Loto Fakaaue Katoatoa ke he Tau Mahani ha Iehova

1. (a) Ko e heigoa e tau mahani ha Iehova ka manatu a koe ki ai? (e) To lagomatai fēfē a koe he fakaako ke he tau mahani he Atua?

KAEKE manamanatu a koe hagaao ki a Iehova, ko e heigoa e tau mahani kua manatu a koe ki ai? Liga manatu a koe ke he fakaalofa, fakafili tonu, pulotu, mo e malolō. Mooli, iloa e tautolu na ha ha foki ia Iehova loga e tau mahani homo ue atu. He loga e tau tau kua mole, ne fakatutala e tau tohi ha tautolu ke he molea e 40 e tau mahani kehekehe ha Iehova. Ka fakaako e koe e tau mahani nei mo e magafaoa haau, manamanatu la ke he mena ka fakaako e koe hagaao ki a Iehova! To uho lahi atu e tau mahani haana ki a koe. Ti ko e fua, to malolō lahi e manako haau ke fifitaki a Iehova mo e fakatata lahi e kapitiga mo ia.​​—Iosua 23:8; Sala. 73:28.

2. (a) Fakatai e puhala ka fakaako hagaao ke he tau mahani ha Iehova ka lagomatai a tautolu ke tokiofa fakalahi ai. (e) Ko e heigoa ka fakatutala a tautolu he vala tala nei mo e he tau vala tala ua ka mui mai?

² Maeke fēfē a koe ke fakaako ke tokiofa fakalahi e taha mena? Manamanatu la, ko koe hane kamata e mena kai foou. Fakamua kua mailoga e koe e manogi mitaki. Ti kamata ai e koe mo e mailoga e lolo lahi. Fakahiku ti tunu ai e koe. Pihia ni, maeke ia tautolu ke tokiofa fakalahi e mahani ha Iehova he fakaako fakamua hagaao ke he mahani ia, ti manamanatu fakahokulo ke he puhala ne fakakite ai e Iehova, mo e fakahiku he fifitaki e mahani ia ke he tau momoui ha tautolu. (Efeso 5:1) Ko e vala tala nei mo e tau vala tala ua foki ka mumui mai to fakatutala ke he falu he tau mahani ha Iehova. Mo e tau mahani takitaha, to fakatutala a tautolu ke he tau hūhū nei: Ko e heigoa e kakano he mahani nei? Fakakite fēfē ai e Iehova? Ti maeke fēfē a tautolu ke fifitaki a Iehova he fakakite e mahani nei?

MUKAMUKA KE O ATU KI A IEHOVA

3, 4. (a) Ko e heigoa e kakano ke mukamuka ke o atu ki ai? (e) Fakakite fēfē e Iehova kua mukamuka ke o atu ki a ia?

³ Fakamua kia fakatutala la tautolu ke he kakano ke mukamuka ke o atu ki ai. Kakano ai ke totonu, atāina ke tutala ki ai, mo e nakai lavelave lahi ke tutala ke he falu. Ko e tau tala, tau aga, mo e mata kapitiga he tagata ne mukamuka ke o atu ki ai ne fakakite kua makai a ia ke fanogonogo mo e lagomatai.

⁴ Kua mukamuka ke o atu ki a Iehova. Pete foki ko ia ko e Atua malolō ue atu he lagi mo e lalolagi katoatoa, ne uiina e ia a tautolu ke liogi ki a ia. Fanogonogo a ia ke he tau liogi ha tautolu ti foaki mai e ia e lagomatai kua lata mo tautolu. (Totou Salamo 145:18; Isaia 30:18, 19.) Maeke ia tautolu ke tutala ke he Atua he ha matakavi, ha magaaho, mo e ha leva ka lata ia tautolu. Nakai ita a ia ki a tautolu he tutala mo ia. (Sala. 65:2; Iako. 1:5) Kua fakamaama he Tohi Tapu a Iehova ke he puhala kua fakamafana a tautolu ke tutala ki a ia he liogi. Ma e fakatai, ne tohi e Tavita “ko e tau fofoga a Iehova kua hagao ia” ki a tautolu ti lalago e ia a tautolu ke he haana “lima matau.” (Sala. 34:15; 63:8) Ti talahau e perofeta ko Isaia ko Iehova kua tuga e leveki mamoe. Kua tohi e ia: “To hapai e ia e tau punua mamoe ke he hana tau lima, mo e uta e ia a lautolu ke he hana fatafata; to takitaki fakatekiteki e ia e tau mamoe kua fai punua.” (Isaia 40:11) Manamanatu la! Manako a Iehova ki a tautolu ke fakatata ki a ia tuga e punua mamoe tote ne lukuluku ke he tau lima he leveki mamoe fakaalofa. Ka manamanatu pihia ke he ha tautolu a Matua, kua omoi a tautolu ke lahi atu foki e fakaalofa ki a ia! Maeke fēfē a tautolu ke tuga a Iehova?

KO E MAHANI AOGA LAHI MA E TAU MOTUA

5. Ko e ha kua aoga ma e tau motua ke mukamuka ke o atu ki ai?

⁵ Nakai leva, ne hūhū ke he falu Fakamoli he tau faahi kehekehe he lalolagi, “Mahani fe he motua kua uho lahi ki a koe?” Laulahi ia lautolu ne tali, “Mukamuka ke o atu ki ai.” Mooli kua lata ia tautolu oti ke gahua ke he mahani nei, ka e mua atu e aoga ke he tau motua ke taute pihia. (Isaia 32:1, 2) Ko e ha kua aoga lahi ma e tau motua ke mukamuka ke o atu ki ai? Taha e matakainaga fifine ne talahau maeke a ia ke iloa e tau mahani mitaki he motua kaeke mukamuka a ia ke fina atu ki ai mo e fiafia ai ke tutala mo ia. Ko e tau kupu nei kua moolioli. Ti maeke fēfē a koe ke taute e falu ke fiafia ke tutala ki a koe?

6. Ko e heigoa e taha puhala kua maeke a koe ke taute e falu ke fiafia ke tutala ki a koe?

⁶ Taha puhala ke taute e mena nei he fakakite kua leveki mooli a koe ke he falu ti makai ke lagomatai a lautolu. Ti ko e tau matakainaga, putoia a lautolu ne ikiiki, to logona e fiafia ke tutala mo koe. (Mare. 10:13-16) Ko e tama taane 12 e tau he moui ne higoa ko Carlos ne pehē: “Ne kitekite au ke he tau motua i loto he fale he Kautu ne mamali mo e totonu, ti fiafia au ki a lautolu ha ko e mena ia.” Ti nakai kuenaia ma e tau motua ke talahau noa ni kua makai a ia ke fanogonogo mo e lagomatai. Kua lata a ia ke fakakite ai. (1 Ioa. 3:18) Maeke fēfē a ia ke taute ai?

7. Ko e ha e falu tagata ne fiafia ke tutala ki a tautolu ka tau e tautolu e pine he fonoaga? Ko e heigoa ka fakaako e tautolu mai he mena nei?

⁷ Ke fakatai: Nakaila leva ne fina atu e matakainaga taane ke he fonoaga he taha motu. He liu atu ki kaina he vakalele, ne tau e ia e pine he fonoaga ne tū ai e tau kupu “Kia Hoko Mai e Kautu he Atua!” Ko e tagata gahua vakalele ne kitia e pine mo e pehē, “Kia hoko mai!” Mitaki e fakatutalaaga ha laua, ti talia he tagata taane e tau mekasini ha tautolu. Ko e ha e tau tagata kua fiafia ke tutala ki a tautolu ka tau e tautolu e pine he fonoaga? Ha kua taute he pine e falu ke fia iloa e mena ka ō a tautolu ki ai mo e fakakite ki ai kua makai a tautolu ke tutala ki a lautolu hagaao ke he tau taofiaga ha tautolu. He puhala taha, kua lata he motua ke fakakite ke he tau matakainaga kua makai tumau a ia ke tutala ki a lautolu. Ko e heigoa e falu puhala ka taute he tau motua e mena nei?

8. Maeke fēfē he tau motua ke fakakite kua leveki mooli e lautolu e falu? Fēfē e logonaaga ha lautolu he fakapotopotoaga ke he mena nei?

⁸ Laulahi he tau motu, maeke ia koe ke fakakite kua manamanatu a koe ke he tau matakainaga haau he mamali mooli, fakaalofa lima, po ke fakafeleveia fakakapitiga ki a lautolu. Ko hai kua lata ke fakakite fakamua e mena nei? Talahau he Tohi Tapu he mogo ne feleveia a Iesu mo e tau tutaki haana, ne “fina age a Iesu, kua vagahau kia lautolu.” (Mata. 28:18) He puhala taha, ne lali e tau motua he vahā nei ke o atu ke he falu mo e tutala ki a lautolu. Fēfē e logonaaga ha lautolu he fakapotopotoaga ki ai? Ko e matakainaga fifine paionia ne 88 e tau ne pehē: “Ko e mamali mafanatia mo e tau tali atihake ne moua e au mai he tau motua ka hū atu ke he Fale he Kautu kua fakatata a lautolu ki a au.” Taha matakainaga fifine foki ne pehē: “Ka fakafeleveia he motua a au ke he feleveiaaga mo e mamali, kua aoga lahi ai ki a au.”

FAKATOKA E MAGAAHO KE TUTALA KE HE TAU MATAKAINAGA

9, 10. (a) Eke fēfē a Iehova mo fakafifitakiaga mitaki ma tautolu? (e) Maeke fēfē e tau motua ke muitua e fakafifitakiaga ha Iehova?

⁹ Mooli, ka manako a tautolu ke he falu ke fiafia ke tutala ki a tautolu, kua lata ia tautolu ke fai magaaho ma lautolu. Ko e fakafifitakiaga mitaki a Iehova ma tautolu. Pehē e Tohi Tapu: “Nakai ni mamao a ia mo tautolu takitokotaha.” (Gahua 17:27) Taha puhala ka fifitaki he tau motua e fakafifitakiaga ha Iehova he tutala ke he tau matakainaga, ko lautolu ne ikiiki mo e momotua, ato kamata mo e ka oti e tau feleveiaaga. Ko e matakainaga taane paionia ne pehē: “Ka hūhū mai e motua ko e fēfē au ti tū ke fanogonogo ke he tali haaku, ne logona hifo e au kua loto fakaaue lahi a ia ki a au.” Ko e matakainaga fifine ne fekafekau ki a Iehova ke teitei 50 e tau ne pehē: “Ko e tau motua ne fai magaaho ke tutala ki a au ka oti e feleveiaaga kua logona e au e uho.”

¹⁰ Mooli ko e tau motua kua ha ha ai e tau matagahua loga. Ka e he tau feleveiaaga, kua lata ia lautolu ke eketaha ke fakaaoga e magaaho ke tutala mo e tau matakainaga.

NAKAI FAKAMAILOGA TAGATA A IEHOVA

11, 12. (a) Ko e heigoa e kakano he nakai fakamailoga tagata? (e) Fakakite fēfē he Tohi Tapu kua nakai fakamailoga tagata a Iehova?

¹¹ Ko e taha mahani homo ue atu ha Iehova ko e nakai fakamailoga tagata a ia. (Gahua 10:34) Ko e heigoa e kakano he nakai fakamailoga tagata? Kakano ai ke fehagai fakamitaki mo e tau tagata oti. Kaeke manako a tautolu ke nakai fakamailoga tagata, lata mua ia tautolu ke talitonu kua lata ai ke fehagai fakamitaki mo e tau tagata oti. Ko e taha ne nakai fakamailoga tagata kua nakai taute e falu ke mitaki hake ke he falu ha ko e foliga ha lautolu po ke tau tupe ne moua. Kua fehagai fakamitaki a ia ki a lautolu he fakatatau ke he tuaga mooli ha lautolu.

¹² Ko Iehova e fakafifitakiaga mitaki ue atu he nakai fakamailoga tagata. Pehē e Kupu haana kua “nakai fakamailoga tagata” a ia. (Gahua 10:34, 35; Teutaronome 10:17.) Kia manamanatu la tautolu ke he fakafifitakiaga kua fakakite e mena nei.

13, 14. (a) Ko e heigoa e lekua ne fehagai mo e tau tama fifine tokolima ha Selofeata? (e) Fakakite fēfē e Iehova kua nakai fakamailoga tagata a ia?

¹³ Ato huhū e tau Isaraela ke he Motu he Maveheaga, ko e tau tama fifine tokolima he tagata ne higoa ko Selofeata ne fai lekua kua lata ai ke taute. Ko e heigoa a ia? Ne mate e matua taane ha lautolu, ti nakai fakaatā a lautolu ke moua e tufaaga he kelekele haana. Ko e ha? Ha kua hagaao ke he Fakatufono, ko e tau tama taane ni kua fakaatā ke moua e kelekele. Ka e mate e matua taane ha lautolu ka e nakai fai tama taane. (Nume. 26:33, 52-55) To age kia e kelekele ke he falu magafaoa? Ko e heigoa ka taute he tau tama fifine ha Selofeata?

¹⁴ Ne ō a lautolu ki a Mose mo e olelalo ki a ia ma e lagomatai, he pehē: “Kua fakagalo ai he ha e higoa he ha mautolu a matua tane ke he hana magafaoa, he nakai fai tama tane a ia?” Tali atu kia a Mose he pehē, ‘Ko e fakatufono a ia, ti nakai fai mena ke taute e au ke lagomatai a koe’? Nakai, ne ole a ia ki a Iehova hagaao ke he tuaga. (Nume. 27:2-5) Ko e heigoa ha Iehova ne talahau? Tala age a ia ki a Mose: “Kua tonu e tau kupu he tau tama fifine a Selofeata; kia ta age e koe ma lautolu ha tufaaga fakalataha mo e tau matakainaga he ha lautolu a matua tane, kia tuku age kia lautolu e tufaaga he matua tane ha lautolu.” Ti fai mena foki a Iehova ne taute. Ne tala age a ia ki a Mose ke tohi hifo e mena nei he Fakatufono: “Kaeke ke mate e tagata, ka e nakai fai tama tane a ia, to tuku atu ai e mutolu hana tufaaga ke he hana tama fifine.” (Nume. 27:6-8; Iosua 17:1-6) Tali mai he mogoia, ko e tau fifine Isaraela oti he tuaga ia to moua e tufaaga.

15. (a) Fehagai fēfē a Iehova mo e tau tagata haana, putoia a lautolu kua nakai fai tagata ke lagomatai a lautolu? (e) Ko e heigoa falu tala Tohi Tapu ne fakakite kua nakai fakamailoga tagata a Iehova?

¹⁵ Ko e fifiliaga nakai fakamailoga tagata mooli anei! Nakai fai tagata foki ke lagomatai e tau tama fifine tokolima ia, ati fehagai fakamitaki mo e fakalilifu e Iehova a lautolu, tuga he fehagai a ia mo e falu Isaraela. (Sala. 68:5) Ko e taha ni anei he tau tala loga he Tohi Tapu ne fakakite kua taute fakamitaki e Iehova e tau tagata haana.​​—1 Samu. 16:1-13; Gahua 10:30-35, 44-48.

MAEKE A TAUTOLU KE FIFITAKI A IEHOVA

16. Maeke fēfē a tautolu ke nakai fakamailoga tagata ke tuga a Iehova?

¹⁶ Maeke fēfē a tautolu ke nakai fakamailoga tagata ke tuga a Iehova? Manatu to nakai fakamailoga tagata a tautolu kaeke ke talitonu a tautolu kua lata he tau tagata oti ke fehagai fakamitaki. Liga manatu a koe kua nakai fakamailoga tagata a koe. Ka e falu mogo kua uka ma tautolu ke iloa e logonaaga mooli ha tautolu hagaao ke he falu. Ti maeke fēfē a koe ke iloa kua nakai fakamailoga tagata mooli a koe? Ko Iesu ko e fakafifitakiaga mitaki ma tautolu. Ka manako a ia ke iloa e tau tala he tau tagata hagaao ki a ia, ne hūhū a ia ke he tau kapitiga haana: “Po ke heigoa e kupu he tau tagata kia au ko e Tama he tagata, po ko hai?” (Mata. 16:13, 14) Liga maeke ia koe ke fifili e kapitiga ne iloa e koe kua fakamooli ki a koe ti hūhū ki a ia, ‘Manatu nakai a koe na fehagai fakamitaki au mo e tau tagata? Manatu nakai e falu kua nakai fakamailoga tagata au?’ Liga tala atu a ia ki a koe, falu mogo kua fehagai fakamitaki a koe mo e tau tagata motu kehe ka e nakai ke he falu po ke mitaki atu a koe ki a lautolu kua fai tupe po ke lahi e fakaakoaga. Ka tala atu e ia ki a koe taha mena tuga anei, ko e heigoa haau kua lata ke taute? Liogi ki a Iehova, ti olelalo ki a ia ke lagomatai a koe ke hiki e tau logonaaga haau hagaao ke he falu ke maeke a koe ke tuga a Iehova mo e nakai fakamailoga tagata.​​—Mata. 7:7; Kolo. 3:10, 11.

17. Ko e heigoa e falu puhala ka nakai fakamailoga tagata a tautolu ka fehagai mo e falu?

¹⁷ He fakapotopotoaga, maeke a tautolu ke fifitaki a Iehova he fakalilifu mo e totonu ke he tau tagata oti. Ma e fakatai, ka uiina e koe e tau matakainaga ke he kaina haau, maeke a koe ke uiina a lautolu mai he tau aga fakamotu kehekehe. Po ke liga putoia e koe a lautolu ne nakai loga e tupe ki a koe, lautolu ne mamate e tau hoa, po ko lautolu ne ikiiki kua nakai fai magafaoa he kupu mooli. (Totou Kalatia 2:10; Iakopo 1:27.) He gahua fakamatala, kua tutala a tautolu ke he tau tagata kehekehe, putoia a lautolu mai he tau motu kehe. Kua taute he fakatokatokaaga ha Iehova e tau tohi faka-Tohi Tapu kavi ke he 600 e vagahau. Ha ha mooli ia tautolu e magaaho mitaki lahi ke fakakite e nakai fakamailoga tagata!

18. Ka manamanatu a koe ke he mukamuka ke o atu ki ai mo e nakai fakamailoga tagata ha Iehova, kua lata a koe ke manako ke taute e heigoa?

¹⁸ Ka manamanatu fakalahi atu a tautolu ke he mukamuka ke o atu ki ai mo e nakai fakamailoga tagata ha Iehova, kua lahi atu e uho he tau mahani nei ki a tautolu. Ko e fua, kua lata ia tautolu ke manako ke fifitaki a Iehova ti fakakite e tau mahani nei ke he puhala ne fehagai a tautolu mo e tau matakainaga ha tautolu mo lautolu ne feleveia he gahua fakamatala.