Matagahua Pauaki ke he Tuleke ia Oketopa 20–Novema 16!
1 Kamata he Aho Gofua, Oketopa 20, ti matutaki ke he fā e faahi tapu, to fakalataha a tautolu ke he tufatufaaga pauaki he tuleke foou ne mataulu Manako Nakai a Koe ke Iloa e Kupu Mooli? Ne amanaki ki ai ko e matagahua pauaki nei he lalolagi katoa to fakatupu ki mua e fiafia ke he punaaga hokoia he kupu mooli.—Ioane 17:17.
2 Ne foaki he tuleke e tau tali kū he Tohi Tapu ke he ono e hūhū aoga: “Kua leveki mooli kia he Atua a tautolu?” “To fai fakaotiaga nakai e felakutaki mo e matematekelea?” “Ko e heigoa ka tupu ki a tautolu ka mamate?” “Fai amaamanakiaga nakai ma lautolu ne mamate?” “Maeke fēfē au ke liogi ti logona he Atua?” mo e “Maeke fēfē au ke moua e fiafia ke he moui?” Ko e tau lotu he Kerisitenitome ne nakai foaki e tau tali makona ke he tau hūhū nei. Pihia foki a lautolu ne nakai talahau ke eke mo Kerisiano ne manamanatu hagaao ke he tau matakupu nei, ka e liga nakai mailoga e lautolu na moua e tau tali maaliali i loto he Tohi Tapu. Ko e mena ia, ko e fekau nei kua lata ke futiaki e tau tagata tokologa.
3 Taute Oti e Fonua ha Mutolu: Lali fakalahi ke taute oti e matakavi ha mutolu he taha fale ke he taha fale. Ka lahi e fonua ha mutolu, maeke he tau motua ke fakamalolō a mutolu ke toka e lagaki he tuleke he tau kaina ne nakai fai tagata he fina atu fakamua. Manatu ke age e lagaki ke he tau tuuta kaina, tau magafaoa, tau kapitiga gahua po ke aoga, mo e falu ne tutala tumau mo koe. Liga maeke ia koe ke fakatokatoka e tau matagahua haau ke paionia fakakū ia Oketopa po ko Novema. Fai tama po ke tagata fakaako Tohi Tapu nakai a koe hane tupu ki mua fakaagaaga mo e liga lata ke fakalataha mo tautolu ke he matagahua nei ko e tagata fakailoa nakaila papatiso? Ka fai, ti fakailoa ke he tau motua.
4 Mena ka Talahau: Ke maeke ke hokotia e fekau ke he tau tagata tokologa, kua mitaki lahi kia fakakū e fakataitaiaga haau. Hūhū ke he tagata he tau kaina e taha he tau hūhū ono he lau i mua ti fakakite ki ai e tali he tuleke. To fakaatā he mena nei e tau tagata fakailoa oti ke hikihiki e fakataitaiaga ha lautolu ke felauaki mo e fonua. Ka fai tagata ne fakakite e fiafia, fakamau hifo ti liu ke aahi atu. He tau matahiku faahi tapu, kua maeke ke foaki e tau mekasini foou fakalataha mo e tuleke. Ka oti e matagahua ia Novema 16, to foaki e tautolu e tohi Fakaako he Tohi Tapu. Ko e ha tuleke ka toe to fakaaoga ke he puhala pihia foki tuga e tau tuleke ne ha ha i ai.
5 Kamata e Fakaako Tohi Tapu: Ko e tuleke nei kua talaga pauaki ke lagomatai a tautolu ke kamata e tau fakaako Tohi Tapu. Ka taute e liu aahi atu ke he tagata ne fakakite e fiafia, liga hūhū a koe ko e heigoa e kupu mooli he Tohi Tapu kua fakamafana po ke fakatotoka a ia? Fakakite age e lau i tua ne tohi ai e fakaholoaga fakaako Tohi Tapu ha tautolu, ti age e lagaki he tohi Fakaako he Tohi Tapu. Ka maeke, totou fakakū taha po ke ua e paratafa mai he veveheaga ne lahi e vala tala ke he matakupu ne fifili e ia.
6 Kua kumi a Iehova ki a lautolu ka tapuaki ki a ia “mo e aga[a]ga mo e fakamoli.” (Ioane 4:23) Kia fakalataha a tautolu oti ke he matagahua pauaki nei ke lagomatai e falu ke iloa e kupu mooli!