Ofaofa e Tau Matakainaga Teligatuli ha Mutolu!

KO E tau tagata he Atua he vahā nei, ko e magafaoa lahi he tau matakainaga ne tupu mai he tau tagata taane mo e tau fifine he vahā i tuai. Putoia ai a lautolu nei ko Samuela, Tavita, Samisoni, Raava, Mose, Aperahamo, Sara, Noa, mo Apelu. Ha ha i ai he tau fekafekau fakamooli ha Iehova e tokologa he tau tagata teligatuli. Ma e fakatai, ko e tau tagata tokoua fakamua ne eke mo Tau Fakamoli a Iehova i Mongolia ko e hoa mau ne teligatuli. Ti ko e fua he mahani fakamooli he ha tautolu a tau matakainaga talitonu ne teligatuli i Rusia, ati moua e tautolu e kautūaga matafakatufono he European Court of Human Rights.

He vahā nei, kua tauteute he “fekafekau fakamoli mo e loto matala” e tau tohi vagahau matalima mo e fakatokatoka e tau fakapotopotoaga ti pihia foki e tau toloaga mo e tau fonoaga ke he vagahau matalima. (Mata. 24:45) Ne aoga lahi mahaki e tau mena nei ki a lautolu ne teligatuli.a Ka kua manamanatu nakai a koe, ko e fēfē la e logonaaga he tagata teligatuli he fakaako hagaao ke he Atua mooli ti holo ki mua he kupu mooli ka nakai fai foakiaga pehēnei? Kua manamanatu nakai a koe hagaao ke he mena ka taute e koe ke lagomatai e tau tagata teligatuli ne nonofo he matakavi haau?

Ato Moua e Tau Koloa Foou he Vahā Nei

Ka e kua ka hūhū a koe ke he falu kua momotua ne teligatuli hagaao ke he puhala ne iloa e lautolu e Atua? Liga tala atu e lautolu ki a koe e logonaaga ha lautolu he magaaho fakamua ne iloa e lautolu na fai higoa e Atua—puhala ne hiki he taha kupu mooli pihia e tau momoui ha lautolu mo e lagomatai a lautolu he tau tau loga ato moua e tau polokalama vagahau matalima ke he tau vitiō po ke tau DVD ke lagomatai a lautolu ke iloa e tau mena hokulo lahi he kupu mooli he Tohi Tapu. Liga fakamaama e lautolu e tuaga he tau feleveiaaga Kerisiano he magaaho ne nakai taute po ke fakahokohoko ke he vagahau matalima. Ka e kua fai tagata ka nofo he tapa ha lautolu mo e tohi hifo e tau manatu he laupepa ke lagomatai a lautolu ke maama e tau mena ne talahau. Taha e matakainaga taane ne fakaako e kupu mooli he Tohi Tapu ke he puhala nei ke he fitu e tau ato fai tagata fakahokohoko.

Ne manatu he Tau Fakamoli momotua ne teligatuli e magaaho ne fakamatala a lautolu he fonua he tau tagata ne “logona.” He taha lima, ne totō hake e lautolu e index card ne tohi ai e fakafeleveiaaga mukamuka ma e gahua he taha gutuhala ke he taha gutuhala. Ti totō e lautolu e tau mekasini Watchtower mo e Awake! foou he taha lima. Ko e taufetului ke taute e fakaako Tohi Tapu mo e taha tagata teligatuli he fakaaoga hokoia e tau tohi lolomi ne nakai maama mitaki ia laua tokoua. Ne manatu foki he tau tagata fakailoa momotua ne teligatuli e hogohogomanava ne logona e lautolu he magaaho ka nakai maama he faoa a lautolu ti nakai maeke ke fakatutala fakalaulahi hagaao ke he kupu mooli fakaagaaga. Ne iloa foki e lautolu e kakano ke moua e fakaalofa hokulo lahi ma Iehova ka kua nakai maeke ke fakagahua ai mo e mauokafua. Ko e ha? Ha kua nakai iloa mitaki e lautolu kua hako mooli e maamaaga ha lautolu ke he falu matakupu.

Pete e tau paleko oti nei, ne taofi mau e tau matakainaga teligatuli ha tautolu ke he mahani hakohako ha lautolu. (Iopu 2:3) Kua leva e talifaki ha lautolu ki a Iehova. (Sala. 37:7) Ti fakamonuina e ia a lautolu mogonei aki e tau mena ne mua atu e loga ne nakai amanaki e tokologa ia lautolu ki ai.

Manamanatu la ke he tau laliaga ne taute he taha matakainaga taane teligatuli, ko e taane mo e matua taane. Ato moua e tau vitiō vagahau matalima, ne fakamooli tumau a ia he takitaki e fakaakoaga fakamagafaoa. Ne manatu he tama taane haana: “Ne uka tumau e fakaakoaga fakamagafaoa ke he matua taane haaku, ha ko e tau tohi oti ne fakaako aki e ia a mautolu ne mai he tau tohi ne lolomi. Nakai fa maama katoatoa e ia e tau matakupu ne tohi. Ti nakai lahi foki e lagomatai ha mautolu ko e tau tama. Maeke ia mautolu ke mafiti ke tala age ka nakai hako e tau fakamaamaaga haana. Pete ko e tau mena oti nei, ne taute tumau e ia e fakaakoaga fakamagafaoa. Logona hifo e ia kua mua atu e aoga ke fai mena a mautolu ka iloa hagaao ki a Iehova, ke he falu magaaho ne fuafua kelea a ia ha kua temotemoai e maamaaga haana ke he vagahau Peritania.”

Ko e fakafifitakiaga foki ha Richard, ko e matakainaga taane kua 70 tumā e tau he moui ne teligatuli mo e matapouli ne nofo i Brooklyn, New York, U.S.A. Ne talahaua a Richard he fano tumau ke he tau feleveiaaga Kerisiano. Ke hoko ke he feleveiaaga, ne fano tokotaha a ia he tuleni, ti totou e tau magaaho ne tū e tuleni ke maeke ke iloa e ia e mogo ka hū mai ki fafo. He taha vahā makalili, ne tō lahi mahaki e sinō ti nakai fakahoko e feleveiaaga. Ne fakailoa ke he tau matakainaga oti he fakapotopotoaga, ka kua nakai hoko e fakailoaaga ki a Richard. Magaaho ne mailoga he tau matakainaga e mena ne tupu ti kumi a ia, ne moua e lautolu a Richard ne tū i fafo he Fale he Kautu, hane fakatali fakatekiteki ke hafagi e tau gutuhala. He hūhū ko e ha ne fano a ia ka e tō e sinō, tali e ia, “kua fakaalofa au ki a Iehova.”

Ko e Heigoa Haau Ka Taute?

Nonofo nakai e tau tagata teligatuli he matakavi haau? Maeke nakai a koe ke fakaako falu vagahau matalima ke matutaki mo lautolu? Kua lahi e totonu mo e fakauka he tau tagata teligatuli ka fakaako e falu ke he vagahau ha lautolu. Liga feleveia a koe mo e tagata teligatuli he taha magaaho noa po ke he gahua he fonua. Ko e heigoa haaku ka taute? Lali ke matutaki. Fakaaoga e tau lima, tohi e tau manatu he laupepa, tā e tau fakatino, fakakite e tau ata, po ke taute oti e tau mena nei. Pete he fakakite he tagata kua nakai fiafia a ia ke he kupu mooli, tala age ke he Fakamoli teligatuli po ko ia ne iloa e vagahau matalima hagaao ke he ahiahi atu haau. Liga futiaki lahi e fekau ke he tagata teligatuli ka fakakite ai ke he vagahau matalima.

Hane liga fakaako a koe ke he vagahau matalima mo e fano he fakapotopotoaga vagahau matalima. Maeke fēfē a koe ke mahomo atu e makaukau ke he vagahau matalima mo e maama ai? Liga fai tagata fakailoa foki he fakapotopotoaga ha mutolu ne maeke ke logona, ko e ha he ua tutala? To lagomatai he mena nei a koe ke manamanatu he puhala kitia ke he vagahau matalima. He falu magaaho, liga lali a koe ke fakamukamuka he vagahau. Ka e ka fakaako ha vagahau kehe, kua lata a koe ke fakauka ke he tau paleko ke maeke ke mahifi ki ai.

He lali fakalahi ke fakaaoga e vagahau matalima kua fakakite e fakaalofa mo e fakalilifu ma e tau matakainaga teligatuli ha tautolu. Manamanatu la ke he tau logonaaga hogohogomanava ne moua e lautolu ne teligatuli he tau aho takitaha ha kua nakai maama e tau tagata he gahuaaga po ke aoga. “He tau aho takitaha, ne tutala e tau tagata oti ne takatakai ia au,” he talahau he taha matakainaga taane teligatuli. “Ko e tau logonaaga matimati mo e tiaki ne fa tupu hake i loto haaku ati hogohogomanava mo e ita foki au. Nakai maeke he tau kupu ke fakamaama katoatoa e puhala ne logona hifo e au he tau magaaho.” Kua lata e tau feleveiaaga ha tautolu ke atihake ke moua he tau matakainaga teligatuli ha tautolu e tau mena kai fakaagaaga ti olioli ai e matutakiaga mo e fakafetuiaga mafanatia.—Ioane 13:34, 35.

Nakai nimo foki e tau matakau ikiiki loga ha lautolu ne teligatuli hane feleveia fakalataha mo e tau fakapotopotoaga ne logona. Kua fakahokohoko e tau feleveiaaga ma lautolu. Ke maama katoatoa e tau lauga, ko e tau tagata teligatuli kua maeke ke nonofo i mua he Fale he Kautu. He mena nei kua maeke a lautolu ke kitia mitaki e tagata fakahokohoko mo e tagata lauga. Fitā he kitia kua mafiti a lautolu ne toe he fakapotopotoaga ke mahani mo e mena nei, ti nakai ko e mena fakatauhele. Hagaao foki e tau fakatokaaga nei ke he tau toloaga mo e tau fonoaga ne fakahokohoko ke he vagahau matalima. Kua lata e tau tagata he fakapotopotoaga ne gahua malolō ke nava mafanatia he fakahokohoko ke tuga ni e tagata teligatuli ka fakakite e vala tala—ke he puhala kakano lahi mo e mukamuka.

Liga ko koe he fakapotopotoaga ne leveki e matakau vagahau matalima po ke fai tagata teligatuli ati fakahokohoko ai e tau feleveiaaga. Ko e heigoa haau ka taute ke fakakite e fiafia fakatagata ke he tau matakainaga teligatuli nei? Uiina a lautolu ke he kaina haau. Ka maeke, fakaako falu vagahau matalima. Ua fuafua kelea he nakai maeke ke fematutakiaki. To moua e koe e puhala ke matutaki, mo e fakakite he fakaalofa pihia ka fua mai ai e tau manatu fiafia. (1 Ioa. 4:8) Kua lahi mahaki e mena ke foaki he tau matakainaga Fakamoli teligatuli ha tautolu. Ko e tau tagata ne mua atu e mahifi he tutala, lotomatala lahi mahaki, ti homo ue atu e aga vaiga ha lautolu. Pehē taha matakainaga taane ne teligatuli tokoua e tau matua: “He moui katoa haaku, ne fakalataha tumau au mo e tau tagata teligatuli, ti nakai fai puhala au ke liu fakakite age fakalahi e tau mena ne moua mai e au ia lautolu. Maeke ia tautolu ke loga e mena ne fakaako mai he tau matakainaga teligatuli ha tautolu.”

Kua ofania e Iehova haana tau tagata tapuaki tua fakamooli ne putoia a lautolu kua teligatuli. Ko e ha lautolu a fakafifitakiaga he tua mo e fakauka kua lafi mooli ke he uho lahi he fakatokatokaaga ha Iehova. Kia ofaofa ai e tautolu e tau matakainaga teligatuli ha tautolu!

[Matahui Tala]

[Fakatino he lau 31]

Liga futiaki lahi e fekau he Kautu ke he tagata teligatuli ka fakakite ke he vagahau matalima

[Tau Fakatino he lau 32]

Kua lata e tau feleveiaaga ha tautolu ke atihake ke moua he tau matakainaga teligatuli ha tautolu e fakamalolōaga fakaagaaga