“Ko e Meleniamu Fou—Ko e Heigoa ka Ta Mai ma Hau Anoiha?”
1 Ko e huhu ne manamanatu aia e tau tagata he lalolagi katoa. Pete kua loga e tau mena ne fakakatoatoa he tau tagata he tau senetenari, ne fakaatukehe e tau tagata ha kua ha i ai e tau lekua ne fakamamahi agaia e tau tagata he tau meleniamu. (Iopu 14:1; Sala. 90:10) To moua mai fe he tau tagata e lagomataiaga?
2 He tau mahina ia Oketopa mo Novema, to ha ha i ai e magaaho kua fakatoka pauaki ma tautolu ke lagomatai e tau katofia ha tautolu ke tali e huhu ia. Fefe? Puhala he tufatufaaga he Tau Tala he Kautu Nu. 36. Ko e mataulu hana “Ko e Meleniamu Fou—Ko e Heigoa ka Ta Mai ma Hau Anoiha?” He vala fakamua ia Oketopa, to foaki e tautolu e tau mekasini Kolo Toko mo e Awake! Mai he Aho Gofua, Oketopa 16, ke he Aho Faraile, Novema 17, kia gahua fakalahi a tautolu ke tufatufa e Tau Tala he Kautu Nu. 36. He taute e matagahua nei, kia lata ke foaki fakamahao e Tau Tala he Kautu Nu. 36 he fahitapu. He matahiku fahitapu, kia foaki fakalataha mo e tau mekasini fou ha tautolu.
3 Maeke Nakai a Koe ke Fakalataha Katoatoa? Kua lata e tau motua, tau fekafekau lagomatai, mo e tau paionia ke takitaki e matagahua nei, ha ko lautolu ne matamua atu he gahua. Tokologa e tau tagata fakamatala ne fa hiki e tau fakaholoaga ha lautolu ke paionia fakaku ke taha po ke ua e mahina he tufatufaaga. Ka e falu foki ne tauteute ke fakalaulahi e magaaho fa fakaaoga he fekafekauaga.
4 Kua aoga lahi e tau takitaki Fakaakoaga Tohi he fakapotopotoaga ke fakamafana e tau tagata oti he matakau ha lautolu ke gahua auloa ke tufatufa e Tau Tala he Kautu Nu. 36. Ka e ha i ai e falu tagata fakamatala kua lolelole hifo he gahua fakamatala. Kua lata he tau motua ke ahiahi e faoa nei ke kikite e puhala ke lagomatai a lautolu. Kia fakatokatoka e puhala ma e tau tagata fakamatala motua ke igatia mo e fakalataha mo lautolu ne lolelole ke he fekafekauaga he tau mahina nei. Ko e talahauaga mukamuka he Tau Tala he Kautu Nu. 36 nukua liga ko e mena ke liu fakagahuahua aki e tau tagata fakamatala nei.
5 Ko e magaaho mitaki foki anei ma e tau tagata fakaako tohi ne lotoga e tohi Iloilo mo e kua fakata ke fakamatala ka e nakala papatiso ke kamata mo e fakalataha ke he fekafekauaga. Tatai foki mo e tau tama ikiiki ke fakalataha auloa he gahua fulufuluola nei.
6 Ko e kamataaga mukamuka ni ne lata. Pehe age a koe:
◼ “Kua foaki e au e magaaho ke lagomatai mo e tufatufa e tala mitaki nei ke he tau magafaoa katoa he [higoa he maaga po ke matakavi]. Ko e lagaki hau anei. Fakamolemole kia totou.” Kua mitaki ke nakai takitaki e kato fakamatala hau ka tufa e Tau Tala he Kautu Nu. 36.
7 Fakatokatoka Fakamitaki e tau Magaaho he Fekafekauaga: Kua lata he tau momotua ke kikite kua holo mitaki mo e aoga e tau fakatokatokaaga he fonua. Ko e leveki fekafekau ne lata ke kikite kua loga e tau matakavi he gahua fale-ke he-fale mo e tau pisinisi ke maeke e tau tagata oti ke gahua fakalataha katoatoa. Kaeke lata, kia fakatokatoka ke feleveia ma e tau magaaho he fonua he tau fahitapu, he tau matahiku fahitapu, mo e tau magaaho afiafi. Ke lagomatai aki a lautolu ne o aoga, ne gahua hikihiki, mo e falu atu, kia fakatokatoka ke feleveia he tau magaaho pale la.
8 Puhala ke Taute e tau Nakai-ke he-Fale: Ko e foliaga ha tautolu ke vagahau ke he tau tagata tokologa. Ka aahi atu a koe ti nakai fai tagata he fale, ti fakamau hifo e kaina ke liu he taha magaaho kehe he aho. Kaeke kua ai moua e koe e tau tagata nei he fahitapu fakahiku he matagahua, ti maeke ia koe ke tokahifo e Tau Tala he Kautu Nu. 36 he mena galo mai he tau tagata o fano. Lata he tau motua ke fakailoa ke he fakapotopotoaga, kaeke nakai fai tagata he fale he magaaho fakapa ka aahi, ti toka e lagaki he Tau Tala he Kautu Nu. 36 he tau kavi ne tokogahoa e tagata po ke ka lahi mahaki e matakavi ke taute he matagahua.
9 Kia Fakamakaukau a Tautolu! Lata e tau fakapotopotoaga ke kaki ke fakamaopoopo oti e fonua ha lautolu ato fakaoti e matagahua ia Novema 17. Kaeke lahi mahaki e fonua hau, ti lata e falu tagata fakamatala ke gahua tokotaha kaeke haohao mitaki mo e nakai hagahaga kelea. Ko e puhala mukamuka lahi anei ke hohoko atu ke he tokologa ia lautolu kua lata. Kia fakamoli ke fakamau hifo fakamitaki e tau tagata ne moua kua fiafia.
10 Kua lata e tau motua ke talahau tuai po ke fakalahi e tau mekasini ke lata ma e fakapotopotoaga, ti fakahu e ota. Nakai lata ke ota e Tau Tala he Kautu Nu. 36, ha to fakahu atu ke he tau fakapotopotoaga oti. Kia fafati ke he tau paionia pauaki, tau paionia tumau, mo e tau paionia fakaku ke taki 250 e tau lagaki ke tufatufa, ka e igatia ke he tau tagata fakamatala he fakapotopotoaga ke taki 50 e tau lagaki ke tufatufa. Ti, kua mau mo e amaamanaki nakai a koe ke fakamakaukau ke he gahua uho nei? Ko e tau tagata uhoaki ha ia a tautolu ke fakailoa ke he tau katofia ha tautolu e finagalo ne mavehe mai he Atua ma e tau aho ne tata mai i mua!