Fakatokaaga he Tau Gahua Fakaagaga Ia Tesemo
1 Na logona hifo e tautolu oti e loto olioli he logona e tau mena mitaki kua fakakatoatoa he fakamatala e fekau he Kautu. (Kikite Tau Fakatai 25:25.) Talahau mai ia Gahua 2:41 he oti e talahauaga fakalagalaga a Peteru he aho Penetekose, “kua lafi ai po ke tolu e afe tagata.” Nakai levaleva mai, kua tupu e numera “ko e lima e afe ka totou.” (Gahua 4:4) Kua fiafia ha ai e tau fakailoaaga ia ke he tau Kerisiano he senetenari fakamua! Kua pihia foki e tali ha tautolu ke he tau fakailoaaga mafanatia he vaha nei. Kua fiafia lahi a tautolu ke logona kua kautu e tau matakainaga ha tautolu he fakamatalaaga he tala mitaki ke he lalolagi.
2 Ko e heigoa la e hokotaki ha tautolu ka fakakite hagaao ke he tau gahua ha tautolu ia Tesemo? Nakai leva to hoko mai e vaha mafana mo e tamai foki ai e magaaho okiokiaga. Ha ko e mena nei kua lata ke tokaloto e lilifu ha tautolu ke he fakamatalaaga he tala mitaki ke fakalataha atu mo e falu. Ha kua katoa tolu e matahiku fahitapu ia Tesemo ato kamata e tau okiokiaga fakalalolagi, ko e ha he kamata tuai e gahua fakamatala hau ka kamata e mahina. Kaeke kua tauteute a koe ke fano kehe he fakapotopotoaga hau, maeke nakai ia koe ke gahua fakalataha mo e fakapotopotoaga ne finatu ki ai ti moua e koe e fiafia he fakamatala ke he fonua kehe? Kia fakatokatoka ke feleveia mo e tau matakainaga hau ke gahua fakalataha ke he mena ka nonofo ai he okiokiaga hau. (Fa mahani e tau matahigoa he Fale Kautu ke moua i loto he tau tohi telefoni.) Pete ni ko e vaha mafana ko e magaaho ka o kehe e tokologa he okiokiaga ‘ke o mamao he tau mena oti,’ he talahau he falu, aua fakateaga e tau gahua fakaagaga he tau fakatokaaga hau he magaaho nei he tau.—Roma 13:14.
3 He taute katoa mo e gahua fiafia ke he fakamatalaaga he puhala pihia ni kua moli ke “fakafiafia e tino,” ko e kakano a ia he “okioki he malolo mo e tau agaga ka oti e gahua mamafa.” Ko e hahau ha ia ke fakamatala e tala mitaki fakalataha atu mo e falu mo e lagomatai a lautolu ke tupu fakaagaga! Ko e foakiaga pihia ka tamai e monuina mo e ati hake e tau agaga ha tautolu.—Gahua 20:35.
4 Pete ni ia, ko e fakalataha he fekafekauaga ko e taha vala ni a ia he hokotaki mitaki. Kua lata e tau tagata fakailoa oti ke manamanatu hifo kua fakalago a lautolu ke tuku tumau fakamafiti e hokotaki he fonua he tau mahina oti. Fakamua ato fano kehe ke tuku e hokotaki hau, po ke uta e fagatohi ne fakaulutohi mo koe ke maeke ia koe ke fakafano fakahako e hokotaki hau ke he tohikupu he hau a fakapotopotoaga kaeke kua mule e fano okioki hau. Ko e makutu ha tautolu ke tuku fakamafiti e tau hokotaki gahua fonua ha tautolu to fakamama e kavega ia lautolu ne leveki e tau malolo fakaagaga ha tautolu.
5 To olioli nakai a tautolu ia Tesemo mai nai? Ko e laliaga ni hau he fekafekauaga mo e makutu hau ke hokotaki e laliaga ia, ka maeke ke moua mai e hokotaki mitaki.