Fakamua to Fakamatala, Liga Lata ia Koe ke Kumi
1. Ko e ha e tau kotofaaga he fonua he fakapotopotoaga he tau matakavi ne loga e vagahau kua fakatū hagaao ke he vagahau?
1 He Penetekoso 33 V.N., he mole e moua e agaaga tapu, ko e tau tutaki ha Iesu ne “kamata ai he vagahau ke he tau vagahau kehekehe” ki a lautolu ne o mai he tau faahi mamao he lalolagi. (Gahua 2:4) Ti ko e fua, kavi ke he 3,000 ne papatiso. Fuluola ai, tuga ko e laulahi he tau tagata o mai ne vagahau foki e vagahau taha ia, liga faka-Heperu po ke faka-Heleni. Ka e fifili e Iehova ke fakamatala e ogo he Kautu ki a lautolu ke he vagahau motu ni ha lautolu. Taha e kakano mooli ma e mena nei ko e tau tagata kua talia fiafia e tala mitaki ka logona e lautolu ke he vagahau motu ni ha lautolu. Ko e mena ia he vahā nei, ko e tau kotofaaga he fonua he fakapotopotoaga kua loga e vagahau ne fakatū hagaao ke he vagahau. (Organized, lau 107, para. 2-3) Ko e tau matakau vagahau kehe ne nakai moua ha kotofaaga he matakavi, ka e fakamatala a lautolu ki a lautolu kua vagahau e vagahau he matakavi he fakapotopotoaga ne leveki mo e falu fakapotopotoaga he takatakaiaga.
2. (a) Ko e heigoa e gahua kumi, ti kua liga lata ki fe? (e) Maeke fēfē e tau fakapotopotoaga ke felagomataiaki ke gahua he fonua ne loga e vagahau? (i) Ko e heigoa kua lata ia tautolu ke taute ka moua e tautolu e taha ne vagahau kehe kua fakakite e fiafia?
2 Ka nofo a koe he matakavi ne taha e vagahau ne fakaaoga he tau tagata oti, maeke a koe ke fakamatala mai he taha fale ke he taha fale. Ka kua kehe e tuaga haau ka nofo a koe he taone ne loga e vagahau ne fakaaoga. Ko e falu fakapotopotoaga vagahau kehe ne liga fakamatala ke he tau katofia taha ia. Ko e tau fakapotopotoaga ne liga atu e vala tala ke he tau tagata takitaha kua vagahau e vagahau haau, ko e matagahua lahi ke kumi e tau tagata ne maeke a koe ke fakamatala kua fakavē ke he fakapotopotoaga po ke matakau haau. (Kikite e puha “Felagomataiaki.”) Ko e mena ia, liga lata ia koe ke fai vala ke he gahua kumi, ke taute e koe e tau kumikumiaga ke moua a lautolu kua vagahau e vagahau pauaki. Maeke fēfē e gahua kumi ke taute?
3. Ko e heigoa ne fifili e fakapotopotoaga po ke matakau ke kumi mo e lahi fēfē e magaaho ke foaki e lautolu ke he matagahua nei?
3 Fakatokatoka e Gahua Kumi: Ko e lahi he magaaho ne foaki ke he gahua kumi he tau matakavi ne loga e vagahau kua fakavē ke he tau tuaga he matakavi. Ma e fakatai, tokofiha e tagata he maaga ne vagahau e vagahau ia? Tokofiha e tagata fakailoa i ai? Fiha e kaina kua fitā he moua he fakapotopotoaga po ke matakau? Kua nakai lata e fakapotopotoaga ke tatai e puhala kumi he tau katofia takitaha ka e fifili ke hagaaki ke he tau matakavi ne tokologa ne nonofo ai he fonua kua fakakaupā mo e tau matakavi ia kua mamao lahi. Ka e, he fai fakaholoaga fakatokatoka mitaki ke kumi kua aoga ke maeke e tokologa ke age e magaaho ke he tokologa ke ui atu ke he higoa a Iehova.—Roma 10:13, 14.
4. (a) Kua lata ke fakatokatoka fēfē e gahua kumi? (e) Ko e heigoa falu puhala ke kumi e tau tagata kua vagahau e vagahau haau?
4 Ke kalo he gahua lagaloga he tau matakavi ne kua lata ke kumi, ko e kau he tau motua, mua atu ke he leveki fekafekau kua lata ke fakatokatoka mo e leveki e gahua kumi. (1 Kori. 9:26) He tau matakau vagahau kehe, ko e matakainaga taane kua fifili, manako ke he motua po ke fekafekau lagomatai ne fifili he kau he tau motua he fakapotopotoaga ne leveki ka taki ai. Loga e fakapotopotoaga mo e matakau ne fai fakaholoaga fakapapahi ke taute e kumikumi fakamua, liga fakaaoga e tohi telefoni po ke Internet ke fakamau e tau higoa ne iloa lahi ke he vagahau. Ti taute e gahua kumi he puhala he hea telefoni po ke ahiahi atu ke kitia e tau kaina kua lata ke fakamau hifo he fonua. Ka aoga ke taute pihia, ko e kau he tau motua he fakapotopotoaga ne leveki e matakau ka fakatoka ma e fakapotopotoaga katoa ke fai vala tumau he gahua kumi.—Kikite e puha “Puhala ke Kumi a Lautolu kua Vagahau e Vagahau ha Mutolu.”
5. (a) Ko e heigoa falu lagomataiaga ma e tau tagata fakailoa ne taute e gahua kumi? (e) Ko e heigoa ka talahau e tautolu ke he tau tagata ka kumi?
5 Kua lata ia tautolu ke maaliali e foliaga he tau magaaho takitaha he fai vala a tautolu ni ke he gahua kumi. Ha ko e gahua nei ko e vala he fekafekauaga, kua lata ia tautolu ke tauteute tuga e tau fekafekau. Tokologa ne moua ko e taute e tau fakataitaiaga ha lautolu mo e vagahau e vagahau ka e kumi kua lagomatai a lautolu ke fakatumau e hakahakau mo e fakamatila e tau lotomatala ha lautolu. Maeke a tautolu ke totou e magaaho kua fakaaoga e tautolu ke kumi ka e nakai he fakaaoga e magaaho ke tauteute e tau mepe mo e tau fakamauaga he fonua. Ka moua e tautolu e taha kua vagahau e vagahau, kia eketaha a tautolu ke talahau e tala mitaki mo e tala age fakamafiti he mogo fakamui ke he leveki fekafekau po ke tagata ne kotofa e ia ke maeke ke fakafoou e tau fakamauaga he fonua. Kua mooli e mena nei pete kua fakakite he tagata e fiafia. Pete kua aoga e gahua kumi, kua lata ia tautolu ke lagotatai mo e fai vala he tau puhala oti he fekafekauaga.—Kikite e puha “Mena ke Talahau he Gahua Kumi.”
6. Ko e tau paleko pauaki fe kua fehagai ki ai he kumi e tau tagata teligatuli?
6 Kumi a Lautolu ne Teligatuli: Ko e kumi ke he tau tagata teligatuli kua paleko pauaki mo e lata e laliaga pauaki mo e fakatumau. Ko e tagata teligatuli kua nakai mailoga e matatohi he higoa haana, tau aga fakatagata haana, po ke mena tui haana. Lafi ki ai, ko e tau tagata he magafaoa mo e tau kapitiga kua puipui lahi mo e liga fakauaua ke foaki e tau vala tala ke he tau tagata fakailoa kua hūhū atu. Ko e tau lagomataiaga nā ma e kumiaga ke he tau tagata teligatuli kua aoga foki ka kumi a lautolu ne maeke ke vagahau.
7. (a) Ko e heigoa e tau hūhū ka tala age ke he tau tagata he matakavi ke kumi a lautolu ne teligatuli? (e) Liga utakehe fēfē e tautolu e tuahā he tagata he kaina?
7 Ko e tau fakapotopotoaga mo e tau matakau vagahau matalima ne kautū he hūhū ke he tau matakavi ne nonofo tagata. Liga ko e tagata he kaina ne mailoga e katofia, kapitiga gahua, po ke kapitiga aoga ne fakaaoga e vagahau matalima. Liga mailoga e ia e fakamailoga he puhalatū ne fakailoa ke he tau katofia kua ha ha i ai e tau fanau teligatuli. Liga fai magafaoa teligatuli a ia. Tokaloto ko e kakano he ahiahi atu haau kua liga onoono tuahā ki ai. Ka e, maeke ia koe ke lahi e mena ka taute ke fakatotoka e tagata he kaina he haau a aga kapitiga mo e fakamaamaaga kū, fakamooli, mo e fakalilifu haau. Falu ne fai fua mitaki he fakatātā e Tohi Tapu po ke falu DVD he hūhū a lautolu ka eke ke iloa he tagata he kaina taha kua teligatuli. Ti tala age e lautolu e manako ha lautolu ke foaki e amaamanakiaga he Tohi Tapu ki a lautolu ia. Ka tehatehaua e tagata he kaina ke foaki e vala tala, liga makai a ia ke talia e laupepa he kaina haau po ke uiina he feleveiaaga he fakapotopotoaga haau ke age ke he magafaoa po ke kapitiga teligatuli haana.
8. Maeke fēfē e fakapotopotoaga tata mai ke lagomatai e fakapotopotoaga vagahau matalima?
8 Taha po ke ua e aho he tau, maeke he fakapotopotoaga vagahau matalima ke uiina e fakapotopotoaga vagahau kehe ke lagomatai a lautolu ke kumi e tau tagata he tau taone he fonua lahi mahaki ha lautolu. Ko e feleveiaaga ma e gahua ne taute he fakapotopotoaga vagahau matalima ka putoia e tau fakaakoaga ma e gahua nei mo e fakataitaiaga. Igatia e matakau he motokā mo e kotofa ke taha e tagata fakailoa mai he fakapotopotoaga vagahau matalima ti age e mepe ke fakakite e matakavi pauaki ke kumi.
9. Taute fēfē e gahua kumi ke he mena ne fakapotopoto ma e fakalatahaaga mo e fakafiafiaaga he tau tagata teligatuli po ke moua e lagomataiaga?
9 Maeke foki ke kumi ke he matakavi ne fa fakapotopoto ma e fakalatahaaga mo e fakafiafiaaga he tau tagata teligatuli po ke moua e tau lagomataiaga ne foaki he maaga. Kua lata e tau tagata fakailoa ke tui e tau tapulu kua felauaki mo e matagahua. Liga mitaki lahi ke fakatutala mo e tokotaha po ke tokoua e tagata ne fakalataha ti fakailoilo ke nakai age e fakataitaiaga ke he matakau katoa. Ka fua mitaki e fakatutalaaga, liga tautui e tau vala tala ke matutaki.
10. Maeke fēfē he tau tagata fakailoa ke kumi ke he tau pisinisi he matakavi?
10 Ko e taha puhala foki ke tauteute e tau mepe kua fakakite ke he tau tagata gahua he matakavi mo e ahiahi atu ki a lautolu ke he magaaho kua latatonu. Taha e mepe kua liga ha ha i ai e numera he tau fale utu penisini. Taha ne liga ha ha i ai e tau tagata fakamōmō mena tui, tau fale unu mena, tau fale kai, tau hotela, po ke taha vahega pisinisi foki. Ka igatia e mepe mo e vahega pisinisi taha ia, maeke e tau tagata fakailoa ke fakaaoga e tau fakatutalaaga tatai mo e moua e iloaaga mo e lotomatala. Ma e fakatai, fa mahani e tau hotela ke fakaatā e tau tagata teligatuli, liga fakamaama fakakū e tautolu e gahua ha tautolu ke he tagata gahua mo e age e pasolo kua tauteute ne toka ai e DVD mo e uiina he feleveiaaga he fakapotopotoaga ma e hotela ke age ke he tau tagata ahiahi ne teligatuli. He falu gahuaaga kua maeke ia tautolu ke hūhū ke he ha tagata gahua po ke tagata leveki ne fakaaoga e vagahau matalima. Ka fai aoga ma e tau tagata teligatuli he matakavi, maeke ia tautolu ke age e tau DVD ha tautolu ma e tokaaga tohi.
11. Ko e ha e gahua kumi ko e vala aoga he fekafekauaga?
11 Ko e Gahua Aoga: Ko e kumi he tau tagata he kaina ne vagahau e vagahau haau ka lahi e magaaho. Lafi ki ai, ko e tau matakau he falu katofia ka hiki mafiti he o atu mo e o mai e tau tagata, ne uka ke fakafoou tumau e tau fakamauaga he fonua. Ti ko e tupu ki mua e numera he tau matakavi, ko e gahua kumi ko e puhala aoga he fekafekauaga. Ko Iehova ne mai ki a tautolu e matagahua ke fakamatala, kua nakai fakamailoga tagata. (Gahua 10:34) Ko e haana “finagalo ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:3, 4) Ko e mena ia, kia kaufakalataha a tautolu mo Iehova mo e falu ke kumi e tau tagata he tau vagahau kehekehe oti ne “loto fakamoli mo e mitaki.”—Luka 8:15.
[Puha he lau 7]
Felagomataiaki
Ka manako lagomatai e fakapotopotoaga po ke matakau ke kumi a lautolu he vagahau ha lautolu ke fakamatala ki ai, ko e leveki fekafekau ka matutaki ke he tau motua he falu fakapotopotoaga vagahau kehe ne tata atu. Ti liga mitaki lahi ke matutaki ke he tau fakapotopotoaga ne nakai mamao lahi po ke lahi e puke tagata ha lautolu kua vagahau ke he vagahau ia. Ko e tau fakapotopotoaga ne matutaki ki ai ka tala age ke he tau tagata fakailoa ha lautolu ka moua e lautolu ha tagata kua vagahau e vagahau ia, kua lata ia lautolu ke tohi hifo e kaina mo e age ai ke he leveki fekafekau ke age ke he fakapotopotoaga po ke matakau ne ole lagomatai. Ko e tau leveki fekafekau he tau fakapotopotoaga kua putoia ka gahua auloa ke he fakatokaaga kua talia oti he taute e tau fonua ne loga e vagahau ti takitaki atu a lautolu ne fiafia ke he fakapotopotoaga po ke matakau kua latatonu.
Ka moua he tau tagata fakailoa e taha tagata ne vagahau kehe kua fakakite mooli e fiafia (po ke taha kua teligatuli), kua lata ia lautolu ia ke fakapuke mafiti e laupepa Please Follow Up (S-43) ti age ke he tohikupu he fakapotopotoaga. Kua maeke he mena nei ke moua mafiti he tagata e lagomatai fakaagaaga.—Kikite e km 5/11 lau 5.
[Puha he lau 8]
Puhala ke Kumi a Lautolu kua Vagahau e Vagahau ha Mutolu
• Hūhū ke he falu—tau tagata fakaako Tohi Tapu, tau tagata he magafaoa, tau kapitiga gahua, mo e falu foki.
• Fakaaoga e pepa telefoni ke kumi e tau higoa kua mahani ke he vagahau ha mutolu. Ko e pepa telefoni ne toka ai e tau higoa fakatatau ke he tau kaina kua haia he Internet po ke puhala he telefoni he kamupanī.
• Hūhū fakailoilo ke he tau matakavi lagomatai ke he tau tagata, tuga e tau tokaaga tohi he matakavi, tau ofisa fakatufono, mo e tau aoga.
• Fakakia e nusipepa he matakavi ma e tau fakailoaaga hagaao ke he tau matagahua ne fakatoka he maaga vagahau kehe.
• O atu ke he tau fale koloa mo e tau pisinisi ne taute ke lata mo e maaga vagahau kehe.
• Ko e fakaatāaga mai ia lautolu kua leveki, fakatoka e laulau he tau tohi he gahuaaga, toloaga he tau tagata fakaako univesitī, po ke tuaga ō fenoga ne ha ha i ai tumau e tau tagata ne vagahau e vagahau ia.
• Ka fakaatā he fakatufono he motu haau, fakatau e pepa telefoni pisinisi po ke polokalama komopiuta ne maeke ke kumi e tau matakavi he tau tagata he Internet.
[Puha he lau 9]
Mena ke Talahau he Gahua Kumi
Ko e tutala fakakapitiga, fakamooli, mo e atāina ka utakehe e tuahā. Fa lagomatai mua ke fakakite e tau tohi he vagahau.
Mole e fakafeleveia, maeke a koe ke pehē: “Kumi a mautolu ke he tau tagata ne vagahau ․․․․․ ke maeke a mautolu ke tutala ke he amaamanakiaga he Tohi Tapu mo lautolu. Iloa nakai e koe ha tagata ke tutala a mautolu ki ai?”
Ka kumi ma e tau tagata teligatuli, maeke a koe ke pehē: “Fakaalofa atu. Manako au ke fakakite ki a koe taha mena? [Fakaaoga e matini vitiō, fakakite e vala mai he Learn From God and Live Forever—On DVD.] Ko e vala anei he tohi ne fakavē ke he Tohi Tapu he Vagahau Matalima ha Niu Silani. Fai vitiō foki a mautolu ne nakai totogi kua talaga ke fakapuke aki e tau manako fakaagaaga he tau tagata teligatuli. Iloa nakai e koe ha tagata teligatuli po ke uka ke logona ne fakaaoga e vagahau matalima?” Ka nakai manatu he tagata he kaina ha tagata, kua fa mitaki ke foaki e tau fakataiaga he tau matakavi ne kua liga kitia e ia e tagata teligatuli, tuga he gahuaaga, he aoga, po ke he katofia.