Fakatumau ha Tautolu a Tuaga ko e “Tau Tagata Kehe”
“Kua ole atu au kia mutolu ko e tau tagata paea mo e tau tagata kehe, kia fakamamao a mutolu mo e tau manako lahi he tino.”—1 PETE. 2:11.
1, 2. Hagaao ki a hai a Peteru he talahauaga “lautolu ne fifili,” ti ko e ha ne fakahigoa e ia a lautolu ko e “tau tagata kehe”?
KAVI ke he 30 e tau he mole e hake ha Iesu ke he lagi, ne tohia he aposetolo ko Peteru e tohi “ke he tau tagata kehe kua paea fano i Pono, mo Kalatia, mo Kapatokia, mo Asia, mo Pitunia, Ko lautolu kua fifili.” (1 Pete. 1:1, 2) Maaliali ai, ko e talahauaga “lautolu kua fifili,” ne hagaao a Peteru ki a lautolu ne tuga a ia, kua fakauku he agaaga tapu ti ‘fanau fakafou ke he amaamanaki kua moui’ ke pule mo Keriso ke he lagi. (Totou 1 Peteru 1:3, 4.) Ka ko e ha he mogo fakamui ne fakahigoa e ia a lautolu nei ne fifili ko e “tau tagata paea mo e tau tagata kehe”? (1 Pete. 2:11) Ti ko e heigoa e kakano he mena nei ma tautolu he vahā nei ka tote maka e numera he Tau Fakamoli he lalolagi katoa ne talahau ai ko lautolu ne fifili, ti kotofa?
2 Kua latatonu ai ke hagaao e tau kupu “tau tagata kehe” po ke “tau tagata o fano” ki a lautolu ne fakauku he senetenari fakamua. Mooli e mena nei ki a lautolu ne toe he matakau ne momoui agaia mogonei, ko e ha ha i ai ha lautolu ke he lalolagi ne nakai tumau. Ko e aposetolo ko Paulo ko e tagata fakauku he “fuifui mamoe gahoa,” ne fakamaama: “Ha ko e māga moli ha tautolu ha ha he lagi ia, ha ne fakatalitali ai a tautolu ke he Fakamoui, ko e Iki ko Iesu Keriso.” (Luka 12:32; Filipi 3:20) Mailoga ai ha lautolu a ‘māga moli ha ha he lagi,’ ti ka mamate a lautolu ne fakauku to toka ai e lalolagi ma e taha mena ne mua e mitaki, ko e moui nakai mate ke he lagi. (Totou Filipi 1:21-23.) Ti, he puhala fakatai, to talahau ai hagaao ki a lautolu ko e “tau tagata kehe” he lalolagi i lalo he pule ha Satani.
3. Ko e heigoa e hūhū hagaao ke he ‘tau mamoe kehe’ ne lagā mogonei?
3 Ka e kua a lautolu ko e ‘tau mamoe kehe’? (Ioane 10:16) Nakai kia ha ha ia lautolu e amaamanakiaga ne mauokafua he Tohi Tapu he eke mo tau tagata kua nonofo tumau he lalolagi? Mooli, ko e kaina ha lautolu a ia tukulagi! Ka e kakano agaia, to eke a lautolu ia mogonei mo tau tagata kehe. He kakano fe?
‘OI FAKALATAHA E TAU MENA OTI NE EKE’
4. Ko e heigoa ne nakai maeke he tau takitaki he lalolagi ke puipui?
4 He tumau e fakatokaaga kelea ha Satani, to fakatumau e tau tagata oti ne putoia e tau Kerisiano ke matematekelea ke he tau fua mamahi he totokoaga ha Satani ki a Iehova. Totou e tautolu ia Roma 8:22: “Kua iloa e tautolu kua oi fakalataha mo e mamahi fanau fakalataha e tau mena oti ne eke kua hoko ni ke he vaha nai.” Ka ko e tau takitaki, tau saienetisi, mo e tau tagata fakatū lagomatai he lalolagi, ne loto mooli kua nakai maeke ke puipui e mena nei.
5. Tali mai he 1914, ko e heigoa e lakaaga ne taute he tau miliona, ti ko e ha?
5 Tali mai he 1914, totou miliona ne kua fifili ke eke mo tau tagata makai he Patuiki ne fakafoufou he Atua, ko Iesu Keriso. Nakai manako a lautolu ke fai vala he fakatokaaga he lalolagi ha Satani. Ne fakaheu a lautolu ke lalago e lalolagi ha Satani. Ka kua fakaaoga e lautolu e tau momoui mo e tau koloa ha lautolu ke lalago e Kautu he Atua, he fekafekau ke lata mo e tau mena i ai.—Roma 14:7, 8.
6. Ke he puhala fe ne fakahigoa e Tau Fakamoli a Iehova ko e tau tagata paea?
6 E, ko e Tau Fakamoli a Iehova ko e tau tagata muitua ke he tau matafakatufono ne molea e 200 motu, ka e pete ne matakavi ne nonofo a lautolu, kua tuga e tau tagata paea a lautolu. Ne fakatumau a lautolu he tuaga ne kikili ke he tuuho ke he tau mena fakapolitika mo e kaufakalatahaaga he magahala ia. He mogonei foki, ne eke a lautolu mo tau tagata he lalolagi foou, ko e taha he tau mena ne tufuga he Atua. Ne fiafia a lautolu ke kitia e magahala ha lautolu he nonofo fakakū he fakatokaaga he lalolagi nakai mitaki katoatoa nei hane tata lahi mai e moumouaga.
7. To eke fēfē e tau fekafekau he Atua mo tau tagata nonofo tumau, mo e puhala fe?
7 Nakai leva to fakagahua he Keriso e pule haana ke fakaotioti e fakatokaaga kelea ha Satani. Ko e fakatufono mitaki katoatoa he Keriso to utakehe e agahala mo e fakaatukehe he lalolagi. To utakehe e tau tuaga oti ne kitia mo e nakai kitia he totokoaga ke he pule tonu katoatoa ha Iehova. Ko e tau fekafekau fakamooli he Atua to eke mo tau tagata nonofo tumau he lalolagi Parataiso. (Totou Fakakiteaga 21:1-5.) He puhala katoatoa, ko e tufugatiaaga he mogoia “to toka noa ai e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.”—Roma 8:21.
KO E HEIGOA KUA AMANAKI KE HE TAU KERISIANO MOOLI?
8, 9. Fakamaama e kakano ha Peteru ke he ‘fakamamao mo e tau manako lahi he tino.’
8 Ne fakamaama e Peteru e mena ne amanaki ke he tau Kerisiano he matutaki a ia ke pehē: “Ko e tau fakahelehele na e, kua ole atu au kia mutolu ko e tau tagata paea mo e tau tagata kehe, kia fakamamao a mutolu mo e tau manako lahi he tino.” (1 Pete. 2:11) Ko e fakatonuaga ia ne hagaaki fakamua ke he tau Kerisiano fakauku, ka kua aoga foki ke lata mo e tau mamoe kehe ha Iesu.
9 Falu manako, ka fakamakona ke he puhala ne poaki he Tufuga, kua nakai hepe ai e tau mena ia. Mooli, kua lafi e tau mena ia ke he fiafia he moui. Ma e fakatai, kua ha ha i ai e tau manako pauaki ke fiafia e tau mena kai mo e tau mena inu mitaki, ke fakalataha ke he tau matagahua atihake, mo e ke fiafia e tau fakafetuiaga mauokafua. Ti pihia mo e manako ke fiafia e mahani fakataane mo e fifine mo e hoa mau he tagata kua latatonu ti fai fakakaupāaga foki. (1 Kori. 7:3-5) Ka ko Peteru, ne fakakaupā fakahako e “tau manako lahi he tino” ne vagahau a ia ki a lautolu ke he “tau mena ia kua tau ke he agaga.” Ke kitia maali e kakano he mena ia, falu fakaliliuaga he Tohi Tapu ne tutala hagaao ke he “manako feuaki velagia” (King James Version) po ke “manako agahala” (New International Version). Maaliali ai, ko e ha manako he tagata kua taufetului mo e finagalo ha Iehova ne fakakite ati maeke he mena ia ke lauia kelea e fakafetuiaga mitaki he tagata mo e Atua ne latatonu ai ke fakakia tumau. Po kua fakahagahaga kelea lahi e amaamanakiaga he Kerisiano ke fakatumau e agaga haana ke moui.
10. Ko e heigoa falu puhala ne fakaaoga e Satani ke eke e tau Kerisiano mo vala he lalolagi haana?
10 Ko e foliaga ha Satani ke fakalolelole e fifiliaga he tau Kerisiano mooli ke onoono ki a lautolu ko e “tau tagata kehe” he fakatokaaga nei. Ko e kikila he velevelekoloa, ko e fakataki he mahani feuaki, ko e futiaki he tau tuaga matalahi, ko e latatonu he “ko au mua,” mo e fakaohoohoaga he papale fakamotu—ko e tau matahele oti anei ha Satani ti kua latatonu ke kitia e tau mena ia. He eketaha a tautolu ke fakamamao mai he tau manako fakatino kelea nei, kua fakakite fakamaali e tautolu kua nakai manako a tautolu ke fai vala he lalolagi kelea ha Satani. Kua fakakite e tautolu e fakamooliaga kua nonofo fakakū ni a tautolu i ai. Ko e mena ne manako mooli a tautolu ti kua eketaha fakamalolō ke moua ko e nonofo tumau he lalolagi tututonu foou he Atua.
MAHANI MITAKI
11, 12. Onoono fēfē he falu magaaho ke he tau tagata motu kehe, ti ko e heigoa ka talahau hagaao ke he Tau Fakamoli a Iehova?
11 Ne matutaki e Peteru e fakamaamaaga haana ke he mena ne amanaki ke he tau Kerisiano ko e “tau tagata kehe,” he talahau he kupu 12: “Kia mitaki ha mutolu a mahani ki mua he tau motu kehe, ko e mena kua kupu kelea ai kia mutolu tuga ne tau tagata mahani kelea a mutolu, ka kitekite a lautolu ke he tau gahua mitaki ha mutolu, ti fakaheke atu ai a lautolu ke he Atua ke he aho ke ahi mai ai.” Ko e tau tagata motu kehe, ko lautolu e tau tagata kehe ne nonofo he motu ne nakai ko e ha lautolu kua fa tutuhia he falu magaaho. Ha kua kehe a lautolu mai he tau katofia ha lautolu, ne fa onoono foki ki a lautolu ko e tau tagata mahani kelea. Ko e ha lautolu a tau vagahau, ha lautolu a tau mahani, ha lautolu a tau mena tui, liga ke he tau foliga foki ha lautolu kua kehe lahi. Ka ko e mogo ka taute e lautolu e tau gahua mitaki, kakano ai, ka mitaki e tau mahani ha lautolu, ko e tau talahauaga kelea hagaao ki a lautolu he kehe kua nakai fai fakavēaga mooli.
12 Pihia foki, kua kehe e tau Kerisiano mooli mai he tokologa he tau katofia ha lautolu he falu puhala, ke he tau fakatutalaaga po ke fifiliaga he tau fakafiafiaaga. Ko e ha lautolu a tau mena tui mo e tau tauteuteaga kua fa fakakite a lautolu kua kehe mai he laulahi he matakavi. Ko e tau kehekeheaga nei he falu mogo ne iloa hēhē he tau tagata ti tukupau a lautolu ko e tau tagata mahani kelea. Ka e, liga fakaheke he falu tagata a lautolu ha ko e puhala moui ha lautolu.
13, 14. Maeke fēfē ke “talahaua tututonu” e pulotu? Fakatai.
13 E, ko e mahani mitaki ka taute ke utakehe aki e tau tuhituhi fakakelea. Ko Iesu foki ko e tagata ni ne moui mahani fakamooli katoatoa ke he Atua, ne tukupau fakavai ki ai. Na fakahigoa he falu a ia “ko e tagata kai lahi mo e inu uaina, ko e kapitiga he tau telona mo e tau tagata hala.” Ko e puhala pulotu haana he fekafekau ke he Atua kua nakai fakamooli e tau talahauaga ko ia e tagata mahani kelea. Ne “talahaua tututonu e pulotu he tau [gahua] hana,” he ui e Iesu. (Mata. 11:19) Pihia foki he vahā nei. Tuga e fakatai, ne kehe e onoonoaga he falu katofia ha lautolu ke he tau matakainaga ne gahua ke he fale Peteli i Selters i Sihamani. Ka ko e takitaki he maaga ne vagahau hake ke lata mo lautolu, he pehē: “Ko e Tau Fakamoli ne fekafekau i ai kua ha ha ni ia lautolu e puhala moui, ka ko e puhala ne nakai fakatauhele e tau momoui he falu he maaga.”
14 Ko e fakahikuaga taha ne nakaila leva e hokotia ke lata mo e Tau Fakamoli a Iehova ne nonofo i Moscow i Rusia. Kua tukupau fakavai a lautolu ke he loga e tau matagahua hepe. Ti, ia Iuni 2010, ko e European Court of Human Rights i Strasbourg i Falani, ne poaki: “Ko e Hopoaga ne moua ko e fakatauhele [ha Moscow] ke he tonuhia he tau tagata ne putoia ke he tokanoaaga fakalotu mo e kaufakalatahaaga kua nakai tonuhia. Kua nakai tuku age he tau hopoaga he motu e tau kakano ‘aoga mo e latatonu’ ke fakakite ko lautolu he matakavi” kua agahala, tuga anei, he moumou e tau magafaoa, fakaohooho e taupega, po ke fakaheu e levekiaga fakaekekafo. Ti, ko e “tau hopoaga ne fakaaoga e tau matafakatufono malolō he motu ke he puhala nakai fakafili tonu.”
OMAOMA FAKAMITAKI
15. Ko e heigoa e matapatu fakaakoaga he Tohi Tapu ne muitua he tau Kerisiano mooli he lalolagi katoa?
15 Ko e Tau Fakamoli a Iehova i Moscow—pihia ke he lalolagi katoa—ne fakamooli e taha poakiaga foki ma e tau Kerisiano ne tohi e Peteru. Ne tohia e ia: “Hanai, kia omaoma a mutolu ke he tau pule oti he tau tagata ha ko e Iki; po ke patuiki ha kua mua ni a ia; po ke tau iki.” (1 Pete. 2:13, 14) Pete he nakai fai vala he lalolagi kelea, ne omaoma fakamakai e tau Kerisiano mooli ke he tau tui ne mua ne “ha ha i ai e pule,” tuga foki he hataki e Paulo ki a lautolu.—Totou Roma 13:1, 5-7.
16, 17. (a) Ko e heigoa ne fakakite mooli kua nakai totoko e tautolu e tau fakatufono? (e) Ko e heigoa ne talahau he falu takitaki fakapolitika?
16 He eke e Tau Fakamoli a Iehova mo “tau tagata kehe” he fakatokaaga nei, kua nakai mahani a lautolu ke tuga e falu ne totoko fakakelea; ti nakai totoko po ke tauhele e lautolu e falu ne taute ha lautolu a tau fifiliaga fakapolitika po ke kaufakalatahaaga. Nakai tuga e falu matakau fakalotu, ne fakamamao e Tau Fakamoli a Iehova mai he fio mo e tau mena politika. Ne nakai lali a lautolu ke hiki e tau matafakatufono ne taute he tau tui ne mua. Ko e manatu ha lautolu he lali ke moumou e tau poakiaga po ke totoko atu ke he fakatufono kua nakai fai fakavēaga!
17 He omaoma ke he tau tui ne mua kua felauaki mo e fakatonuaga ha Peteru ke “fakalilifu ke he patuiki,” kua fakakite he tau Kerisiano e fakalilifu mo e fakaheke ne latatonu mo e tau tuaga he tau tui ia ne mua. (1 Pete. 2:17) He falu mogo, ne talahau he tau tui ne mua ne nakai fai kakano aoga a lautolu ke tupetupe hagaao ke he Tau Fakamoli a Iehova. Ma e fakatai, ko e tagata politika Sihamani ko Steffen Reiche, ko e ikipule fakamua he motu ha Brandenburg, ti ko e tagata he paliamene Sihamani he mogo fakamui ne pehē: “Ko e mahani he Tau Fakamoli a Iehova he tau kemuaga mo e tau fale puipui ne fakakite e tau mahani mitaki ne kua aoga he vahā nei tuga ni ke he magahala ia ne gahuahua agaia e fakaholoaga fakatemokarasi he motu: kakano ko e tumauokafua ha lautolu ke totoko e SS mo e fakaalofa hofihofi noa ke he ha lautolu a tau kapitiga he fale puipui. He fakamamahi lahi mahaki he totoko e tau tagata motu kehe mo e tau tagata fakapolitika motu kehe po ke tau manatu iloilo, ko e tau mahani mitaki nei kua latatonu ma e tau tagata ne nonofo he motu ha mautolu.”
FAKAKITE E FAKAALOFA
18. (a) Ko e ha ko e aga pauaki ma tautolu ke fakaalofa ke he tau matakainaga oti? (e) Ko e heigoa he falu ia lautolu ne nakai ko e Tau Fakamoli ne mailoga?
18 Ne tohi he aposetolo ko Peteru: “Kia fakaalofa ke he tau matakainaga; kia matakutaku ke he Atua.” (1 Pete. 2:17) Kua moua he Tau Fakamoli a Iehova e matakutaku mitaki he fakafiafia tumau e Atua, ti kua lafi e mena nei ke he ha lautolu a omoomoiaga ke taute e finagalo haana. Kua fiafia a lautolu ke fekafekau ki a Iehova ko e vala he tau matakainaga oti he lalolagi katoa ne tatai e tau manako. Ko e mena ia, ko e aga pauaki ma lautolu ke “fakaalofa ke he tau matakainaga.” Ko e fakaalofa fakamatakainaga pihia ne lavea lahi ke he fakatokaaga lotokai he vahā nei ne fa fakaofo ki a lautolu ne nakai ko e Tau Fakamoli. Ma e fakatai, ko e tagata fakakitekite ne gahua mo e matakau ō fenoga Amerika ne ofo ke he fakaalofa hohofi mo e lagomataiaga ne fakakite he Tau Fakamoli ke he tau tagata uiina mai he falu motu ke he fonoaga he lalolagi katoa i Sihamani he 2009. Ne pehē a ia ke he tau tau ne gahua a ia ko e tagata fakakitekite, ne nakaila kitia a ia ha mena pihia. Fakamui, taha he Tau Fakamoli ne talahau: “Ko e tau mena oti ne talahau e ia hagaao ki a mautolu ne fakakite ke he puhala he leo ofoofogia mo e hakahakau.” Kua logona pihia nakai e koe e tau tali he tau tagata ne mailoga e Tau Fakamoli he fonoaga ne fano a koe ki ai?
19. Ko e heigoa kua lata ia tautolu ke eketaha ke taute, ti ko e ha?
19 He tau puhala oti i luga—mo e falu foki—kua fakatātā he Tau Fakamoli a Iehova e kakano mooli, ko lautolu ko e “tau tagata kehe” he fakatokaaga mogonei ha Satani. Ti fiafia a lautolu he eketaha ke fakatumau pihia. Ko e amaamanakiaga ha lautolu ka nakai leva ti eke a lautolu mo tau tagata nonofo tumau he lalolagi tututonu foou he Atua kua malolō mo e mauokafua. Onoono atu nakai a koe ke he mena ia?