TAU VALA TALA I MUA | MOUI HE MOLE E MATE—MAEKE NAKAI?
Ko e Heigoa kua Tupu ka Mate e Tagata?
“Manatu au ha i ai tolu e matakavi ka fano ki ai e tagata ka mate: lagi, hell, po ke pulekatolia.a Iloa e au nakai mitaki lahi au ke hake ke he lagi po ke kelea lahi ke hifo ke he hell. Ka e nakai maama mitaki au hagaao ke he pulekatolia. Nakai kitia e au ha tala pihia he Tohi Tapu. Ko e tau tala ni he tau tagata a ia.”—Lionel.
“Ne fakaako mai ki a au na ō oti e tau tagata ne mamate ke he lagi, ka e nakai talitonu au ki ai. Manatu ni au ko e mate ko e fakahikuaga he tau mena oti—ti nakai fai amaamanakiaga ma lautolu ne mamate.”—Fernando.
Manamanatu nakai a koe: ‘Ko e heigoa kua tupu mooli ka mate e tagata? Kua matematekelea kia e tau fakahelehele ha tautolu ne mamate he taha matakavi? To liu nakai a tautolu ke kitia a lautolu ia? Maeke fēfē ia tautolu ke iloa mooli?’ Fakamolemole, manamanatu ke he tau fakaakoaga mooli he Tohi Tapu. Fakamua, kia kumikumi a tautolu ke he talahauaga he Tohi Tapu ke he tuaga he mate. Ti fakatutala foki a tautolu ke he amaamanakiaga mai he Kupu he Atua,ko e Tohi Tapu.
Ko e heigoa e tuaga he tau tagata mamate?
TALI HE TOHI TAPU: “Ha ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena, to nakai tuai fai taui a lautolu; ha kua nimo ni a lautolu. Ko e tau mena oti kua iloa he tau lima hāu ke eke, kia eke a mo e hāu a malolo; ha kua nakai fai gahua, po ke manamanatu, po ke mena kua iloa, po ke iloilo ke he tukuaga, kua fina atu ki ai a koe.”b—Fakamatalaaga 9:5, 10.
Ko e Tukuaga, ko e matakavi ne tuku ai e tau tagata ka mamate, ko e matakavi po ke tuaga ia kua nakai gahuahua e manamanatuaga po ke ha mena foki. Fēfē e onoonoaga he tagata tua fakamooli ko Iopu ke he Tukuaga? Ne galo oti e ia e tau koloa mo e tau fanau haana he taha e aho, ti lauia a ia he gagao fufula kelea mo e mamahi lahi mahaki ke he tino katoa haana. Ne olelalo a ia ke he Atua: “Ane fufu e koe au i Seoli, [“hell po ke luo,” Catholic Douay Version] mo e fakagalo ai e koe au.” (Iopu 1:13-19; 2:7; 14:13) Maaliali ai, ne nakai maama e Iopu e Tukuaga ko e matakavi velagia, ka au atu ai e matematekelea haana. Ka e manatu a ia ko e matakavi ke okioki.
Fai puhala foki ke fakaako hagaao ke he tuaga ha lautolu ne mamate. Maeke ia tautolu ke kumikumi ke he tau fakamauaga he Tohi Tapu, hagaao ke he toko valu e tagata ne liliu mai he mate.—Kikite e puha “Valu e Liu Tu Mai ne Fakamaama i Loto he Tohi Tapu.”
Nakai fai ia lautolu toko valu ia ne tutala hagaao ke he matakavi he mafola mooli po ke fakakikiveka. Kaeke o atu e tau tagata ia ke he matakavi pihia he magaaho ne mamate a lautolu, to tala age nakai e lautolu ke he tau tagata hagaao ki ai? To fakamau nakai e tau tala pihia he Tohi Tapu ma e tau tagata oti ke iloa? Nakai fai tala pihia ne fakamau he Tohi Tapu. Maaliali ai, ko e tau tagata toko valu ia ne nakai fai tala hagaao ke he manatu ia. Ko e ha? Ha kua nakai gahuahua e manamanatuaga ha lautolu, tuga kua mohe pulumohea. Mooli ai, falu magaaho ne fakaaoga he Tohi Tapu e mohe ko e fakataiaga ke fakamaama e mate. Ma e fakatai, ko e tau tagata tua fakamooli ko Tavita mo Setefano ne “mohe” he mate.—Gahua 7:60; 13:36.
Ti ko e heigoa e amaamanakiaga ma lautolu ne mamate? Maeke nakai a lautolu ke aala mai he mohe nei?
a Ko e taofiaga nei, to fai magaaho ke fakamatematekelea e tau agaaga he tau tagata, ke fakameā e tau agahala ha lautolu to fakaatā ke huhū atu ke he lagi.
b I loto he New World Translation of the Holy Scriptures, ko e kupu Heperu “Seoli” mo e kupu Heleni “Hate” kua hagaao ke he “Tukuaga.” Falu Tohi Tapu ne fakaaoga e kupu luo po ke “hell,” ka ko e taofiaga ke he matakavi fakakikiveka he tau tagata mamate kua nakai mai he Tohi Tapu.