Fekafekau ke he Atua he Tokanoaaga
“Ko e fakaalofa ke he Atua hanai, kia omaoma a tautolu ke he tau poaki hana; nakai mamafa foki hana tau poaki.”—1 IOA. 5:3.
MAEKE NAKAI IA KOE KE TALI?
Lali fēfē a Satani ke taute e tau fakatufono he Atua ke tuga na mamafa?
Ko e ha kua lata ia tautolu ke fakaeneene lahi mahaki ke he tau lafiaga ha tautolu?
Ko e heigoa ka lagomatai a tautolu ke fakatumau e mahani fakamooli ke he Atua he tokanoaaga?
1. Onoono fēfē a Iehova ke he tokanoaaga, ti fakakite fēfē e ia e mena nā he tau fakafehagaiaga haana ki a Atamu mo Eva?
KO IEHOVA hokoia ne ha ha i ai e tokanoaaga katoatoa. Ka e, nakai fakaaoga hehē ai e ia; po ke fakaaoga katoatoa e ia e tokanoaaga he pule malolō ke he tau fekafekau haana. Ka kua age e ia ki a lautolu e tokanoaaga ke fifili, ne kua fakaatā a lautolu ke fakaaoga e fakailoilo mo e fakamakona e tau manako mitaki ha lautolu. Ma e fakatai, ne age he Atua ki a Atamu mo Eva taha ni e poakiaga fakatapu—ko e nakai fakaatā ke kai mai he “akau ke iloa ai e mitaki mo e kelea.” (Kene. 2:17) Ko e fakatokaaga ofoofogia mooli he tokanoaaga he taute e laua e finagalo he Tufuga ha laua!
2. Ko e ha ne galo he tau matua fakamua ha tautolu ha laua a tokanoaaga ne foaki he Atua?
2 Ko e ha ne age he Atua ke he tau matua fakamua ha tautolu e tokanoaaga lahi mahaki? Ne tufuga e ia a laua ke he fakatai haana ti age ki a laua e loto manamanatu, ti tonutika ai he amanaki ke he fakaalofa ha laua ma haana ko e Tufuga ha laua ke takitaki atu ai ke he puhala hako. (Kene. 1:27; Roma 2:15) Momoko ai, ne kaumahala a Atamu mo Eva ke loto fakaaue ke he ha laua a Foaki Moui homo ue atu mo e tokanoaaga ne age e ia ki a laua. Ka kua fifili a laua ke he tokanoaaga fakateaga ne foaki e Satani, ko e mahani tutokotaha. Ka e he nakai moua lahi e tokanoaaga, ne fakafua he tau matua fakamua ha tautolu a laua mo e ha laua tau hologa anoiha ke he tupaaga he agahala, mo e tau fua matematekelea.—Roma 5:12.
3, 4. Lali fēfē a Satani ke fakahehē a tautolu hagaao ke he tau tuaga ha Iehova?
3 Ka maeke a Satani ke kamatamata e tau tagata mitaki katoatoa tokoua—nakai ke talahau e tokologa he tau mena momoui fakaagaaga ke tiaki e pule katoatoa he Atua, kua maeke foki a ia ke fakahehē a tautolu. Ko e lagatau haana kua fakatumau agaia ni. Ne lali a ia ke fakahehē a tautolu ke manamanatu ke he tau poakiaga he Atua kua mamafa mo e fofō a tautolu mai he fefeua mo e fakafiafia. (1 Ioa. 5:3) Ko e manamanatuaga ia ka omoomoi e malolō lahi kaeke ke fakatumau a tautolu ke fakatapakupaku ki ai. “Ko e feoakiaga kelea ne fakaohooho lahi au, mua atu ha kua matakutaku au neke kehe e manatu mai he tau kapitiga haaku,” he ui he matakainaga fifine ne 24 e tau he moui ne taute e mahani feuaki. Liga kua logona foki e koe e peehiaga taha ia.
4 Momoko ai, he falu mogo ne ha ha ai e fakaohoohoaga kelea he tau kapitiga ka mai foki i loto he fakapotopotoaga Kerisiano. “Na iloa e au falu tama fuata ne fakatū kapitiga ke he tau tagata nakai tua,” he ui he fuata Fakamoli. “Fakahiku mogoia, ne mailoga e au ko e lahi e matutaki haaku mo lautolu, kua lahi foki e tatai haaku mo lautolu. Ne kamata e tuaga fakaagaaga haaku ke matematekelea. Nakai fiafia au ke he tau mena kai fakaagaaga he tau feleveiaaga, ti tote maka e fano haaku he gahua he fonua. Ko e fakamailoga haaku anei ke vevehe kehe he tau kapitiga ia, ti taute pihia e au!” Mataala nakai a koe ke he malolō he tau kapitiga haau kua lauia ki a koe? Manamanatu ke he fifitakiaga magaaho tonu he Tohi Tapu.—Roma 15:4.
LILIU KEHE E IA E TAU LOTO HA LAUTOLU
5, 6. Fakahehē fēfē e Apisaloma e falu, ti kautū nakai e lagatau haana?
5 Kua loga e fifitakiaga he Tohi Tapu hagaao ki a lautolu ne fakaohooho kelea ke he falu. Ko e taha fifitakiaga kelea pihia ko Apisaloma, ko e tama taane he Patuiki ko Tavita. Ko Apisaloma ko e tagata taane ne mua atu e mata mitaki. Fai magaaho, ke tuga a Satani, ne fakaatā e ia e foli tuaga ke fakapuke e loto haana, ha kua kamata a ia ke manako lahi ke he nofoaiki he matua taane haana ne nakai ha ha ia ia e tonuhia.a He lali fakavai ke fofō e tuaga patuiki, ne fakatupua e manamanatuaga hokulo ha Apisaloma ma e tau matakainaga Isaraela haana ka e eke lagatau, kua nakai manamanatu e lotopā he patuiki ki a lautolu. E, tuga e Tiapolo he kaina ko Etena, ne fakakite e Apisaloma a ia ko e tagata maukoloa, ke he magaaho taha fakafualoto vale ke he matua taane ni haana.—2 Samu. 15:1-5.
6 Kautū nakai e lagatau makaka ha Apisaloma? Ke he taha puhala, ē, ha kua pehē e Tohi Tapu: “Ti liliu kehe ai e Apisaloma e tau loto he tau tagata Isaraela.” (2 Samu. 15:6) Ka e he fakahikuaga, ko e fakaikaluga ha Apisaloma ne takitaki ke he veliaga ni haana. Kelea lahi mogoia, ne takitaki foki ai ke he mate haana mo e mamate he tokoafe ne fakahehēina e ia.—2 Samu. 18:7, 14-17.
7. Ko e heigoa e tau fakaakoaga ka fakaako e tautolu mai he tala hagaao ki a Apisaloma? (Kikite fakatino he lau 14.)
7 Ko e ha e tau Isaraela ia ne mukamuka lahi ke fakahehē? Liga manako a lautolu ke he tau mena ne mavehe e Apisaloma ki a lautolu. Po ke liga maueue a lautolu ha ko e fulufuluola he tino haana. Ko e mena ni ne tupu, maeke a tautolu ke mauokafua ke he mena nei: Kua nakai mahani fakamooli a lautolu ki a Iehova mo e haana patuiki ne fakauku. He vahā nei, ne matutaki a Satani ke fakaaoga e “tau Apisaloma” ke he laliaga haana ke liliu kehe e tau loto he tau fekafekau ha Iehova. ‘Ko e tau tuaga a Iehova kua pāpā maō lahi,’ liga talahau e lautolu. ‘Ti onoono la ke he tau tagata oti ia ne nakai fekafekau ki a Iehova. Ha ha ia lautolu e tau fiafia oti!’ To kitia nakai e koe e puhala he tau pikopiko fakalialia pihia mo e fakatumau ke mahani fakamooli ke he Atua? To mailoga nakai e koe ko e “fakatufono kua katoatoa e mitaki” ni ha Iehova, ko e fakatufono he Keriso, ka takitaki a koe ke he tokanoaaga mooli? (Iako. 1:25) Ka pihia, tokiofa e fakatufono ia, ti ua kamatamata ke fakaaoga hehē e tokanoaaga faka-Kerisiano haau.—Totou 1 Peteru 2:16.
8. Ko e heigoa e tau fifitakiaga mooli he moui kua fakataitai ne nakai fua mai e fiafia he moumou e tau tuaga a Iehova?
8 Mua atu ke he tau tagata fuata e tataoaga ha Satani. Ko e matakainaga taane mogonei kua 30 tumā ne pehē hagaao ke he tau tau fuata mui haana: “Ne onoono au ke he tau tuaga he mahani ha Iehova kua pāpā maō, nakai ko e puipuiaga.” Ti ko e fua, ne taute e ia e mahani feuaki. Ka kua tamai he mena nei ki a ia e nakai fiafia. “Ko e tau logonaaga hokulo he agahala mo e tokihala ne mafuta hake ke he loga e tau tau,” he ui e ia. He fakaata ke he vahā fuata mui haana, ne tohi he matakainaga fifine: “He mole e mahani feuaki, logona e koe e momoko vaivai mo e gatigati. Pihia foki mogonei he mole e 19 e tau, kua liliu mai e tau manatu kelea.” Taha foki e matakainaga fifine ne pehē: “Ko e manatu kua moumou he mahani haaku e tau tagata ne ofania lahi mahaki e au kua fakakelea e logonaaga, fakaagaaga, mo e manamanatuaga ne lauia kelea lahi au. Ko e mena nakai mitaki ke moui ka e nakai talia e Iehova.” Nakai manako a Satani ki a koe ke manamanatu hagaao ke he fakahikuaga pihia he agahala.
9. (a) Ko e heigoa e tau hūhū ka lagomatai a tautolu ke filifilia ha tautolu a onoonoaga ki a Iehova mo e tau fakatufono mo e tau matapatu fakaakoaga haana? (e) Ko e ha kua aoga ke iloa mitaki e Atua?
9 Ko e momoko ha ia kua tokologa e tau fuata he kupu mooli—ti pihia mo e tokologa ia lautolu ne momotua—ne fakaako ke he puhala uka ko e tau fakafiafiaaga agahala kua hagahaga kelea lahi! (Kala. 6:7, 8) Ti hūhū hifo ki a koe: ‘Mailoga mitaki nakai e au e tau lagatau a Satani—ko e tau fakahehē vale? Onoono nakai au ki a Iehova ko e Kapitiga tata lahi mahaki haaku, ko ia kua talahau tumau e tau mena mooli ti manako ma e mitaki lahi mahaki ma haaku? Kua mauokafua katoatoa nakai au to nakai taofi au mai he taha mena kua mitaki mooli mo e to fua mai e fiafia lahi mahaki ki a au?’ (Totou Isaia 48:17, 18.) Ke maeke ke talahau mai he loto, ē, kua lata ia koe ke nakai iloa potake a Iehova. Kua lata ia koe ke iloa mitaki a ia mo e mailoga e tau fakatufono mo e tau matapatu fakaakoaga he Tohi Tapu ne fakaata e fakaalofa haana ma haau, nakai ko e manako ke puipui malolō a koe.—Sala. 25:14.
LIOGI MA E LOTO ILOILO MO E OMAOMA
10. Ko e ha kua lata ia tautolu ke eketaha ke fifitaki e patuiki fuata ko Solomona?
10 He tote agaia a Solomona, ne pehē fakatokolalo a ia he liogi: “Ko au foki ko e tama tote, nakai iloa e au ke hu atu ki fafo mo e hu mai ki fale.” Ne liogi mogoia a ia ma e loto kua lotomatala mo e omaoma. (1 Patu. 3:7-9, 12) Ne tali e Iehova e ole ia mai he loto, mo e to taute pihia foki e ia ki a koe, pete ko e tote po ke motua a koe. Mooli, to nakai foaki e Iehova ki a koe e lotomatala mo e pulotu he puhala fakamana. Ka to taute e ia a koe ke pulotu kaeke ke fakaako fakamakutu e koe e haana Kupu, liogi ma e agaaga tapu, mo e fakaaoga katoatoa e tau foakiaga fakaagaaga ne foaki mai puhala he fakapotopotoaga Kerisiano. (Iako. 1:5) Mooli, puhala he tau foakiaga nei kua foaki fakalahi foki e Iehova e pulotu lahi ke he tau fekafekau fuata haana ka e nakai ki a lautolu kua fakaheu e fakatonuaga haana, ne higoa ko e “tau tagata iloilo, mo e loto matala” he lalolagi nei.—Luka 10:21; totou Salamo 119:98-100.
11-13. (a) Ko e heigoa e tau fakaakoaga aoga ka fakaako e tautolu mai ia Salamo 26:4, Tau Fakatai 13:20, mo e 1 Korinito 15:33? (e) To fakagahua fēfē e koe e tau matapatu fakaakoaga Tohi Tapu nei?
11 Ke fakatai e uho lahi he fakaako e Tohi Tapu mo e manamanatu fakahokulo ke he mena kua totou e tautolu ke maeke a tautolu ke iloa mitaki a Iehova, manamanatu ke he tau kupu tohi nei. Igatia ai mo e matapatu fakaakoaga aoga hagaao ke he ha tautolu a fifiliaga he tau lafiaga: “Nakai nofo au mo e tau tagata matahavala; ti nakai fano au mo e tau tagata pikopiko.” (Sala. 26:4) “Ko ia kua feoaki mo e tau tagata iloilo, kua iloilo ni a ia; ka ko ia kua kapitiga mo e tau tagata goagoa, to matematekelea ai a ia.” (Fakatai 13:20) “Ko e feoaki mo lautolu kua mahani kelea kua kelea ai e tau mahani mitaki.”—1 Kori. 15:33.
12 Ko e heigoa e tau fakaakoaga aoga lahi ka fakaako e tautolu mai he tau kupu tohi ia? (1) Manako a Iehova ki a tautolu ke fifili e tau lafiaga ha tautolu. Manako a ia ke puipui e tau mahani mo e tuaga fakaagaaga ha tautolu. (2) Kua fakaohooho a tautolu ma e mitaki po ke kelea he tau tagata ne lafi mo tautolu; ko e mena mooli a ia he moui. Ko e puhala ne tuku aki e tau kupu tohi i luga kua fakakite ko Iehova kua kitia e tau loto ha tautolu. Pihia fēfē? Mailoga kua nakai fai kupu tohi ne fakatoka mai e tau poakiaga, tuga “kua nakai lata a koe ke . . . ” Ka kua tohi fakamahino ai ko e tau talahauaga mooli. Ko e kakano kua pehē a Iehova ki a tautolu: ‘Hanei e tau mena mooli. To tali fēfē a koe? Ko e heigoa ne toka he loto haau?’
13 Fakahiku ai, ha ko e tolu e kupu tohi kua fakatoka mai e tau kupu mooli aoga, kua hau he magaaho tonu mo e laulahi e fakagahuaaga. Ke fakatai ai, hūhū hifo ki a koe e tau hūhū tuga e: Maeke fēfē au ke kalo he fio mo lautolu takitaha ne pikopiko he fufū a lautolu? He tau tuaga fe kua liga matutaki au mo lautolu ia? (Fakatai 3:32; 6:12) Ko hai e “tau tagata iloilo” kua manako a Iehova ke fio mo au? Ko hai e “tau tagata goagoa” kua manako a ia ke kalo kehe au i ai? (Sala. 111:10; 112:1; Fakatai 1:7) Ko e heigoa e “tau mahani mitaki” ka moumou e au he fifili e tau kapitiga kelea? To feleveia nakai au mo e tau kapitiga kelea ni he lalolagi? (2 Pete. 2:1-3) To tali fēfē e koe e tau hūhū nei?
14. Fakamalolō fēfē e koe haau a Tapuakiaga Magafaoa he afiafi?
14 He fakakakano ke he tau Tohiaga Tapu, ko e ha he nakai kumikumi e falu kupu Tohi Tapu kua fakakite e manamanatuaga he Atua hagaao ke he tau matakupu kua felauaki ki a koe mo e magafaoa haau?b Tau matua, manamanatu ke fakatutala e tau matakupu pihia he ha mutolu a Tapuakiaga Magafaoa he afiafi. He taute pihia e koe, tokaloto e foliaga haau ke lagomatai e tau tagata takitaha he magafaoa ke loto fakaaue katoatoa ke he hokulo he fakaalofa he Atua ma tautolu tuga ne fakakite mai he haana tau fakatufono mo e tau matapatu fakaakoaga. (Sala. 119:72) Mooli, ko e fakaako ke he tau mena ia kua lata ke fefakatataaki e tau tagata oti he magafaoa ki a Iehova mo e ke he taha ke he taha.
15. Maeke fēfē a koe ke iloa kaeke kua feaki e koe e loto kua lotomatala mo e omaoma?
15 Maeke fēfē a koe ke iloa kua feaki e koe e loto kua lotomatala mo e omaoma? Taha puhala ko e fakatatai e manamanatuaga haau mo e ha lautolu ne tua fakamooli i tuai, tuga e Patuiki ko Tavita, ne tohi: “Haku Atua na e, kua fiafia au ke eke hāu a finagalo; ha i loto ia au hau a fakatufono.” (Sala. 40:8) Tuga ia, ko e tagata tohia he Salamo 119 ne pehē: “Kua lahi ni haku a manako ke he hāu a fakatufono; kua manamanatu au ki ai ke he aho oti.” (Sala. 119:97) Ko e fakaalofa pihia kua nakai tupu noa ni he kelekele potake. Ka e, kua fua mai he fakaako hokulo, liogi, manamanatu fakahokulo, mo e mena ne tupu—he kitia ke he moui he tagata e tau monuina loga kua fua mai he pipiki ke he tau tuaga he Atua.—Sala. 34:8.
TAU MA E TOKANOAAGA FAKA-KERISIANO HAAU!
16. Ko e heigoa, kua lata ia tautolu ke mailoga kaeke ke kautū a tautolu ke he tauaga ma e tokanoaaga mooli?
16 Mai he fakamauaga tala, ne fakafehagai tau kelea lahi e tau motu he higoa ke he tokanoaaga. Lahi atu fēfē mogoia e lata haau ke makai ke tau fakaagaaga ma e haau a tokanoaaga faka-Kerisiano! He mailoga e tau fī haau kua nakai ni ko Satani, ko e lalolagi, mo e aga kona i ai. Kua lata foki a koe ke mahani fakalatalata mo e haau ni a tau nakai mitaki katoatoa, putoia e loto fakavai. (Iere. 17:9; Efeso 2:3) Ka ko e lagomatai ha Iehova, maeke a koe ke kautu he tau. Mua atu, ko e tau kautūaga takitaha—lahi po ke tote—to ha ha i ai ua e lauiaaga mitaki. Fakamua, to fakafiafia e koe e loto ha Iehova. (Fakatai 27:11) Uaaki, he kamata e koe e malolō fakahao he Atua ke he “fakatufono kua katoatoa e mitaki ha i ai e tokanoaaga,” to fifili fakalahi foki a koe ke fakatumau ke he “gutuhala pukilu” ke he moui tukulagi. Nakai leva, to olioli e koe lahi atu foki e tokanoaaga kua fakatoka mai i mua ma e tau tagata fakamooli a Iehova.—Iako. 1:25; Mata. 7:13, 14.
17. Ko e ha kua lata ke nakai loto lolelole a tautolu hagaao ke he tau nakai mitaki katoatoa ha tautolu, ti ko e heigoa e lagomatai kua foaki e Iehova?
17 Mooli ke he falu mogo, kua taute e tautolu oti e tau hehē. (Fakama. 7:20) Ka tupu e mena ia, ua molea e logonaaga fakateaga po ke lolelole lahi. Ka tupetupe a koe, ke fakatai, matike ti fano ki mua—pete foki kua kakano e mena ia ke ole ke he tau motua he fakapotopotoaga ma e lagomatai. Ko e ha lautolu a “liogi kua eke mo e tua,” he tohi e Iakopo, “to fakamoui e tagata gagao, . . . to fakatu foki [e Iehova] a ia; kaeke foki kua hala a ia, to fakamagalo ai.” (Iako. 5:15) E, ua nimo ko e Atua kua fakaalofa noa mooli ti ko ia ne futiaki a koe ke he fakapotopotoaga ha kua kitia e ia e aoga haau. (Totou Salamo 103:8, 9.) Ti ko e fakatumau haau ke katoatoa e loto ki a Iehova, to nakai tiaki e ia a koe.—1 Nofo. 28:9.
18. Maeke fēfē a tautolu ke fakalagotatai mo e liogi ha Iesu ne fakamau ia Ioane 17:15?
18 He liogi he pō fakahiku mo e tau aposetolo 11 fakamooli haana, ne talahau e Iesu e tau kupu nakai nimo nei ke lata mo lautolu: “Leveki atu e koe a lautolu mai ia ia ne mahani kelea.” (Ioane 17:15) Ko e tupetupe ha Iesu ne nakai kaupā ni ke he tau aposetolo haana, ka e fakalaulahi atu ki a lautolu oti e tau tutaki haana. Ti, maeke ia tautolu ke iloa mooli kua tali e Iehova e liogi ha Iesu he kitekite ki a tautolu he tau vahā uka nei. “Ko e akau punuti a [Iehova] kia lautolu ne o mo e mahani tonu . . . leveki foki e ia e tau puhala he hana tau tagata tapu.” (Fakatai 2:7, 8) E, ko e puhala mahani fakamooli kua nakai paleko ai, ka koe puhala hokoia ke he moui tukulagi mo e tokanoaaga mooli. (Roma 8:21) Ua fakaatā ha tagata ke tataki kehe a koe mai ai!
[Tau Matahui Tala]
a Kua mavehe he Atua ki a Tavita e “tega” (NW) he vahā anoiha ke moua e nofoaiki ka age he mole e fanauaga ha Apisaloma. Mena ia, kua lata a Apisaloma ke iloa ne nakai fifili e Iehova a ia ko e hakega ha Tavita.—2 Samu. 3:3; 7:12.
b Ko e tau fifitakiaga mitaki ko e 1 Korinito 13:4-8, ne fakamaama e Paulo e fakaalofa, mo e Salamo 19:7-11, ne kua fakatoka mai loga e monuina kua fua mai he omaoma ke he tau fakatufono a Iehova.
[Tau Fakatino he lau 14]
Maeke fēfē a tautolu ke kitia e tau Apisaloma he vahā nei ti puipui a tautolu mai ia lautolu?