Gahua Lahi​—Ko e Aga Tuai Kia?

Tuga ni he tuaga ha Alex, tokologa e tagata he vahā nei kua nakai fiafia ke gahua lahi. “Tokologa kua nakai loto ke taute e tau gahua kua ‘fakateaga’ ki a lautolu,” he talahau he makeniki ko Aaron. “Ko e aga ha lautolu anei: ‘To tiaki au e gahua nei ka moua e mena kua mua e mitaki.’”

Ko e ha ne logona hifo e tokologa kua nakai loto ke gahua lahi? Liga kua fakaohooho a lautolu he puhala fakapuloa tala, ne fa fakakite e moui “mooli” ko e moui muhukoloa mo e okioki. “Manatu he tau tagata ka lahi e gahua haau, kua fakateaga e moui haau,” he talahau e Matthew, ko e tagata gahua leveki. Ko e tagata fakameā fale ko Shane ne mailoga foki e aga pihia. Ne pehē a ia: “Ko e gahua he aho katoa ke moua e totogi kua lata, ko e aga kua galo mogonei.”

Ke he taha faahi, tokologa e tagata kua kautū ne fiafia ke gahua lahi. “Manatu au kua lahi e palepale he gahua malolō, mua atu ka tutuli ke he tau foliaga aoga,” he talahau he tagata ta fale lahi ko Daniel, ne 25 e tau he moui. Pihia foki e manatu ha Andre, ne 23 e tau. “Talitonu au kua matutaki e fiafia mo e olioli ke he gahua,” he ui e ia. “Ko e gahua tote kua nakai takitaki ke he fiafia hololoa​—ka e ke he moui mateafu!”

Feaki fēfē he tau tagata tuga a Daniel mo Andre e onoonoaga mitaki ke he gahua lahi? Ha kua fakagahua e laua e tau matapatu fakaakoaga he Tohi Tapu he tau momoui ha laua. Fakaohooho he Tohi Tapu e aga fakamakamaka mo e fakauka ka e nakai ke fakatevateva. Ka e nakai ni talahau he Tohi Tapu ki a tautolu ke gahua. Fakakite foki ki a tautolu e puhala ke gahua mo e fiafia.

Ko e heigoa e tau matapatu fakaakoaga he Tohi Tapu ka lagomatai a koe ke fiafia ke he gahua haau? Kua uiina e mautolu a koe ke manamanatu ke he falu he tau mena ia, to fakamaama ai he vala tala ka mui mai.