Moua e Aoga Katoa he Totou e Tohi Tapu

1-3. Lagomatai fēfē he totou e Tohi Tapu mo e fakagahua e tau mena ne fakaako a tautolu ki ai?

KO E matakainaga fifine motua ne pehē, “Fakaaue au ki a Iehova he tau pogipogi oti he lagomatai au ke maama e Tohi Tapu.” Pete ne totou e ia e Tohi Tapu ke molea e laga 40 kua totou agaia e ia. Ko e matakainaga fifine fuata ne tohi ko e totou e Tohi Tapu kua lagomatai a ia ke iloa na mooli a Iehova mo e moua e fakafetuiaga tata lahi mo Ia. Pehē a ia, “Lahi mahaki e fiafia he moui haaku mogonei!”

² Ne fakaako he aposetolo ko Peteru kua lata ia tautolu ke fiafia ke he kupu mooli mai he Kupu he Atua. (1 Pete. 2:2) Ka fakaako a tautolu ke he Tohi Tapu mo e fakagahua e mena ne fakaako i ai, maeke ia tautolu ke moua e loto manamanatu meā mo e fai kakano e moui. Maeke he tau fakaakoaga he Tohi Tapu ke lagomatai a tautolu ke moua e kapitiga mitaki mo e falu ne fakaalofa mo e fekafekau foki ke he Atua mooli. Ko e tau kakano mitaki anei ma tautolu ke ‘fiafia ke he fakatufono he Atua.’ (Roma 7:22) Maeke fēfē foki e fakaako he Tohi Tapu ke lagomatai a tautolu?

³ Ko e lahi e fakaako haau hagaao ki a Iehova mo e haana Tama, kua lahi foki haau a fakaalofa ki a laua ti pihia mo e falu tagata. To fakaako foki he Tohi Tapu a koe ke he puhala ka fakahao he Atua e tau tagata tututonu ka moumou e ia e tau tagata mahani kelea. He gahua haau he fonua, ha ha ia koe e tala mitaki ke tala age ke he tau tagata. Ti maeke foki a koe ke iloa mooli to lagomatai e Iehova a koe he fakaako e koe e falu ke he tau mena ne iloa e koe.

TOTOU TI MANAMANATU FAKAHOKULO

4. Ko e heigoa e kakano ke totou ‘nakai fai leo’ e Tohi Tapu?

⁴ Manako a Iehova ki a tautolu ke fai magaaho ke manamanatu mo e maama e tau mena ne totou e tautolu he Tohi Tapu. Ne tala age a ia ki a Iosua: “Nakai uta kehe mo e gutu hau e tohi he fakatufono nai, ka kia manamanatu ai [po ke, totou nakai fai leo] a koe ke he aho katoa mo e po.” (Iosua 1:8; Sala. 1:2) Kakano kia e mena nei kua lata ia tautolu ke totou fakaleo lahi e Tohi Tapu katoa po ke fanafana ka totou ai? Nakai. Kakano ai kua lata ia koe ke totou fakatekiteki ke manamanatu hagaao ke he mena kua totou e koe. To lagomatai he mena nei a koe ke hagaaki ke he tau kupu tohi kua aoga lahi mo e fakamalolō ki a koe. Ka moua e koe e talahauaga po ke tala kua fakamalolō ki a koe, totou fakatekiteki ai, liga he talahau fakaleo tote e koe he totou ai. Ti ko e mena kua totou e koe kua maeke ke hokotia mooli ke he loto haau. Ko e ha kua aoga e mena nei? Ha ko e mena ka maama mooli e koe e fakatonuaga he Atua, to manako a koe ke moui fakatatau ki ai.

5-7. Foaki e tau fakataiaga he puhala totou fakatekiteki mo e fakamitaki he Kupu he Atua kua liga lagomatai a koe ke (a) omaoma ke he tau fakatufono he Atua; (e) vagahau totonu ke he falu; (i) falanaki ki a Iehova he tau magaaho uka foki.

⁵ Ka totou e tautolu e tau tohi he Tohi Tapu ne manatu a tautolu kua uka ke maama, lagomatai lahi ke totou fakatekiteki mo e fakamitaki ai ke maeke a tautolu ke manamanatu hagaao ke he mena ne totou. Ma e fakatai, manamanatu ke he matakainaga taane fuata hane totou fakamitaki e tohi ha Hosea. He veveheaga 4, ne fakamanou a ia he mole e totou he kupu 11 ke he 13 ke manamanatu. (Totou Hosea 4:11-13.) Ko e ha kua hagaaki a ia ke he tau kupu nei? Mogonei, kua kamatamata a ia he aoga ke taute e tau mahani kelea. Ka e he manamanatu a ia ke he tau kupu nei, ne pehē a ia ki a ia ni: ‘Na kitia e Iehova e tau mena kelea ne taute foki he tau tagata ka nonofo tokotaha a lautolu. Ai fia manako au ke fakaita a Ia.’ Kua fifili e matakainaga ke fakatumau ke omaoma ke he tau fakatufono he mahani ha Iehova.

⁶ Ko e fakataiaga ke uaaki, manamanatu ke he matakainaga fifine hane totou fakamitaki e tohi ha Ioelu mo e hoko ai ke he veveheaga 2, kupu 13. (Totou Ioelu 2:13.) Kua fakalagalaga he kupu nei a ia ke mailoga kua lata a ia ke fifitaki a Iehova, ne ‘fakaalofa noa, mo e fakaalofa hofihofi noa, kua fakatuai hana ita, mo e lahi ni hana fakaalofa.’ Ne fifili a ia ke taute falu hikiaga ha ko e falu mogo kua vagahau fakamamahi mo e ita a ia ke he taane haana mo e ke he falu.

⁷ Ko e fakataiaga ke toluaki, manamanatu ke he matakainaga taane kua fai hoana mo e fai fanau. Ne galo e gahua haana ti tupetupe ke he puhala ka leveki e ia e magafaoa haana. Kua totou fakamitaki e ia e tohi ha Nahuma. Ia Nahuma 1:7, ne totou e ia kua iloa e Iehova a lautolu kua falanaki ki a Ia mo e to puipui a lautolu “ke he aho matematekelea.” Lagomatai he mena nei e matakainaga ke mailoga kua fakaalofa a Iehova ki a ia mo e magafaoa haana, mogonei kua nakai tupetupe lahi mahaki a ia. Ti totou fakamitaki e ia e kupu 15. (Totou Nahuma 1:15.) Mailoga e ia na maeke ke fakamooli kua falanaki a ia ki a Iehova he fakamatala e tala mitaki he tau magaaho uka foki. Ti pete he matutaki a ia ke kumi e gahua tupe foou, to lahi e magaaho haana ka fakaaoga he faahi tapu he gahua ke he fonua.

8. Fakamaama fakakū taha mena kua fakaako e koe mai he totouaga haau he Tohi Tapu.

⁸ Ko e tau fakataiaga lagomatai ne fakatutala laia a tautolu ne haia he tau tohi he Tohi Tapu ne liga manatu e falu kua uka ke maama. Ka moua e koe e tau kupu tohi atihake he tau tohi nei, to manako a koe ke fakatumau ke totou ai. Maeke ai ke fakamafana a tautolu mo e fakailoilo ai a tautolu. Ko e tau tohi oti he Tohi Tapu ka lagomatai a tautolu ke he puhala taha. Ko e Kupu he Atua kua tuga e makauho ne loga e taimani ne hokulo muatua hifo ke he kelekele. He totou e koe e Tohi Tapu katoa, kia kumi tumau e tau “taimani,” po ke takitakiaga uho mo e fakamalolōaga i loto!

EKETAHA KE MAAMA

9. Ko e heigoa ha tautolu ka taute ke maama mitaki e Tohi Tapu?

⁹ Kua aoga ke totou e Tohi Tapu he tau aho takitaha. Ka e lata foki ia koe ke mailoga kua maama e koe e tau mena haau hane totou. Ti taute e tau kumikumiaga ke he tau tohi ha tautolu ke iloa hagaao ke he tau tagata, tau matakavi, mo e tau mena tutupu kua totou a koe ki ai. Ka nakai maama mitaki e koe e puhala kua lata ke fakagahua taha mena kua totou ai he Tohi Tapu, maeke ia koe ke hūhū ke he motua po ke taha matakainaga taane po ke fifine motua fakaagaaga ma e lagomatai. Ko e Kerisiano he vahā Tohi Tapu kua lata ke moua e lagomatai ke maama hako e kupu mooli. Ko e higoa haana ko Apolo.

10, 11. (a) Moua fēfē e Apolo e lagomatai ke eke mo fekafekau mitaki he tala mitaki? (e) Ko e heigoa ka fakaako e tautolu mai he fakafifitakiaga ha Apolo? (Kikite e puha “Felauaki Tonu Nakai e Fakaakoaga Haau mo e Maama Foou?”)

¹⁰ Ko Apolo ko e Kerisiano Iutaia ne iloa mitaki e tau Tohiaga Tapu ti ko e fekafekau fakamakutu. Talahau he tohi ha Gahua kua fakamatala a ia hagaao ki a Iesu. Ka e nakai mailoga e Apolo kua fai mena foou hagaao ke he papatisoaga ne fakaako e Iesu ke he tau tutaki haana. Ko e hoa Kerisiano ne higoa ko Pisila mo Akula ne logona e fakaako atu ha Apolo i Efeso, ti fakamaama “fakatonu atu e puhala he Atua kia ia.” (Gahua 18:24-26) Aoga fēfē e mena nei ki a Apolo?

¹¹ He fano a Apolo ki Akaia, ne matutaki a ia ke fakamatala. Ne lagomatai e ia a lautolu ne talia e tala mitaki he fakaaoga e tau Tohiaga Tapu ke fakakite kua hepe e tau tagata Iuta ti ko Iesu e Keriso. (Gahua 18:27, 28) Ha kua maama e Apolo mogonei e kakano he papatisoaga faka-Kerisiano, ne “lagomatai fakalahi” e ia a lautolu ne foou ke holo ki mua he kupu mooli. Ko e heigoa ha tautolu ka fakaako mai he mena nei? Maeke ia tautolu ke muitua e fakafifitakiaga ha Apolo he gahua fakamalolō ke maama e tau mena kua totou e tautolu he Tohi Tapu. Ka e lata ia tautolu ke talia fakatokolalo mo e loto fakaaue foki ke he ha manatu kua moua ai ke lagomatai a tautolu ke eke mo tau faiaoga mitaki.

FAKAAOGA E MENA NE FAKAAKO E KOE KE LAGOMATAI FALU

12, 13. Maeke fēfē a tautolu ke fakaaoga e tau Tohiaga Tapu he puhala totonu ke lagomatai e tagata fakaako Tohi Tapu ke holo ki mua?

¹² Tuga a Pisila, Akula, mo Apolo, maeke ia tautolu ke lagomatai e falu. Ka lagomatai e koe e tagata fiafia ke hikihiki e puhala moui haana ke maeke a ia ke holo ki mua he kupu mooli, fēfē e logonaaga haau? Po ke motua, fēfē e logonaaga haau ka fakaaue atu e taha Kerisiano ki a koe ma e fakatonuaga he Tohi Tapu kua tala age e koe ka lauia a ia he magaaho uka? Kua fakafiafia mooli he mena ia a tautolu ke fakaaoga e Tohi Tapu ke lagomatai e falu ke taute e tau hikihikiaga he tau momoui ha lautolu.a Maeke fēfē a koe ke taute e mena nei?

¹³ He vahā ha Elia, tokologa e Isaraela ne nakaila fifili ke mumui ke he tapuakiaga mooli po ke tapuakiaga fakavai. Ko e mena ne tala age e Elia ke he tau Isaraela ia ka lagomatai e tagata fakaako Tohi Tapu ne nakaila fifili ke fekafekau ki a Iehova. (Totou 1 Patuiki 18:21.) Po ke liga matakutaku e tagata fiafia to tuhituhi he tau kapitiga po ke magafaoa haana a ia he fakaako e Tohi Tapu. Maeke ia koe ke lagomatai a ia ke fifili ke tapuaki ki a Iehova he fakaaoga e tau kupu ia Isaia 51:12, 13.​​—Totou.

14. Ko e heigoa ka lagomatai a koe ke manatu e tau kupu Tohi Tapu ke maeke a koe ke lagomatai e falu?

¹⁴ Loga e manatu he Tohi tapu ka atihake, fakatonu, po ke fakamalolō a tautolu. Ka e liga manamanatu a koe ke he puhala kua maeke ke iloa e tau kupu tohi ke fakaaoga ka manako a koe ki ai. Totou e Tohi Tapu he tau aho takitaha, ti manamanatu fakahokulo ke he mena kua totou e koe. To mahani lahi fakahaga a koe mo e Tohi Tapu, ti maeke a Iehova ke fakaaoga e agaaga tapu haana ke lagomatai a koe ke manatu e mena ne talahau i ai.​​—Mare. 13:11; totou Ioane 14:26.b

15. Ko e heigoa ka lagomatai a koe ke maama mitaki e Kupu he Atua?

¹⁵ Tuga e Patuiki ko Solomona, liogi ki a Iehova ma e pulotu. Lata a koe ke moua e pulotu ke taute e gahua fakamatala mo e ke leveki e tau matagahua haau he fakapotopotoaga. (2 Nofo. 1:7-10) Fifitaki e tau perofeta he kumikumi fakamitaki e Kupu he Atua. To lagomatai he mena nei a koe ke iloa e kupu mooli hagaao ki a Iehova mo e haana finagalo. (1 Pete. 1:10-12) Ne tala age e aposetolo ko Paulo ki a Timoteo ke fakaako “ke he tau kupu he tua, mo e tau kupu mitaki.” (1 Timo. 4:6) Ka fakatumau a koe ke fakaako e Tohi Tapu, to maama mitaki ai e koe mo e to iloa e koe e puhala ke fakaaoga ai ke lagomatai e falu. He magaaho taha, to tupu fakahaga e malolō he tua haau.

PUIPUIAGA MOOLI NE FAKAVĒ KE HE TOHI TAPU

16. (a) Aoga fēfē e tau Perea mai he totou e tau Tohiaga Tapu he tau aho takitaha? (e) Ko e ha kua aoga ma tautolu ke totou e Tohi Tapu he tau aho takitaha?

¹⁶ Ko e tau Iuta ne nonofo i Perea ne totou fakamakutu e tau Tohiaga Tapu he tau aho takitaha. He fakamatala a Paulo ki a lautolu, ne fakatatai e lautolu e mena ne talahau e ia mo e tau mena ne iloa e lautolu mai he tau Tohiaga Tapu. Tokologa ia lautolu ne mailoga kua fakaako atu e ia e kupu mooli ti ‘tua a lautolu.’ (Gahua 17:10-12) Mai he mena nei, maeke a tautolu ke fakaako ko e totou e Tohi Tapu he tau aho takitaha ka lagomatai a tautolu ke atihake e tua malolō ki a Iehova. Kua lata ia tautolu ke malolō e tua ka manako a tautolu ke hao atu ke he lalolagi foou he Atua.​​—Hepe. 11:1.

17, 18. (a) Puipui fēfē he tua malolō mo e fakaalofa e tau loto ha tautolu? (e) Puipui fēfē he amaamanakiaga a tautolu?

¹⁷ Ne fakamaama e Paulo kua lata ia tautolu ke moua e tua, fakaalofa, mo e amaamanakiaga. Pehē a ia: “Ko tautolu, ko e tau tagata he aho, kia nonofo fakalatalata a tautolu, kia tapulu ai a tautolu ke he ufikahokaho, ko e tua mo e fakaalofa haia, mo e potiki tau, ko e amaamanaki haia ke he fakamouiaga.” (1 Tesa. 5:8) Ko e ufikahokaho ko e papatau ne uufi e fatafata he kautau ke puipui e ate haana. He puhala pihia foki, kua lata ke puipui e tau loto ha tautolu. Ka atihake he Kerisiano e tua malolō ke he tau maveheaga he Atua mo e malolō e fakaalofa ki a Ia mo e falu, kua puipui e ia e loto haana. To taute e ia e tau mena oti kana kua maeke a ia ke fakatumau ke he taliaaga he Atua.

¹⁸ Ne talahau foki e Paulo ko e potiki tau fakatai kua lata ia tautolu ke tui. Ko e “amaamanaki haia ke he fakamouiaga.” Kua fakaaoga he tau kautau he vahā Tohi Tapu e potiki tau ke puipui e tau ulu ha lautolu. Ka atihake e tautolu e amaamanakiaga malolō ke he lotomatala ha Iehova ke laveaki a tautolu, to puipui he amaamanakiaga ha tautolu e manamanatuaga ha tautolu. Ko e amaamanakiaga malolō ha tautolu kua foaki ki a tautolu e tau kakano oti ke fakaheu e tau tagata tiaki taofiaga mo e tau vagahau kelea ha lautolu, ne maeke ke holofa mafiti ke he fakapotopotoaga tuga e gagao. (2 Timo. 2:16-19) Ko e amaamanakiaga ha tautolu ka fakamalolō a tautolu mo e foaki ki a tautolu e kakano ke kalo kehe he mahani kelea.

KO E KEI KE HE FAKAHAOAGA

19, 20. Ko e ha kua loto fakaaue lahi a tautolu ma e Kupu he Atua? Fakakite fēfē e tautolu kua loto fakaaue a tautolu ki ai? (Kikite e puha “Foaki e Iehova ki a Au e Mena kua Latatonu mo Au.”)

¹⁹ He tata lahi a tautolu ke he fakaotiaga he fakatokaaga nei, kua lata ia tautolu ke falanaki fakalahi ke he Kupu ha Iehova. Maeke ai ke lagomatai ke tiaki e tau mahani kelea mo e ke totoko ke he ha manako ha tautolu ke agahala. To fakamafana mo e fakamalolō a tautolu ke fakauka ke he ha kamatamata ne tuku mai e Satani mo e lalolagi haana ki a tautolu. Ko e tau fakatonuaga he Kupu he Atua ka lagomatai a tautolu ke nonofo tumau he puhala ke he moui.

²⁰ Ko e finagalo he Atua “ke fakamomoui e tau tagata oti kana.” Putoia he mena nei e tau fekafekau haana pihia mo lautolu kua makai ke fanogonogo ka fakamatala mo e fakaako atu a tautolu ki a lautolu hagaao ke he tala mitaki. Ka ko lautolu oti kua manako ke hao he fakaotiaga he fakatokaaga nei kua latatonu ke “maama ke he kupu moli.” (1 Timo. 2:4) Kua lata ia tautolu ke totou e Tohi Tapu mo e fakagahua e tau fakatonuaga i ai ka manako a tautolu ke hao. Ko e ha tautolu a totouaga ke he Tohi Tapu he tau aho takitaha kua fakakite ai e loto fakaaue lahi mahaki ke he Kupu ha Iehova.​​—Ioane 17:17.