hukihuki e lautolu e tau tagata totou po ke fanogonogo ke taute e tau fakatolomakiaga ke lagotatai mo e tau kupu pulotu kua totou po ke logona. Lafi ki ai, ko lautolu kua lavelave ke he tau ‘kupu kehekehe’ po ke tau talahauaga kua pulotu moli mo e aoga, kua tuga e “tau fao kua fakamau ai,” po ke mau nivaniva. Liga pihia e mena nei ha ko e tau kupu mitaki he tau tagata takitaha kua fakaata e pulotu a Iehova mo e ko e mena ia kua eke ai ke fakamauniva mo e atihake e tau tagata totou po ke tau tagata fanogonogo. Kaeke ko e matua matakutaku Atua a koe, nakai kia lata ia koe ke taute ha laliaga ke feaki e pulotu pihia he manamanatuaga mo e loto he tama hau?—Teutaronome 6:4-9.
14. (a) Ke he tau tohi fefe kua nakai aoga ke foaki e “kumi lahi”? (e) Ko e heigoa e tohi kua lata ke manamanatu fakalahi ki ai, mo e ko e ha?
14 Ko e ha ne talahau ai e Solomona e mena ne taute e ia ke he tau tohi? Fakatatai ai mo e Kupu a Iehova, ko e tau pega volume he lalolagi nei kua toka ai e tau fakakakanoaga fakatagata hokoia. Ko e lahi he manamanatuaga nei kua fakaata e manatu a Satani ko e Tiapolo. (2 Korinito 4:4) Mena ia, ko e “kumi lahi” ke he tau mena fakalalolagi kua nakai lahi e aoga tukulagi. Moha ia, ko e mena lahi ko e moumouaga fakaagaga. Tuga a Solomona, kia manamanatu fakahokulo la tautolu ke he mena kua talahau he Kupu he Atua hagaao ke he moui. To fakamalolo he mena nei e tua ha tautolu mo e fakatata lahi atu a tautolu ki a Iehova. Ko e matakite fakalahi ke he falu tohi po ke punaaga he fakaakoaga ka fakalolelole a tautolu. Mua atu kaeke ko e tau tohi ia mai he fakakakanoaga fakalalolagi ne kua totoko mo e pulotu faka-Atua ne kua nakai ati hake mo e moumou e tua ke he Atua mo e hana tau finagalo. Ti, ko e mena ia, kia manatu e tautolu ko e tau matohiaga aoga lahi he vaha ha Solomona mo e ha tautolu ni ko e tau matohiaga kua fakaata e pulotu he “leveki mamoe ne tokotaha,” ko Iehova ko e Atua. Ne foaki e ia 66 e tohi he tau Tohiaga Tapu, ti he mena nei kua lata ia tautolu ke fakamakutu fakalahi e kitekiteaga. Ko e Tohi Tapu mo e tau tohi lagomatai he “fekafekau fakamoli” kua fakamalolo a tautolu ke moua “e iloilo ke he Atua.”—Tau Fakatai 2:1-6.
Ko e Matagahua Katoatoa ha Tautolu ke he Atua
15. (a) Talahau fefe e koe e tau kupu a Solomona hagaao ke he “[“matagahua katoatoa] he tau tagata oti kana”? (e) Ko e heigoa ha tautolu kua lata ke taute kaeke ke fakamoli e tautolu e matagahua ha tautolu ke he Atua?
15 He fakamaama oti e fokifokiaga katoa hana, ko e tagata fakamatala, ko Solomona, kua talahau: “Kia fanogonogo a a tautolu ke he fakahikuaga he tau mena oti ia, kia matakutaku a ke he Atua, mo e omaoma ke he hana tau fakatufono; ha ko e [“matagahua katoatoa,” NW] he tau tagata oti kana. Ha ko e mena to fakafili he Atua e tau gahua oti, katoa mo e tau mena galo oti ni, ko e tau mena mitaki katoa mo e tau mena kelea.” (Fakamatalaaga 12:13, 14) Ko e matakutaku mitaki, po ke fakalilifu ke he Tufuga Lilifu Lahi ha tautolu ka puipui a tautolu, mo e amanaki ai ko e tau magafaoa ha tautolu, mai he kumikumi fakagoagoa ai ke he puhala he moui ka ta mai e tau matematekelea loga mo e mamahi ki a tautolu mo e tau fakahelehele ha tautolu. Ko e matakutaku mitaki ke he Atua kua tavana mo e ko e kamataaga he pulotu mo e iloilo. (Salamo 19:9; Tau Fakatai 1:7) Kaeke ke moua e tautolu e maamaaga fakave ke he Kupu mai he agaga he Atua mo e fakaaoga ai e tomatomaaga ke he tau mena oti, to fakakatoatoa e tautolu e “matagahua katoatoa” ke he Atua. Nakai, ko e mena ke taute e tautolu e tohi loa he tau matagahua. Ka kua lata ke onoono a tautolu ke he tau Tohiaga Tapu ka fakatonutonu e tau lekua he moui mo e taute tumau e tau mena he puhala he Atua.
16. Hagaao ke he fakafiliaga, ko e heigoa ha Iehova ka taute?
16 Kua lata ia tautolu ke mailoga kua nakai fai mena ne galo noa he Tufuga Lilifu Lahi ha tautolu. (Tau Fakatai 15:3) “To fakafili [e Ia] e tau gahua oti.” E, to fakafili he Mua Ue Atu e tau mena oti kana, putoia foki e tau mena galo ke he tau tagata. Ko e mataala ke he tau mena pihia ka lagomatai mo fakalaga ke muitua ke he tau poakiaga he Atua. Ka ko e fakalaga ne mua kua lata ko e fakaalofa ma e Matua ha tautolu he lagi, ha kua tohia he aposetolo ko Ioane: “Ha ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.” (1 Ioane 5:3) Ha kua talaga e tau poakiaga he Atua ke fakatolomaki e fiafia tukulagi ha tautolu, moli kua nakai ni tonu hokoia ka kua pulotu moli ke muitua ki ai. Nakai mamafa e mena nei ma e tau tagata ne ofania e Tufuga Lilifu Lahi. Manako a lautolu ke fakakatoatoa ha lautolu a matagahua ki a ia.
Fakamoli e Matagahua Katoatoa Hau
17. Ko e heigoa ha tautolu ke taute ka manako moli a tautolu ke fakamoli e matagahua katoatoa ha tautolu ke he Atua?
17 Ka pulotu a tautolu mo e manako moli ke taute hana matagahua katoatoa ke he Atua, he nakai ni ke taute e tau poakiaga hana, to ha ha ia tautolu e matakutaku fakalilifu he nakai fakaita a ia. Moli, “ko e matakutaku kia Iehova, ko e kamataaga ia he iloilo,” mo lautolu kua muitua ke he hana tau poakiaga kua ha ha i ai e “loto manamanatu hifo mitaki.” (Salamo 111:10; Tau Fakatai 1:7) Ti kua lata ni a tautolu ke gahuahua fakapulotu mo e omaoma ki a Iehova ke he tau mena oti. Mua atu e aoga he mena nei he magaaho nei, ha kua ha ha hinei e Patuiki ko Iesu Keriso, mo e ko e aho he fakafiliaga hana ko e Iki Fakafili ne kotofa he Atua kua tata lahi mai.—Mataio 24:3; 25:31, 32.
18. Ko e heigoa e fua ma tautolu kaeke ke fakamoli e tautolu e matagahua katoatoa ha tautolu ki a Iehova ko e Atua?
18 Igatia oti a tautolu mogonei mo e haia i lalo he filifilia faka-Atua. Hagahaga fakaagaga nakai a tautolu, po kua fakaata e tau fakaohoohoaga fakalalolagi ke fakalolelole e fakafetuiaga ha tautolu mo e Atua? (1 Korinito 2:10-16; 1 Ioane 2:15-17) He fuata po ke fuakau, kia igatia oti a tautolu mo e taute e mena kua fakafiafia e Tufuga Lilifu Lahi ha tautolu. Kaeke ke omaoma a tautolu ki a Iehova mo e taofi hana tau poakiaga, to tiaki e tautolu e tau mena fakateaga he lalolagi tuai nei hane mole atu. Ti manamanatu atu a tautolu ke he amaamanakiaga he moui tukulagi ke he fakatokaaga fou he tau mena ne mavehe mai he Atua. (2 Peteru 3:13) Ko e tau amaamanakiaga mua ue atu nei ma e tau tagata oti kua fakamoli ha lautolu a matagahua katoatoa ke he Atua!
To Tali Fefe e Koe?
◻ Ko e ha ne talahau ai a ko e nakai fakateaga e tau mena oti?
◻ Ko e ha kua lata ai e Kerisiano fuata ke manamanatu he liogi ke he hana a fekafekauaga tapu?
◻ Ko e tau tohi fefe ka nakai aoga ke foaki e “kumi lahi”?
◻ Ko e heigoa e “[gahua katoatoa he tagata] he tau tagata oti kana”?
[Fakatino he lau 14]
Nakai fakateaga e tau mena oti ma lautolu kua fekafekau ki a Iehova
[Fakatino he lau 17]
Nakai tuga e tau tohi loga he lalolagi nei, kua hahau mo e aoga e Kupu he Atua