Lata Nakai e Tau Matua ke Fakaako e Fanau ha Lautolu ke he Mahani Fakataane mo e Fifine?

▪ Tokologa lahi e tau matua ne gahua lahi ke puipui ha lautolu a tau fanau mai he moua he tau gagao hagahaga kelea. Kua lata e tau matua ke taute e tau laliaga pihia ke puipui ha lautolu a tau fanau mai he tau aga hagahaga kelea. Taha puhala ke taute pihia e lautolu he foaki e fakaakoaga lagotatai hagaao ke he mahani fakataane mo e fifine. (Tau Fakatai 5:3-23) Kua aoga e fakaakoaga pihia mo e takitakiaga he tau mahani mitaki mai he tau matua ha kua fakatapakupaku lahi mahaki e tau fanau ke he tau ata fakalialia he mahani feuaki he televisoni mo e he Internet, tau tohi mo e tau komiki.

“Ko e lekua he vahā nei, nakai fakaako e tau fanau ha tautolu hagaao ke he mahani fakataane mo e fifine,” he fakamaama e Diane Levin ko e Porofesa he fakaakoaga mo e tagata tohia. “Ko e lekua ko e tau mena kua fakaako e lautolu, ko e tau tau he moui hane fakaako ai e lautolu, mo e tagata kua fakaako a lautolu. Kua moua he tau fanau e vahega fakaakoaga ke he mahani fakataane mo e fifine ne malolō lahi mo e hagahaga kelea lahi mai he tau tagata fakafua koloa mo e mahani fakamotu talahaua.”

Kua lata e tau matua ke puipui e tau fanau ha lautolu mai he tau onoonoaga fakakeukeu mo e kelea kua moumou e kaufakalatahaaga. (Tau Fakatai 5:1; Efeso 6:4) Kua lata e tau fanau ikiiki ke iloa e puhala he gahuahuaaga he tau tino ha lautolu, puhala ke leveki e tau tino ha lautolu, mo e puhala ke puipui e lautolu a lautolu mai he tau tagata kolokolovao. Ato fuata mui—ko e tau tau he moui ne kamata ke kitia e motua he mahani fakataane mo e fifine—kua lata e tama fifine ke iloa hagaao ke he tau hikihikiaga ke tupu ke he tino haana mo e ke maama e kakano mo e puhala ne gahuahua e gagao fifine he mahina. Pihia foki, kua lata e tama taane ke iloa tuai hagaao ke he pā he puke vai ka mohe he pō. He ikiiki e fanau, maeke e tau matua ke fakaako ki a lautolu e tau matahigoa hako he tau faahi tino. Fakaako he tau matua fakaalofa ke he ha lautolu a tau fanau tolu e matapatu fakaakoaga hagaao ke he tau faahi tino nei: (1) Kua uho mo e tapu e tau mena nei. (2) Kua nakai lata e tau mena nei ke fakatutala ai he puhala kelea. (3) Ko e tau mena nei kua nakai lata ke aamo po ke fakakite ke he falu. He lalahi hake e tau fanau, kua lata e tau matua ke iloa e magaaho tonu ke fakamaama e puhala ke fai tama e fifine.a

Kua lata ke kamata he magaaho fē he tau matua e fakaakoaga pihia? Lata ke kamata tuai ne nakai mailoga he tokologa. Liga moua he tama fifine e gagao fifine fakamua he 10 e tau tau he moui po ke moua tuai foki. Ko e tama taane liga pā fakamua e puke vai haana he pō he 11 po ke 12 e tau tau he moui. Ko e tau lakaaga nei ne hikihiki e moui kua maeke ke fakatupetupe ka nakai maama he tau fanau e mena kua tupu. Kua lata ke fakamafana tuai ke he tau fanau kua nakai hepe e tau tupuaga pauaki he tau tino ha lautolu. Ko e magaaho anei foki ke lagomatai a lautolu ke maama e uho mo e aoga ke mumuitua ke he tau tutūaga mitaki he Tohi Tapu—ko e mena fa kaumahala ke foaki he laulahi he tau fakaakoaga fakalalolagi ke he mahani fakataane mo e fifine.—Tau Fakatai 6:27-35.

[Matahui Tala]