Kua Hafagi e Pa Gutuhala Lahi
1 Ko e tagata fakamatala fakamakutu he tala mitaki, ne kumi fakamakamaka e Paulo e tau matakavi kua lahi mahaki ke gahua, ti taha ko e taone ha Efeso. Ne kautu lahi a ia he fakamatala i ai ti tohi e ia ke he tau matakainaga Kerisiano: “Ha kua hafagi ki a au e pa gutuhala kua lahi mo e aoga lahi.” (1 Kori. 16:9) Ne fakatumau a Paulo ke fekafekau ke he matakavi ia mo e lagomatai e tau Efeso tokologa ke eke mo tau tagata tua.—Gahua 19:1-20, 26.
2 He vaha nei, kua hafagi mai ki a tautolu e pa gutuhala lahi ke gahua. Kua fai uiina a tautolu ke lagomatai e tau fakapotopotoaga ne nakai la gahua fakamatafeiga ia e matakavi ke he tau tau takitaha. Ti maeke he tau laliaga ha tautolu ke fakalagotatai ke he tau matakavi pauaki nei.—Fakatatai 2 Korinito 8:13-15.
3 Maeke Nakai a Koe ke Gahua he Matakavi kua Manako Lahi? Kua manamanatu nakai a koe he liogi ke maeke ke fekafekau he taha matakavi? Liga to maeke ia koe ke lagomatai taha fakapotopotoaga he taone hau. He ha he tutala e manatu ke he leveki takaiaga mo e kitia hana manatu lagomatai? Po ke liga ke he matakavi he fakapotopotoaga hau, kua ha ha ai lahi mahaki e puke tagata teliga tuli po ke vagahau motu kehe kua nakai la fai ia kua maeke ke leveki. Ke maeke ke hokotia ke he manako nei, kua eketaha nakai a koe ke ako e vagahau ha lautolu? Lafi ai, liga fai matakau he falu vagahau kehe po ke fakapotopotoaga tata mai kua ‘olelalo atu ke he Iki ma e falu ke gahua ke he Kautu.’ (Mata. 9:37, 38) Ka pihia, kua maeke nakai a koe ke lagomatai?
4 Ke he tau hogofulu tau kua mole, totou afe he tau magafaoa Kerisiano kua hiki ke he tau motu ke taute katoatoa e gahua helehele. Ne talahau he taha hoa mau ne taute e mena nei: “Ne manako a maua ke fekafekau ki a Iehova ke he matakavi kua maeke ia maua ke lagomatai lahi.” Ka ha ha ia koe e manako nei mo e kua maeke ke hiki ke he falu matakavi he motu nei po ke ka lata a koe ke fekafekau ke he falu motu, kia fakatutala fakamua mo e tau motua he fakapotopotoaga hau.
5 Ka manako a koe ke kumikumi atu ke he Sosaiete ke he matakavi kua manako lagomatai, age e tohi kua fakatoka e manako pauaki hau ke he Komiti Fekafekau he Fakapotopotoaga. To tohi e lautolu e tau manatu ha lautolu mo e fakafano atu ke he Sosaiete. Pete ia, he hafagi agaia e gutuhala lahi, kia fakatumau a tautolu oti ke lavelave ke he fekafekauaga a Iehova.—1 Kori. 15:58.