TAU HŪHŪ TOHI TAPU KUA TALI
Ko e ha ne fai perofetaaga he Tohi Tapu?
Ko e ha ne fakamaama he Tohi Tapu e tau mena tutupu he magaaho ha tautolu?—Luka 21:10, 11.
Loga e tau perofetaaga ne tohi fakamatafeiga i loto he Tohi Tapu. Ai fai tagata ne maeke ke talahau tuai fakamatafeiga pihia e vahā anoiha. Ti ko e fakamooliaga he tau perofetaaga he Tohi Tapu ne foaki e fakakiteaga mauokafua ko e Tohi Tapu ko e Kupu he Atua.—Totou Iosua 23:14; 2 Peteru 1:20, 21.
Ko e tau perofetaaga he Tohi Tapu ne fitā e fakamooli kua foaki mai ki a tautolu e fakavēaga mauokafua ke tua ke he Atua. (Heperu 11:1) Foaki mai foki ki a tautolu e mauokafua to fakamooli e tau maveheaga he Atua ma e vahā anoiha kua mua e mitaki. Ti foaki mai he Tohi Tapu e amaamanakiaga mooli—Totou Salamo 37:29; Roma 15:4.
Lagomatai fēfē he tau perofetaaga he Tohi Tapu a tautolu?
Ne hataki he falu perofetaaga e tau fekafekau he Atua ke taute taha mena. Ma e fakatai, mogo ne kitia he tau Kerisiano he senetenari fakamua e falu perofetaaga kua fakamooli, ne toka e lautolu a Ierusalema. Fakamui, ne malona e maaga ha kua tokologa e tagata ne tiaki a Iesu ka kua mamao ligo e tau Kerisiano ne haia he matakavi haohao mitaki.—Totou Luka 21:20-22.
He vahā nei, ko e tau perofetaaga ne fitā e fakamooli kua fakakite to nakai leva ti fakaotioti he Kautu he Atua e tau kautu mo e tau fakatufono he tagata. (Tanielu 2:44; Luka 21:31) Ti kua uho lahi mahaki ke igatia e tagata mo e eketaha mogonei ke moua e taliaaga he Patuiki ko Iesu Keriso, ko ia ne kotofa he Atua.—Totou Luka 21:34-36.