Taute Loto Katoa e Tau Poa ki a Iehova
‘Ko e tau mena oti foki kua eke e mutolu kia eke mo e loto, tuga ne eke ki a Iehova.’—KOLO. 3:23.
1-3. (a) Kakano kia e mate ha Iesu he akau fakakikiveka kua nakai manako a Iehova ke he ha poa mai ia tautolu? Fakamaama. (e) Ko e heigoa e hūhū hagaao ke he tau poa he vahā nei?
KE HE senetenari fakamua V.N., ne fakakite e Iehova ke he tau tagata haana ko e poa lukutoto ha Iesu ne utakehe e Fakatufono faka-Mose. (Kolo. 2:13, 14) Ko e tau poa foaki oti ne taute he tau Iutaia he tau teau tau kua mole ne nakai latatonu mo e nakai fai aoga foki. Ne fakamooli he Fakatufono e gahuaaga i ai ko e “leveki tama, ke takitaki . . . kia Keriso.”—Kala. 3:24.
2 Nakai pehē e mena ia kua nakai fiafia foki e tau Kerisiano ke he tau poa. Kehe mamao, na tutala e aposetolo ko Peteru ke lata ke “ta atu e tau poa kua lata mo e agaga ke fiafia ki ai e Atua ha ko Iesu Keriso.” (1 Pete. 2:5) Pihia foki, ne talahau fakamaali he aposetolo ko Paulo ko e moui he Kerisiano tukulele—ko e tau vala oti i ai—ka latatonu ke manamanatu ki ai ko e “poa.”—Roma 12:1.
3 Ti ko e mena ia, kua taute he Kerisiano e tau foakiaga ki a Iehova, he foaki e tau mena pauaki ki a ia po ke tuku ki tua e falu mena ha ko ia. He fakavē ke he mena ne iloa e tautolu hagaao ke he tau poakiaga ma e tau Isaraela, maeke fēfē a tautolu ke iloa ko e tau poa oti ha tautolu he vahā nei kua talia ki a Iehova?
HE MOUI HE TAU AHO TAKITAHA
4. Ko e heigoa kua lata ia tautolu ke manatu hagaao ke he tau matagahua he moui he tau aho takitaha?
4 He taute e tau matagahua ha tautolu ke he tau aho takitaha he tau momoui ha tautolu, liga uka ai ke matutaki e tau matagahua ha tautolu ke he taute e tau poa ma Iehova. Ko e gahua kaina, gahua aoga, gahua tupe, fakatau, mo e falu foki ne liga matutaki tote mo e tau mena fakaagaaga. Ka e, ka tukulele e moui haau ki a Iehova po ke amaamanaki ke taute pihia he vahā anoiha ne tata mai, ko e aga ne onoono a koe ke he tau matagahua fa mahani kua aoga lahi. Ko tautolu ko e tau Kerisiano 24 tulā he aho. Kua lata ke fakagahua e tau matapatu fakaakoaga faka-Tohi Tapu ke he tau faahi oti he tau momoui ha tautolu. Ti tomatoma e Paulo a tautolu: “Ko e tau mena oti foki kua eke e mutolu kia eke mo e loto, tuga ne eke ke he Iki [Iehova], ka e nakai ke he tau tagata.”—Totou Kolose 3:18-24.
5, 6. Ko e heigoa e tau manatu kua lata ke lauia e tau puhala he tauteuteaga mo e tau mahani ha tautolu he tau aho takitaha?
5 Ko e tau matagahua he Kerisiano he tau aho takitaha kua nakai fai vala he haana a fekafekauaga tapu. Ka e tomatoma e Paulo a tautolu ke gahua he ‘eke mo e loto katoa ki a Iehova’ kua fakamanamanatu a tautolu ke he puhala katoa he moui ha tautolu. Liga fakagahua fēfē e tautolu e mena nei ki a tautolu ni? Mahani mo e tauteute lilifu tumau kia a tautolu he tau magaaho oti? Po ke he taute e tautolu e tau matagahua he tau aho takitaha, liga fuafuakelea kia a tautolu ke fakakite a tautolu ko e Tau Fakamoli a Iehova, ha ko e puhala kua mahani po ke puhala he tauteuteaga ha tautolu? Kia nakai pihia a tautolu! Ko e tau tagata a Iehova to nakai manako ke taute ha mena kua liga fakakelea e higoa mitaki he Atua.—Isaia 43:10; 2 Kori. 6:3, 4, 9.
6 Kia kumikumi a tautolu ke he puhala he manako ke gahua mo e ‘loto ki a Iehova’ ne lauia e tau faahi kehekehe he moui. He taute pihia e tautolu, tokaloto ko e tau poa oti ne foaki he tau Isaraela ki a Iehova kua lata ke mitaki lahi mahaki ai.—Esoto 23:19.
PUHALA NE LAUIA E MOUI HAAU
7. Ko e heigoa ne putoia ke he tukuleleaga faka-Kerisiano?
7 He tukulele e koe e moui haau ki a Iehova, ne taute e koe e fifiliaga makai ia, pihia nakai? Ati pehē a koe, ke he tau faahi oti he moui haau, to tuku fakamua e koe a Iehova. (Totou Heperu 10:7.) Ko e fifiliaga mitaki a ia. Nakai fakauaua kua kitia e koe ka kumi e koe e finagalo a Iehova ke he manatu mo e eketaha ke gahua fakatatau ki ai, to mitaki lahi mahaki e tau fua. (Isaia 48:17, 18) Ko e tau tagata he Atua kua tapu mo e fiafia ha kua fakaata e lautolu e tau mahani Haana kua fakaako a lautolu.—Levi. 11:44; 1 Timo. 1:11.
8. Ko e heigoa e aoga i ai ki a tautolu kua onoono a Iehova ke he tau poa i tuai ke tapu?
8 Ko e tau poa ne taute he tau Isaraela ki a Iehova ne kua tapu ai. (Levi. 6:25; 7:1) Ko e kupu Heperu ne fakaliliu “tapuina” ne talahau e manatu he vevehe kehe, fakatoka kehe, po ke fakatapu ke he Atua. Ke maeke he tau poa ha tautolu ke talia ki a Iehova, kua lata ke vevehe kehe mai mo e nakai ilaila he tau fakaohoohoaga fakalalolagi. Nakai lata ia tautolu ke fiafia ke he tau mena ne vihiatia e Iehova. (Totou 1 Ioane 2:15-17.) Maaliali ai, kakano e mena nei ke kalo kehe a tautolu mai he tau feoakiaga po ke tau putoiaaga ke fakailaila a tautolu mai he tuaga he Atua. (Isaia 2:4; Fakakite. 18:4) Kakano foki kua nakai lata ia tautolu ke fakaatā e tau mata ha tautolu ke onoono tumau ke he tau mena nakai meā po ke tau mahani feuaki po ke fakaatā e tau manamanatuaga ha tautolu ke miti ke he tau mena ia.—Kolo. 3:5, 6.
9. Aoga fēfē e mahani he Kerisiano ke he falu, ti ko e ha?
9 Ne fakamafana e Paulo e tau matakainaga talitonu: “Aua neke nimo ia mutolu ke mahani mitaki atu mo e fakaalofa atu; ha ko e tau poa pihia kua fiafia ai e Atua.” (Hepe. 13:16) Ti ko e mahani mitaki mo e taute e tau mena mitaki ma e falu ko e taha mena kua onoono a Iehova ki ai ko e poa kua talia ki a ia. Ko e manamanatu fakaalofa ke he falu ko e fakamailoga maaliali he tau Kerisiano mooli.—Ioane 13:34, 35; Kolo. 1:10.
TAU POA HE TAPUAKIAGA
10, 11. Fēfē e onoonoaga a Iehova ke he fekafekauaga mo e tapuakiaga faka-Kerisiano ha tautolu, ti puhala fe kua lata e mena nei ke lauia a tautolu?
10 Taha he tau puhala maaliali lahi ne taute e tautolu ko e tau Kerisiano ko e tau mena mitaki ma e falu he “ha tautolu a amaamanaki kua talahau atu e tautolu.” Fakaaoga nakai e koe e tau magaaho oti ke fakamatala? Ne ui e Paulo e gahua faka-Kerisiano aoga nei ko e “poa fakaheke ke he Atua kia ia ni, ko e fua haia he tau laugutu ha lautolu, kua fakaaue atu ke he hana [Atua] higoa.” (Hepe. 10:23; 13:15; Hosea 14:2) Loga e mena ka talahau hagaao ke he lahi mo e uho he magaaho ne fakaaoga e tautolu ke fakamatala e tala mitaki he Kautu, ti loga e tau vala he Feleveiaaga Fekafekau ne taute ke fakalagalaga e manamanatuaga ha tautolu ke he manatu nei. He talahau fakakū ai, ha ko e ha tautolu a gahua he fonua mo e fakamatala he tau magaaho noa ko e “poa fakaheke,” ko e vala he tapuakiaga ha tautolu, kua lata e tau poa pihia ke eke mo tau mena kua mua e mitaki ka foaki e tautolu. Na kehekehe e tau tuaga, ko e lahi he magaaho ka fakaaoga e tautolu ke fakapuloa e tala mitaki kua fa fakakite e loto fakaaue ha tautolu ma e tau mena fakaagaaga.
11 Kua fakaaoga tumau he tau Kerisiano e magaaho ke he tapuakiaga fakatagata po ke matakau. Kua manako a Iehova ki a tautolu ke taute pihia. Mooli kua nakai muitua fakakikili a tautolu ke he okiokiaga he Sapati po ke fenoga tumau ke he tau galue ki Ierusalema. Ka ko e tau fakamanatuaga i tuai kua tatai ai ke he moui faka-Kerisiano. Kua amanaki agaia e Atua ki a tautolu ke okioki mai he tau gahua ke mamate ai mo e ke fakaako haana Kupu, liogi, mo e fakalataha ke he tau feleveiaaga Kerisiano. Ti ko e tau ulu magafaoa Kerisiano kua fakalotomatala he taute e tapuakiaga magafaoa mo e tau tagata he tau magafaoa ni ha lautolu. (1 Tesa. 5:17; Hepe. 10:24, 25) Hagaao ke he ha tautolu a tau gahua fakaagaaga, to mitaki ke hūhū hifo ki a tautolu ni, ‘Maeke nakai au ke fakaholo ki mua e puhala he tapuakiaga haaku?’
12. (a) Ko e foaki he tau mena manogi he tapuakiaga i tuai ka fakatatai ke he heigoa he vahā nei? (e) Lata ke lauia fēfē e fakatataiaga nei ke he kakano he tau liogi ha tautolu?
12 Ko e Patuiki ko Tavita ne lologo ki a Iehova: “Kia tumau haku a liogi ke tuga ne tau mena manogi kua vela ki mua hāu.” (Sala. 141:2) Manamanatu fakakū ke he tau liogi haau—hagaao ke he tumau mo e alito he tau liogi. Ko e tohi ha Fakakiteaga kua fakatatai e tau mena manogi ke he “tau liogi haia he tau tagata tapu” ne tahake e tau liogi kua talia ki a Iehova ti tuga e tau mena manogi ke huhunu. (Fakakite. 5:8) I Isaraela i tuai, ko e tau mena manogi kua foaki tumau he fatapoa a Iehova ne kua tauteute fakamitaki mo e hakotika. Kua talia ai ki a Iehova kaeke ke foaki fakatatau ke he tau takitakiaga ne fakatū e ia. (Esoto 30:34-37; Levi. 10:1, 2) Ka fakatoka pihia foki e tau liogi mai he tau loto ha tautolu, ti maeke ia tautolu ke iloa tonu kua talia ai ki a Iehova.
FOAKI MO E MOUA
13, 14. (a) Ko e heigoa e gahua ne taute e Epaferoti mo e fakapotopotoaga Filipi ma Paulo, ti fēfē e logonaaga he aposetolo ki ai? (e) Maeke fēfē a tautolu ke muitua ke he fifitakiaga a Epaferoti mo e tau tagata Filipi?
13 Ko e tau foakiaga fakatupe ne taute ke lalago e gahua he lalolagi katoa kua fakatatai ke he foakiaga lahi po ke tote he poa ha tautolu. (Mare. 12:41-44) He senetenari fakamua V.N., ne fakafano he fakapotopotoaga i Filipi a Epaferoti ki Roma ke leveki e tau manako fakatino a Paulo. Ko e hukui ia he tau tagata Filipi ne maaliali ai ke uta mo ia e mena fakaalofa tupe he fakapotopotoaga. Nakai ko e mogo fakamua anei ne fakakite he tau tagata Filipi e mahani fakamokoi ki a Paulo. Mo e mahani totonu ne manako a lautolu ke atā a Paulo he tau fakaatukehe fakatupe ke maeke a ia ke foaki fakalahi e magaaho ke he fekafekauaga. Fēfē e onoonoaga a Paulo ke he mena fakaalofa? Ne ui ai e ia “ko e tau mena manogi mitaki, ko e poa ia ke talia he Atua mo e fiafia.” (Totou Filipi 4:15-19.) Ne loto fakaaue mooli a Paulo ke he foakiaga totonu he tau tagata Filipi, ti pihia foki a Iehova.
14 Pihia foki he vahā nei, ne loto fakaaue hokulo a Iehova ke he tau mena fakaalofa ha tautolu ke he gahua he lalolagi katoa. Lafi ki ai, ne mavehe a ia ka fakatumau a tautolu ke tuku fakamua e tau mena he Kautu he tau momoui ha tautolu, to leveki e ia e tau manako oti ha tautolu, fakaagaaga mo e fakatino.—Mata. 6:33; Luka 6:38.
FAKAKITE E LOTO FAKAAUE HAAU
15. Ko e heigoa falu he tau mena ne loto fakaaue a koe ki a Iehova?
15 To leva ai ke fakapapahi e tau kakano loga kua moua e tautolu ma e loto fakaaue ki a Iehova. Nakai kia mooli kua lata a tautolu ke fakaaue ki a ia he tau aho takitaha ma e mena fakaalofa he moui? Kua foaki e ia ki a tautolu e lata ke fakatumau a tautolu—ko e tau mena kai, tau mena tui, mo e tau nonofoaga pihia foki mo e tau fafagu oti ha tautolu. Lafi ki ai, ko e tua ha tautolu ne fakavē ke he iloilo tonu kua foaki ki a tautolu e amaamanakiaga. Kua latatonu ai ke tapuaki a tautolu ki a Iehova mo e foaki e tau poa fakaheke ki a ia, ha ko ia ko e Atua mo e mena ne taute e ia ma tautolu.—Totou Fakakiteaga 4:11.
16. Lata ke tali fēfē a tautolu ke he poa lukutoto he Keriso?
16 He fitā e kitia e tautolu he vala tala fakamua, mua atu e mena fakaalofa uho he Atua ke he tau tagata ko e poa lukutoto he Keriso. Ko e fakakiteaga ofoofogia anei he fakaalofa he Atua ki a tautolu. (1 Ioa. 4:10) Ko e heigoa e tali kua latatonu ki ai? Ne fakapuloa e Paulo: “Ha kua omoomoi a mautolu he fakaalofa a Keriso, kua manatu pehe a mautolu, kaeke kua mate tokotaha ke hukui aki e tau tagata oti kana; . . . ne matulei foki a ia ke hukui aki e tau tagata oti, kia nakai omaoma a lautolu kua momoui kia lautolu ni, ka ko ia ne matulei, mo e liu tu mai foki ke hukui aki a lautolu.” (2 Kori. 5:14, 15) Mooli ai, ne talahau a Paulo kaeke ke loto fakaaue a tautolu ke he fakaalofa noa he Atua, to fakaaoga e tautolu e tau momoui ha tautolu ke fakalilifu a Ia mo e Haana a Tama. Ko e ha tautolu a fakaalofa mo e loto fakaaue ke he Atua mo e Keriso kua fakakite he ha tautolu a mahani omaoma mo e ha tautolu a manako ke fakamatala mo e taute tutaki.—1 Timo. 2:3, 4; 1 Ioa. 5:3.
17, 18. He tau puhala fe ne fakatolomaki he falu e poa fakaheke ha lautolu ki a Iehova? Talahau e fakataiaga.
17 To maeke kia a koe ke fakaholo ki mua e poa fakaheke kua foaki e koe ki a Iehova? Ka liu manamanatu ke he tau mena mitaki oti ne taute e Iehova ma lautolu, tokologa ne omoomoi ke fakatokatoka e ha lautolu a magaaho mo e tau gahua ke fakalahi e vala ha lautolu ke he gahua fakamatala he Kautu po ke falu he tau gahua fakateokarasi. Falu ne maeke ke paionia fakakū he taha po ke loga e mahina he tau tau takitaha, ka ko e falu ne eke mo tau paionia tumau. Falu ne maeke agaia ke fai vala he tau matagahua tā fale he Kautu. Mitaki lahi kia e tau puhala nei ma e taha ke fakakite e loto fakaaue? Ka taute mo e fatuakiloto tonu—ke fakakite e loto fakaaue mo e fakaaue atu—kua talia he Atua e tau gahua nei he fekafekauaga tapu.
18 Tokologa e tau Kerisiano ne loto fakaaue lahi ki a Iehova ti kua omoomoi ai a lautolu. Taha e tagata pihia ko Morena. Ne kumikumi a ia ma e tau tali ke he haana a tau hūhū fakaagaaga he taofiaga faka-Katolika, ko e lotu ne tupu hake ai a ia, mo e he taofiaga Asia. Ka e nakai moua e ia e tau tali makona mai i ai. He magaaho laia ne kamata a ia ke fakaako e Tohi Tapu mo e Tau Fakamooli a Iehova ne fakamakona e fia inu fakaagaaga haana. Ne loto fakaaue a Morena ma e tau tali faka-Tohi Tapu ke he tau hūhū oti haana mo e mauokafua ne tamai he tau tali na ke he moui haana ti manako lahi a ia ke fakaaue ki a Iehova he fakaaoga e malolō katoa haana he fekafekau ki a Ia. Ne kamata agataha a ia ke paionia fakakū tumau he mole e papatisoaga haana, ti ko e mogo ne maeke he tau tuaga haana, ne eke a ia mo paionia tumau. Ne tupu e mena ia 30 e tau kua mole, ti ha ha agaia a Morena ke he fekafekauaga mau.
19. Liga maeke fēfē ia koe ke fakaholo ki mua haau a tau poa ki a Iehova?
19 Mooli, tokologa e fekafekau tua fakamooli ha Iehova ne nakai fakaatā he tau tuaga ha lautolu ke fekafekau ko e tau paionia. Ko e ha mena ni kua maeke ia tautolu ke taute he fekafekauaga ha Iehova, maeke ia tautolu oti ke foaki e tau poa fakaagaaga ne talia e ia. Ke he ha tautolu a mahani, kua lata ia tautolu ke omaoma fakamatafeiga ke he tau matapatu fakaakoaga tututonu, he manatu tumau kua hukui e tautolu a Iehova he tau magaaho oti. Ke he tua, kua falanaki katoatoa a tautolu ke he tau fakamooliaga he tau finagalo he Atua. Ke he tau gahua mitaki, kua lagomatai a tautolu ke folafola e tau tala mitaki. Mai he loto kua puke mo e he loto fakaaue ke he tau mena oti ne taute e Iehova ma tautolu, kia fakatumau a tautolu ke taute e tau poa loto katoa ki a Iehova.
[Blurb he lau 25]
Omoomoi kia he mahani mitaki ha Iehova a koe ke fakaholo ki mua haau a poa fakaheke?
[Fakatino he lau 23]
Fakaaoga nakai e koe e tau magaaho oti ke fakamatala?