Liu Ahi Atu ke he Fiafia he Tau Tala he Kautu
1 He tau tapu gahoa kua mole, kua olioli lahi e tautolu e kotofaaga he tufatufa e Tau Tala he Kautu Nu. 35, ne fakamataulu “To Maeke Nakai e Tau Tagata Oti ke Fefakaalofaaki?” Kua amanaki lahi e tau tagata fakailoa oti ke hoko e fufuta nei he Tau Tala he Kautu ke he tau tagata tokologa kua lata. (Mata. 10:11) Pete ni kua fakatoka e matagahua ke fakaoti mai he Aho Tapu, Novema 16, kaeke ke lahi agaia e matakavi ne toe ke taute, to liga ole e tau motua ki a mutolu ke fakatumau e tufatufaaga he Tau Tala he Kautu Nu. 35 ato oti e tau fufuta he fakapotopotoaga.
2 Ko e fufuta nei he Tau Tala he Kautu ne fakalagalaga e fiafia he tau tagata tokologa. Kua kitia e lautolu kua galo he tau tagata kehekehe ha lautolu a fakaalofa mo e ko e mena ia kua manatu noa ke he mena ka fakatoka mai he vaha anoiha. (2 Timo. 3:3) Manako a tautolu ke liu ahi atu ke he fiafia ne kua kitia.
3 Tau Fua Mai he Tau Tala he Kautu: Ke he matagahua he Tau Tala he Kautu he 1995, ne moua he fifine e lagaki ti hau ke he feleveiaaga he Fale he Kautu ha kua manako a ia ke fakalaulahi atu e ako hagaao ke he tua he Tau Fakamoli a Iehova. Ke he feleveiaaga ia ne talia moli e ia e fakaakoaga Tohi Tapu mo e he magaaho fakamui lavea ni ke fakato e feleveiaaga. Nakai leva, ne fakafita a ia he tohi atu ke he lotu tuai hana, ke fakaoti hana fakalatahaaga!
4 He magaaho nei, totou teau e tau tagata he matakavi kua totou e fekau he Tau Tala he Kautu Nu. 35. Ka e ko e heigoa e tali ha lautolu ki ai? Pete ni e nava mitaki ha lautolu ke he tau mena ne totou e lautolu, nakai fai ne hiki ato taha he Tau Fakamoli a Iehova ka liu ahi atu ki a lautolu. Kua fakatoka nakai a koe ke liu ahi atu? Ko e manatu fakaalofa ma e matakainaga ha tautolu kua maeke ke omoi a tautolu ke taute pihia. Ko lautolu oti ne fakakite e fiafia ke he Tau Tala he Kautu kua lata ke liu ahi atu.
5 Ko e Heigoa Hau Ka Talahau Ka Liu Atu? Liga ke taute e koe falu talahauaga hagaao ke he fekau kua lau tonu mo e magaaho he Tau Tala he Kautu mo e huhu e huhu fakaohooho. Fanogonogo fakamitaki ke he tagata he kaina ka e vagahau a ia ke maeke ia koe ke iloa e mena he manamanatuaga hana. Ti hagaaki atu ke he manatu tonu he porosua Manako, ne kua fakakite mai he Tau Tala he Kautu. Ka talia fiafia, lali ke kamata e fakaakoaga Tohi Tapu he mogoia.
6 Hanei falu manatu lagomatai fakakite ka fakaaoga e koe ka liu atu ki a lautolu ne fakakite e fiafia ke he “Tau Tala he Kautu” Nu. 35.
◼ “Liga manatu e koe e vala tala tohi ne toka e au mo koe he mogo kua mole. Kua putoia ai he fekau i ai e matakupu aoga he feveheveheaki he tau tagata he vaha nei—nakai fai fakaalofa ma e falu.” Hagaaki atu ke he fakamoliaga he lau 2 he Tau Tala he Kautu i lalo hifo he mataulu tala “Kua Tupu e Momoko he Fakaalofa ke he Katofia.” Ti huhu, “Manatu nakai a koe ko e finagalo he Atua anei ma e tau tagata ke momoui pehe?” Fakaata ma e tali. Fufuke ke he fakaakoaga 5 he porosua Manako, mo e lali ke kamata e fakaakoaga Tohi Tapu.
◼ “He feleveia fakamua ha taua, ne toka e au mo koe falu vala tala ke he matakupu ‘To Maeke Nakai e Tau Tagata Oti ke Fefakaalofaaki?’ Manatu nakai a koe to maeke he lalolagi?” Fakaata ma e tali. Fufuke ke he fakaakoaga 6 he porosua Manako, mo e totou e paratafa 6. Ti totou e maveheaga he Atua ia Mika 4:3, 4. Ka eke ke fiafia e tagata he kaina, ti foaki e porosua mo e fakaakoaga.
◼ “He ahi fakahiku mai haku ki a koe, ne toka e au falu vala tala ne fakamatapatu ‘To Maeke Nakai e Tau Tagata Oti ke Fefakaalofaaki?’ Ne fakatoka mai e foaki noa he fakaakoaga Tohi Tapu he kaina. Liu mai au ke fakakite ki a koe e puhala fakaako ka fakaaoga e taua. [Fakakite e tohi Iloilo.] Fakamaama mai he tohi nei e magaaho ka fefakaalofaaki e tau tagata oti, mo e tali ai foki e falu huhu kua liga manatu noa a koe: Ko e ha kua fuakau a tautolu ti mamate? Ko e ha kua fakaata he Atua e mamahi? Ko e heigoa e mena ka tupu ki a lautolu ne mamate ne ofania e tautolu?” Ti huhu, “Maeke nakai ia au ke fakatata e puhala fakaako ki a koe?” Ka nakai manako e tagata he kaina, huhu ki ai ko e loto nakai a ia ke totou ni e ia e tohi. Ka loto, ti toka e lagaki mo e fakamaama ko e gahua fakaako Tohi Tapu ha mautolu kua lagomatai ha ko e tau mena fakaalofa foaki noa. Fakatoka ke liu ahi atu.
7 He oti e matakavi he gahua fakamatafeiga ke he Tau Tala he Kautu Nu. 35, kia foaki e tautolu e tohi Iloilo ke he vala ne toe he mahina. Ko e fifiliaga loga kua moua mai e tau manatu lagomatai fakakite he tohi nei i tua he lau he Our Kingdom Ministry he tau fufuta ia Mati, Iuni, mo Novema 1996; mo Iuni 1997.
8 Ko e tufatufaaga pauaki nei he Tau Tala he Kautu kua lata ke fakalagalaga a tautolu oti ke fakamalolo ha tautolu a tau laliaga ke he gahua fakamatala. Mo e lagomatai ha Iehova to mauokafua a tautolu ke kautu moli e matagahua nei, ke lagomatai e tau tagata ke kitia e finagalo he Atua ma e tau tagata oti ke fefakaalofaaki. Kia fakatumau a Iehova ke fakamonuina e tau laliaga fakamakamaka ha tautolu he liu ahi atu ke he fiafia he Tau Tala he Kautu.