Tufatufa Fakalaulahi Atu e Tau Tala he Kautu Nu. 35
1 To lavelave e tau mahina a Oketopa mo Novema ki a tautolu oti. Ko e tau aho 11 fakamua ia Oketopa, to foaki e tautolu e tau lagaki takitaha he Kolo Toko mo e Awake! Ti, mai he Aho Tapu, Oketopa 12, ke he Aho Tapu, Novema 16, to fakalataha a tautolu ke he tufatufaaga he lalolagi katoa ke he Tau Tala he Kautu Nu. 35. Ko e kotofaaga ha tautolu ke uta e fekau aoga ke he tau tagata oti he matakavi ha tautolu. Ko e tali haia ke he huhu, “To Maeke Nakai e Tau Tagata Oti ke Fefakaalofaaki?” Ke he matagahua pauaki nei, to tufatufa e tautolu e Tau Tala he Kautu Nu. 35 ke he tau fahi tapu. Lafi ke he foaki he Tau Tala he Kautu he tau matahiku fahi tapu, to fakakite e tautolu e tau fufuta fou he tau mekasini.
2 Ko Hai Ka Taute? Tuga fa mahani, to fakamataulu he tau motua e gahua. Kua olioli e tau tagata oti he tufatufa e Tau Tala he Kautu, ti nakai fakauaua to fakamau e tau tagata fakailoa tokologa lahi ke paionia fakaku ke he taha po ke ua e mahina he matagahua. To manako falu tagata fakailoa ke fakaaoga fakalahi e magaaho nakai fa mahani ke he fekafekauaga.
3 Fai tagata fakaako Tohi Tapu nakai a koe ne kua leva e fakaako hana ke he tohi Iloilo ka nakai leva ti lata ke fakalataha ke he gahua he fonua? Liga to eke a ia mo tagata fakailoa nakai la papatiso he magaaho ia ke taute e matagahua foaki he Tau Tala he Kautu. Ko e fakafeleveiaaga mukamuka hokoia kua lata ke talahau aki e tuleke. Ma e fakatai, liga ke talahau taha: “Kua aoga lahi e fekau nei ti kua tufatufa ai he lalolagi katoa he mahina nei ke he 169 e tau vagahau. Manako au ke fai lagaki a koe ma hau ni.” Kua maeke foki he tau fanau ikiiki ke fai vala aoga he gahua hakahakau nei.
4 Kua lata he tau takitaki he Fakaakoaga Tohi ke fakamalolo e tau tagata oti he potopotoaga ha lautolu ke fakalataha katoa ke he tufatufaaga he Tau Tala he Kautu Nu. 35. To liga fai tagata fakailoa foki kua nakai gahua ka e ke liu foki fakafita ke he gahua kaeke ke moua e lautolu e fakamaloloaga kua lata. Ato hoko e matagahua, kua lata he tau motua ke ahi atu ki a lautolu takitaha nei ke kitia e mena ka taute ke lagomatai a lautolu ke gahua fakalataha mo e tau tagata fakailoa kua leva ke he mena nei he fekafekauaga.
5 Magaaho Fe Ka Feleveia a Tautolu ma e Fekafekauaga? Ko e tau gahua oti nei to taute ma e tau fakatokatokaaga he fakamatala ne kua lata mo e kua aoga. Ko e matakavi fe ni ka maeke ke fakalataha ki ai ma e tau aho takitaha he fahi tapu, ke he tau matahiku fahi tapu, mo e he tau magaaho afiafi. Kua lata ke fakahoko he tau magaaho ke maeke he tau tagata fakailoa mo e tau paionia ke fakaaoga katoatoa e magahala fakamatala. Kia taute foki e tau fakatokatokaaga ke feleveia he tau magaaho pale la lahi ke lata mo e tau fanau o aoga, tau tagata gahua hikihiki, mo e falu foki. Kua lata e leveki fekafekau ke kitia moli to loga e fale ke he taha fale mo e matakavi pisinisi ke maeke he tau tagata oti ke taute katoa ai ke he gahua. Ha kua tokologa ai e tau tagata fakailoa ke he matakavi, kua lata ke fakailoilo a lautolu ke tokofiha ni ka gahua he poloka he matakavi.
6 Ka e Kua e Tau Kaina ne Nakai Moua? Manako a tautolu ke tutala tino ke he tau tagata he kaina ke fakamaama e kakano kua lata ia lautolu ke totou e Tau Tala he Kautu Nu. 35. Ti ka nakai fai tagata i kaina ka ahi atu a koe, tohi hifo e kaina mo e liu ai ke ahi atu he magaaho kehe he aho. Kaeke ko e tapu fakahiku he matagahua ka e nakai la moua ia e koe e tau tagata nei he kaina, kia toka e koe e lagaki he Tau Tala he Kautu he gutuhala he mena ke nakai kitia he tau tagata. Ke he tau matakavi nonofo, kia mataala ke foaki e Tau Tala he Kautu ke he tau tagata ne o he puhala tu. Ka gahua he tau matakavi i tua ne ha ha ai lahi e matakavi ne kua lata ke taute ai he matagahua, kia toka e lagaki he Tau Tala he Kautu he tau fale nakai fai tagata he ahi atu fakamua.
7 Ko e Heigoa ha Tautolu a Foliaga? Kua lata ke fakamakutu e tau fakapotopotoaga ke fakaaoga ha lautolu a foaki katoa he Tau Tala he Kautu ke tufa oti ke he matakavi ha lautolu ato fakaoti e matagahua ia Novema 16. Kaeke kua lahi mahaki e matakavi gahua he fakapotopotoaga ha mutolu mo e ka mitaki ke gahua tokotaha a koe ni ai fai tagata fakatauo, liga kua aoga ki a koe ke taute pihia. To maeke he mena nei ke hokotia a koe ke he tokologa kua manako mo e tala mitaki. (Mata. 10:11) Kua liga mitaki ke toto falu tuleke mo e tuku e Tohi Tapu he kato tapulu hau po ke pesi, ka e nakai fakaaoga e kato toto. Kia mailoga ke fakamau fakamitaki e tau tagata kua fakakite e fiafia.
8 Kua Mautali Nakai a Koe ke Kamata? Kua lata he tau motua ke kitia ko e fiha e mekasini he fakapotopotoaga ka manako mo e kua lata ke ota fakalata ki ai. Nakai fai kakano ke ota e Tau Tala he Kautu Nu. 35, ha ko e mena tufa ai ke he tau fakapotopotoaga takitaha. To igatia e tau paionia pauaki, tumau, mo e fakaku ke moua 200 e tau lagaki ke tufatufa, ka to moua he tau tagata fakailoa he fakapotopotoaga 40 e tau lagaki. Kua kotofa mai e gahua ma tautolu. To fakamakutu nakai a koe ke taute e gahua mitaki nei? Nakai fakauaua to taute e koe. Kia foaki e tautolu e fekau aoga ne fakave ke he Tohi Tapu he tufatufa fakalaulahi e Tau Tala he Kautu Nu. 35!