“A Mutolu, Neke Lautaki e Taha a Mutolu”!

1. Hagaao ke he Kolose 2:4, 8, lali fēfē a Satani ke lautaki e tau manatu ha tautolu?

MANAKO a Satani ki a tautolu ke totoko ki a Iehova. Ke moua e foliaga ha Satani, lali a ia ke fakaohooho e puhala manamanatu ha tautolu he lautaki ai ke he puhala haana mo e omaoma ki a ia. Lali a ia ke omoomoi po ke fakahehē a tautolu ke mumui ki a ia he fakaaoga e tau mena ne futiaki ke he tau manako ha tautolu.​—Totou Kolose 2:4, 8.

2-3. (a) Ko e ha kua lata a tautolu ke mataala ke he hatakiaga ne fakamau he Kolose 2:8? (e) Ko e heigoa ha tautolu ka fakatutala he vala tala nei?

² Hagahaga kelea lahi mooli kia a tautolu neke fakahehē e Satani? Ē, pihia mooli! Manatu, nakai tohi e Paulo e hatakiaga ne fakamau he Kolose 2:8 ke he tau tagata ne nakai tua. Tohi e ia ke he tau Kerisiano ne fakauku he agaaga tapu. (Kolo. 1:2, 5) Hagahaga kelea e tau Kerisiano he vahā ia, ti mua atu e hagahaga kelea ha tautolu mogonei. (1 Kori. 10:12) Ko e ha? Kua līlī a Satani ke he lalolagi nei, ti hagaaki a ia ke fakahehē e tau fekafekau fakamooli he Atua. (Fakakite. 12:9, 12, 17) Lafi ki ai, kua nonofo a tautolu he vahā ne “au atu he kelea” e tau tagata mahani kelea mo e tau tagata fakavai.​—2 Timo. 3:1, 13.

³ He vala tala nei, to fakatutala a tautolu ke he puhala ne fakaaoga e Satani e “pulotu nakai aoga” ke lali ke fakaohooho e tau manamanatuaga ha tautolu. To onoono a tautolu ke he tolu e “lagatau” haana. (Efeso 6:11) Ti ko e vala tala ka mui mai, to fakatutala a tautolu ke he puhala ka fehagai ke he tau lagatau kelea ne liga ha ha he tau manamanatuaga ha tautolu. Ka e fakamua, kia fakatutala a tautolu ke he mena ka fakaako mai he puhala ne fakahehē e Satani e tau Isaraela he mole e huhū atu ha lautolu ke he Motu he Maveheaga.

KAMATAMATA KE TAPUAKI KE HE TAU ATUA FAKAVAI

4-6. Hagaao ke he Teutaronome 11:10-15, ko e heigoa e hikiaga he tau puhala gahua fonua ne lata he tau Isaraela ke fakaako he mogo ne hoko atu a lautolu ke he Motu he Maveheaga?

⁴ Halahū e puhala ne kamatamata e Satani e tau Isaraela ke tapuaki ke he tau atua fakavai. Taute fēfē e ia? Fakaaoga e ia e tau manako pauaki ha lautolu ke moua aki e tau mena kai. Magaaho ne huhū atu e tau Isaraela ke he Motu he Maveheaga, lata a lautolu ke iloa e tau puhala foou ke tō aki e tau mena kai. He haia i Aikupito, ne fakamalū he tau Isaraela e tau fonua he fakaaoga e vai ne tafe mai he Vailele Naila. Ka ko e puhala gahua fonua he Motu he Maveheaga ne nakai fakavē ke he vai ne tafe mai he vailele lahi mahaki, ka ko e vai ne moua mai he uha mo e hahau ne fakamalū aki e tau lakau kai. (Totou Teutaronome 11:10-15; Isaia 18:4, 5) Ko e mena ia, lata e tau Isaraela ke fakaako e tau puhala foou he gahua fonua. To nakai mukamuka e mena ia ha kua laulahi ia lautolu ne iloa e puhala gahua fonua kua mamate he tutakale.

⁵ Fakamaama e Iehova ke he tau tagata haana kua hiki tuai e tau tutūaga ha lautolu. Ti talahau foki e ia e hatakiaga ne mui mai ne tuga kua nakai felauaki mo e matakupu he gahua fonua: “A mutolu, neke fakavai ha mutolu a tau loto, ke o kehe ai mo e fekafekau ai a mutolu ke he tau atua kehe mo e fakaveveli fakafohifo ai kia lautolu.” (Teu. 11:16, 17) Ko e ha ne hataki e Iehova ke nakai tapuaki ke he tau atua fakavai ka e magaaho taha, fakaako e tau puhala foou he gahua fonua?

⁶ Iloa e Iehova to kamatamata e tau Isaraela ke fakaako falu puhala gahua fonua he matakavi mai he tau tagata pouliuli ne viko takai ia lautolu. Ko e tau katofia ha lautolu ne lotomatala lahi he gahua fonua ti maeke he tau Isaraela ke fakaako mai e falu puhala aoga ia lautolu, ka e ha ha i ai e hagahaga kelea. Ko e tau manamanatuaga he tau tagata gahua fonua Kanana ne putoia e taofiaga ki a Paala. Onoono a lautolu ki a Paala ko e pule he lagi mo e ko e foaki he uha. Nakai manako a Iehova ke he tau tagata haana ke fakahehē he tau taofiaga fakavai pihia. Ka kua lagaloga e fifili he tau Isaraela ke tapuaki ki a Paala. (Nume. 25:3, 5; Fakafili 2:13; 1 Patu. 18:18) Mailoga mogonei e puhala ne maeke a Satani ke lautaki e tau Isaraela.

TOLU E LAGATAU NE FAKAAOGA E SATANI KE LAUTAKI E TAU ISARAELA

7. Ko e heigoa e kamatamata he tua ne fehagai e tau Isaraela ki ai he mogo ne huhū atu ke he Motu he Maveheaga?

⁷ Ko e lagatau fakamua ha Satani ne fakaaoga ko e futiaki ke he manako pauaki ke kitia e fonua kua malū he uha. Nakai lahi e uha he Motu he Maveheaga he matahiku ia Aperila ki a Sepetema he tau tau takitaha. Ko e moui mo e monuina ne fakavē ke he uha ne fa kamata ke tō kavi ia Oketopa. Fakahehē e Satani e tau Isaraela ke talitonu ke moua e monuina, kua lata a lautolu ke muitua e tau mahani he tau katofia pouliuli ha lautolu. Talitonu e tau katofia ia ko e tau matagahua pauaki ne lata ke taute ke fiafia e tau atua ha lautolu ti fakatō e uha. Ko lautolu ne nakai tua ki a Iehova ne talitonu ko e puhala ni anei ke ua leva e vahā laā, ti taute e lautolu e tau matagahua pouliuli ke fakaheke e atua fakavai ko Paala.

8. Ko e heigoa e lagatau ke uaaki ne fakaaoga e Satani? Fakamaama.

⁸ Fakaaoga e Satani e lagatau ke uaaki ke he tau Isaraela. Ko e futiaki ke he tau manako feuaki. Ko e tau motu pouliuli ne tapuaki ke he tau atua ha lautolu he taute e tau mahani fakalialia. Ko e puhala fakateteki nei he tapuakiaga he tau fifine mo e tau tagata taane ne taute e mahani fakataka he faituga. Ne fakaatā e mahani fakasotoma mo e falu mahani feuaki ti eke foki mo aga pauaki! (Teu. 23:17, 18; 1 Patu. 14:24) Talitonu a lautolu ne pouliuli ko e tau matagahua nei ne omoomoi e tau atua ha lautolu ke fakatalumelie e kelekele. Tokologa e Isaraela ne futiaki he tau matagahua feuaki he tau tagata pouliuli ti fakaatā a lautolu ke fifili ke fekafekau ke he tau atua fakavai. Ka ko e mena mooli, kua lautaki e Satani a lautolu.

9. Ia Hosea 2:16, 17, fakapulefu fēfē e Satani e onoonoaga he tau Isaraela ki a Iehova?

⁹ Fakaaoga e Satani e lagatau ke toluaki. Ko e fakapulefu e onoonoaga he tau Isaraela ki a Iehova. He vahā he perofeta ko Ieremia, fakailoa e Iehova kua taute he tau perofeta pikopiko e tau tagata Haana ke nimo e higoa Haana “ha ko Paala.” (Iere. 23:27) Ti nakai fakaaoga he tau tagata he Atua e higoa ha Iehova ka e hukui aki e higoa ha Paala. Kua fakapulefu he matagahua nei e kehekehe ha Iehova mo Paala he tau loto he tau Isaraela, he fakamukamuka a lautolu ke fio e tau matagahua he tapuakiaga ha Paala mo e tapuakiaga ha Iehova.​—Totou Hosea 2:16, 17.

TAU LAGATAU A SATANI MOGONEI

10. Ko e heigoa e tau lagatau ne fakaaoga e Satani mogonei?

¹⁰ Fakaaoga foki e Satani e tau lagatau ia mogonei. Ne moua e ia e tau tagata he futiaki ke he tau manako pauaki, fakaohooho e mahani feuaki, mo e fakapulefu e onoonoaga he tau tagata ki a Iehova. Kia fakatutala fakamua la tautolu ke he lagatau fakahiku ia.

11. Fakapulefu fēfē e Satani e onoonoaga he tau tagata ki a Iehova?

¹¹ Fakapulefu e Satani e onoonoaga he tau tagata ki a Iehova. He mole e mamate he tau aposetolo ha Iesu, falu ne totoku ko e tau Kerisiano ne kamata ke fakaholofa e tau fakaakoaga fakavai. (Gahua 20:29, 30; 2 Tesa. 2:3) Ko e tau tagata tiaki taofiaga nei ne kamata ke fakapulefu e matahigoa he Atua mooli tokotaha. Ma e fakatai, ne nakai liu a lautolu ke fakaaoga e higoa he Atua he tau Tohi Tapu ha lautolu ka e fakaaoga e matahigoa “Iki.” He utakehe e higoa he Atua mo e hukui aki e “Iki,” ne taute e lautolu ke uka e tagata ne totou e Tohi Tapu ke kitia e kehe ha Iehova mai he falu “iki” i loto he tau Tohiaga Tapu. (1 Kori. 8:5) Fakaaoga foki e lautolu e matahigoa “Iki” ke lata mo Iehova mo Iesu, ati uka ai ke maama e kehekehe ha Iehova mo e Tama haana mo e kua nakai tatai foki e tau matagahua. (Ioane 17:3) Ko e fakahehē nei kua lafi ke he kamataaga he fakaakoaga ke he Tolu Taha ne nakai fakaako mai he Kupu he Atua. Ti ko e fua, tokologa ne kitia e Atua ko e mena galo ti talitonu kua nakai maeke a tautolu ke iloa a ia. Ko e pikopiko kelea lahi!​—Gahua 17:27.

12. Ko e heigoa kua fakalagalaga he lotu fakavai, ti ko e heigoa e fua ne fakamaama ia Roma 1:28-31?

¹² Futiaki a Satani ke he tau manako feuaki. He vahā ha Isaraela i tuai, fakaaoga e Satani e lotu fakavai ke fakalagalaga e mahani feuaki. Taute pihia foki e ia mogonei. Fakaatā mo e fakalagalaga foki he lotu fakavai e mahani feuaki. Ko e mena ia, tokologa ne totoku ke fekafekau ke he Atua ne tiaki e tau tuaga maaliali Haana he mahani. Fakamaama he aposetolo ko Paulo he tohi haana ke he tau Roma e fua ne tupu mai ai. (Totou Roma 1:28-31.) Ha ha i ai ke he “tau mena kua nakai lata” e tau puhala oti he mahani feuaki, putoia e mahani fakasotoma. (Roma 1:24-27, 32; Fakakite. 2:20) Aoga mooli ki a tautolu ke pipiki mau ke he tau fakaakoaga maaliali he Tohi Tapu!

13. Ko e heigoa taha lagatau ne fakaaoga e Satani?

¹³ Futiaki a Satani ke he tau manako pauaki. Ko e manako pauaki ha tautolu ke fakaako ke iloa e tau puhala ke moua e iloaaga ke leveki aki a tautolu mo e tau magafaoa ha tautolu. (1 Timo. 5:8) Fa mahani ke iloa e tautolu e tau puhala ia he ō he aoga mo e fakaako fakalahi. Ka e lata a tautolu ke mataala. Ko e tau puhala fakaakoaga he tau motu loga kua nakai ni fakaako e tau fanau ke he lotomatala kua aoga ka e pihia foki ke he pulotu he tagata. Ko e tau fanau aoga ne fakaohooho ke talitonu kua nakai fai Atua mo e ke tiaki e Tohi Tapu. Tala age ki a lautolu ko e fakaakoaga he tupumainoa ko e fakamaamaaga iloilo hokoia ma e kamataaga he moui. (Roma 1:21-23) Ko e tau fakaakoaga pihia kua totoko ke he “iloilo he Atua.”​—1 Kori. 1:19-21; 3:18-20.

14. Ko e heigoa ne feaki he pulotu he tagata?

¹⁴ Ko e pulotu he tagata kua fakaheu po ke totoko e tau tutūaga tututonu ha Iehova. Nakai feaki ai e fua he agaaga he Atua, ka ko e “tau gahua he tino.” (Kala. 5:19-23) Kua fakaohooho e fakatokoluga mo e fakaikaluga, ti ko e fua kua maeke ke “ofaofa he tau tagata a lautolu ni.” (2 Timo. 3:2-4) Ko e tau mahani nei kua nakai tatai ke he mahani molū mo e mahani fakatokolalo ne omoomoi e tau fekafekau he Atua ke moua. (2 Samu. 22:28) Falu Kerisiano ne tutuli e fakaakoaga univesitī ne hikihiki e tau manamanatuaga ha lautolu ke he manatu he tagata ka e nakai ke he manatu he Atua. Kia fakatutala a tautolu ke he taha e fakataiaga ke he mena ka tupu.

15-16. Ko e heigoa kua fakaako e koe mai he taha matakainaga fifine lotomatala?

¹⁵ Ko e matakainaga fifine ne fekafekau he gahua mau ke molea 15 e tau, ne pehē: “He eke mo matakainaga papatiso, ne totou mo e logona e au hagaao ke he tau hagahaga kelea he tutuli e fakaakoaga univesitī, ka e nakai fanogonogo au ke he tau hatakiaga ia. Manatu au kua nakai hagaao e fakatonuaga ia ki a au.” Ko e heigoa e tau paleko ne fehagai mo ia? Pehē a ia: “Ko e fakaako ke lata mo e aoga haaku kua lahi e magaaho mo e malolō ati lavelave lahi au ke liogi ki a Iehova tuga ne fa taute e au fakamua, ti mategūgū lahi ke fakatutala mo e falu hagaao ke he Tohi Tapu, ti lolelole lahi ke tauteute fakamitaki ke lata mo e tau feleveiaaga. Fakaaue ai, mailoga e au ko e lahi e fakaakoaga tokoluga kua moumou e fakafetuiaga haaku mo Iehova, ti iloa e au kua lata au ke tiaki ai. Ti taute pihia e au.”

¹⁶ Puhala fe ne fakaohooho he fakaakoaga tokoluga e manatu he matakainaga fifine nei? Tali e ia: “Mā au ke talahau ko e fakaakoaga ne foli au ki ai ne fakaako au ke aga tuhituhi hagaao ke he falu, mua atu ke he tau matakainaga haaku. Ti lahi e mena ne amanaki au mai ia lautolu, mo e vevehe kehe au mai ia lautolu. Leva lahi ato tiaki e au e tau aga nei. He magaaho ia he moui haaku ne fakakite ki a au e hagahaga kelea mooli ke fakaheu e tau hatakiaga ne foaki he ha tautolu a Matua he lagi puhala mai he fakatokatokaaga haana. Iloa mitaki e Iehova au. Ane mai ni fanogonogo au!”

17. (a) Ko e heigoa ha tautolu kua lata ke fifili fakamalolō ke taute? (e) Ko e heigoa ka fakatutala a tautolu ki ai he vala tala ka mui mai?

¹⁷ Kia eketaha ke nakai lautaki he ‘pulotu nakai aoga mo e fakahehe’ he lalolagi ha Satani. Fakatumau ke puipui mai he tau lagatau ha Satani. (1 Kori. 3:18; 2 Kori. 2:11) Ua fakaatā a ia ke fakapulefu e onoonoaga haau ki a Iehova. Moui fakatatau ke he tau tuaga tokoluga ha Iehova he mahani. Ua toka a Satani ke fakahehē a koe ke fakaheu e fakatonuaga ha Iehova. Ka e kua ka mailoga e koe kua fitā a koe he lauia he manamanatu he lalolagi nei? Ko e vala tala ka mui mai to fakakite e puhala ka lagomatai he Kupu he Atua a tautolu ke ulu ai e “tau kolo” malolō he tau manatu mo e tau aga.​—2 Kori. 10:4, 5.