Amaketo—Ko e Heigoa e Mena Ia he Ui he Falu?

“Ne fakapotopoto foki e ia a lautolu ke he mena kua higoa ke he vagahau Heperu ko Amaketo.”—FAKAKITEAGA 16:16.

KO E heigoa e manatu haau ka logona e koe e kupu “Amaketo”? Liga manatu e koe e tau fakatino he tau mena matematekelea lalahi. Pete kua lagataha ni e kitia e kupu ia he Tohi Tapu, kua fa talahau lagaloga ai he tau nusi fakapuloa tala mo e tau takitaki lotu.

Lautatai nakai e tau manatu talahaua ki a Amaketo mo e tau fakaakoaga he Tohi Tapu? Kua aoga ke iloa e tali. Ko e ha? Kakano ko e tali ke he tala mooli ke he Amaketo ka fakatokanoa mai a koe he matakutaku teao, hafagi e onoonoaga haau ke he vahā i mua, mo e fakaohooho e puhala ne manamanatu a koe ke he Atua.

Manamanatu ke he tolu e hūhū i lalo, ti fakatatai e tau manatu talahaua ke he Amaketo mo e tau mena ne fakaako mooli he Tohi Tapu.

1. KO AMAKETO KIA KO E MATEMATEKELEA TAUTE HE TAGATA?

Kua fa fakaaoga he tau tagata tohi tala mo e tau tagata kumikumi e kupu “Amaketo” ke fakamaama aki e tau matematekelea lalahi ne fakatupu he tau tagata. Ke fakatai, ko e tau Felakutaki I mo e II kua hagaao ki ai ko e Amaketo. He oti e tau felakutaki ia, ne tupetupe e tau tagata neke fakafeolo e tau kanavaakau fakaetomo he Tau Faahi Kaufakalataha mo e Kautaha Soviete. Ne fakahigoa he tau fakapuloa tala e fakafeao ia ka tupu ko e “Amaketo he tau kanavaakau tau niukilia.” He vahā nei, ko e tau tagata kumikumi kua matakutaku neke fakatupu mai he kiva e tau hikiaga lalahi ke he matagi he lalolagi, kua hataki ai hagaao ke he “matagi Amaketo.”

Kakano he tau fakamaamaaga ha lautolu: Kua ha ha he tau tagata e malolō katoa ke fakatokatoka e vahā anoiha he lalolagi mo e tau mena momoui oti i ai. Ka kaumahala e tau fakatufono ke gahua fakamitaki, to malona tukulagi e lalolagi.

Ko e mena ne fakaako he Tohi Tapu: To nakai fakaatā he Atua e tau tagata ke fakaotioti e lalolagi. Kua fakamafana mai he Tohi Tapu ki a tautolu ko e mena nakai “eke noa” e Iehovaa e lalolagi. Ka kua eke e ia “ke nonofo ai e tau tagata.” (Isaia 45:18) He nakai toka e lalolagi ke takiva katoatoa he tau tagata, ko e Atua ka “moumou ai foki a lautolu kua moumou e lalolagi.”—Fakakiteaga 11:18.

2. KO AMAKETO KIA KO E MATEMATEKELEA TUPU PAUAKI?

Kua fa fakaaoga he tau tagata tohi tala e kupu “Amaketo” ke fakamailoga aki e tau matematekelea tutupu pauaki ne lalahi. Ke fakatai, he 2010 ne taha e hokotaki ne talahau hagaao ke he “‘Amaketo’ i Haiti.” Ne fakamaama ai e matematekelea, malona, mo e tau tagata ne mamate ha ko e mafuike lahi mahaki ne lulululu e motu ia. Ko e tau tagata hokotaki tala mo e tau tagata taute kifaga ne fakaaoga e kupu ke hagaao ke he tau mena ne fitā he tutupu mo e falu ne kua matakutaku a lautolu neke tutupu. Ma e fakatai, ne fakaaoga e lautolu e kupu “Amaketo” ke fakamaama aki e tau lauiaaga fakataitai ka lauia e lalolagi he taha vala maka.

Kakano he tau fakamaamaaga ha lautolu: Ko e Amaketo ko e mena tupu fakalaulahi ka mamate fakahanoa e tau tagata noa. Kua tote maka e mena haau kua maeke ke taute ke puipui a koe mai i ai.

Ko e mena ne fakaako he Tohi Tapu: I Amaketo, ne nakai moumou fakahanoa e tau tagata. Ka e, ka hoko mai a Amaketo, ko lautolu ni ne mahani kelea ka tatafi kehe. Kua mavehe mai he Tohi Tapu to nakai leva ti “nakai ha i ai e tagata mahani kelea; ka manamanatu foki a koe ke he mena hana ne nofo ai, nakai ha i ai a ia.”—Salamo 37:10.

3. TO MOUMOU NAKAI HE ATUA E LALOLAGI I AMAKETO?

Tokologa e tagata lotu ne talitonu to ha ha i ai e fetoko fakahiku he mitaki mo e kelea ti ko e fua to fakaotioti ai e fua lalolagi ha tautolu. Ko e kumikumiaga manatu he Tau Faahi Kaufakalataha ne taute he Princeton Survey Research Associates ne moua ko e 40 e pasene he tau tagata lalahi ne hūhū tala ki ai ne talitonu to fakaoti e lalolagi he “tauaga i Amaketo.”

Kakano he tau fakaakoaga ha lautolu: Kua nakai lata e tagata ke moui tukulagi he lalolagi, po ke nakai tufuga e lalolagi ke tumau tukulagi. Ne tufuga he Atua e tau tagata mo e amanakiaga to mamate oti a lautolu he taha magaaho.

Ko e mena ne fakaako he Tohi Tapu: Kua fakamaama fakamahino mai he Tohi Tapu ko e Atua “ne fakave e lalolagi ki luga he hana tau fakave, kia nakai tuai gahuahua a ia tukulagi tukumuitea.” (Salamo 104:5) Hagaao ke he tau tagata ne nonofo he lalolagi, ne pehē e Tohi Tapu: “To eke ni e motu ma e tau tagata tututonu, to nonofo muatua ai a lautolu.”—Salamo 37:29.

Maaliali ai, kua nakai tatai e talahauaga he Tohi Tapu mo e loga he tau manatu talahaua hagaao ke he Amaketo. Ti ko e heigoa e tala mooli?

[Matahui Tala]