Ko e Fakaotiaga he Lalolagi​​—Matakutaku, Futiaki, mo e Fakaokaoka

Fēfē e logonaaga haau ke he Tesemo 21, 2012, ko e aho he kalena Maya ne tokologa kua talahau to tamai e hikiaga ke he lalolagi katoa? Falanaki ke he mena ne amanaki a koe ki ai, to liga fakatotoka, hogohogo manava, po ke fakateaga a koe. Ko e taha kia anei he tau fuafuaaga hepe ma e fakaotiaga he lalolagi?

Ka e kua e “fakaotiaga he lalolagi” ne fakamaama he Tohi Tapu? (Mataio 24:3) Falu ne matakutaku to tugi e lalolagi. Falu kua ofoofogia ke kitia e mena ka tupu he fakaotiaga he lalolagi. Tokologa ne fiu he logona kua tata mai e fakaotiaga. Ka kua tali pihia kia ha ko e tau tala fakatūtū nakai mooli?

Liga ofo a koe ke iloa e mena ne talahau mooli he Tohi Tapu hagaao ke he fakaotiaga he lalolagi. Nakai ni foaki he Tohi Tapu e tau kakano ke amanaki atu ke he fakaotiaga ka e fakakite foki e hogohogo manava ka tuga kua mule mai e fakaotiaga. Kua uiina e mautolu a koe ke manamanatu ke he tau tali he Tohi Tapu ke he falu he tau hūhū aga mau hagaao ke he fakaotiaga he lalolagi.

To tugi kia e lalolagi?

TALI HE TOHI TAPU: “Ko ia [Atua] ne fakave e lalolagi ki luga he hana tau fakave, kia nakai tuai gahuahua a ia tukulagi tukumuitea.”​​—SALAMO 104:5.

To nakai moumou e lalolagi ke he afi po ke ha puhala foki. Ka kua fakaako he Tohi Tapu ko e palaneta nei ko e kaina tukulagi he tau tagata. Pehē e Salamo 37:29: “To eke ni e motu ma e tau tagata tututonu, to nonofo muatua ai a lautolu.”​​—Salamo 115:16; Isaia 45:18.

He mole e tufuga he Atua e lalolagi, ne pehē a ia “kua mitaki lahi ni,” ti logona hifo pihia agaia a ia. (Kenese 1:31) Mamao ligo mai he fakatoka ke moumou ai, ne mavehe a ia ke “moumou ai foki a lautolu kua moumou e lalolagi” mo e to puipui ai e ia mai he malona tukulagi.​​—Fakakiteaga 11:18.

Ka e liga manamanatu a koe ke he 2 Peteru 3:7. Pehē e kupu Tohi Tapu ia: “Ka ko e lagi a enei mo e fonua kua fakatoka ha ko e kupu ia ni, kia taofi ma e afi.” Ka e nakai kia fakakite he mena nei to tugi ai e lalolagi po ke fonua? Kua fa mahani e Tohi Tapu he falu mogo ke fakaaoga e tau kupu “lagi,” “lalolagi,” mo e “afi” ko e tau fakataiaga. Ma e fakatai, mogo ne pehē e Kenese 11:1: “Ne taha maka e vagahau, . . . he lalolagi oti,” kua fakaaoga ai e “lalolagi” ke kakano ko e kaufakalatahaaga he tagata.

Ko e kakano he 2 Peteru 3:7 kua fakakite ko e lagi, lalolagi, mo e afi ne talahau i ai ko e tau fakamailoga. He kupu 5 mo e 6 ne fakatatai mo e Fakapukeaga he vahā ha Noa. He magaaho ia, ne moumou e lalolagi tuai, ka e nakai galo e palaneta ha tautolu. Ka ko e Fakapukeaga ne utakehe e kaufakalatahaaga vale, po ke “lalolagi.” Ti ko e “lagi” ne moumou​​—ko e tau tagata ne pule ke he kaufakalatahaaga ia he lalolagi. (Kenese 6:11) He puhala taha, ne talahau tuai he 2 Peteru 3:7 ko e moumouaga tukulagi tuga e afi ke he kaufakalatahaaga mahani kelea mo e tau fakatufono kolokolovao.

Ko e heigoa ka tupu he fakaotiaga he lalolagi?

TALI HE TOHI TAPU: “Ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”​​—1 IOANE 2:17.

‘Ko e lalolagi’ ka mole atu ai, nakai ko e fua lalolagi, ka ko e lalolagi he tau tagata ne nakai fakatatau e tau momoui mo e finagalo he Atua. Tuga ni ka utakehe he tagata iihi e tuma kenesā ke fakahao e moui he tagata gagao, to “fakaotioti” he Atua e tau tagata mahani kelea ke maeke e tau tagata mitaki ke fiafia mooli e moui he lalolagi. (Salamo 37:9) He puhala ia, ko e “fakaotiaga he lalolagi” ko e mena mitaki.

Ko e onoonoaga mitaki pihia ke he “fakaotiaga he lalolagi” kua hagaao ki ai e tau fakaliliuaga he Tohi Tapu, ne fakamaama e talahauaga nei “ko e fakaotiaga he vahā.” (Mataio 24:3; New International Version) Ha kua hao e tau tagata mo e lalolagi mai he fakaotiaga, nakai kia liga tonu ko e vahā foou, ko e fakatokaaga foou to mui mai? Kua tali he Tohi Tapu ē, ha kua talahau ai “ke he mouiaga ne tatali.”​​—Luka 18:30.

Ne fakahigoa e Iesu e magahala ia he vahā anoiha ko e “fakafouaga” he tau mena oti. He mogoia, to liuaki mai e ia e tau tagata ke he tau tuaga ne finagalo e Atua ki ai he kamataaga. (Mataio 19:28) To fiafia mogoia a tautolu ke he

• Lalolagi parataiso kua haohao mitaki mo e monuina ma e tau tagata oti.​​—Isaia 35:1; Mika 4:4.

• Gahua ne kakano mo e makona lahi.​​—Isaia 65:21-23.

• Fakamaulu e tau gagao oti.​​—Isaia 33:24.

• Liu fuata foki.​​—Iopu 33:25.

• Liliu tu mai a lautolu ne mamate.​​—Ioane 5:28, 29.

Ka taute e tautolu e “finagalo he Atua,” ko e mena ne ole a ia ki a tautolu, kua nakai lata ia tautolu ke matakutaku ke he fakaotiaga he lalolagi. Ka e amaamanaki atu a tautolu ki ai.

Kua tata mooli kia e fakaotiaga he lalolagi?

TALI HE TOHI TAPU: “Ka kitia e mutolu e tau mena ia kua eke, kia iloa ai e mutolu, kua tata tuai e kautu he Atua.”​​—LUKA 21:31.

He tohi The Last Days Are Here Again, ko e Porofesa ko Richard Kyle kua tohia ko e “hikiaga fakaofo mo e miha he kaufakalatahaaga kua fakaohooho ke fuafua manatu e fakaotiaga he lalolagi.” Mua atu ka tuga kua uka ke fakamaama e hiki mo e miha.

Ka ko e tau perofeta he Tohi Tapu ne vagahau hagaao ke he fakaotiaga ne kua nakai lali ke fakamaama e tau mena tutupu fakagalogalo he vahā ha lautolu. Ka kua omoomoi he Atua a lautolu ke fakamaama e tau tuaga ka fakakite e tata lahi he fakaotiaga he lalolagi. Manamanatu la ke he falu he tau perofetaaga ia mo e fifili ni e koe kua fakamooli kia he vahā ha tautolu.

• Ko e tau felakutaki, tau hoge, tau mafuike, mo e holofa he tau gagao kelea lahi mahaki.​​—Mataio 24:7; Luka 21:11.

• Tupu lahi e mahani kolokolovao.​​—Mataio 24:12.

• Ko e moumou he tau tagata e lalolagi.​​—Fakakiteaga 11:18.

• Ko e tau tagata ne ofaofa a lautolu ni, tau tupe, mo e tau mena fakafiafia ka e nakai fakaalofa ke he Atua.​​—2 Timoteo 3:2, 4.

• Ko e malona he magafaoa.​​—2 Timoteo 3:2, 3.

• Ko e fakateaga ke he fakamooliaga he fakaotiaga hane gutu mai.​​—Mataio 24:37-39.

• Ko e fakamatala atu e tala mitaki he Kautu he Atua ke he lalolagi katoa.​​—Mataio 24:14.

Tuga he talahau e Iesu, ko e kitia e “tau mena oti ia” kua fakailoa ki a tautolu kua tata mai e fakaotiaga he lalolagi. (Mataio 24:33) Kua talitonu e Tau Fakamoli a Iehova kua mauokafua e tau fakamooliaga, ti tala age e lautolu e tua ha lautolu ke he falu he fakamatala ke he 236 e motu.

Ko e tau amanakiaga hepe ke he fakaotiaga kua kakano kia to nakai hoko mai ai?

TALI HE TOHI TAPU: “Ha ko e mena ka pehe a lautolu, Kua mafola, kua nakai haofia, ti hokotia fakalutukia ai a lautolu he mahaikava, tuga ne mamahi fanau ke he fifine kua fatu, ti nakai fakai ke hao a lautolu.”​​—1 TESALONIA 5:3.

Kua fakatatai he Tohi Tapu e moumouaga he lalolagi ke he kamataaga he mamahi fanau​​—to mamahi e matua fifine mo e to mafiti ai. Ko e mogo ne hagaaki atu ai ke he fakaotiaga kua tuga e fatu, ko e matua fifine kua amanaki ke fanau kua kitia lahi fakahaga e tau fakamailoga kua teitei fanau fai. Liga fuafua he ekekafo e aho ke fanau ai; pete ni ka mule, kua mauokafua e matua fifine to nakai leva ti fanau e tama mukemuke haana. Pihia foki, ko e tau amanakiaga hepe hagaao ke he fakaotiaga kua nakai hiki e tau fakamooliaga maaliali kua fakakite aki ai e “tau aho fakamui.”​​—2 Timoteo 3:1.

‘Ka maaliali e fakamailoga kua tata a tautolu ke he fakaotiaga,’ liga hūhū a koe, ‘ko e ha ne tokologa e tau tagata ne kaumahala ke mailoga ai?’ Kua fakakite he Tohi Tapu ka tata mai e fakaotiaga, to tokologa ka uta fakateaga e fakamooliaga. He nakai talia e tau hikiaga lalahi he tau aho fakamui nei, to vaiga a lautolu: “Ha ko e mena tali mai he momohe e tau matua, kua tumau agaia e tau mena oti tali mai he fakatoka eke.” (2 Peteru 3:3, 4) Talahau ai pehē, ko e fakamailoga he tau aho fakamui kua maaliali, ka e tokologa ka fakaheu ai.​​—Mataio 24:38, 39.

Ko e vala tala nei kua fakatutala ai ke he falu ni he tau fakamooliaga faka-Tohi Tapu kua tata mai e fakaotiaga.a To manako nakai a koe ke fakaako atu foki? Ka pihia, he ha he matutaki ke he Tau Fakamoli a Iehova ke talia ha lautolu a foaki fakaako Tohi Tapu nakai totogi? Ko e tau magaaho fakaako kua maeke ke taute he kaina haau, he taha matakavi kua hagahaga mitaki ki a koe, po ke he telefoni foki. Ko e totogi ni ko e magaaho haau, mo e kua aoga lahi e tau mena ka moua.