“To Maeke Nakai e Tau Tagata Oti ke Fefakaalofaaki?”
1 To fakapuloa ai e fekau fulufuluola, fakaohooho, mo e mafanatia he lalolagi katoa ke he 169 e tau vagahau. Ko e heigoa e fekau nei? Mo e to foaki ai fefe?
2 Kua hagaao e fekau ke he fakaalofa ke he katofia. To moua ai he Tau Tala he Kautu Nu. 35, ne fakamataulu “To Maeke Nakai e Tau Tagata Oti ke Fefakaalofaaki?” Kua kumikumi fakaku e Tau Tala he Kautu nei ke he tuaga mogonei he tau mena he lalolagi, he fakakite kua nakai fai fakaalofa he vahaloto he tau tagata ti ko e tupumaiaga haia he lahi e loto mamahi mo e uhu. Kua fakamaama ai e kakano, mua atu ke he vaha ha tautolu, ne momoko e fakaalofa ke he katofia ti fai kakano nakai e mena nei ma e vaha anoiha.
3 Putoia ai foki, kua fakakite he Tau Tala he Kautu Nu. 35 e fakaalofa moli ke he katofia kua kitia ke he tau miliona kua momoui he lalolagi he vaha nei. Kua kitia ai a lautolu kua liu fakafou he vaha faka-Kerisiano fakamua—ko e tapuaki he senetenari fakamua, ne kua fakamailoga aki e fakaalofa ke he katofia ne fakaako e Iesu Keriso.—Luka 10:25-37.
4 Kua fakahiku aki he Tau Tala he Kautu Nu. 35 e fakamaamaaga to nakai leva ti fakagahuahua he tau tagata he lalolagi katoa e fakaalofa ke he katofia i lalo hifo he pule he Kautu he Atua ia Keriso. Ko lautolu ne totou e fekau nei ne fakamalolo ki ai ke moua e porosua Ko e Heigoa e Manako he Atua ma Tautolu? mo e ako e puhala ke eke mo vala he fakatokaaga fakaalofa nei he lalolagi katoa ne kua fakamaama fakamatafeiga i loto he Kupu he Atua.
5 Ko Hai Ka Foaki e Fekau Nei? To foaki he Tau Fakamoli a Iehova he lalolagi katoa e fekau nei he fakaalofa ke he katofia ke he tau kapitiga, tau katofia, mo e tau magafaoa ha tautolu ke he mahina ha Oketopa mo Novema. Ne fakamalolo ki a lautolu oti kua lata ke fakalataha ke he tufatufaaga he Tau Tala he Kautu Nu. 35.
6 Ko e foliaga mua atu he matagahua nei ke fakaohooho e fiafia he tau tagata ke fakaako Tohi Tapu ke he porosua Manako po ke tohi Iloilo. Lafi ki ai, ko e laliaga loto katoa he vala he tau fekafekau takitaha ha Iehova ka fua mai e fakamoliaga mua ue atu ke he Atua he fakaalofa, ko Iehova, mo e ke he hana Tama ko Iesu Keriso.