Fakatumau ke Tutuli e Tau Gahua Fakateokarasi he Tau Mahina ‘Vaha Mafana’
1 Kua fa foaki he matagi mitaki e tau magaaho ke fakalataha ke he tau gahua kehekehe. Laulahi ia tautolu kua manako ke fakaaoga e magaaho mafana ke taute e tau mena kehekehe mo e okioki. Pete ia, kua lata ia tautolu ke puipui mai he fakatauhele e fakaholoaga fakateokarasi.—Filipi 3:16.
2 Ka fai magaaho a koe, tuga e okioki tuku aoga, kua manamanatu nakai a koe ke gahua fakalaulahi atu he fekafekauaga? Tokologa ne kitia e mena nei mo magaaho mitaki ke hu mo tau paionia fakaku. Fa hafagi he mena nei e gutuhala ke he loga he tau magaaho he fekafekauaga. Maeke he tau magafaoa ke moua e olioli moli he gahua auloa he aho katoa ke he fekafekauaga. Ko e heigoa ni, maeke nakai ia koe ke fakamalikiti hau a magaaho he fekafekauaga? Ha kua mafana mo e aho loloa, kua maeke ke lahi e tau fua ke helehele mai he fakalataha ke fakamatala he magaaho afiafi.
3 Ka e kua he lagomatai e fakapotopotoaga kua manako lagomatai ke taute e tau vala fonua ia? Ha ha i ai falu he fakapotopotoaga hau kua liga manako ke fakatauo mo koe ke gahua ke he taha po ke ua e fahi tapu ke he matakavi kua manako lagomatai. Kaeke ke tote e matakau hau, liga ko e tau tagata fakailoa he fakapotopotoaga tata mai ka manako ke fakatauo mo koe. Kaeke ke kaupa e mamao he fenoga hau, to liga maeke he leveki takaiaga ke tala atu ki a koe e fakapotopotoaga tata mai ka loto fakaaue ke he lagomataiaga hau.
4 Kua fakatoka kia e vaha okioki hau ke he taha matakavi mamao? Ka pihia, kua taute kia e koe e tau fakatokaaga ke fina atu ke he tau feleveiaaga ke he matakavi ka fina atu a koe ki ai? Ka e kua he gahua he fonua mo e tau matakainaga i ai? Ko e putoia e mena nei he magahala okioki hau kua palepale lahi ki a koe mo e ke he falu. (Roma 1:11, 12) Pihia foki, maeke nakai ia koe ke fakamatala nakai mautali he fenoga hau? Manatu ke uta e Tohi Tapu hau mo e loga he tau tohi. Fakaaoga falu magaaho ata hau ke totou mo e fakaako e Tohi Tapu hau. Manatu pete ni he lata falu magaaho mo okioki ha tautolu mai he tau gahua fakalalolagi, nakai manako a tautolu ke fai magaaho he nakai fekafekau ki a Iehova.
5 Kua lata e tau motua ke mataala ke fakatokatoka fakamitaki e tau gahua he fakapotopotoaga. Ka fai motua po ke tau fekafekau lagomatai ka o mamao, kua lata ke taute e tau fakatokatokaaga ma e falu ke leveki e tau matagahua ha lautolu. He fakailoa tuai atu ke he leveki he fakapotopotoaga e tau aho ka o mamao e tau matakainaga tane nei ka lagomatai a ia ke kitia e tau hikihikiaga kua lata ke taute.
6 E, ko e tau aho loloa kua fa lavelave. Ka ko e tau fakalavelave kua mukamuka lahi ke fakatauhele e fakaholoaga mitaki hau he fekafekau ke he Kautu. Fakaaoga fakalahi e tau magaaho ha kua mitaki e matagi. Tuku mua e tau mena atihake fakaagaga, ti tapiki mau ki ai.—Filipi 1:10.