Kia Mataala ke Kumi e Tau Tagata Teliga Tuli he Matakavi Hau

¹ Kua fakalaulahi e Iehova e uiina: “Ati hau ā; ko . . . ia kua manako ki ai, kia uta noa e ia e vai he moui.” (Fakakite. 22:17) Kua tupu tokologa e tau tagata teliga tuli katoa mo lautolu kua talia e ogo nei. Ti ko e fua, he tau tau gahoa kua mole ne loga e matakau vagahau matalima ne fakatu i Niu Silani.

² Pete ne hagaaki e gahua fakamatala ha lautolu he matakau vagahau matalima ke he tau tagata teliga tuli mo e kelea e tau fanogonogoaga he matakavi ni ha lautolu, ha ha i ai tokologa agaia a lautolu kua nakai la moua mo e fakamatala ki ai he motu nei.

³ Lagomatai Fefe e Koe? Ke he tau toloaga, kua mailoga nakai e koe e tau tagata ne fakaaoga e vagahau matalima? Iloa nakai e koe taha he gahuaaga hau po ke he aoga kua fai tagata teliga tuli he magafaoa? Kia mataala ke kumi a lautolu kua teliga tuli he taute a koe he tau matagahua hau he tau aho takitaha. Ka e iloa fefe e koe to moua e lautolu e fakamatala he Kautu?

⁴ He Fakamatala Atu: Fakailoa atu ke he matakau vagahau matalima tata e kaina he tagata teliga tuli. Tokologa a lautolu e tau tagata teliga tuli ne mafiti e holo ki mua he ako e kupu moli he magaaho ne feoaki mo e Tau Fakamoli teliga tuli nukua fakaaoga e New Zealand Sign Language. Ko e mena ia, ka fai matakau vagahau matalima e matakavi hau, kua lata he tohikupu he fakapotopotoaga ke ta atu ki ai e vala tala hagaao ke he tau tagata teliga tuli he matakavi hau.

⁵ Ka e kua ka nakai fai tagata tata ke foaki e lagomataiaga fakaagaga ke he tau tagata teliga tuli he matakavi hau? Liga lagomatai fefe e koe? He ha he liu ahi atu mo e tutala ke he ha tagata ne teliga logona he magafaoa? Ne ako foki he falu tagata fakailoa e New Zealand Sign Language ke maeke ke matutaki mitaki mo e tagata teliga tuli. (Gahua 16:9, 10)

⁶ He mataala ke kumi e tau tagata teliga tuli he matakavi hau, nukua foaki e koe e magaaho ki a lautolu ke uta noa e vai he moui.​—Mata. 10:11.