Ko e Fekafekau Pule Fakamooli a Koe!
“Nakai pule a mutolu kia mutolu.”—1 KORI. 6:19.
1. Ko e heigoa e onoonoaga he lalolagi ke he tūtokotaha?
KAVI ke he 2,500 tau kua mole, ko e tagata Heleni tohi tala ne tohia: “Nakai fai tagata ne makai ke hahamo e akau he fakatupa.” Tokologa he vahā nei ne talia fiafia e talahauaga ia. Fakamanatu mai he tau fakatino fakatupa e tau tagata ne pehia mo e līlī, ne kua fai aoga e tau gahua mo e tau mena foaki noa, nakai ma lautolu ka e ma e falu ne pule mo e fakapehia a lautolu.
2, 3. (a) Ko e heigoa e tuaga he tau fekafekau fakamakai he Keriso ne olioli? (e) Ko e heigoa e tau hūhū hagaao ke he fekafekau pule ka fakatutala a tautolu ki ai?
2 Ka e, fakakite e Iesu ko e tau tutaki haana to eke mo tau fekafekau, po ke tau tupa fakatokolalo. Nakai fai mena ne fakateaga po ke fakapehia, hagaao ke he fakatupa nei ne putoia ai e tau Kerisiano mooli. Ko e tau fekafekau nei ne fiafia e tuaga lilifu, falanaki, mo e fakalilifu. Ma e fakatai, manamanatu la ke he tau kupu ha Iesu hagaao ke he taha “fekafekau” ne nakai leva ti hoko e mate Haana. Ne talahau tuai e Keriso to kotofa e ia e tau matagahua ke he “fekafekau fakamoli mo e loto matala.”—Mata. 24:45-47.
3 Kua aoga lahi he tala ia foki, ko e fekafekau ia kua fakahigoa ko e “fekafekau pule.” (Totou Luka 12:42-44.) Laulahi he tau Kerisiano fakamoli kua momoui mogonei ne nakai ko e tau tagata he vahega fekafekau pule ia. Ka e fakakite he tau Tohiaga Tapu ko lautolu oti ne fekafekau ke he Atua ne moua e fekafekauaga pule. Ko e heigoa e tau matagahua ne putoia ai? Lata ke onoono atu fēfē ki a lautolu ia? Ke iloa e tali, kia kumikumi la tautolu ke he matagahua he tau fekafekau pule he tau vahā i tuai.
GAHUA HE TAU FEKAFEKAU PULE
4, 5. Ko e heigoa e tau matagahua ne moua he tau fekafekau pule i tuai? Foaki e tau fakataiaga.
4 He tau vahā i tuai, ko e fekafekau pule ne fa mahani ko e fekafekau ne falanaki ki ai ne kotofa ke leveki e kaina po ke tau matagahua he iki haana. Mahani ai, kua lahi e pule he tau fekafekau pule mo e kua tuku age e pule ke leveki e tau koloa he kaina, tau tupe, mo e falu fekafekau. Maeke ia tautolu ke kitia e mena nei ne tupu ki a Elisara, ne tuku age ki ai e levekiaga he tau koloa loga ha Aperahamo. Liga ko Elisara ne fakafano e Aperahamo ki Mesopotamia ke fifili e hoana ma e tama taane haana ko Isaako. Ko e kotofaaga aoga lahi mo e mua atu!—Kene. 13:2; 15:2; 24:2-4.
5 Ko e mokopuna taane ha Aperahamo ko Iosefa ne leveki e magafaoa ha Potifara. (Kene. 39:1, 2) Nakai leva, ti fai fekafekau pule foki a Iosefa, ke “pule ke he magafaoa a Iosefa.” Ne fakakite he fekafekau pule ia e mahani fakamokoi ma e tau lafu tokohogofulu ha Iosefa. He poakiaga ha Iosefa, ne fakatokatoka e ia e tau puhala hagaao ke he kapiniu ario ne “kaiha.” Maaliali ai, ne olioli he tau fekafekau pule e tau tuaga falanaki lahi.—Kene. 43:19-25; 44:1-12.
6. Ko e heigoa e fekafekauaga pule ne taute he tau motua Kerisiano kehekehe?
6 He tau senetenari fakamui, ne tohi he aposetolo ko Paulo ko e tau leveki Kerisiano ko e ‘tau fekafekau pule he Atua.’ (Tito 1:7) He kotofa ke he tau leveki he “fuifui mamoe he Atua,” ne tuku age he tau leveki e tau puhala mo e takitaki e tau fakapotopotoaga. (1 Pete. 5:1, 2) Mooli, kua kehekehe e tau matagahua. Ma e fakatai, laulahi he tau leveki Kerisiano he vahā nei ne fekafekau he taha e fakapotopotoaga. Kua fekafekau e tau leveki faifano he tau fakapotopotoaga loga. Ko e tau tagata he La Komiti ne leveki e tau fakapotopotoaga he tau motu katoa. Amanaki oti agaia ki a lautolu ke taute fakamooli e tau matagahua ha lautolu; igatia ai mo e “tala atu” ke he Atua.—Hepe. 13:17.
7. Iloa fēfē e tautolu e mena ia, ko e tau Kerisiano oti ko e tau fekafekau pule?
7 Ka e kua mogoia e tau Kerisiano fakamooli tokologa ne nakai ko e tau leveki? Ne tohia he aposetolo ko Peteru e tohi ke he tau Kerisiano, he pehē: “Kia takitokotaha a mutolu mo e fekafekau ko e taha ke he taha ke he mena ia ni, ke fakalata ke he mena fakaalofa kua moua e ia, tuga ne tau fekafekau pule mitaki ke he tau mena fakaalofa kehekehe he Atua.” (1 Pete. 1:1; 4:10) Ne tuku mai he Atua e fakaalofa noa haana ki a tautolu oti e tau mena fakaalofa, tau koloa, tau lotomatala, po ke tau taleni ne maeke ia tautolu ke fakaaoga ke aoga e tau matakainaga talitonu. Fakatatau ki ai, ko e tau tagata oti ne fekafekau ke he Atua ko e tau fekafekau pule, mo e ha lautolu a fekafekauaga pule kua moua ai e lilifu, falanaki, mo e matagahua.
PULE E ATUA KI A TAUTOLU
8. Ko e heigoa e taha matapatu fakaakoaga aoga kua lata a tautolu ke manatu?
8 To hagaaki a tautolu mogonei ke he tolu e matapatu fakaakoaga kua lata ia tautolu ko e tau fekafekau pule ke fakatutala ki ai. Ko e fakamua: Kua pule e Atua ki a tautolu mo e kua fakalago a tautolu ki a ia. Ne tohi e Paulo: “Nakai pule a mutolu kia mutolu. Ha ko e mena kua fakafua a mutolu ke he totogi,” ko e toto ne poa he Keriso. (1 Kori. 6:19, 20) Ha kua pule a Iehova ki a tautolu, kua lago ki a tautolu ke omaoma ke he tau poakiaga haana ne kua nakai mamafa. (Roma 14:8; 1 Ioa. 5:3) Kua eke foki a tautolu mo tau tupa he Keriso. Tuga e tau fekafekau pule he vahā i tuai, kua tuku mai ki a tautolu e tokanoaaga lahi—ka ko e tokanoaaga ha tautolu kua fakakaupā. Latatonu ia tautolu ke taute e tau matagahua ha tautolu tuga ne fakaako mai. Pete ne tau matagahua ha tautolu he fekafekauaga ne liga fiafia e tautolu, ko e tau fekafekau agaia a tautolu he Atua mo e he Keriso.
9. Fakatai fēfē e Iesu e fakafetuiaga he vahāloto he iki mo e fekafekau?
9 Ne lagomatai e Iesu a tautolu ke maama e fakafetuiaga he vahāloto he iki mo e fekafekau. Ne tutala a ia ke he tau tutaki haana hagaao ke he fekafekau ne hau ki kaina he oti e gahua he aho katoa. Pehē nakai e iki: “Hau la mogoho nai ke takoto, ke kai”? Nakai. Pehē a ia: “Ati taute mai a haku a mena kai, mo e pipi a koe, ti fekafekau mai kia au ato oti haku a kai mo e inu, ka mole ia, ti kai ai a koe mo e inu.” Fakagahua fēfē e Iesu e fakataiaga? “To pihia foki a mutolu, ka oti he eke e tau mena oti ne poaki atu ai kia mutolu, ti pehe a mutolu, Ko e tau fekafekau nakai aoga a mautolu; ha ko e tau mena kua lata ke eke e mautolu, ko e tau mena ia kua eke e mautolu.”—Luka 17:7-10.
10. Ko e heigoa ne fakakite kua loto fakaaue a Iehova ke he tau laliaga ha tautolu ke fekafekau a ia?
10 Mooli, kua loto fakaaue a Iehova ke he tau laliaga ha tautolu ke fekafekau a ia. Kua fakamafana he Tohi Tapu ki a tautolu: “Nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” (Hepe. 6:10) Ne manamanatu tumau a Iehova ke he tau mena ne ole e ia ki a tautolu. Lafi ki ai, ko e tau mena ne ole e ia ke lata mo e mitaki ni ha tautolu ti nakai mamafa lahi. Ka e, he fakalagotatai mo e fakatai a Iesu, nakai fakafiafia he fekafekau a ia ni, he tuku fakamua e tau mena ne fiafia a ia ki ai. Ko e manatu, he fakatapu e tautolu a tautolu ke he Atua, ne fifili e tautolu ke tuku fakamua e tau mena haana he tau momoui ha tautolu. Talia nakai e koe?
KO E MANAKO HA IEHOVA MA TAUTOLU OTI
11, 12. Ha ko e tau fekafekau pule, ko e heigoa e mahani kua lata ia tautolu ke fakatātā, mo e ko e heigoa ka kalo kehe a tautolu?
11 Ko e matapatu fakaakoaga ke uaaki: Ha ko e tau fekafekau pule, kua pipiki tumau a tautolu oti ke he tau tuaga aoga ne tatai. Mooli, ko e falu matagahua kua kotofa ke he tokogahoa i loto he fakapotopotoaga Kerisiano. Ka e laulahi he tau matagahua kua mahani ke he tau tagata oti. Ma e fakatai, ko e tau tutaki he Keriso mo e ko e Tau Fakamoli ha Iehova, kua poaki ki a tautolu ke fefakaalofaaki. Ne pehē a Iesu ko e fakaalofa ko e fakamailoga he tau Kerisiano mooli. (Ioane 13:35) Ka kua fakalaulahi atu e fakaalofa ha tautolu ke he tau matakainaga oti. Kua eketaha a tautolu ke fakakite e fakaalofa ki a lautolu kua nakai faoa ki a tautolu he tua. Ko e mena nei kua maeke mo e kua lata ke taute e tautolu oti.
12 Ko e mahani mitaki kua lata foki ke moua e tautolu. Manako a tautolu ke kalo kehe he mahani mo e tau puhala moui ne nakai fakagofua he Kupu he Atua. Ne tohi e Paulo: “Ko e tau tagata feuaki, mo lautolu kua hufeilo ke he tau tupua, mo lautolu kua faivao, mo lautolu kua fakakelea e lautolu a lautolu, mo lautolu kua eke e mahani Sotoma, Mo lautolu kua kaiha, mo lautolu kua velevelemena, mo lautolu kua konahia, mo lautolu kua tauamuamu, mo lautolu kua fofo mena, nakai moua e lautolu nā e kautu he Atua.” (1 Kori. 6:9, 10) Talahau ai, kua lata ke eketaha ke fakatatau ke he tau tuaga tututonu he Atua. Ko e tau laliaga ia kua uho lahi, he foaki ki a tautolu e tau lagomataiaga loga, putoia e puhala moui ne lafi ke he tino malolō mitaki, mitaki e tau fakafetuiaga mo e falu, mo e taliaaga mo e Atua.—Totou Isaia 48:17, 18.
13, 14. Ko e heigoa e matagahua kua foaki ke he tau Kerisiano oti, ti kua lata ke onoono fēfē a tautolu ki ai?
13 Manatu foki ko e fekafekau pule kua fai gahua ke taute. Ti pihia foki a tautolu. Kua foaki ki a tautolu e mena fakaalofa uho—ko e iloilo he kupu mooli. Amanaki e Atua ki a tautolu ke uta e iloilo ia ke he falu. (Mata. 28:19, 20) Ne tohi e Paulo: “Kia manatu pehe e tau tagata kia mautolu, ko e tau fekafekau a Keriso, ko e tau fekafekau [pule] foki kua toka ki ai e tau mena galo he Atua.” (1 Kori. 4:1) Ne mailoga e Paulo ko e fekafekauaga pule nei ne kakano ko e leveki fakamakutu he “tau mena galo” mo e talahau fakamooli ai e tau mena ia ke he falu tuga he fakaako mai he Iki ko Iesu Keriso.—1 Kori. 9:16.
14 Ko e talahau atu e kupu mooli ko e mena fakaalofa a ia ke taute. Mooli, kua kehekehe e tau tuaga he tau Kerisiano. Nakai maeke ke tatai oti e gahua ke he fonua. Maama e Iehova e mena ia. Ko e mena kua aoga ko e taute e tautolu e tau mena oti kua maeke ia tautolu takitokotaha ke taute. Ti fakatātā e tautolu e fakaalofa nakai lotokai ma e Atua mo e ha tautolu a katofia.
KO E UHO HE MAHANI FAKAMOOLI
15-17. (a) Kua latatonu he ha e fekafekau pule ke mahani fakamooli? (e) Fakatai fēfē e Iesu e tau fua kelea he nakai mahani fakamooli?
15 Ko e matapatu fakaakoaga ke toluaki ne fetataaki lahi ke he ua fakamua: Kua lata ia tautolu ke mahani fakamooli mo e falanaki ki ai. Ko e fekafekau pule ne liga loga e tau mahani mitaki mo e tau lotomatala, ka e nakai aoga ai ka nakai fai falanakiaga po ke nakai fakamooli ke he haana iki. Ko e mahani fakamooli kua latatonu ke eke mo fekafekau pule mitaki mo e kautū. Manatu e mena ne tohi e Paulo: “Kua lata mo e tau fekafekau [pule] kua toka ki ai e tau mena, kia takitokotaha mo e fakamoli.”—1 Kori. 4:2.
16 Ka mahani fakamooli a tautolu, to palepale mitaki a tautolu; ti mooli e mena ia. Ka nakai mahani fakamooli a tautolu, to matematekelea a tautolu. Kitia e tautolu e matapatu fakaakoaga nei he fakataiaga ha Iesu ke he tau taleni. Ko e tau fekafekau ne fakamooli he “fakafua atu ai” po ke “gahua” ke lata mo e tupe he iki ne moua e navaaga mo e monuina lahi. Nakai gahua fakailoilo e fekafekau mo e mena ne tuku age he iki ki a ia ne fakafili “kelea,” “teva,” mo e “nakai aoga.” Ko e taleni ne age ki a ia kua utakehe tuai, ti liti a ia ki fafo.—Totou Mataio 25:14-18, 23, 26, 28-30.
17 He taha magaaho foki, ne fakakite e Iesu e tau fua kelea he nakai fakamooli. Ne pehē a ia: “Ko e taha tagata maukoloa ha ia ia e fekafekau kua pule; ne hokotaki a ia kia ia, kua moumou e ia hana tau mena. Kua ui atu a ia kia ia, kua pehe age kia ia, Ko e heigoa e mena nai kua logona e au kia koe? Ati talahau mai a e kupu ke he tau mena ne pule a koe ki ai; ha kua nakai tuai maeke ke eke a koe mo fekafekau ke pule.” (Luka 16:1, 2) Ha kua moumou he fekafekau pule e koloa he iki haana, ne vega he iki a ia. Ko e fakaakoaga malolō lahi ma tautolu! Kua nakai manako mooli a tautolu ke mahani kelea ke he mena ne ole mai ki a tautolu.
PULOTU NAKAI KE FAKATATAI A TAUTOLU MO E FALU?
18. Ko e ha kua nakai lata ia tautolu ke fakatatai e tautolu a tautolu ke he falu?
18 Igatia a tautolu mo e hūhū hifo, ‘Onoono fēfē au ke he fekafekauaga pule haaku?’ Liga tutupu e tau lekua ka fakatatai e tautolu a tautolu ke he falu. Fakatonu he Tohi Tapu a tautolu: “Ka kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha,” po ke “fakatatai mo e taha.” (Kala. 6:4) He nakai fakatatai e tautolu e mena ne taute e tautolu mo e falu, kua lata ke hagaaki a tautolu ke he mena kua maeke ia tautolu ke taute fakatagata. To puipui he mena nei a tautolu ke nakai ni fakaikaluga ke he mahani fakatokoluga ka e pihia foki ke he fakaloleloleaga. He hakahaka ni e tautolu a tautolu, kua lata ia tautolu ke mailoga na hiki e tau tuaga. Liga ha ko e kelea e malolō tino, fuakau, po ke falu matagahua, kua nakai maeke ia tautolu ke taute e tau mena oti tuga fakamua. He taha faahi, liga maeke ia tautolu ke lahi atu e mena ne taute e tautolu mogonei. Ka pihia, ko e ha he lali ke fakamalagaki hake e tau matagahua ha tautolu?
19. Ka nakai moua e tautolu e kotofaaga pauaki, ko e ha kua nakai lata ke loto lolelole a tautolu?
19 Ko e taha vala foki ke manamanatu ko e tau matagahua kua moua e tautolu po ke manako a tautolu ke moua. Ma e fakatai, kua manako e matakainaga taane ke fekafekau ko e motua he fakapotopotoaga po ke kotofa ki ai falu vala he tau toloaga po ke tau fonoaga. Kua mitaki ke gahua fakamalolō ke lata mo e tau kotofaaga ia, ka e nakai lata ke loto lolelole ka nakai moua ai e tautolu tuga he amanaki ki ai a tautolu. Ma e tau kakano ne liga nakai maama mitaki e tautolu, falu he tau kotofaaga ne liga tuku atu he magaaho fakamui ne nakai amanaki ki ai. Manamanatu na tuga kua mautali a Mose ke takitaki e tau Isaraela mai i Aikupito, ka e fakatali a ia ke 40 e tau ato taute pihia ai. Ne fakaatā he mena nei e magaaho lahi ke feaki e ia e tau mahani kua lata ke takitaki e tau tagata loto maō mo e totoko.—Gahua 7:22-25, 30-34.
20. Ko e heigoa e fakaakoaga ka moua e tautolu ke he mena ne tupu ki a Ionatana?
20 He falu mogo ko e kotofaaga pauaki ne liga nakai tuku mai ki a tautolu. Pihia e mena ne tupu ki a Ionatana. Ko ia ko e tama ha Saulo ti ko ia he laini ke patuiki ki Isaraela katoa. Ka e fifili he Atua a Tavita, ko e tagata taane fuata ke eke mo patuiki. Fēfē e tali ha Ionatana ke he mena ne tupu? Ne talia e ia ti lalago a Tavita pete ne fakahagahaga kelea ai ke he moui haana. Ne pehē a ia ki a Tavita: “Ka to eke a koe mo patuiki a Isaraela, ko au foki to eke au mo tagata ke hoa aki a koe.” (1 Samu. 23:17) Kitia nakai e koe e manatu? Talia e Ionatana e tuaga haana, he nakai tuga e matua taane haana, ne nakai mahekeheke a ia ki a Tavita. He nakai mahekeheke ke he falu ha kua kotofa ki ai e tau mena ke taute e lautolu, kua maeke ia tautolu oti ke hagaaki ke taute e tau matagahua ne moua e tautolu. Maeke ia tautolu ke iloa tonu ke he lalolagi foou, to kitia e Iehova ki ai ko e tau manako mitaki he tau fekafekau oti haana kua fakamakona.
21. Kua lata ke fēfē e onoonoaga ke he fekafekauaga pule ha tautolu?
21 Kia tokaloto e tautolu ko e tau fekafekau pule ne falanaki ki ai, kua nakai moua e tautolu e tupaaga kelea ne fakakite he pehiaaga mo e tau hihina mata. Kehe lahi ai. Kua olioli e tautolu e tau tuaga he lilifu lahi, ne tuku mai he nakai liu e gahua nei he fakapuloa e tala mitaki ke fatiaki foki he tau aho fakamui he fakatokaaga nei. He taute e mena ia, kua olioli e tautolu e tokanoaaga lahi ke he puhala ka taute e tautolu e tau matagahua ha tautolu. Kia eke mogoia a tautolu mo tau fekafekau pule fakamooli. Ti tokiofa e tautolu e lilifu ne moua e tautolu ke fekafekau a Ia ne mua ue atu he lagi mo e lalolagi katoatoa.