‘Fakakikila e Iehova Haana Fofoga ki Luga ia Lautolu’
KUA molea e 30 e masolo (muscle) he fofoga he tagata. Hogofulu ma fa ni e masolo ne gahuahua fakalataha ke taute a koe ke mamali! Manamanatu la ke he tau fakatutalaaga haau ka nakai ha ha ai e tau masolo nei. Fulufuluola? Nakai. Ma lautolu mogoia ne teligatuli mo e kuhukuhu, kua gahuahua lahi e tau masolo he fofoga ke lagomatai foki ke he falu a puhala he tau fakatutalaaga. Ka lafi ua e tau masolo he fofoga mo e tau gahuahuaaga he tino, ko e tau puhala aoga lahi a ia ke fakamaama aki e tau logonaaga mo e tau manatu. Tokologa e tagata ne ofo ke he puhala kua maeke he vagahau matalima ke fakakite e tau manatu uka fakalataha mo e tau tala fakamatafeiga.
He tau magaaho foou nei, kua maeke he tau tagata teligatuli mo e kuhukuhu he lalolagi katoa ke kitia e fofoga ne loga mo e kehekehe e tau fakakiteaga ne nakai kitia ke he fofoga he tau tagata. He vagahau fakatai kua maeke ia lautolu ke kitia ‘ki mua [po ke, fofoga] ha Iehova.’ (Aue 2:19) Kua nakai maeke noa e mena nei. Kua leva tigahau e fakakite e Iehova e fakaalofa lahi ki a lautolu ne teligatuli mo e kuhukuhu. Ne taute pihia e ia he magaaho fakamua atu ke he motu a Isaraela i tuai. (Levi. 19:14) He vahā foou nei, ko e fakaalofa haana ki a lautolu ne teligatuli mo e kuhukuhu kua kitia maaliali foki. “Ko ia [Atua] kua finagalo ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:4) He moua e maama ke he iloilo tonu he kupu mooli hagaao ke he Atua, tokologa a lautolu ne teligatuli mo e kuhukuhu kua liga maeke ke kitia e fofoga Haana. Maeke fēfē he tau tagata teligatuli mo e kuhukuhu ke taute e mena nei ka e nakai logona e lautolu? Ato tali e hūhū ia, manamanatu la a tautolu ke he kakano ne aoga e vagahau matalima ke he tau tagata teligatuli mo e kuhukuhu.
Iloa he Puhala he Tau Mata
Kua loga e tala fakahehē hagaao ke he tau tagata teligatuli mo e kuhukuhu mo e vagahau matalima. Kia fakaatā a mautolu ke fakamaama e falu mena ia. Na maeke e tau tagata teligatuli mo e kuhukuhu ke fakaholo peleōafi. He lali ke maama e manatu he kitekite ke he tau laugutu he tagata nukua uka lahi mahaki ki a lautolu. Kua nakai tatai e vagahau matalima mo e Paraile ti nakai ko e mena taute fakataitai noa ni. Ne nakai taha ni e vagahau matalima he lalolagi katoa. Lafi ki ai kua ha ha he tau tagata teligatuli mo e kuhukuhu e puhala vagahau matalima ne fakaaoga he matakavi ha lautolu ni.
Maeke nakai e tau tagata teligatuli mo e kuhukuhu ke totou? He iloa mitaki e falu ke totou, kua tokologa agaia a lautolu ne teligatuli mo e kuhukuhu ne taufetului ke totou. Ko e ha? Ha ko e tau matatohi he laupepa kua puna mai he tau kupu ne vagahau. Manamanatu ke he tama ne maeke ke logona, ti iloa ai ke vagahau. He mogoia ne fanau mai e tama, kua agaagai a ia he tau tagata ne tutala ke he vagahau he motu. Ke he magaaho kū, kua maeke a ia ke tuku fakalataha e tau kupu ti talahau e tau alaga kupu. Kua mukamuka pauaki e mena nei he logona e vagahau ne fakaaoga. Ti ka kamata e tau tama ne logona ke totou, kua aoga ke fakaako e tau matatohi uli he laupepa ne felauaki ke he tau fakaleoaga mo e tau kupu kua fitā he iloa e lautolu.
Manamanatu la mogonei ki a koe he motu kehe, ne haia he poko ne taute aki e kalase ne nakai taogo ai ha leo. Ne nakaila logona ai e koe e vagahau he motu ia. He tau aho takitaha ne o mai e tau tagata mo e lali ke tutala ki a koe mai i fafo he poko kalase ia. Ka e nakai logona e koe e tau mena ne talahau e lautolu. Ne kitia ni e koe e tau laugutu ha lautolu hane kalamukalamu. He mailoga ai kua nakai maama e koe a lautolu, ne tohi hifo e lautolu e tau kupu taha ia he laupepa, ti fakakite ki a koe i loto he poko kalase e tau mena ne tohi hifo e lautolu. Manatu a lautolu kua maeke ia koe ke maama ai. Lahi fēfē e mena ka maama e koe ke he manatu haau? To mailoga e koe kua teitei ke nakai maeke ke fetutalaaki he tuaga nei. Ko e ha? Ha ko e mena ne tohi kua fakakite e vagahau ne nakaila logona ia e koe. Ko e mena tonu nei ne lauia e laulahi he tau tagata teligatuli mo e kuhukuhu.
Ko e vagahau matalima ko e puhala mitaki lahi mahaki ma e tau tagata teligatuli mo e kuhukuhu. Ne fakaaoga he tagata e tau fakamailoga (signs) ke fakatokatoka aki ke fakakite e tau fakatino kehekehe he takatakaiaga i mua haana. Ko e fakaaoga he tau alaga he tino haana ke he takatakaiaga ia fakalataha mo e tau fakatātāaga he fofoga haana kua muitua ke he tau puhala he kalama he vagahau matalima. Ke he puhala nei ne moua mai e vagahau ne fakaaoga e tau mata ke fakamaama aki e tau vala tala ke he tau tagata teligatuli mo e kuhukuhu.
Ti teitei e tau gahuahuaaga oti ne taute he tau lima, tino mo e fofoga he tagata teligatuli mo e kuhukuhu, mo e fai kakano ka vagahau matalima a ia. Ko e tau fakatātāaga he fofoga kua nakai ni taute ke nava he tau tagata. Ko e vala aoga lahi a ia he kalama he vagahau matalima. Ke fakatai: Ke talahau e hūhū mo e lagaki hake e tau tuamata kua liga fakakite ko e hūhū ke manamanatu po ke ke moua e tali ē po ke nakai. Ka hifo e tau tuamata ki lalo, kua liga fakakite he mena nei e hūhū ko hai, ko e heigoa, i fe, magaaho fe, ko e ha, po ke fēfē. Ko e tau gahuahuaaga pauaki he gutu kua liga fakakite e lahi he mena po ke puhala malolō he matagahua. Ko e puhala ne fakagahuahua he tagata teligatuli mo e kuhukuhu e ulu haana, lagaki hake e tau tukeua haana, fakaaoga he tau kauvehe haana, mo e lamilami he tau mata haana ne fakakite e tau kakano kehekehe ke he manatu kua fakamaama.
Ko e tau gahuahuaaga nei he tino kua lagomatai e tau tagata ne kitekite ke olioli lahi he maama e vala tala. He fakaaoga e tau puhala kehekehe nei he matutakiaga, ko e tau tagata teligatuli mo e kuhukuhu ne iloa mitaki e vagahau matalima kua maeke ke fakamaama e tau mena oti—mai he fakapoeme ke he tau mena uka, mai he tau mena loto fakavihi ke he tau mena fakafekī, mai he tau mena ne kitia mo e tau mena ne nakai kitia.
Fai Kehe ne Moua Mai he Tau Tohi Vagahau Matalima
Ka fakamaama e iloilo a Iehova ke he vagahau matalima, kua maeke he tagata teligatuli mo e kuhukuhu ke logona e fekau ti “tua” mogoia ke he Punaaga he fekau. Ko e mena ia, ati lali fakalahi e Tau Fakamoli a Iehova ke fakamatala ke he tau tagata teligatuli mo e kuhukuhu he lalolagi katoa mo e foaki e tau tohi ke lagomatai a lautolu. (Roma 10:14) He foou nei, kua 58 e matakau fakaliliu ke he vagahau matalima he lalolagi katoa mo e tau tohi vagahau matalima he tau DVD kua moua mogonei ke he 40 e vagahau matalima. Kua aoga nakai e tau gahua oti nei?
Ko Jeremy, ne teligatuli mo e kuhukuhu e tau matua, ne talahau: “Ne manatu e au e matua taane haaku ne lahi e magaaho ne fakaaoga he poko mohe haana ke fakaako falu paratafa he vala tala he The Watchtower, he lali ke maama ai. Ne amanaki ni a ia ti hu mai he poko mo e fiafia lahi he vagahau matalima: ‘Maama tei e au! Maama tei e au!’ Ne kamata mogoia a ia ke fakamaama e kakano he vala tala ki a au. Ko e 12 laia e tau haaku he mogoia. Ne totou fakamafiti e au e tau paratafa ti vagahau matalima: ‘Tete, ai manatu au ko e kakano a ia. Hanai e . . . ’ Ti alo a ia ki a au ke oti e tala mo e liu a ia ke he poko haana ke manamanatu ai ke he kakano he vala tala ne tohi. To nakai nimo e au e hogohogo manava he fofoga haana mo e nava lahi ne logona hifo e au he kitekite atu ki a ia he liu ke he poko mohe. Ka e, he moua e tau tohi he vagahau matalima ke he DVD kua maeke ia ia mogonei ke maama mitaki e tau vala tala. He kitia e fiafia lahi he fofoga haana he magaaho ne fakakite e ia e puhala he logonaaga haana hagaao ki a Iehova, ko e taha mena ne nakai uta fakateaga e au.”
Manamanatu foki ke he mena ne tupu ke he hoa mau Fakamoli, ne tutala mo Jessenia, ko e fifine fuata teligatuli mo e kuhukuhu i Chile. He moua e fakaatāaga mai he matua fifine ha Jessenia ke fakakite ki a ia e My Book of Bible Stories—On DVD he Vagahau Matalima faka-Chile, ne pehē a laua: “He magaaho ne kamata a Jessenia ke kitekite ke he tala, ne kamata a ia ke kata, ti tagi foki. He magaaho ne hūhū age e matua fifine haana ko e tagi he ha, ne pehē a ia ha kua loto lahi a ia ke he mena ne kitia e ia. Ati mailoga he matua fifine haana kua maeke ia ia ke maama e tau mena oti he DVD.”
Ko e fifine teligatuli mo e kuhukuhu ne nonofo he maaga tua i Venesuela, ne taha e tama, ti kua fatu he tama ke uaaki. Ne logona hifo e ia mo e taane haana kua nakai fahia a laua ke liu fai tama ha ko e tau tuaga fakatupe, ti manamanatu a laua ke he fakatō tama. He nakai iloa e tau mena nei ne tutupu, ne aahi atu e Tau Fakamoli a Iehova mo e fakakite ki a laua e vitiō What Does God Require of Us? he fakaakoaga 12, ke he Vagahau Matalima faka- Venesuela. Ne fakamaama he fakaakoaga nei e onoonoaga he Atua ke he fakatō tama mo e kelipopo tagata. He magaaho fakamui, ne tala age e fifine ke he Tau Fakamoli kua loto fakaaue lahi a ia he taute e fakaakoaga ia. Ne talahau e ia ko e fua ne moua mai kua nakai fifili a laua ke fakatō tama. Ati hao e moui ia ha kua lagomatai he tohi vagahau matalima he DVD!
Ko Lorraine, ko e Fakamoli teligatuli mo e kuhukuhu ne fakamaama: “Ko e fakaako he Tohi Tapu kua tuga e tukutuku he tau mata he puzzle lahi mahaki. Ne ha ha i ai e tau avaava—he tau mata puzzle ne galo—ti pihia e maamaaga haaku ke he fakatino katoa. He loga fakahaga e tau kupu mooli he Tohi Tapu ne moua ke he vagahau matalima mogoia, ti maama e au e fakatino katoa.” Ko George ne 38 e tau he eke mo Fakamoli ne teligatuli mo e kuhukuhu, ne talahau: “Nakai fakauaua ka maeke ia koe ke maama taha mena, kua foaki ki a koe e logonaaga lilifu fakatagata mo e mauokafua. Ne logona hifo e au ko e tau DVD he vagahau matalima kua lahi mahaki e lagomataiaga ke he tupuaga fakaagaaga ni haaku.”
“Ko e Feleveiaaga he Vagahau Haaku!”
He lafi ke he tau tohi vagahau matalima, ne fakatokatoka he Tau Fakamoli a Iehova e tau fakapotopotoaga ne taute oti e tau feleveiaaga ke he vagahau matalima. He foou nei, kua molea e 1,100 fakapotopotoaga vagahau matalima he lalolagi katoa. Kua lauga ke he tau tagata teligatuli mo e kuhukuhu ke he vagahau matalima ni ha lautolu ti fakaako e tau kupu mooli he Tohi Tapu ke he puhala ne manamanatu ai e tagata teligatuli mo e kuhukuhu—ke he vagahau haana. Ne fakamaama ai ke he puhala kua fakakite e fakalilifu ke he aga mo e mahani mo e tau mena tutupu he moui haana.
Kua aoga nakai e fakatokaaga he tau fakapotopotoaga vagahau matalima? Manamanatu ke he mena ne tupu ki a Cyril kua papatiso ko e taha he Tau Fakamoli a Iehova he 1955. Ke he tau tau loga ne fakaako fakamitaki e ia e tau tohi ne tohia mo e fakalataha atu tumau ke he tau feleveiaaga Kerisiano. Falu magaaho ne fai tagata fakaliliu vagahau matalima ti falu magaaho ai fai. Ka ai fai tagata fakaliliu vagahau matalima, ne falanaki a ia ke he Tau Fakamoli ne lali fakalahi ke lagomatai he tohi hifo e tau manatu hagaao ke he mena ne talahau mai i mua. Ato hoko ke he 1989, ne kavi ke 34 e tau he eke a ia mo Fakamoli, ne fakatū ai e fakapotopotoaga vagahau matalima fakamua he Tau Faahi Kaufakalataha i New York City. He eke mo matakainaga he fakapotopotoaga ia, fēfē e logonaaga ha Cyril? “Kua tuga e hū mai ki fafo he uho vao, mai he luo pouli ke he mena maama. Ko e feleveiaaga he vagahau haaku!”
Ko e tau fakapotopotoaga vagahau matalima he Tau Fakamoli a Iehova, ko e tau matakavi ka fakapotopoto tumau e tau tagata teligatuli mo e kuhukuhu ke fakaako ki a Iehova mo e tapuaki ki a ia. Ko e tau matakavi ia ka fakamalolō ai e tau manamanatuaga he tau tagata he Atua. He lalolagi ne nakai maeke he tau tagata teligatuli mo e kuhukuhu ke vagahau mo e vevehe kehe mai he falu tagata, kua eke e tau fakapotopotoaga nei mo tau huaga ke fematutakiaki mo e fefakalatahaaki. He tau fakalatahaaga ia, kua maeke he tau tagata teligatuli mo e kuhukuhu ke fakaako, holo ki mua, mo e fakalaulahi atu e fekafekauaga ha lautolu ki a Iehova. Tokologa e Tau Fakamoli teligatuli mo e kuhukuhu ne eke mo tau fekafekau fakamatala tumau. Ne hiki falu ke he tau motu kehe ke lagomatai e tau tagata teligatuli mo e kuhukuhu ke fakaako ki a Iehova. Ko e tau tagata taane Kerisiano ne teligatuli mo e kuhukuhu kua fakaako ke lauia mitaki he eke mo tau faiaoga, tau tagata fakatokatoka, mo e tau leveki mamoe, ti tokologa kua maeke ke taute e tau kotofaaga he fakapotopotoaga.
Ne molea e 100 e fakapotopotoaga he tau vagahau matalima mo e kavi ke 80 e matakau he Tau Faahi Kaufakalataha. Ti teitei ke 300 e fakapotopotoaga he tau vagahau matalima mo e molea 400 e matakau i Parasili. Kua tata ke 300 e fakapotopotoaga he tau vagahau matalima i Mesikō. Ti molea e 30 e fakapotopotoaga he tau vagahau matalima mo e 113 e matakau i Rusia. Ko e tau fakataiaga gahoa ni anei he tupuaga ne hoko ke he lalolagi katoa.
Ne taute foki he Tau Fakamoli a Iehova e tau toloaga mo e tau fonoaga vagahau matalima. He tau kua mole, ne molea e 120 e fonoaga he lalolagi katoa ne taute ke he loga e vagahau matalima kehekehe. Ko e tau fakalatahaaga nei kua maeke he Tau Fakamoli teligatuli mo e kuhukuhu ke kitia ko e vala foki a lautolu he tau matakainaga Kerisiano he lalolagi katoa ne aoga mai he tau mena kai fakaagaaga he magaaho tonu.
Ko Leonard kua teligatuli mo e kuhukuhu, ti ko e taha he Tau Fakamoli a Iehova ke molea e 25 e tau. Ne talahau e ia: “Na iloa tumau e au ko Iehova ko e Atua mooli. Ka e nakai maama mitaki e au e kakano ne fakaatā e Ia e matematekelea. He falu magaaho, ne taute he mena nei au ke ita ki a ia. Ka e, he taha lauga pauaki he fonoaga faahimotu vagahau matalima, ne maama agataha e au e tau kakano ne putoia ai. He oti e lauga, ne neke mai e hoana haaku ki a au ti hūhū, ‘Kua fiafia nakai a koe mogonei?’ Maeke ia au ke talahau fakamooli ē! He mole e 25 e tau, kua fakaaue lahi au he nakai tiaki e au a Iehova. Na ofania tumau e au a ia ka e nakai iloa mitaki e au a ia. He aho nei kua iloa tuai e au a ia!”
Loto Fakaaue Lahi
Ko e heigoa e “tau fakakiteaga” he fofoga ha Iehova ne kitia he tau tagata teligatuli mo e kuhukuhu he fakaako a lautolu ki a Ia? Ko e fakaalofa, hofihofi noa, fakafili tonu, mahani fakamooli, fakaalofa-totonu—mo e loga atu foki.
Ko e kaufakalatahaaga he tau tagata teligatuli mo e kuhukuhu he Tau Fakamoli he lalolagi katoa kua kitia e fofoga a Iehova mo e to fakatumau ke kitia maaliali ai. Mo e loto fakaalofa Haana ke he tau tagata teligatuli mo e kuhukuhu, ‘kua fakakikila e Iehova haana fofoga ki luga ia lautolu.’ (Nume. 6:25) Ko e loto fakaaue ha ia he tau tagata teligatuli mo e kuhukuhu he maeke ia lautolu ke iloa a Iehova!
[Tau Fakatino he lau 24, 25]
Molea e 1,100 fakapotopotoaga vagahau matalima he lalolagi katoa
[Tau Fakatino he lau 26]
Kua kikila e fofoga ha Iehova ki luga ha lautolu ne teligatuli mo e kuhukuhu