Fakaatā a Iehova ke Takitaki a Koe ke he Tokanoaaga Mooli
“Kikite ke he fakatufono kua katoatoa e mitaki ha i ai e tokanoaaga.”—IAKO. 1:25.
MAEKE NAKAI A KOE KE FAKAMAAMA?
Ko e heigoa e fakatufono kua takitaki ke he tokanoaaga mooli, ti ko hai ka aoga mai he fakatufono ia?
Ko e heigoa e mena galo ke moua e tokanoaaga mooli?
Ko e heigoa e tokanoaaga kua tatali ke he tau tagata oti kua fakatumau ke he puhala ke he moui?
1, 2. (a) Ko e heigoa ne tupu ke he tau tokanoaaga he lalolagi, ti ko e ha? (e) Ko e heigoa e tokanoaaga kua fakatoka i mua ma e tau fekafekau a Iehova?
KUA nonofo a tautolu he magahala ne tupu lahi e lotokai, matematekelea, mo e favale. (2 Timo. 3:1-5) He tali, kua taute he tau fakatufono loga e tau matafakatufono, fakamalolō e tau matakau leoleo, mo e fakatū e tau pokiata leoleo. He falu motu, ha ha i ai e tau tagata kua lali ke fakaholo ki mua e haohao mitaki ha lautolu he tuku e tau fakatokaaga puipui (alarm) he tau kaina ha lautolu, ti pihia mo e falu loka mo e tau pā puipui hila. Tokologa ne nakai mahalo ke ō ka pouli po ke fakatoka e tau tama ha lautolu ke fefeua i fafo ka e nakai fakakia—he aho po ke pō. Maaliali ai, kua galo fakahaga e tokanoaaga, ti tuga to matutaki ke he puhala ia.
2 He kaina ko Etena, ne fakailoa e Satani ko e matapatu ke he tokanoaaga mooli ko e tutokotaha mai ia Iehova. Ko e pikopiko fakalialia mo e kelea muitui mooli! Ko e tokologa mogoia e tagata kua tiaki e tau fakakaupāaga he tau mahani mo e tuaga fakaagaaga ne fakatū he Atua, ko e lahi he kaufakalatahaaga katoa kua matematekelea. Ko e tuaga kelea lahi nei kua lauia foki a tautolu ko e tau fekafekau a Iehova. Ko e mena ia, ha ha ia tautolu e amaamanakiaga he kitia e fakaotiaga he fakatupa e tau tagata ke he agahala mo e matahavala mo e olioli e mena ne fakahigoa he Tohi Tapu ko e “tokanoaaga ha ha he monuina he fanau he Atua.” (Roma 8:21) Ti fitā he kamata a Iehova ke tauteute e tau fekafekau haana ma e tokanoaaga ia. He puhala fe?
3. Ne age e Iehova ke he tau tutaki he Keriso e matafakatufono fe, ti ko e heigoa e tau hūhū ka fakatutala a tautolu ki ai?
3 Ko e tali kua fakavē ke he mena ne fakahigoa he tagata tohia Tohi Tapu ko Iakopo ko e “fakatufono kua katoatoa e mitaki ha i ai e tokanoaaga.” (Totou Iakopo 1:25.) Kua fakamaama he falu fakaliliuaga he Tohi Tapu e talahauaga nei “ko e fakatufono kua fakatokanoa a tautolu” (The New English Bible) mo e “fakatufono mitaki katoatoa he tokanoaaga” (The New American Bible). Fa mahani ai, kua matutaki he tau tagata e matafakatufono mo e tau fakakaupāaga, ka e nakai mo e tokanoaaga. Ko e heigoa mogoia e “fakatufono kua katoatoa e mitaki ha i ai e tokanoaaga”? Ti fakatokanoa fēfē he matafakatufono ia a tautolu?
KO E FAKATUFONO KUA FAKATOKANOA
4. Ko e heigoa e “fakatufono kua katoatoa e mitaki ha i ai e tokanoaaga,” ti ko hai ne aoga mai ai?
4 Ko e “fakatufono kua katoatoa e mitaki ha i ai e tokanoaaga” ne nakai ko e Fakatufono faka-Mose, ha ko e fakaholoaga ia ne taute e tau holifono ke kitia mo e fakamooli ai ke he Keriso. (Mata. 5:17; Kala. 3:19) Ko e fakatufono fe mogoia ne hagaao a Iakopo ki ai? Kua manatu a ia ke he “fakatufono a Keriso,” ne ui foki ko e “fakatufono ha ha he tua” mo e “fakatufono he tokanoaaga [he tau tagata].” (Kala. 6:2; Roma 3:27; Iako. 2:12) Ko e “fakatufono kua katoatoa e mitaki” mogoia ne fakakatoatoa e tau mena oti kua manako a Iehova ki a tautolu. Ko e tau Kerisiano fakauku mo e ‘tau mamoe kehe’ kua aoga mai ai.—Ioane 10:16.
5. Ko e ha e fakatufono he tokanoaaga kua nakai mamafa?
5 Nakai tuga e tau fakatokaaga matafakatufono he tau motu loga, ko e “fakatufono kua katoatoa” kua nakai uka po ke mamafa ka e ha ha i ai e tau poakiaga mo e tau matapatu fakaakoaga aoga. (1 Ioa. 5:3) “Maeke vave haku a lakau hahamo he uta, ko e haku a kavega foki, ko e mena mama a ia,” he ui e Iesu. (Mata. 11:29, 30) Lafi ki ai, ko e “fakatufono kua katoatoa” ne nakai lata ma e tohi loagitu he tau fakaatāaga, po ke tau fakahala, ha kua fakavē ai ke he fakaalofa mo e kua fakamau ai ke he tau manamanatuaga mo e tau loto, nakai ke he tau lapa maka.—Totou Heperu 8:6, 10.
PUHALA KUA FAKATOKANOA A TAUTOLU HE “FAKATUFONO KUA KATOATOA E MITAKI”
6, 7. Ko e heigoa ka talahau hagaao ke he tau tuaga a Iehova, ti ko e ha e matafakatufono he tokanoaaga kua aoga?
6 Ko e tau kaupāaga kua fakatoka e Iehova ma e tau mena momoui iloilo haana kua aoga mo e puipui aki ni a lautolu. Tuga ma e fakatai, kia manamanatu ke he tau fakatufono he fua lalolagi ne puipui e malolō mo e tupuaga. Nakai gūgū e tau tagata he pehia he tau matafakatufono ia. Ka e loto fakaaue a lautolu ki ai, he mailoga e tau matafakatufono pauaki kua latatonu ma e tau momoui ha lautolu. Pihia foki, ko e tau mahani mo e tau tuaga fakaagaaga ha Iehova, ne fakaata e “fakatufono kua katoatoa e mitaki” he Keriso, kua latatonu ma e aoga he tagata.
7 Lafi ke he puipuiaga, ko e matafakatufono he tokanoaaga kua fakaatā a tautolu ke fakamakona e tau manako kua lata ha tautolu he nakai fakahagahaga kelea a tautolu po ke aofia atu ke he tau tonuhia mo e tau tokanoaaga he falu. Ko e mena galo mogoia ke tokanoa katoatoa ai—he maeke ke taute e tau manako ha tautolu—ko e feaki e tau manako hako, ko e tau manako kua felauaki mo e aga mo e tau tuaga a Iehova. Ke he tau kupu foki, kua lata a tautolu ke fakaako ke fiafia ke he mena ne fiafia a Iehova ki ai mo e fakavihia e mena kua vihiatia e ia, ne kua lagomatai he fakatufono he tokanoaaga a tautolu ke taute.—Amosa 5:15.
8, 9. Ko e heigoa e tau aoga kua moua mai ia lautolu kua pipiki ke he matafakatufono he tokanoaaga? Fakatātā.
8 He tuaga nakai mitaki katoatoa ha tautolu, kua taufetului a tautolu ke tautaofi e tau manako hehē. Ti ka pipiki fakamooli a tautolu ke he matafakatufono he tokanoaaga, kua logona e tautolu e tau malolō aoga ke he mogonei foki. Ke fakatai: Ko e tagata fakaako Tohi Tapu foou ne higoa ko Jay ne hufia ke he tapaka. He fakaako e ia ko e aga haana ne nakai fakafiafia e Atua, ti kua lata a ia ke taute e fifiliaga. To matutaki nakai a ia ke mahala ke he tino haana po ke to muitua a ia ki a Iehova? Pulotu ai, ne fifili a ia ke fekafekau ke he Atua, pete he manako lahi e tino haana ke he nikotini. Fēfē e logonaaga haana he kautū ke he aga haana? “Logona hifo e au e atāina katoatoa mo e molea e fiafia,” he talahau e ia he mogo fakamui.
9 Ne iloa e Jay ke he mena ne tupu, ko e tau tokanoaaga he lalolagi ne fakaatā e tau tagata ke “loto ke he tau mena he tino,” ko e mena ke tupa ai, ka ko e tau tokanoaaga a Iehova, kua kakano ko e “loto ke he tau mena he Agaga,” ne fakatokanoa mo e takitaki ke he ‘moui mo e mafola.’ (Roma 8:5, 6) Moua i fe e Jay e malolō ke fahia ke he aga fakatupa ia haana? Nakai ia ia; ka e mai ai he Atua. “Fakaako tumau e au e Tohi Tapu, liogi ma e agaaga tapu, mo e kumi e lagomatai fakaalofa ne foaki fakamakai he fakapotopotoaga Kerisiano ki a au,” he ui e ia. Ko e tau foakiaga taha nei ka lagomatai a tautolu oti ke he manako ha tautolu ma e tokanoaaga mooli. O mai la tautolu ke kitia e puhala.
KIKITE KE HE KUPU HE ATUA
10. Ko e heigoa e kakano ke “kikite” ke he matafakatufono he Atua?
10 Ia Iakopo 1:25, ko e taha vala ne totou: “Ko ia kua kikite ke he fakatufono kua katoatoa e mitaki ha i ai e tokanoaaga, mo e tumau ki ai, . . . to monuina e ia ke he hana omaoma.” Ko e kupu Heleni fakamua ne fakaliliu “kikite” kua kakano “ke tukutukuhifo ke onoono ki ai,” ne hagaao ke he laliaga katoatoa. E, ka manako a tautolu ke he matafakatufono he tokanoaaga ke lauia e tau manamanatuaga mo e tau loto ha tautolu, kua lata ia tautolu ke taute e vala ha tautolu he fakaako fakamakutu e Tohi Tapu mo e manamanatu fakahokulo he liogi ke he tau mena ne totou e tautolu.—1 Timo. 4:15.
11, 12. (a) Peehi fēfē e Iesu e lata ke eke e kupu mooli mo puhala moui ha tautolu? (e) He fakakite i luga, ko e heigoa e hagahaga kelea kua lata ia lautolu ne ikiiki ke kalo kehe pauaki i ai?
11 He magaaho taha, kua lata ia tautolu ke ‘tumau,’ po ke fakauka, he fakagahua e Kupu he Atua ti eke e kupu mooli mo puhala moui ha tautolu. Ne talahau e Iesu e manatu pihia he pehē a ia ke he falu ne talitonu ki a ia: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu. To iloa foki e mutolu e mena moli, ko e mena moli foki ke toka noa ai a mutolu.” (Ioane 8:31, 32) Ke “iloa,” he talahau he taha tohi, kua kakano foki ke loto fakaaue ha ko e “mena ne ‘iloa’ kua aoga po ke uho ki a ia kua iloa.” Ti ko e “iloa” e tautolu e kupu mooli ke he puhala katoatoa ka taute ai e tautolu mo puhala moui ha tautolu. Ti maeke a tautolu ke talahau fakahako ‘ko e kupu he Atua, kua gahua’ ai i loto ha tautolu, he fakahakohako e aga ha tautolu ke fakaata fakalahi ha tautolu a Matua he lagi.—1 Tesa. 2:13.
12 Hūhū ki a koe, ‘Iloa moolioli nakai e au e kupu mooli? Kua eke nakai e au mo puhala moui haaku? Po ke manako agaia au ke he falu he “tau tokanoaaga” he lalolagi?’ He liu ono ki tua ke he vahā fuata haana, ko e matakainaga fifine ne feaki he tau matua Kerisiano ne tohi: “Ka tupu hake a koe he kupu mooli, kua ha ha i ai tumau a Iehova. Ka ko e mena ne tupu ki a au, ne nakai iloa mitaki e au a ia. Ne nakai fakaako e au ke fakavihia e tau mena ne vihiatia e ia. Nakai talitonu au ko e mena ne taute e au na aoga lahi ki a ia. Ti nakai fakaako au ke fina atu ki a ia ka lekua au. Tua na au ke he iloilo haaku, he iloa e au mogonei kua goagoa ha kua nakai iloa e au ha mena.” Fiafia ai, ko e matakainaga fifine he mogo fakamui ne mailoga ko e manamanatuaga haana kua hepe lahi, ti taute e ia falu hikihikiaga lalahi. Ne kamata foki a ia ke eke mo paionia tumau.
MAEKE E AGAAGA TAPU KE FAKATOKANOA A KOE
13. Lagomatai fēfē e agaaga tapu he Atua ke fakatokanoa a tautolu?
13 Ia 2 Korinito 3:17, kua totou e tautolu: “Ko e mena ha i ai e Agaga he Iki [Iehova] ha ha i ai e tokanoaaga.” Maeke fēfē e agaaga tapu ke lafi ke he tokanoaaga ha tautolu? He falu mena foki, kua fakatupu ia tautolu e tau mahani kua latatonu ke he tokanoaaga—‘ko e fakaalofa, fiafia, mafola, fakauka, totonu, mahani mitaki, tua, mahani molu, mo e manako fakalatalata.’ (Kala. 5:22, 23) He nakai fai mahani pihia, mua atu ai ke he fakaalofa, kua nakai fai fakalatahaaga ka tokanoa mooli—ne kua kitia maaliali ke he lalolagi he vahā nei. Fuluola ai, he mole e tohi e fua he agaaga, ko e aposetolo ko Paulo ne lafi: “Kua nakai fai fakatufono ke he tau mena pihia.” Ko e heigoa e kakano haana? Ko e fua he agaaga he Atua kua nakai fakakaupā ke he ha matafakatufono ka fakakaupā e tupuaga ia. (Kala. 5:18) Mole ia, ko e heigoa e kakano ke he matafakatufono pihia? Ko e finagalo ha Iehova ke feaki tukulagi e tautolu e tau mahani tuga e Keriso mo e fakatātā ai mo e nakai fai fakakaupāaga.
14. He tau puhala fe kua fakatupu e agaaga he lalolagi ki a lautolu kua muitua ki ai?
14 Ko lautolu kua hufia he agaaga he lalolagi mo e kua aofia a lautolu ke he tau manako fakatino ne liga manamanatu kua tokanoa a lautolu. (Totou 2 Peteru 2:18, 19.) Ka ko e mooli he fekau kua kehe lahi mahaki. Ko e loga lahi he tau matafakatufono mo e tau poakiaga kua latatonu ke tautaofi e tau manako mo e tau aga kelea ha lautolu. “Nakai ko e tagata tututonu kua fakatu ai e fakatufono, ka ko lautolu ni kua holifono mo lautolu kua faliuliu,” he ui e Paulo. (1 Timo. 1:9, 10) Ko e tau tupa foki a lautolu he holifono, he fakaohooho ke ‘eke foki e tau mena kua loto ki ai e tino katoa,’ ko e iki favale. (Efeso 2:1-3) He puhala pihia, ko lautolu kua tuga e tau moko ikiiki ne totolo ki loto he polu hani. He fakaohooho he tau manako ha lautolu, ne nakai leva ti puto a lautolu he matahele.—Iako. 1:14, 15.
FAKATOKANOA I LOTO HE FAKAPOTOPOTOAGA KERISIANO
15, 16. Aoga fēfē e feoakiaga ha tautolu mo e fakapotopotoaga, ti ko e heigoa e tokanoaaga kua olioli e tautolu?
15 Ka kamata a koe ke feoaki mo e fakapotopotoaga Kerisiano, kua nakai fakalataha a koe ke he kalapu fakafiafia. Ka e hau a koe ke he fakapotopotoaga ha kua futiaki e Iehova a koe. (Ioane 6:44) Ko e heigoa ne omoomoi a ia ke taute pihia? Kitia nakai e ia e tagata tututonu ne matakutaku Atua? “Nakai fai!” he liga ui e koe. Ko e heigoa mogoia ne kitia he Atua? Kitia e ia e loto fiafia ke he matafakatufono fakatokanoa, ko e loto ka muitua ke he fakaohoohoaga totonu haana. I loto he fakapotopotoaga, ne feaki e Iehova e loto haau he fagai fakaagaaga a koe, he fakatokanoa a koe mai he tau pikopiko fakalotu mo e tau taulatua, mo e fakaako a koe ke feaki e aga tuga he Keriso. (Totou Efeso 4:22-24.) Ti ko e fua, ha ha ia koe e lilifu ke fakalataha mo e tau tagata ni ke he lalolagi ka tonuhia ke fakahigoa ko e ‘tau tagata he tokanoaaga.’—Iako. 2:12.
16 Manamanatu ke he mena nei: Ka fio a koe mo lautolu kua fakaalofa ki a Iehova mo e tau loto katoa ha lautolu, logona hifo nakai e koe e matakutaku? Kua kilokilo fano tumau kia a koe? He fakalataha ke he fakatutalaaga ke he Fale he Kautu, kua gega nivaniva tumau kia a koe ke he tau koloa haau neke galo? Mamao ligo! Kua logona hifo e koe e totoka mo e atāina. Pihia kia e logonaaga haau ke he tau mena tutupu he lalolagi? Liga nakai pihia! Mua atu ai, ko e tokanoaaga kua olioli e koe mogonei mo e tau tagata he Atua ko e vala tote he tokanoaaga ne fakatoka mai i mua.
“TOKANOAAGA HA HA HE MONUINA HE FANAU HE ATUA”
17. Matutaki fēfē e tokanoaaga he tau tagata ke he “fakakite mai e tau tama he Atua”?
17 Ka fakatutala ke he tokanoaaga kua fakatoka mai e Iehova i mua ma e tau fekafekau haana he lalolagi, ne tohi e Paulo: “Ha kua fakaneinei e tau mena ne eke ti fakatalitali ni ke he fakakite mai e tau tama he Atua.” Ti lafi e ia: “Ha ko e mena to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.” (Roma 8:19-21) Kua hagaao e “tau mena ne eke” ke he tau tagata ne amaamanaki ke he lalolagi, ko lautolu ka aoga he “fakakite mai” he tau tama fakauku he agaaga he Atua. Ko e fakakiteaga ia to kamata ka fakaliu tu mai e tau “tama” nei ke he tuaga fakaagaaga, he fakalataha mo e Keriso he fakameā e lalolagi he mahani kelea muitui mo e fakahao e “moto tagata tokologa” ke he fakatokaaga foou.—Fakakite. 7:9, 14.
18. To tupu fēfē e tokanoaaga ma e tau tagata omaoma, ti ko e heigoa e tokanoaaga ka fakahiku ke olioli e lautolu?
18 Ko e tau tagata ne fakahao to moua e tokanoaaga foou katoatoa—ko e tokanoaaga mai he fakaohoohoaga ha Satani mo e tau temoni. (Fakakite. 20:1-3) Ko e totokaaga mooli a ia! Mole ia, to matutaki e 144,000 he Keriso he tau patuiki mo e tau ekepoa ke matutaki ke fakatokanoa e tau tagata he fakagahua tumau e tau aoga he poa lukutoto ato utakehe katoa e agahala faka-Atamu mo e nakai mitaki katoatoa. (Fakakite. 5:9, 10) He fakakite e fakamooli foki i lalo he kamatamata, to moua he tau tagata e mitaki katoatoa he tokanoaaga kua finagalo e Iehova ma lautolu—ko e “tokanoaaga ha ha he monuina he fanau he Atua.” Manamanatu! Nakai liu ke taufetului ke taute e tau mena kua hako ke he fofoga he Atua, ha ko e tau vala oti he tino haau kua mitaki katoatoa mo e aga haau to hiki katoatoa fakatatau ke he fakatai he Atua.
19. He vahā nei, ko e heigoa kua lata ia tautolu ke matutaki ke taute ke fakatumau he puhala ke he tokanoaaga mooli?
19 Manako nakai a koe ke he “tokanoaaga ha ha he monuina he fanau he Atua”? Ka pihia, kia matutaki e manamanatuaga mo e loto haau ke fakaohooho he “fakatufono kua katoatoa e mitaki ha i ai e tokanoaaga.” E, fakaako fakamakutu e tau Tohiaga Tapu. Fakagahua e kupu mooli, eke ma haau ni. Liogi ma e agaaga tapu. Fakalataha tumau ke he fakapotopotoaga Kerisiano mo e fakaaoga e tau mena kai fakaagaaga ne foaki e Iehova. Ua fakaatā a Satani ke fakahehē a koe, tuga he fakahehē e ia a Eva, ke manamanatu ko e tau puhala he Atua kua molea e pāpā maō. Mailoga na makaka lahi e Tiapolo. Ka e to kitia e tautolu he vala tala ka mui mai, kua lata ia tautolu ke nakai ‘fakavai e Satani; nukua nakai pouli a tautolu ke he hana tau lagatau.’—2 Kori. 2:11.
[Tau Fakatino he lau 9]
Manako lahi agaia nakai au ke he falu he “tau tokanoaaga” he lalolagi?
[Tau Fakatino he lau 9]
Kua taute nakai e au e kupu mooli ko e puhala moui haaku?