Mataala ke he Fakaaogaaga Fakataulatua he Tohi Tapu
“KO E kupu he Atua kua moui ia, mo e gahua malolo.” (Hepe. 4:12) He tau kupu ia ne fakamaama e Paulo e malolō he kupu he Atua ke aamotia e tau loto mo e hiki e tau momoui.
Ko e onoonoaga ia ke he malolō he ogo he Tohi Tapu ne malokiloki ai he magahala ne holofa ai e tiaki taofiaga ne talahau tuai he mole e mamate he tau aposetolo. (2 Pete. 2:1-3) Fai magaaho ai ti kamata e tau takitaki lotu ke peehi kua ha ha he Tohi Tapu e tau malolō mana. Ne tohi he Porofesa Harry Y. Gamble hagaao ke he “fakaaogaaga fakamana he tau tohi faka-Kerisiano.” Ne mailoga e ia he senetenari ke toluaki, ne talahau he Church Father Origen “ko e leo he tau kupu tapu ke he teliga kua aoga ai: kaeke ke fai malolō e tau kupu he mana pouliuli, ti mua atu fēfē e malolō he tau kupu faka-Atua he kupu tohi.” Ko John Chrysostom he matahiku he senetenari ke fāaki ne tohi “to nakai malolō e tiapolo ke fina atu ke he fale ne ha ha i ai e tohi Evagelia.” Ne talahau foki e ia kua kahoa he falu e tau vala mai he Tau Evagelia he tau kakia ha lautolu mo tau mena puipui fakamana malolō. Ko e Porofesa ko Gamble ne talahau hagaao ke he akoako Katolika ko Augustine “ne pehē kua fakaatā e tagata kaeke kua mamahi e ulu ke mohe mo e tohi he Evagelia ha Ioane he lalo uluga”! Ti ko e tau kupu he Tohi Tapu kua fakagahuahua ke lata mo e tau gahua mana. To manatu nakai a koe ke he Tohi Tapu ko e mena fakamana, po ke mena ke moua e monuina, ne maeke ke puipui a koe mai he tau agaaga kelea?
Liga ko e fakaaogaaga fakahehē he Tohi Tapu ne aga mau ki ai, ko e bibliomancy. Ko e heigoa e mena ia? Kua hagaao ke he hafagi fakapuleheu he tohi, fa mahani ko e Tohi Tapu, mo e totou e kupu ne kitia mua he mata mo e kua talitonu ki ai ko e tau kupu ia ka foaki mai e takitakiaga kua lata. Ma e fakatai, hagaao ke he Porofesa ko Gamble, he taha mogo ne logona e Augustine e leo he tama tote he fale he tuuta kaina ne pehē: “Uta ti totou, uta ti totou,” ne manatu a Augustine ko e mena ia kua hagaao ke he poakiaga faka-Atua ke hafagi e Tohi Tapu ti totou e tau kupu fakamua ne kitia e ia.
Kua logona nakai e koe e falu tagata he magaaho ka feleveia mo e tau tuaga uka ne liogi ke he Atua ti veveu puleheu e Tohi Tapu, mo e talitonu ko e tau kupu fakamua ne kitia e lautolu kua maeke ke lagomatai a lautolu ke fahia mai he lekua? Pete ni kua liga mitaki e tau manako ha lautolu, ka e nakai ko e puhala a ia kua lata ma e tau Kerisiano ke kumi e takitakiaga mai he tau Tohiaga Tapu.
Ne fakamafana e Iesu e tau tutaki haana to fakafano mai e ia ma lautolu e ‘lagomatai, ko e agaga tapu.’ Ne matutaki atu a ia: “To fakaako e ia a mutolu ke he tau mena oti kana; to fakamanatu foki e ia kia mutolu e tau mena oti kua tala atu ai e au kia mutolu.” (Ioane 14:26) Ka kua kehe mai ha ko e bibliomancy kua nakai lata ke fai iloilo ke he tau Tohiaga Tapu.
Ko e fakagahuaaga he bibliomancy mo e falu fakaaogaaga fakataulatua he Tohi Tapu ko e mena aga mau. Ka kua nakai talia he Kupu he Atua e kumikumi ke he tau fakamailoga fakataulatua. (Levi. 19:26; Teu. 18:9-12; Gahua 19:19) “Ko e kupu he Atua kua moui ia, mo e gahua malolo,” ka e lata ia tautolu ke fakaaoga fakalotomatala. Ko e iloilo tonu ke he Tohi Tapu, nakai ko e fakaaoga fakataulatua, kua fakatolomaki ki mua e tau momoui he tau tagata. Ko e moua he iloilo ia kua lagomatai e tokologa ke feaki e tau mahani mitaki, ke tiaki e tau puhala momoui hagahagakelea, ke fakamalolō e moui magafaoa, mo e ke feaki e fakafetuiaga fakatagata mo ia ne Tohia e Tohi Tapu.