Onoonoaga Mitaki ke he Fakamauaga ne Vihi

“Kua tala atu foki au kia lautolu kua fai hoana mo e fai tane, ka e nakai ko au, ka ko e Iki.”—1 KORI. 7:10.

MAEKE NAKAI A KOE KE FAKAMAAMA?

Ko e heigoa e kakano ne fakalataha he Atua e tau hoa mau tokoua?

Maeke fēfē e tau motua ke lagomatai e tau Kerisiano ne lekua e tau fakamauaga?

Kua lata ke fēfē e onoonoaga ha tautolu ke he fakamauaga?

1. Onoono fēfē e tau Kerisiano ke he fakamauaga, ti ko e ha?

KA MAU e tau Kerisiano, kua taute e lautolu e omonuo ki mua he Atua—ko e matagahua ke nakai uta fakateaga. (Fakama. 5:4-6) He puhala ko ia e Kamataaga he fakatokaaga he fakamauaga, “kua fakalataha” e Iehova a laua ke he fakamauaga. (Mare. 10:9) Ko e fakalatahaaga nei kua fakavē ai he Atua pete ne tau matafakatufono ne fakagofua ke lata mo e fakamauaga. Kua lata e tau fekafekau a Iehova ke onoono ke he fakamauaga ko e fakaholoaga he pipiaga pete he eke a lautolu mo tau tagata tapuaki haana he magaaho ne mau a lautolu po ke nakai.

2. Ko e heigoa e tau hūhū ka fakatutala he vala tala nei?

² Ko e fakamauaga ne kautū ka moua e fiafia lahi. Ka ko e heigoa ka taute ka hagahaga kelea e pipiaga he fakamauaga ne vihi? Maeke nakai e fakamauaga lolelole ke fakamalolō? Ko e heigoa e lagomatai ma lautolu ne kua lekua e mafola he fakamauaga?

TO OLIOLI NAKAI PO KE LOTO MAMAHI?

3, 4. Ko e heigoa ka tupu kaeke ke taute he tagata e fifiliaga nakai pulotu he fifili e hoa mau?

³ Ka kautū e fakamauaga he Kerisiano, ko e olioli mo e tamai e fakahekeaga ki a Iehova. Ka kaumahala, kua mua atu e loto mamahi. Ko e Kerisiano nakaila fai tokoua kua manamanatu ke he fakamauaga he tuaga ke moua e kamataaga mitaki he fakamauaga he muitua ke he takitakiaga he Atua. He taha faahi, ko e tagata ne taute e fifiliaga nakai pulotu ka fifili e taane po ke hoana ka moua e nakai fiafia mo e maanu. Tuga anei, ko e falu fuata kua kamata ke fakatutane ka e nakaila mautali a lautolu ma e tau matagahua ne felauaki mo e moui fai taane mo e fai hoana. Ko e falu ne moua e hoa ke mau he Internet ne fakatepetepe ti fakahiku ke he fakamauaga kua nakai fiafia lahi. Falu ne taute e agahala kelea lahi mahaki he fakamahaniaga ka e mau ni, liga kamata e moui fai taane mo e fai hoana ha laua ke he tote e fefakalilifuaki.

⁴ Falu Kerisiano kua nakai mau “kia lata mo e Iki” ti fa matematekelea he tau fua mamahi ha ko e mavehevehe fakalotu e magafaoa. (1 Kori. 7:39) Ka tupu e mena ia ki a koe, liogi ma e fakamagaloaga mo e lagomatai he Atua. Ne nakai utakehe e ia e tau lauiaaga he tau hehē kua mole he tagata, ka e lagomatai e ia a lautolu ne fakatokihala ke fahia ke he tau kamatamata. (Sala. 130:1-4) Tuku e loto haau ke fakafiafia a ia mogonei mo e tukulagi, ti “ko e fiafia kia Iehova ko e malolo [haau] haia.”—Nehe. 8:10.

KA LEKUA E TAU PIPIAGA HE FAKAMAUAGA

5. Hagaao ke he fakamauaga nakai fiafia, ko e vahega manamanatu fe kua lata ke kalo kehe ai?

⁵ Ko lautolu ne moua e loto mamahi he fakafetuiaga he fakamauaga ne liga manamanatu: ‘Latatonu mooli nakai ke fakahao e fakamauaga nakai fiafia haaku? Ane mai ni maeke au ke vivilo ki tua mo e kamata foou mo e taha hoa mau foki!’ Liga miti a lautolu ke moumou e pipiaga—‘Oi, ke liu atāina foki! He ha he tau vevehe? Pete ni ka nakai moua e tau vevehe faka-Tohi Tapu, he ha he nonofo kehekehe mo e liu fiafia foki e moui?’ He nakai manamanatu ke he tau talahauaga ia po ke miti hagaao ke he mena ka tupu, kua lata e tau Kerisiano ke fakaaoga fakamitaki e tuaga ha lautolu mogonei he kumi ke he takitakiaga he Atua mo e muitua ki ai.

6. Fakamaama e mena ne talahau e Iesu ne fakamau ia Mataio 19:9.

⁶ Ka moua he Kerisiano e tau vevehe, liga ko ia po ke nakai tokanoa faka-Tohi Tapu ke liu mau foki. Pehē a Iesu: “Ke tala atu foki e au kia mutolu, ko ia kua tiaki hana hoana, ka e nakai faivao a ia, ti hoana ke he taha, kua faivao a ia; ko ia foki ka fai hoana kia ia kua tiaki kua faivao a ia.” (Mata. 19:9) He mena nei, ko e mahani feuaki kua putoia e faivao mo e falu agahala mahani fakataane mo e fifine ti pihia mo e tau agahala feuaki fakalialia. Kua aoga ai ke manamanatu he liogi hagaao ke he tau vevehe ka agahala e taha he tau hoa he mahani feuaki.

7. Ko e heigoa ka manamanatu a lautolu ne kitekite kaeke ke kaumahala e fakamauaga he Kerisiano?

⁷ Ko e fakamauaga ne kaumahala ka fakatupu e fakauaua ke he tuaga fakaagaaga he taha. Ne fakalagā he aposetolo ko Paulo e hūhū hokulo nei: “Ha ko e mena kaeke kua nakai iloa e taha ke pule ke he hana ni a magafaoa, to leveki fefe e ia e ekalesia he Atua?” (1 Timo. 3:5) Ti ka eke e tau hoa tokoua mo tau Kerisiano ti kaumahala e fakamauaga ha laua, liga to manamanatu e tau tagata kitekite kua nakai fakagahuahua mooli e laua e mena ne talahau e laua.—Roma 2:21-24.

8. Liga ko e heigoa kua hepe kaeke ke fifili e tau hoa Kerisiano ke mavehevehe?

⁸ Ka pulega e tau hoa mau nukua papatiso ke nonofo kehekehe po ke tau vevehe a laua ke he tau tuaga nakai faka-Tohi Tapu, fai mena mooli ne hehē fakaagaaga he tau momoui ha laua. Ko e tau matapatu faka-Tohi Tapu kua nakai fakagahuahua he taha he hoa po ke liga he tau hoa tokoua. Ka eke mooli a laua ke ‘tua kia Iehova mo e ha lau[a] a loto katoa,’ to nakai fai kakano lahi ke talitonu kua nakai maeke a laua ke kalo mai he fakamauaga ne kaumahala.—Totou Tau Fakatai 3:5, 6.

9. Kua taui fēfē e falu Kerisiano ma e tau laliaga fakamanavalahi ha lautolu ne matutaki mo e fakamauaga?

⁹ Loga e fakamauaga ne liga gutu atu ke he kaumahala ne fai magaaho ti kautū lahi. Ko e tau Kerisiano ne fakaheu ke mahala mafiti ke he fakamauaga uka kua fa fiafia e taui mitaki. Manamanatu ke he mena ka tupu he magafaoa mavehevehe fakalotu. Ne tohi he aposetolo ko Peteru: “A mutolu ko e tau fifine, kia omaoma ke he tau tane ha mutolu ni, kaeke foki kua faliuliu falu ke he kupu, kia moua a lautolu he mahani mitaki he tau hoana ha lautolu, ka e nakai vagahau, Ka kitekite age a lautolu kia mutolu kua nonofo fakatekiteki mo e matakutaku.” (1 Pete. 3:1, 2) E, ha ko e mahani mitaki he hoa mau haana, liga ofania e ia ne nakai tua e tua mooli! Ko e fakamauaga pihia ne fakahao kua fakaheke e Atua ti maeke ke tamai e monuina lahi ma e taane, hoana, mo e tau tama ka fai a laua.

10, 11. Ko e heigoa e tau lekua nakai amanaki ki ai ka tutupu he fakamauaga, ka ko e heigoa ka mauokafua ki ai e Kerisiano?

¹⁰ Mo e manako ke fakafiafia a Iehova, laulahi he tau Kerisiano nonofo nakai fai tokoua ne fifili e tau matakainaga tukulele mo tau hoa mau. Ka e pete ia, ko e tau tuaga ne liga fakahiku kelea. Ma e fakatai, lavea ke he falu magaaho, kua liga tupu e tau lekua lalahi ke he tau logonaaga he hoa. Po ke falu magaaho he mole e mau, ne liga eke e hoa mo tagata lolelole fakaagaaga. Ke fakatai: ko Linda,a ko e Kerisiano makutu mo e ko e matua fifine mahani fakamooli ne onoono mo e mamahi e finagalo ke he taane papatiso haana ne nakai fakatokihala he fano he puhala nakai faka-Atua ti tuku ki tua. Ko e heigoa he Kerisiano kua lata ke taute kaeke kua nakai mauokafua e pipiaga he fakamauaga haana ha ko e kakano pihia?

¹¹ ‘Lata nakai au ke eketaha ke fakahao e fakamauaga haaku pete ne mena ne tupu?’ he liga hūhū e koe. Nakai fai tagata ka maeke po ke kua lata ke taute e fifiliaga ma haau. Ka e ha ha i ai e tau kakano uho ma e nakai mahala ke he pipiaga he fakamauaga kua lolelole. Ko e tagata taane po ke fifine mahani Atua kua fakamanavalahi ke he tau kamatamata he fakamauaga uka ke lata mo e loto manamanatu kua uho lahi ke he Atua. (Totou 1 Peteru 2:19, 20.) He puhala he Kupu mo e agaaga a Iehova, to lagomatai e Ia e Kerisiano kua eketaha fakamakamaka ke fakatumau e fakamauaga vihi.

MAUTALI A LAUTOLU KE LALAGO

12. To onoono fēfē e tau motua ki a tautolu kaeke ke kumi e tautolu e lagomataiaga ha lautolu?

¹² Ka fehagai a koe mo e tau lekua he fakamauaga, nakai fakauaua ke kumi e lalagoaga fakaagaaga he tau Kerisiano momotua. Ko e tau motua ne eke mo tau leveki mamoe he fuifui mo e to fiafia a lautolu ke takitaki atu ai ke he fakatonuaga mai he agaaga ne moua he tau Tohiaga Tapu. (Gahua 20:28; Iako. 5:14, 15) Ua fakahiku ko koe mo e hoa haau to galo e fakalilifu he tau motua ka kumi e koe e lalagoaga fakaagaaga mo e fakatutala e lekua he fakamauaga hagahaga kelea mo lautolu. Ko e fakalilifu fakaalofa ha lautolu ma haau to tupu ki mua he kitia e lautolu kua manako mooli a koe ke fakafiafia e Atua.

13. Ko e heigoa e fakatonuaga ne moua ia 1 Korinito 7:10-16?

¹³ Ka ole ke lagomatai e tau Kerisiano ne nonofo he tau kaina mavehevehe fakalotu, kua hagaao e tau motua ke he fakatonuaga tuga ia ha Paulo, ne tohi: “Kua tala atu foki au kia lautolu kua fai hoana mo e fai tane, ka e nakai ko au, ka ko e Iki, Aua neke fano kehe e hoana mo e hana tane, Kaeke foki kua fano kehe, kia nofo noa pihia a ia po ke fakafeilo mo e hana tane; aua foki neke mavehe e tane mo e hana hoana ni. . . . Ha kua iloa fefe e koe ko e hoana, to moui hāu a tane kia koe? Ko koe foki, ko e tane, kua iloa fefe a koe to moui e hoana hāu kia koe?” (1 Kori. 7:10-16) Ko e monuina ha ia ka kautū e hoa nakai tua he fakalataha ke he tapuakiaga mooli!

14, 15. Magaaho fe ka lata he hoa Kerisiano ke mavehe mooli, ka ko e ha kua aoga e liogi mo e manamanatu fakamooli?

¹⁴ I lalo he tau tuaga fe ka maeke he hoana Kerisiano ke “mavehe”? Falu ne fifili ke nonofo kehekehe ha ko e nakai lalago pauaki he hoa mau. Falu ne taute ha ko e fakamamahi fakakelea e tino po ke fakahagahaga kelea lahi mahaki e tuaga fakaagaaga Kerisiano.

¹⁵ He mavehe po ke nakai, ko e fifiliaga fakatagata. Pete ia, ko e hoa papatiso ne lata ke liogi hagaao ke he mena nei ne tupu ti manamanatu fakamooli ki ai. Ma e fakatai, kua lago katoatoa kia ke he tagata nakai tua ma e fakahagahaga kelea he tuaga fakaagaaga, po ke kua fakaheu he Kerisiano e fakaakoaga Tohi Tapu, nakai fano tumau he feleveiaaga, mo e nakai fakatumau ke he gahua he fonua?

16. Ko e heigoa kua lata ke kalo kehe e tau Kerisiano mai he taute e tau fifiliaga mafiti hagaao ke he tau vevehe?

¹⁶ Ko e mooli kua tokiofa e tautolu e fakafetuiaga ha tautolu mo e Atua mo e fakaaue ke he mena fakaalofa haana he fakamauaga kua lata ke fakamamao a tautolu he taute e tau fifiliaga mafiti hagaao ke he tau vevehe. Ha ko e tau fekafekau a Iehova, kua manamanatu a tautolu ke he fakatapuaga he higoa tapu haana. Mooli mogoia, to nakai eke lagatau a tautolu ke hola kehe mai he taha fakamauaga ka e magaaho taha pulega ke he taha fakamauaga foki.—Iere. 17:9; Mala. 2:13-16.

17. I lalo he tau tuaga fe ka pehē kua ui he Atua e tau Kerisiano fai taane mo e fai hoana ke mafola?

¹⁷ Ko e Kerisiano kua mau ke he tagata nakai tua kua lata ke eketaha fakamakamaka ke fakatumau e pipiaga he fakamauaga. Ka kua nakai lata e Kerisiano ke logona e agahala ka lali mooli e Kerisiano ke fakahao e fakalatahaaga, ka e fakaheu he hoa nakai tua ke nonofo tokoua mo ia ne tua. “Kaeke ke fano kehe a ia kua nakai tua, kia toka a ia ke fano kehe ai,” he tohi e Paulo. “Nakai fakatupa e matakainaga po ke mahakitaga ka pihia; ka kua ui a tautolu he Atua kia mafola ai.”—1 Kori. 7:15.b

AMANAKI KI A IEHOVA

18. Pete ka nakai maeke ke fakahao e fakamauaga, ko e heigoa e mitaki ka fua mai he tau laliaga ke taute pihia?

¹⁸ Ka fehagai mo e tau lekua he fakamauaga, onoono ki a Iehova ma e loto malolō mo e amaamanaki tumau ki a ia. (Totou Salamo 27:14.) Manamanatu ki a Linda, ne totoku ke he kamataaga. Ne fakahiku e fakamauaga haana ke he tau vevehe, pete he lali a ia ke he loga e tau tau ke fakahao ai. Logona hifo nakai e ia kua moumou magaaho a ia? “Nakai pihia,” he ui e ia. “Ko e tau laliaga haaku kua fakamatala mitaki ke he tau tagata kitekite. Ha ha ia au e loto manamanatu mitaki. Mua ue atu, ne lagomatai he tau tau ia e tama fifine ha maua ke mauokafua he kupu mooli. Ne lahi hake a ia ke eke mo Fakamoli tukulele makutu ha Iehova.”

19. Ko e heigoa ka tupu kaeke ke taute e tau laliaga ke fakahao e fakamauaga?

¹⁹ Ko e fifine Kerisiano ne higoa ko Marilyn ne fiafia kua falanaki a ia ke he Atua mo e eketaha fakamakamaka fakalahi ke fakahao e fakamauaga haana. “Ne kamatamata au ke nofo kehe mai he taane haaku ha ko e nakai fai lalagoaga fakatupe mo e fakahagahaga kelea fakaagaaga,” he ui e ia. “Ka ko e taane haaku ne eke mo motua ato putoia a ia ke he falu fakaholoaga pisinisi nakai mitaki. Ne kamata a ia ke galo he tau feleveiaaga, ti fakahiku fakaoti e matutakiaga ha maua. Ko e favale matakutakuina he taone ha mautolu ne hopoate lahi mahaki au ti hū na au ki a au ni. Ti mailoga e au kua hehē foki au. Kamata a maua ke matutaki foki, ti liu e fakaakoaga fakamagafaoa ha maua, mo e tumau ke he tau feleveiaaga. Ne totonu mo e lagomatai lahi e tau motua. Ati tupu olaola e fakamauaga ha maua. Nakai leva, ne liu e taane haaku moua e tau kotofaaga he fakapotopotoaga. Ko e fakaakoaga uka ne fua mitaki mai ai.”

20, 21. Ke fakalilifu e fakamauaga, ko e heigoa kua lata ke fifili a tautolu ke taute?

²⁰ He nofo tokotaha po ke mau a tautolu, kia gahua fakamalolō mo e amaamanaki tumau a tautolu ki a Iehova. Ka fehagai a tautolu mo e tau mena uka he fakamauaga, kua lata ia tautolu ke kumi fakamakamaka ke fakamafola ai, he manatu ko lautolu ne fakalataha ke he fakamauaga kua “nakai tuai tokoua, ka kua tino taha.” (Mata. 19:6) Ti eketaha a tautolu ke tokaloto ka fakamanavalahi a tautolu he tau kaina mavehevehe pete ne tau mena ia, liga moua e tautolu e olioli he fakalataha mai e hoa ke he tapuakiaga mooli.

²¹ Pete ne tau tuaga ha tautolu, liga fifili a tautolu ke ō fakailoilo ke maeke ke kitia mitaki he tau tagata kitekite i fafo he fakapotopotoaga. Ka hagahaga kelea e fakamauaga ha tautolu, kia liogi fakamakamaka a tautolu, kumikumi hifo fakamooli ke he tau logonaaga ha tautolu, manamanatu ke he tau Tohiaga Tapu fakaeneene, mo e kumi lalagoaga fakaagaaga ke he tau motua. Mahomo atu, maeke ia tautolu ke fifili ke fakafiafia a Iehova ko e Atua ke he tau mena oti mo e fakakite e loto fakaaue mooli ma e mena fakaalofa homo ue atu he fakamauaga.

[Tau Matahui Tala]

[Blurb he lau 10]

Ko e tau Kerisiano ne nakai mahala mafiti ke he fakamauaga vihi kua fa fiafia e taui mitaki

[Blurb he lau 12]

Amaamanaki tumau ki a Iehova mo e kumi ki a ia ma e loto malolō

[Fakatino he lau 9]

Fakamonuina e Iehova e tau hoa Kerisiano ne eketaha ke fakamalolō e fakamauaga vihi

[Fakatino he lau 11]

Eke e fakapotopotoaga Kerisiano mo punaaga mafanatia mo e lagomataiaga fakaagaaga