Fakaako e Iehova Au ke Taute Haana Finagalo

Ne talahau e Max Lloyd

He taha tulotopō he 1955. Ko e matakainaga misionare mo au he kotofaaga ha maua i Parakuai i Amerika Toga, ne viko takai he matakau vale e fale ne nonofo ai a maua ti tui kalaga: “Ko e atua ha mautolu ko e atua lima toto, ti manako a ia ke he toto he tau gringo.” O mai fēfē a maua ko e tau gringo (tau tagata motu kehe) ke he matakavi nei?

KI A au, ne kamata ai he loga e tau kua mole i Ausetalia ko e matakavi ne tupu hake au mo e kamata a Iehova ke fakaako au ke taute e finagalo haana. Ne talia he tete haaku e tohi Enemies mai he Fakamoli he 1938. Ne fitā a ia mo Mami he nakai fiafia ke he tau akoako he matakavi, ne hagaao ai ke he tau vala he Tohi Tapu ko e tau tala nakai mooli. Kavi ke he taha e tau he mole, ne papatiso e tau matua haaku he fakakite e tukulele ha laua ki a Iehova. Tali mai he mogoia, ko e taute e finagalo ha Iehova kua eke mo vala aoga lahi he moui magafaoa ha mautolu. Ko e mahakitaga haaku ko Lesley, ne lima e tau ne fakamua ia au ne papatiso foki, ti papatiso au he 1940 he mogo ne hiva e tau haaku he moui.

Nakai leva e kamata he Felakutaki II he Lalolagi, ko e lolomi mo e tufatufa he tau tohi faka-Tohi Tapu he Tau Fakamoli a Iehova ne pā i Ausetalia. He tama tote ai, ne fakaako au ke fakamatala e fakaveaga he tua haaku he fakaaoga hokoia he Tohi Tapu. Ne fakamahani au ke uta e Tohi Tapu haaku he aoga ke fakakite e kakano ne nakai saluti au ke he matini po ke lalago e tau matagahua ma e felakutaki he tau motu.—Esoto 20:4, 5; Mata. 4:10; Ioane 17:16; 1 Ioa. 5:21.

Tokologa he aoga ne nakai lafi mo au ha kua leipolo au “ko e toko Sihamani.” He magahala ia, ne fakakite e tau kifaga he aoga. Ato kamata e kifaga, kua lata e tau tagata oti ke tutū mo e uhu e lologo motu. Magaaho ne nakai tu au, ne tokoua po ke tokotolu e tama taane ne lali ke toho hake au he nofoa ke he tau lauulu haaku. Fakahiku ai ne fekau au ke oti mo e aoga ha kua tapiki mau ke he tau taofiaga faka-Tohi Tapu haaku. Pete ia, ne maeke ia au ke taute e tau fakaakoaga i kaina he tau puhala he meli.

KO E FOLIAGA NE FAKAHIKU AU KE TAUTE

Ne fakatoka e au e foliaga fakatagata ke kamata e fekafekauaga mau ko e paionia ka tu e 14 e tau haaku he moui. Ti momoko lahi au he mogo ne pehē e tau matua haaku kua lata au ke kumi fakamua e gahua ti fano ke gahua. Ne fakamakamaka a laua ke totogi e au e poko mo e nofo i kaina ka e mavehe ka tu e 18 e tau haaku he moui, to maeke au ke kamata ke paionia. Takitaki atu e mena nei ke tutala tumau ke he tupe haaku ne moua. Ne totoko e au kua manako au ke fakaputu ai ma e gahua paionia, ka kua uta ai e laua.

Hoko e mogo ke kamata ke paionia, ne fakanofo he tau matua haaku au ti fakamaama na tuku e laua e tupe ne age e au he pege ke fakaputu ai. Ti liuaki mai oti e laua ki a au ke fakatau aki e tau mena tui mo e falu mena ke lata mo e gahua paionia. Kua fakaako e laua au ke leveki ne au a au mo e nakai amanaki ke taute he falu e mena nei. He liu ono ki tua, ko e fakaakoaga ia kua mua atu e aoga.

He lalahi hake a maua mo Lesley, ne fa nonofo e tau paionia he kaina ha mautolu, ti fiafia a mautolu ke fakalataha ke he gahua he fonua mo lautolu. Ko e tau matahiku faahi tapu ha mautolu kua fakatoka ni ke gahua he fonua he taha fale ke he taha fale, fakamatala he puhalatū, mo e taute e tau fakaako Tohi Tapu. Ko e foliaga ma e tagata fakailoa he fakapotopotoaga he tau magahala ia ko e 60 e tulā he mahina. Ne fa teitei tumau e matua fifine ke hokotia ke he foliaga ia, ko e fakafifitakiaga mitaki ma Lesley mo au.

PAIONIA I TASMANIA

Ko e kotofaaga paionia fakamua haaku ko e aelani ko Tasmania i Ausetalia, ne fakalataha atu au mo e mahakitaga haaku mo e taane haana. Pete ia, ne nakai leva ti o atu a laua ke he vahega ke 15 aki he Aoga Kiliata. Ko e mena mā lahi au ti nakaila fano kehe ia a au mo e kaina tali mai. Ne tuahā e falu to liga tolu ni e mahina haaku i ai. Ka e he nakaila taha ia e tau he 1950, ne kotofa au ke eke mo fekafekau kamupanī, ne fakahigoa mogonei ko e leveki he kau he tau motua. Fakamui ne kotofa au ko e paionia pauaki, ti ko e taha matakainaga taane fuata foki e hoa haaku.

Ne kotofa a maua ke he taone mamao keli kopa ne nakai fai Fakamoli i ai. Ne hohoko atu a maua he pasi he taha afiafi. Nonofo ai a maua he hotela tuai he pō fakamua. He aho hake ne ō a maua fakamatala he taha fale ke he taha fale, ne hūhū a maua ke he tau tagata he tau kaina ko e fai poko atā nakai a lautolu ne iloa. He teitei oti e aho, ne talahau he taha tagata e fale he akoako ne tata ke he fale tapu Presbyterian ne tokanoa ti pehē kua lata a maua ke tutala ke he tiakono. Ne fiafia a ia ti mai e fale ki a maua. Matakehe ke o mai he fale he akoako he tau aho takitaha ke ō ke fakamatala.

Kua fua mitaki e fonua he matakavi. Ne mitaki e tau fakatutalaaga ha maua ti loga e fakaako Tohi Tapu ne kamata. Mogo ne iloa he tau takitaki he lotu ne nonofo he taone lahi e mena nei ti logona kua nonofo he Tau Fakamoli a Iehova e fale he akoako, ne poaki e lautolu e tiakono ke fekau a maua ke ō kehe fakamafiti. Ne liu foki a maua nakai fai mena ke nonofo ai!

He mole e fakamatala ato hoko ke he lotoga he pale laā he aho hake, ne kumi mena a maua ke momohe ai he pō. Ko e tau tutūaga he malē sipote ni ha maua ne maeke ke moua. Ne fufū e maua e tau katoleta ha maua i ai ti matutaki e fakamatala. Kua pouli fakahaga ai, ka e fifili a maua ke ahiahi foki e falu kaina gahoa ne toe ke fakaoti e puhalatū ia. He taha fale ne foaki mai he tagata taane e mena ke nonofo ai a maua he fale ne ua e poko ikiiki i tua he vala kaina haana!

GAHUA TAKAIAGA MO KILIATA

Kavi ke he valu e mahina he mole e kotofaaga fakamatala nei, ne moua e au e uiina mai he la ofisa i Ausetalia ke eke mo leveki takaiaga. Ne ofo lahi au he mena nei ha ko e 20 laia e tau haaku he moui. He oti e ua e faahi tapu he fakamahani, ne kamata au ke taute e tau ahiahi tumau ke fakamafana e tau fakapotopotoaga. Ko lautolu ne motua hake ia au, ne liga teitei ni ko e tau tagata oti, ne nakai onoono hifo ke he fuata haaku ka e fakalilifu e gahua haaku ne taute.

Lahi mahaki e kehekehe mooli he ahiahi atu ke he tau fakapotopotoaga takitaha! He taha faahi tapu ne fina atu au he pasi, taha faahi tapu he peleō, ti he motokā po ke heke i tua he pasikala afi, he fakalagotatai e katoleta mo e kato fakamatala. Ko e mena fiafia mooli ke nofo mo e tau matakainaga Fakamoli. Taha e fekafekau kamupanī ne makai lahi ke nofo au mo ia pete kua nakaila mau maopoopo e fale haana he talaga. He faahi tapu ia ko e mohega haaku ne taute i loto he tapu koukou, ka ko e fiafia fakaagaaga ha ia he faahi tapu ia ha mautolu!

Taha mena fakaofo foki ne tupu he 1953 he moua e au e tohi ole ma e vahega ke 22 aki he Aoga Kiliata. Ka kua lafi e olioli haaku mo e tupetupe. Kitia e mutolu, he mole e kautūaga he mahakitaga haaku mo e taane haana mai i Kiliata ia Iulai 30, 1950, ne kotofa a laua ki Pakisitani. He nakaila katoa ia e tau, ne gagao a Lesley ti mate i ai. To fēfē e logonaaga he tau matua haaku he manamanatu e au, ha ko e fano fai au ke he taha matakavi he lalolagi he nakaila leva e tupu e mena ia? Pete ia, ne pehē a laua: “Fano mo e fekafekau ki a Iehova ke he matakavi kua fakakite atu e ia.” Nakai liu au kitia e Matua Taane. Ne mate a ia he matahiku he atu tau 1950.

Nakai leva, ne fakalataha atu au ke he toga mo e tokolima foki e Ausetalia ke lata mo e fenoga ne ono e mahina i New York City. He magahehala, ne totou Tohi Tapu, kumikumi, mo e fakamatala a mautolu ke he falu tagata ne fakatauō he toga. Ato o hake ke he aoga i South Lansing i New York, ne ō a mautolu he fonoaga he lalolagi katoa ia Iulai 1953 he Yankee Stadium. Ko e tapunu ne fakalataha atu ai ko e 165,829!

Ko e vahega ha mautolu ne toko 120 e tagata fakaako i Kiliata ne o mai he tau kalakala oti he lalolagi. Ko e hoko laia ke he aho ne fakamailoga e kautūaga ha mautolu ne tala mai e tau matakavi kua kotofa a mautolu ke fekafekau i ai. He moua e magaaho atā, ne fakatepe atu a mautolu ke he fale toka tohi i Kiliata ke fakakia e tau motu kua kotofa a mautolu ki ai. Ne iloa e au ko e motu kua kotofa au ki ai ko Parakuai ko e motu ne talahaua he miha fakapolitika. Nakai leva e hoko atu ki ai, ne hūhū au ke he falu misionare he taha pogipogi ko e heigoa e “fakamanatuaga” ne hoko he pō. Ne mamali a laua ti pehē: “Ko e miha fakapolitika fakamua a ia haau ne mailoga. Ono ki fafo he gutuhala he faahi mua.” Haia e tau kautau he tau matapoko oti!

KO E MENA OFOOFOGIA NE TUPU

He taha mogo, ne fakatauō au mo e leveki takaiaga ke ahiahi e fakapotopotoaga mamao mo e fakakite e kifaga The New World Society in Action. Ne valu po ke hiva e tulā he fenoga atu ha maua, fakamua he tuleni, ti he nua mo e peleō, ti fakahiku aki e peleō ne toho he povi. Ne ta atu e maua e matini hila mo e hulu he kifaga. He hohoko atu ai, ne fakaaoga e maua e aho hake ke ahiahi e tau faama mo e uiina oti ke o mai ke he kifaga ka fakakite he pō ia. Kavi ke he 15 e tagata ne o mai.

He mole e kavi ke he 20 e minuti he fakakite e kifaga, ne tala mai ki a maua ke ō fakamafiti ki loto he fale. Ne totō e maua e hulu he kifaga ti omaoma. Ko e mogoia ne kamata e tau tagata taane ke tauhea, fakapāpā e tau fana, mo e ui: “Ko e atua ha mautolu ko e atua lima toto, ti manako a ia ke he toto he tau gringo.” Na ua ni e gringo i ai ti ko au taha ia laua ia! Ne taofi he tau tagata ne o mai ke kitekite e kifaga e tau laliaga he matakau ke moumou e fale. Ka e liliu mai e tau tagata totoko he kavi he matahola tolu he pogipogi, he fakapāpā e tau fana ha lautolu mo e mavehe ke uta a maua ke he taone he taha vala he aho ia.

Ne matutaki atu e tau matakainaga ke he leoleo, ti hau a ia he pale laā mo e ua e nua ke uta a maua ke he taone. He liliu a mautolu, ka hohoko ke he tau ulu akau, ne aaki mai e ia e fana haana ti mua atu ke tivi e matakavi. Ne kitia e au e nua kua aoga lahi mo ō fenoga, ti fai foki au he mogo fakamui.

LOGA FOKI E MISIONARE NE HOHOKO MAI

Ne matutaki e gahua fakamatala ke fua mitaki pete ni e totoko tumau he tau akoako. He 1955, lima e misionare foou ne hohoko mai, putoia e matakainaga fifine fuata Kanatā ko Elsie Swanson, ne kautū mai he vahega ke 25 aki i Kiliata. Fai magaaho he nonofo a maua he la ofisa ato kotofa a maua ke he taha taone foki. Ne foaki e moui haana ke fekafekau ki a Iehova mo e tote maka e lagomatai mai he tau matua haana, ne nakai talia e kupu mooli. Ia Tesemo 31 he 1957, ne mau au mo Elsie, ti nonofo ni a maua he kaina misionare he faahi tokelau ha Parakuai.

Ne nakai fai vai i loto he kaina ha maua; ka e fai vai keli a maua he faahi tua. Ti nakai fai saoa po ke fale tote ki fale, nakai fai matini unu, ti nakai fai filisa foki. Ne fakatau e maua e tau mena kai ke lata mo e tau aho takitaha. Ka ko e mukamuka he moui mo e tau fakafetuiaga fakaalofa mo e tau matakainaga i loto he fakapotopotoaga ne taute ai mo magahala fiafia lahi mahaki he fakamauaga ha maua.

He 1963, nakaila leva ia e liliu mai a maua ki Ausetalia ke ahiahi e matua fifine haaku, ne oho e ate haana, tuga ha kua fiafia lahi he liu laia kitia e tama taane haana he mole e hogofulu e tau. He teitei a maua ke liliu ke he kotofaaga i Parakuai, ne fehagai a maua mo e taha he tau fifiliaga ne mua atu e uka he tau momoui ha maua. To toka kia e maua e matua fifine haaku he fale gagao, he amanaki to fai tagata ka leveki a ia ti liliu ke he kotofaaga ha maua i Parakuai ne fiafia a maua ki ai? He lahi e liogi, ne fifili a maua mo Elsie ke nonofo mo e leveki e Matua Fifine. Maeke a maua ke taute e mena ia mo e fakatumau ke he fekafekauaga mau ato mate a ia he 1966.

Ko e kotofaaga lilifu ke fakaaoga ke he gahua takaiaga mo e leveki faahimotu i Ausetalia ke he loga e tau tau mo e fakaako e Aoga Fekafekau he Kautu ma e tau motua. Ti hoko mai foki taha hikiaga ke he tau momoui ha maua. Ne kotofa au ke eke mo taha he La Komiti fakamua i Ausetalia. Ti ko e magaaho ne taute a mautolu ke talaga e la ofisa foou, ne fifili au ko e leveki he komiti he matagahua talaga. Mo e lagomatai he tau tagata gahua tokologa ne lotomatala mo e kaufakalataha, ne mau e la fulufuluola lahi he talaga.

Ne kotofa mogoia au ke he Faahi Gahua he Fekafekauaga, ne leveki e gahua fakamatala he motu. Moua foki e au e kotofaaga lilifu ke ahiahi e falu la he lalolagi katoa ko e leveki he tau faahimotu ke foaki e lagomatai mo e fakamalolōaga. Ti atihake mooli e tua haaku ke ahiahi e falu motu ne ha ha i ai a lautolu ne totou tau—hokotia ke he tau hogofulu tau—ne kua tuku he tau fale puipui mo e tau kemuaga pagotā ha ko e omaoma fakamooli ha lautolu ki a Iehova.

KOTOFAAGA HA MAUA MOGONEI

He liliu mai he fenoga ahiahi he tau faahimotu he 2001, ne moua e au e tohi he uiina ke fina atu ki Brooklyn i New York, ke gahua he La Komiti he Tau Faahi Kaufakalataha ne fakatū foou laia. Ne manamanatu hokulo au mo Elsie he liogi hagaao ke he uiina, ti talia fiafia e maua e kotofaaga. He molea e 11 e tau, ko maua agaia i Brooklyn.

Kua fiafia lahi au ha kua moua e au e hoana kua fiafia ke taute ha mena kua ole e Iehova. Ko Elsie mo au mogonei kua kavi ke he 80 tumā e tau tau he moui ti mitaki agaia e tau malolō tino. Kua amaamanaki a maua ke moua tumau e tau fakaakoaga ha Iehova ti pihia foki mo e tau monuina katoatoa ka moua e lautolu kua fakatumau ke taute haana finagalo.

[Blurb he lau 19]

He taha faahi tapu ne fina atu au he pasi, taha faahi tapu he peleō, ti he motokā po ke heke i tua he pasikala afi, he fakalagotatai e katoleta mo e kato fakamatala

[Blurb he lau 21]

Kua amaamanaki a maua ke moua tumau e tau fakaakoaga ha Iehova

[Tau Fakatino he lau 18]

Hema: He gahua takaiaga i Ausetalia

Matau: Mo e tau matua haaku

[Fakatino he lau 20]

Aho mau ha maua, ia Tesemo 31 he 1957