TAU VALA TALA I MUA | KO HAI E TAU FAKAMOLI A IEHOVA?
Fakatupe Fēfē e Gahua Fakamatala ha Mautolu?
He tau tau takitaha ne lolomi mo e tufatufa e mautolu totou teau miliona e tau Tohi Tapu mo e tau tohi faka-Tohi Tapu. Talaga e mautolu ti fakaaoga e tau la ofisa mo e tau fale lolomi tohi he lalolagi katoa. Totou hogofulu afe e tau fakapotopotoaga ne feleveia he tau fale tapuaki kua latatonu mo e maopoopo ne fakahigoa ko e Tau Fale he Kautu. Ko hai ne totogi e tau mena oti nei?
Kua lalago katoatoa ni e gahua ha mautolu mai he tau tupe foaki fakaalofa. (2 Korinito 9:7) He 1879, ko e fufuta ke uaaki he mekasini nei ne pehē: “Ne talitonu a mautolu kua lalago e IEHOVA e ‘Zion’s Watch Tower,’ [higoa he mekasini nei he magahala ia] ko e mena ia to nakai fakaai a mautolu ke kaiole tupe ke he tau tagata ma e lagomatai.” Ti nakai fai hikiaga a mautolu mai he fakavēaga ia.
Ko e tau tupe foaki fakaalofa kua ta atu fakahako ke he taha he tau la ofisa ha mautolu po ke tuku he tau puha foaki fakaalofa i loto he tau Fale he Kautu. Nakai tuku e mautolu e mena ke hogofuluaki, oko tupe, po ke totogi e tau matagahua po ke tau tohi ha mautolu. Nakai totogi a mautolu ke fakamatala, ke fakaako he fakapotopotoaga, po ke lagomatai ke talaga e tau fale tapuaki. Na pehē a Iesu: “Kua moua noa e mutolu, kia foaki noa atu e mutolu.” (Mataio 10:8) Ko lautolu oti ne fekafekau he tau la ofisa mo e matapatu ofisa ha mautolu, putoia e Kau Fakatufono he Tau Fakamoli a Iehova, ko e tau tagata gahua foaki noa nakai totogi.
“Tuga ni e tau gahua oti he Tau Fakamoli a Iehova, ko e tau tupe he lotu na moua mai he tau tupe foaki fakaalofa, igatia e tagata mo e fifili ko e fiha mo e lagafiha e tuku ‘he tau tupe foaki fakaalofa’ ma e gahua fakalotu haana.”—European Court of Human Rights, 2011
Fakaaoga foki e tau tupe foaki fakaalofa ma e tau matematekelea fakaofo. Ne fiafia e tau Kerisiano he vahā fakamua ke foaki e tau koloa ma lautolu ne matematekelea. (Roma 15:26) Ti lagomatai foki e mautolu a lautolu kua matematekelea, he liu talaga e tau kaina mo e tau fale tapuaki, foaki e tau mena kai, tau mena tui, mo e levekiaga fakaekekafo.