Holo ni e moui haaku he kelea ke he mua atu e kelea

MOUI HAAKU KUA MOLE:

Ne tupu hake au i Los Angeles, California, U.S.A., he tau matakavi kehekehe ne talahaua e kelea ha ko e tau kege mo e fakaaoga e tau vai kona. Ne ono e tama he tau matua haaku, ko au ke uaaki.

Ne feaki he matua fifine haaku a mautolu he lotu evagelia. Pete ia, he fuata mui, ne moui faahi ua au. He tau Aho Tapu ne uhu lologo au mo e matakau lologo he lotu. Ko e tau aho ne toe he faahi tapu, ne loto ni au ke patī, kai tulaki, mo e mahani feuaki.

Ne mafiti au ke ita mo e vale. Ka latau, to fakaaoga e au ha mena mo kanavaakau ke kautū ka tau. Ko e mena ne fakaako e au he lotu ne nakai lagomatai. Fa pehē au fakamua, “Ko e Iki ke taui atu​—ti ko au ko e pelu haana!” He fano au ke he aoga tokoluga he matahiku he tau atu tau 1960, ne fakaohooho au he Black Panthers, ko e matakau politika, ne kua iloa lahi ai he ha lautolu a tau puhala latau ke he tau matakupu he tau tonuhia he tagata. Ne fakalataha atu au ke he matakau he aoga ne tumauokafua ma e tau tonuhia he tau tagata. Loga e magaaho ne taute e mautolu e tau totokoaga, ti pa fakaku e aoga ka pihia.

Kua nakai fakamakona he totokoaga ia e aga vale haaku. Ti kamata au ke mahani kolokolovao ha ko e vihiatia ke he falu. Ma e fakatai, falu magaaho ne kitekite au mo e tau kapitiga haaku ke he tau kifaga ne fakakite e matematekelea he tau tupa Aferika he vahā fakamua i Amerika. Ne ita lahi a mautolu ke he tau nakai fakafili tonu ia, ti keli e mautolu e tau fuata palagi i loto he fale kifaga ia. Ti ō a mautolu ke he tau matakavi he tau tagata palagi, ke kumi falu tagata foki ke keli.

He teitei au ke 20 e tau he moui, ko au mo e tau lafu haaku ne mahani mau ko e tau tagata kolokolovao mo e vale. Ne taufetului tumau a mautolu mo e tau leoleo. Ko e taha he tau tehina haaku ne fakalataha ke he kege ne talahaua e kelea, ti lafi foki au mo lautolu. Holo ni e moui haaku he kelea ke he mua atu e kelea.

PUHALA NE HIKI HE TOHI TAPU E MOUI HAAKU:

Ko e tau matua he taha kapitiga haaku ko e Tau Fakamoli a Iehova. Ne uiina e lautolu au ke he tau feleveiaaga he fakapotopotoaga ha lautolu, ti talia ai e au. Mai ni he feleveiaaga fakamua, ne kitia e au kua kehe lahi e Tau Fakamoli. Fai Tohi Tapu e tau tagata oti, ti fakaaoga ai e lautolu he feleveiaaga. Ko e tau fuata foki ne taute e tau lauga i ai! Ne fiafia au he iloa e higoa he Atua, ko Iehova, mo e ke logona ai he fakaaoga. (Salamo 83:18) Ha he fakapotopotoaga e tau tagata tokologa mai he tau motu kehekehe, ka e nakai vihiatia e taha ke he taha ha ko e tupumaiaga.

He fakamua, ne nakai manako au ke fakaako e Tohi Tapu mo e Tau Fakamoli, ka e fiafia au ke fano ke he tau feleveiaaga ha lautolu. Taha pō, he ha hā au he feleveiaaga mo e Tau Fakamoli, ko e matakau he tau kapitiga haaku ne ō ke he konesete. Ne keli e lautolu e taha fuata mui i ai ti mate ha kua nakai foaki age e ia e peleue leta haana. Ko e aho hake, ne palau a lautolu he tamate e fuata ia. Ne fekī foki a lautolu ke he mena kelea ne taute he tutū he fakafiliaga. Laulahi ia lautolu ne fakahala he tuku ke he fale puipui he moui katoa ha lautolu. Maaliali ai, ne fiafia lahi au he nakai ō mo lautolu he pō ia. Ne fifili au ke hiki e moui haaku mo e kamata ke fakaako e Tohi Tapu.

He kitia tumau e au he mogo fakamua e vihiatia lahi he vahaloto he tau lanu tagata, kua ofo lahi au he tau mena ne kitia e au he Tau Fakamoli. Ma e fakatai, he magaaho ne lata e taha Fakamoli palagi ke fenoga atu ke he taha motu, ne toka e ia e haana a fanau ke he levekiaga he magafaoa uli. Pihia foki, ko e magafaoa palagi ne talia ke leveki e fuata uli ne kumi mena ke nofo ai. Ti mauokafua fakahaga au kua felauaki tonu e Tau Fakamoli a Iehova mo e tau kupu ha Iesu ne fakamau ia Ioane 13:35: “Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” Iloa e au kua moua tuai e au e tau matakainaga mooli.

Ha ko e fakaako he Tohi Tapu, ne kamata au ke mailoga kua lata au ke hiki e puhala manamanatu haaku. Ne lata au ke fakafoou e loto haaku ke nakai ni fakatumau e mafola ka e ke mailoga foki ko e puhala anei ne mua atu e mitaki ke moui. (Roma 12:2) Ne holo ki mua fakatekiteki au. Ia Ianuari 1974, ne papatiso au ko e taha he Tau Fakamoli a Iehova.

Pete ne papatiso au, ne lata agaia au ke tautaofi e ita haaku. Ma e fakatai, he taha magaaho he fakamatala mai he taha fale ke he taha fale he fekafekauaga faka-Kerisiano, ne tutuli e au e tagata ne kaihā e letiō he motoka haaku. He tata au ki a ia, ne fakatoka e ia e letiō ti hola. He magaaho ne fakamaama e au ke he falu ne gahua mo au e puhala ne liu moua e letiō haaku, ko e motua he matakau ne hūhū ki a au, “Stephen, ko e heigoa haau ka taute kaeke moua e koe a ia?” Ne manamanatu lahi au ke he hūhū ia ti omoomoi au ke eketaha ke aga mafola tumau.

Ia Oketopa 1974, ne kamata au ke gahua mau, he fakaaoga 100 e tulā he tau mahina takitaha ke fakaako e Tohi Tapu ke he falu. Fai magaaho he mole, ne moua e au e kotofaaga uho ke gahua foaki noa he matapatu ofisa he lalolagi katoa he Tau Fakamoli a Iehova i Brooklyn, New York. He 1978, ne liu au ki Los Angeles ke leveki e matua fifine haaku ne gagao. Ua e tau he mole, ne mau e au e tokoua fakahele haaku, ko Aarhonda. Ko e lagomatai lahi a ia ki a au he leveki e maua e matua fifine haaku to mate a ia. Fai magaaho, ne o atu a maua, ko au mo Aarhonda ke he Aoga Tohi Tapu a Kiliata he Kolo Toko ti kotofa a maua ki Panama, kua matutaki ni a maua ke he gahua misionare i ai.

Tali mai he papatisoaga haaku, ne fehagai au mo e tau tuaga loga ka liga fakatupu e ita lahi. Ne fakamahani au ke fano kehe mai he tau tagata ne lali ke fakaita au po ke kumi e au e falu puhala ke fakatotoka aki e tuaga. Tokologa e tagata, putoia foki e hoana haaku, ne navanava ki a au ha ko e puhala ne fehagai au mo e tau tuaga nei. Ne ofo foki ni au ia au! Kua nakai fakahakehake ni au ma e tau hikiaga nei ke he tau aga haaku. Ka e talitonu au ko e fakamooliaga anei ke he malolō he Tohi Tapu ke hiki e moui.​—Heperu 4:12.

PUHALA NE AOGA KI A AU:

Kua foaki mai he Tohi Tapu e kakano ke he moui haaku mo e fakaako au ke aga mafola mooli. Nakai liu au keli tagata, ka e lagomatai e au a lautolu ke malolō fakaagaaga. Ne fakaako foki e au e Tohi Tapu mo e taha matafī fakamua haaku he aoga tokoluga! He mole e papatisoaga haana, fai magaaho ne nonofo e maua he taha e poko. Ko e tau kapitiga tata a maua ke hoko mai ke he aho nei. Ke hoko mai ke he mogonei, ne lagomatai e au mo e hoana haaku molea e 80 e tagata ke eke mo Tau Fakamoli a Iehova he fakaako e Tohi Tapu mo lautolu.

Kua loto fakaaue lahi mahaki au ki a Iehova he foaki mai e moui ne fai kakano mooli mo e fiafia he kaufakalataha mo e tau matakainaga mooli.