Fefe Hau a Onoonoaga ke he Fekehekeheaki?
1 Ko e fekehekeheaki ko e nakai fakatokaga, ko e nakai fai manamanatuaga. Ko e taha he tau aga uka lahi ne kua fa fakafehagai mo tautolu he fekafekauaga. Kua fefe hau a onoonoaga ki ai? Kua taute kia a koe ke fakamanou hifo he hau a fekafekauaga? Maeke fefe ia koe ke kautu mai ai ke eke ke hokotia atu ke he tau tagata mo e fekau he Kautu?
2 Fakamua, ki a manamanatu ko e ha ne fekehekeheaki ai pihia e tau tagata he matakavi hau. Kua pihia kia ha kua nakai fiafia a lautolu ke he ha lautolu a tau takitaki fakapolitika mo e fakalotu? Kua manatu kia a lautolu kua nakai fai tali ke he tau mena vihi ne fehagai mo lautolu? Kua fakauaua kia a lautolu hagaao ke he tau maveheaga ma e tau mena mitaki lahi? Kua nakai kia fakamakai a lautolu ke manamanatu hagaao ke he tau mena fakaagaga ato kitia ai e lautolu e lauiaaga mitaki mo e mafiti?
3 Fakamaama e Amaamanakiaga he Kautu: To fakahakohako he Kautu e tau mena vihi oti. Ti he magaaho ka fakafita a tautolu ki ai, kua lata ia tautolu ke vagahau hagaao ke he tau maveheaga he Kautu, he fakahagaao atu ke he tau fakamauaga ne mua he Tohi Tapu, pete ni kua nakai maeke po ke lata ke fakakite e kupu Tohi Tapu. (Hepe. 4:12) Ka e, kua maeke fefe ia tautolu ke hokotia atu e fakatutalaaga ke he naia?
4 Kua lata he tau tagata ke maama e kakano he ha tautolu a ahiaga. Kua lata ia lautolu ke mailoga kua o atu ai a tautolu ha ko e fakaalofa ke he tau tuuta kaina mo e tokaga ma e maaga. Kua maeke ia tautolu ke huhu e tau huhu fakamanamanatu tuga anei, “Ko e heigoa e tali he manatu e koe ke he [tau mena vihi ne lauia ai e maaga]?” Kaeke ke nakai talia taha fakafeleveiaaga, kia taute foki taha.
5 He taha matakavi mahuiga ne kua fekehekeheaki e tau tagata he kaina ke he fekau he Kautu, ne lali e tau tagata fakailoa ke moua e fakafeleveiaaga ka fakatupu e fiafia. He foaki e tohi Iloilo, ne fakatai he taha hoa mau e fakafeleveiaaga nei: “Manatu nakai a koe kua mua e aoga he fakaakoaga mitaki ke fai kautuaga he lalolagi he vaha nei? Talia nakai a koe to putoia ke he fakaakoaga tokoluga e iloilo he Tohi Tapu?” He taha pale la ne foaki e laua tolu e tohi, kua toka taha mo e fifine ne talahau he mogo fakamui kua totou oti e ia e tohi Iloilo mo e talia ai ke fakaako Tohi Tapu.
6 Ka fakafehagai a koe mo e fekehekeheaki, kia fakataitai e tau fakafeleveiaaga kehekehe, huhu e tau huhu fakamanamanatu, mo e fakaaoga e malolo he Kupu he Atua. Liga to maeke ia koe ke lagomatai falu ke fiafia mai ke he ha tautolu a amaamanakiaga mua ue atu he Kautu.