Natano​—Kua Lalago Fakamooli e Tapuakiaga Meā

Nakai mukamuka ke fakaohooho e tagata malolō ko e tau puhala haana kua fakahehē mo e kua lata a ia ke hiki. To fakafeleveia atu nakai a koe ke he tagata ia ka iloa e koe kua kelipopo e ia taha tagata ke puipui aki e matalahi?

Ko e Patuiki ko Tavita i Isaraela i tuai ne mahani faivao mo Patesepa, ti fatu a ia. Ke fufū e agahala ha laua, ne poaki a Tavita ke tamate e taane haana ti uta a Patesepa mo hoana haana. Fai mahina he mole ne moui lotolotoua agaia a Tavita, nakai fakauaua kua matutaki a ia ke taute e tau matagahua he patuiki. Ka e nakai fakaatā e Iehova e tau agahala he patuiki ke magalo noa. Ne fakafano e ia e perofeta ko Natano ke vagahau ki a Tavita.

Ko e matagahua uka anei. Tuku a koe he tuaga a Natano. Ko e mahani fakamooli ki a Iehova mo e mauokafua ke he tau tuaga faka-Atua kua fakaohooho mooli a Natano ke fakamanatu ki a Tavita e tau agahala haana. Maeke fēfē e perofeta ke taute e mena nei mo e fakaohooho e Patuiki ko Tavita kua lata a ia ke tokihala?

FAIAOGA NE FAKAILOILO

He ha he fakaaoga e tau minuti gahoa ke totou e 2 Samuela 12:1-25? Manamanatu ko koe he tuaga ha Natano he tala age e ia ki a Tavita e tala nei: “Ha ha i ai ke he taha maga e tau tagata tokoua, ko e tagata maukoloa e taha, ka ko e tagata nofogati e taha. Ha ha i ai ke he tagata maukoloa e tau mamoe mo e tau povi loga ni. Ka e nakai fai mena e tagata nofogati, ka ko e taha ni e punua mamoe fifine, ne fakafua e ia, mo e fakamoui ai e ia, ti tupu ai a ia fakalataha mo lautolu mo e hana fanau: ko e hana mena kai tote ne kai ai e ia, ti inu ai a ia ke he hana kapiniu, ne takoto foki a ia ke he hana fatafata, kua eke ni ke tuga ne tama fifine kia ia. Ti fina age e tagata fano fenoga ke he tagata maukoloa; ti nakai mafai a ia ke ta mai he tau mamoe hana, mo e hana tau povi, ke taute ai mo e fenoga kua fina age kia ia; ka e uta e ia e punua mamoe he tagata nofogati, ti taute ai e ia ma e tagata kua fina atu kia ia.”​—2 Samu. 12:1-4.

Ko Tavita ko e leveki mamoe foki ne talitonu ko e mena nei ko e tuaga mooli. “Liga,” he talahau he taha tagata talahau tala, “ne mahani a Natano ke hukui e tau tagata kua ekefakakelea mo e olelalo ke moua e laveakiaga ma lautolu ne nakai maeke ke lalago a lautolu ni, ti manatu e Tavita e mena nei ke eke mo matagahua haana mogonei.” Pete ko e mena a ia ne tupu, ko e mahani fakamooli ke he Atua mo e loto malolō foki ke maeke a Natano ke vagahau ke he patuiki tuga ne taute e ia. Ne fakaita lahi he tala ha Natano a Tavita. “Kua moui a Iehova, to mate ni e tagata kua eke e mena ia!” he talahau e ia. Ti talahau e Natano e fakailoaaga kelea lahi: “Ko koe ni ko e tagata ia.”​—2 Samu. 12:5-7.

Manamanatu ke he kakano ne talahau pihia e Natano e lekua. Nakai mukamuka ma e tagata ne vihi e logonaaga mo e taha ke kitia mitaki e tuaga haana. Igatia a tautolu mo e fai mena ke piu ki ai he lali ke talahau e tau kakano kua nakai hepehepe e tau mahani ha tautolu. Ka ko e fakataiaga ha Natano ne omoomoi mauokafua a Tavita ke vihiatia e tau mahani ni haana. Ne kitia mitaki he patuiki e mahani ne fakamaama e Natano kua fakalialia. He mole laia e fakavihia ai e Tavita, ne fakakite e Natano kua hagaao ai e fakatai ke he patuiki. Ti maeke ai a Tavita ke kitia e lahi he agahala haana. Kua tuku he mena nei a ia ke he tuaga hako he manamanatuaga ke talia e fakatonuaga. Ne tala age a ia “kua fakavihia” mooli e Iehova a ia ha ko e mahani haana ne matutaki mo Patesepa ti talia e ia e akonakiaga kua latatonu.​—2 Samu. 12:9-14; Sala. 51, mataulu.

Ko e heigoa ka fakaako e tautolu mai he mena nei? Ko e foliaga he faiaoga he Tohi Tapu ko e lagomatai he tau tagata fanogonogo haana ke moua e fakahikuaga kua hako. Ne fakalilifu e Natano a Tavita ti tutala fakailoilo ki a ia. Na iloa e Natano, ke he loto a Tavita ne ofania e ia e tututonu mo e fakafili tonu. Mo e fakataiaga haana, ne fakakite he perofeta e tau mahani faka-Atua nei. Maeke foki ia tautolu ke lagomatai e tau tagata fakamooli ke maama e manatu a Iehova. Fēfē? He fakamatala ki a lautolu e mena kua hako, he taute mo e nakai aga fakatokoluga ke he mahani po ke tuaga fakaagaaga. Ko e Tohi Tapu ka e nakai ko e manatu fakatagata ha tautolu e pule hagaao ke he mena kua hako mo e nakai hako.

Mua atu ke he tau mena oti, ko e mahani fakamooli ke he Atua ati maeke a Natano ke fakatonu e patuiki malolō lahi. (2 Samu. 12:1) Ko e mahani fakamooli pihia to foaki ki a tautolu e loto malolō ke tumauokafua ma e tau matapatu fakaakoaga tututonu a Iehova.

TAGATA LALAGO HE TAPUAKIAGA MEĀ

Ko Tavita mo Natano ko e tau kapitiga mitaki foki, ha kua fakahigoa e Tavita e taha he tau tama taane haana ko Natano. (1 Nofo. 3:1, 5) Ko e magaaho fakamua ne tohi a Natano he fakamauaga he Tohi Tapu, kua ha ha i ai a ia mo Tavita. Ne ofania tokoua e laua a Iehova. Ne falanaki mooli he patuiki e fifiliaga a Natano, ha kua fakakite e ia ke he perofeta e manako haana ke talaga e faituga ki a Iehova. “Kikite mai ā,” he ui e Tavita, “kua nofo ai au ke he fale arasi, ka ko e puha he Atua, kua ha i ai i loto he tau ie puipui. Ti pehe mai ai a Natano ke he patuiki, Ko e tau mena oti kua finagalo a koe ki ai, kia haele atu a koe mo e eke ai, ha kua fakalataha a Iehova mo koe.”​—2 Samu. 7:2, 3.

Ha ko e tagata tapuaki tua fakamooli ha Iehova, ko Natano ne talia hakahakau e pulega a Tavita ke talaga e matakavi fakamua he tapuakiaga meā ke he lalolagi. He magaaho ia mogoia, ne fakakite mooli e Natano e tau logonaaga haana ni ka e nakai vagahau ai ke he higoa a Iehova. He pō ia, ne hataki he Atua e perofeta haana ke tala age e ogo kehe ke he patuiki: To nakai talaga e Tavita e faituga ha Iehova. Ko e tagata ke taute e mena ia ko e taha he tau tama taane a Tavita. Ka e tala age e Natano kua taute he Atua e maveheaga mo Tavita ke hokotia e tuaga patuiki haana ke “tumau tukulagi.”​—2 Samu. 7:4-16.

Ko e finagalo he Atua kua nakai lagotatai mo e fifiliaga ha Natano hagaao ke he talagaaga he faituga. He nakai loma, ko e perofeta fakatokolalo nei ne talia e finagalo a Iehova mo e gahua fakatatau ki ai. Ko e fifitakiaga mitaki ke muitua kaeke kua lata e Atua ke fakahako a tautolu ke he falu puhala! Ko e tau mahani ha Natano ko e perofeta he mogo fakamui ne fakakite kua nakai galo e ia e taliaaga he Atua. Ti liga omoomoi e Iehova a Natano, fakalataha mo Kato ko e tagata kitekite, ke takitaki a Tavita ke fakatokatoka e 4,000 tagata uhu lologo he gahua he faituga.​—1 Nofo. 23:1-5; 2 Nofo. 29:25.

KO E TAGATA PUIPUI HE NOFOAIKI

Ne mailoga e Natano to kautū a Solomona ke he fuakau ko Tavita ko e patuiki. Ti fifili tonu a Natano he mogo ne lali a Atonia ke fofō e nofoaiki he tau tau lolelole ha Tavita. Ko e fakailoilo mo e mahani fakamooli kua liu fakakite foki e tau mahani a Natano. Fakamua ne tomatoma e ia a Patesepa ke fakamanatu ki a Tavita e foliaga ne omonuo ke taute e tama taane haana ko Solomona mo patuiki. Ti fina atu a Natano ki mua he patuiki ke ole kua talia nakai e Tavita a Atonia ke eke mo hukui. He mailoga e uka he tuaga, ne tala age e patuiki fuakau ki a Natano mo e falu fekafekau fakamooli ke fakauku a Solomona mo e fakailoa a ia ko e patuiki. Ko e fofōaga a Atonia ne mahala ai.​—1 Patu. 1:5-53.

TAGATA TOHI TALA TUAI NE FAKATOKOLALO

Ko Natano mo Kato kua fa talahaua he tohia ai e Samuela veveheaga 25 ke he 31 ti pihia mo e 2 Samuela. Hagaao ke he tau tala omoomoi ne fakamau he tau tohi ia, ne pehē ai: “Ko e tau mena ne eke he patuiki ko Tavita, ko e tau mena fakamua mo e tau mena fakamui, kitiala, kua tohi ai ke he tala he tagata kitekite ko Samuela, mo e tala a Natano ko e perofeta, mo e tala a Kato ko e tagata Kitekite.” (1 Nofo. 29:29) Ne kitia foki a Natano ko e tagata tohi tala hagaao ke he “tau mena ne . . . eke e Solomona.” (2 Nofo. 9:29) Liga kakano e mena nei kua matutaki a Natano ke malolō ke he tau gahua he fale patuiki pete he mole e mate a Tavita.

Lahi he mena ne iloa e tautolu ki a Natano ne liga tohia ni he perofeta. Ka ko e fakanono haana hagaao ke he tau mena pauaki kua lahi e mena ne talahau hagaao ki a ia. Mailoga mooli ko Natano ko e tagata tohi tala tuai. Ne nakai foli tuaga a ia mo e manako ke taute e higoa ma haana. He tau kupu he taha tohi fakamaama kupu ke he Tohi Tapu, ne tohi e fakamauaga omoomoi “mo e nakai fai hafagiaga mo e nakai fai matohiaga lilifu.” Nakai iloa e tautolu e matohiaga a Natano po ke moui fakatagata haana.

OMOOMOI HE MAHANI FAKAMOOLI KI A IEHOVA

Mai he tau onoonoaga gahoa ki a Natano ne foaki ki a tautolu he tau Tohiaga Tapu, kua maaliali ai ne fakatokolalo a ia ka e lalago malolō ke he tau fakaholoaga faka-Atua. Ne kotofa e Iehova ko e Atua a ia ke he tau matagahua mamafa. He manamanatu fakahokulo ke he mahani a Natano, tuga e mahani fakamooli ke he Atua mo e loto fakaaue lahi ke he tau poakiaga faka-Atua. Eketaha ke fifitaki e tau mahani pihia.

Liga kua nakai ui ki a koe ke fakatonu e tau patuiki mahani faivao po ke taofi e tau totokoaga. Ka ko e lagomatai he Atua kua maeke ia koe ke fakamooli ke he Atua ti maeke ke tuku fakatokoluga e tau tuaga tututonu haana. Maeke foki ia koe ke loto malolō, ka e fakailoilo, faiaoga he kupu mooli mo e ko e fakaholo ki mua he tapuakiaga meā.

[Fakatino he lau 25]

Ha ko e lalago he nofoaiki, ne tutala fakailoilo a Natano ki a Patesepa