Manako Oti a Tautolu ke Moua e Fakamafanaaga

Manatu nakai e koe e magaaho ne veli a koe he vahā tote? Liga mahele e lima haau po ke mavakuvaku e matatuli. Manatu nakai e koe e puhala ne fakamafanatia he matua fifine haau a koe? Liga fakameā e ia e matamotu ti pipi. Ne tagi a koe, ka e nakai leva ti kua mafanatia he tau kupu fakaalofa haana mo e kuku mai e ia a koe ti oti e tagi haau. He magahala ia he moui haau, ne fai fakamafanaaga tumau.

Ka e uka fakahaga e moui he lalahi hake a tautolu. Ne lalahi e tau lekua ti uka ke moua e fakamafanaaga. Ti momoko ke talahau, ko e tau lekua he tau tagata lalahi kua lavea ke mitaki ka pipi mo e kuku mai he matua fifine. Manamanatu la ke he falu tuaga.

• Kua lauia nakai a koe mo e fakaatukehe he fakaoti mai mo e gahua haau? Pehē a Julian, he magaaho ne fakaoti mai a ia he gahua, ne ofo lahi a ia mo e fakaatukehe. Ne manamanatu a ia ‘To leveki fēfē e au e magafaoa haaku? Ko e ha ne manatu e kamupanī kua nakai aoga au ka e leva pihia e gahua au i ai?’

• Liga kua logona e koe e mamahi lahi he mavehevehe e fakamauaga haau. “He toka he taane haaku au he 18 e mahina kua mole, ne logona e au e fakaatukehe. Ne tuga kua vevehe ua e loto haaku,” he fakamaama e Raquel. “Ne mamahi e tino mo e manamanatuaga. Ti matakutaku au.”

• Liga fai gagao kelea lahi ne lauia a koe ti tuga kua uka ke malolō. Liga fai magaaho a koe ne logona hifo tuga e tupuna ko Iopu, ne tagi: “Kua fakavihia e au ke he haku a moui, nakai fia moui mau au.” (Iopu 7:16) Liga tatai e tau logonaaga haau mo Luis, ko e tagata taane kua 80 tumā, ne talahau, “He falu magaaho ne logona hifo e au kua fakatali ni au ke mate.”

• Po ke liga ko e mate he fakahele haau, ti manako lahi a koe ke fai fakamafanaaga. “Magaaho ne mate e tama taane haaku he pakia kelea lahi he tō e vakalele, ko e logonaaga fakamua haaku, nakai mooli e mena nei,” he fakamaama e Robert. “Ti lauia he mamahi, ko e mamahi ne fakamaama he Tohi Tapu ne tuga kua hokaia e loto haau he pelu loa.”​—Luka 2:35.

Ne moua mooli e Robert, Luis, Raquel mo Julian e fakamafanaaga, pete he lauia he tau tutūaga fakaatukehe ia. Logona e lautolu ko Ia ne mua ue atu ke foaki e fakamafanaaga​—ko e Atua Malolō Ue Atu hokoia ni. Foaki fēfē e ia e fakamafanaaga? To foaki mai foki nakai e ia e fakamafanaaga ke lata mo koe?