Fakatupu e Fonua Vagahau Kehe
1. Ko e heigoa e magaaho kua lagā he taute e tautolu e gahua fakamatala he tau matakavi ne kotofa ki a tautolu?
1 Ne talahau tuai e Iesu Keriso to fakamatala e tala mitaki ke he lalolagi oti “ke eke mo talahau ke he tau atu motu oti.” Kua aoga lahi e tau kupu ia ke he tau fekafekau takitaha hane taute e gahua fakamatala mo e fakaako atu. (Mata. 24:14; 28:19, 20) He taute e tautolu e gahua fakamatala mo e taute tutaki, kua liga moua e tautolu e tau tagata he tau motu kehekehe ne vagahau kehe. Ko lautolu nei foki kua lata ke moua e magaaho ke logona e ogo he Kautu mo e tumauokafua ke he kupu mooli ato hoko mai e aho matakutakuina a Iehova. (Mala. 3:18) Maeke fēfē ia tautolu ke fakatupu e fonua vagahau kehe he matakavi ne kotofa ki a tautolu?
2. He puhala fe kua fifitaki e tautolu a Iehova ka tutala ki a lautolu ne vagahau kehe?
2 Fakaata e Onoonoaga a Iehova ki a Lautolu kua Vagahau Kehe: Ke fakaata e fakaalofa nakai fakamailoga tagata a Iehova ke he tau tagata oti he matakavi ha tautolu, kua latatonu ia tautolu ke manako lahi mahaki ke lagomatai e tau tagata ke moua e iloilo tonu ha Iehova, ko e Atua mooli, pete ka vagahau kehe a lautolu. (Sala. 83:18; Gahua 10:34, 35) Pete he hagaaki pauaki a tautolu ki a lautolu ne fakaaoga e vagahau he fakapotopotoaga ne fakalataha a tautolu ki ai, kua latatonu a tautolu ke mailoga mo e matakite ke he tau manako ha lautolu ne vagahau kehe mo e kumi puhala ke talahau e ogo he Kautu he Atua ki a lautolu. Ke fakaheu a lautolu ne vagahau kehe to nakai lagotatai mo e finagalo a Iehova ke fakamatala ke he tau tagata he tau motu oti. Maeke fēfē mogoia ia tautolu ke lagomatai a lautolu ne nakai fakaaoga e vagahau ha tautolu?
3. Ko e heigoa e tohi tote ne aoga lahi ne foaki ki a tautolu, ti maeke fēfē ia tautolu ke mautauteute ke fakaaoga ai?
3 Fakaaoga e Good News for People of All Nations: Ko e tohi tote nei ne talaga ke fakaaoga ka feleveia mo lautolu ne vagahau kehe. Uta tumau mo koe e tohi tote nei, ti fakamahani mo e tau vala tala kehekehe i loto, ti mautauteute ke fakaaoga ai. Ke fakakia fakamafiti, maaka e tau vagahau kehekehe ne moua he matakavi haau. Ka fai pepa ne tohi ke he tau vagahau nei kua liga aoga ke moua falu ke age ke he tagata he mole e fakaaoga e talahauaga he tohi tote.
4. Maeke fēfē e tohi tote Nations ke fakaaoga he fonua ha tautolu?
4 Ka feleveia a koe mo e tagata vagahau kehe he fonua ti nakai iloa e koe e vagahau haana, kamata he fakakite e kili i mua he tohi tote. Fuluhi ke he mepe he lalolagi he lau i loto he kili i mua, ti tuhi ki a koe mo e motu ne nofo ai a koe, mo e fakakite na manako a koe ke iloa kua mai i fe e tagata he kaina ti vagahau ha. Ka iloa mogoia e koe e vagahau haana, kikite ke he lau he tau mataulu tala, kumi e lau tonu ia, ti takitaki e onoonoaga he tagata he kaina ke he alaga kupu ne lomi puni lahi i luga he lau tohi, mo e fakakite foki kua manako a koe ke he tagata he kaina ke totou e ogo. Ka oti e totou haana, age e tuleke he vagahau haana po ke fakakite e alaga kupu ne lanu efuefu, ne totoku kua manako lahi a koe ke liu atu mo e tohi he vagahau he tagata he kaina. Ti fakakite e talahauaga “my name” ne lomi puni lahi, ti talahau fakamahino e higoa haau. Tuhi ke he “your name” ne lomi puni lahi, ti fakatali ke he tali he tagata he kaina. Taute e tau fakatokaaga mauokafua ke liu aahi atu.
5. Ko e heigoa foki kua lata ke taute ke leveki fakamitaki a lautolu he vagahau kehe ne fakakite e fiafia?
5 Tau Fakatokaaga Liu Aahi Atu: Lata ke lali fakalahi ke aahi atu ki a lautolu ne fakakite e fiafia ke he ogo he Kautu, pete ne tau vagahau ha lautolu. Ka mailoga agataha e tautolu e fiafia ke he Atua mo e haana Kupu ko e Tohi Tapu, kua lata ia tautolu ke fakapuke e laupepa Please Follow Up (S-43) ti age fakamafiti ke he tohikupu he fakapotopotoaga ke fakafano atu ke he matakau po ke fakapotopotoaga he vagahau ia kua latatonu ki ai he matakavi ia, ke maeke e tagata fiafia ia ke matutaki e taha tagata he vagahau ia. Ka ha ha ai e tau matakau po ke tau fakapotopotoaga vagahau kehe he matakavi ha mutolu, kua lata e fakatokaaga nei ke muitua ka fai tagata kua fakaaoga e vagahau ia.
6. Ka feleveia a tautolu mo e tagata ne fiafia ka e vagahau kehe, ko e heigoa e matagahua kua ha ha ia tautolu?
6 Mai he magaaho ne tuku e laupepa S-43 ato aahi atu e tagata fakailoa ke he tagata ne fiafia, nukua iloa e vagahau ia, liga kua fai magaaho tuai he mole. Ko e mena ia, he lali ke fakatupu e fiafia ne fakakite, kua maeke he tagata fakailoa ne tuku e laupepa S-43 ke fakatumau ke feaki e fiafia ia ato fai tagata ne iloa e vagahau haana ka matutaki atu. He falu tuaga, liga kamata e fakaako Tohi Tapu mo e tagata ne fiafia. Pete ia, he magaaho nei ato fai tagata ka aahi atu, maeke fēfē he tagata fakailoa ke moua e pepa he vagahau he tagata ne fiafia?
7. Ko e heigoa e foakiaga ke moua aki e tau pepa he vagahau ha lautolu ne liga feleveia e tautolu?
7 Tau Pepa ma e Falu Vagahau: Kua nakai lata e fakapotopotoaga ke lahi e fakaputuaga tohi he falu vagahau. Kaeke ke fifili he leveki fekafekau kua ha ha ai e fiafia ne moua mai he matakau vagahau pauaki, kua liga latatonu ai ke lahi e tohi he vagahau ia he fakapotopotoaga ke fakaaoga he tau tagata fakailoa. Ka nakai fai tohi ne ha ha ai ke he fakapotopotoaga, maeke ke ota ai. To fai magaaho ato moua e tau tohi he vagahau pauaki ia. Ko e mena ia, ko e foakiaga kua taute ma e tau lagaki he tau tohi he www.watchtower.org. Ha ha i ai loga lahi e tau tohi ne fakakite ke he tau vagahau kehekehe ka moua mafiti he tagata fakailoa po ke he tagata ne fiafia. Kua aoga mooli ai e foakiaga nei ke fakaaoga ka feaki e fiafia ne fakakite e lautolu ne vagahau kehe.
8. Ko e heigoa e gahua he fakapotopotoaga ne taute he feaki e fiafia ha lautolu ne vagahau kehe?
8 Gahua he Fakapotopotoaga: He falu tuaga nukua tupu fakahaga e matakavi vagahau kehe, kua liga nakai fai fakapotopotoaga tata ne taute e tau feleveiaaga ke he vagahau ia. Ko e mena ia, ko lautolu ne fiafia kua vagahau kehe kua lata ke uiina ke o atu ke he tau feleveiaaga haau. Ko e fakafeleveia mafanatia mo e fiafia fakatagata ne fakakite ki a lautolu ka atihake a lautolu ke fakalataha tumau mai. Liga to fai kaupāaga he vagahau mo e aga fakamotu he magaaho fakamua; ka kua nakai fai kaupāaga ma e fakaalofa faka-Kerisiano mooli he feoakiaga he Tau Fakamoli a Iehova he lalolagi katoa. (Sefa. 3:9; Ioane 13:35) Iloa mitaki nakai e koe taha vagahau kehe? Ka iloa e koe mo e makai ke taute e tau liu aahi atu ke he vagahau ia, fakamolemole fakailoa ke he tohikupu he fakapotopotoaga haau. To lagomatai e mena nei ka kumi e la ofisa ke he tagata fakailoa ne liga iloa e vagahau ia ke takitaki atu ke he tau matakavi ne lata mo e lagomatai.
9. Magaaho fe ka fakatū e fakaakoaga he vagahau ma e tau tagata fakailoa, ti taute fēfē e lakaaga nei?
9 Fakaakoaga he Vagahau: Ka lagomatai a koe ia lautolu ne vagahau kehe, kua mitaki lahi mahaki ke atihake a lautolu ke kamata ke o atu ke he fakapotopotoaga he vagahau ni ha lautolu kaeke kua lata ia lautolu ke taute pihia. Ka nakai maeke ai, liga fifili e falu tagata fakailoa ke fakaako e vagahau kehe ti maeke ke lagomatai fakamitaki a lautolu ne fiafia. Ka nakai fai fakapotopotoaga ne tata mai, maeke he la ofisa ke fifili e mena ia ke he tokologa ha lautolu ne hiki mai ke he motu po ke maaga, ti lata ke fakatū e vahega ke fakaako e vagahau. Ka pihia e tuaga, maeke e la ofisa ke fakailoa atu e manako lagomatai ke he tau fakapotopotoaga tata mo e fakatoka ma e fakailoaaga hagaao ke he vahega ke fakaako e vagahau. Ko lautolu ne ole ke fakalataha ke he vahega fakaako e vagahau kua lata ke foli ke hiki ke he matakau po ke fakapotopotoaga ke lagomatai e tupuaga he fonua he vagahau ia.
10. Magaaho fe ka fakatū ai e matakau vagahau kehe, ti fifili fēfē e mena nei?
10 Fakatū e Matakau: Ke maeke e matakau he vagahau pauaki ke fakatū, fā e puhala aoga kua latatonu ke hokotia ki ai. (1) Kua lata ke lahi e fiafia mo e liga to tupu e fonua he vagahau pauaki ia. (2) Kua lata e matakau pauaki he tau tagata fakailoa ke iloa e vagahau po ke fakaako e vagahau. (3) Fai motua kua lata po ke fekafekau lagomatai ke takitaki mo e taute kavi ke taha e feleveiaaga he faahi tapu ke he vagahau ia. (4) Ko e kau he tau motua kua fiafia ke fakatū e matakau. Ka hokotia ke he tau mena nei, kua lata e tau motua ke tohi atu ke he la ofisa hagaao ke he tau manako pauaki he matakau mo e ole ai ma e fakamailoga fakamitaki ko e fakapotopotoaga ne fakatū e matakau vagahau kehe. (Kikite Organized, lau 106-107.) Ko e motua po ke fekafekau lagomatai ne latatonu ke taki to manamanatu ke he “leveki matakau” po ke “fekafekau matakau” ke leveki e matakau.
11. Ko e ha ko e kotofaaga lilifu ke fakatupu e fonua vagahau kehe he matakavi kotofa ha tautolu?
11 He fakatupu e fonua vagahau kehe he matakavi kotofa ha tautolu ko e vala aoga lahi he matagahua fakamatala he lalolagi katoa ne tamata he ha tautolu a Fakafifitaki, ko Iesu Keriso. Kia eketaha a tautolu ke taute e vala ha tautolu mo e kitia e puhala kua matutaki a Iehova ke luelue e tau motu mo e tamai a lautolu ne manako a ia ki ai. (Hakai 2:7) Fiafia lahi mooli a tautolu ke fakalataha katoatoa ke he matagahua nei! Kia fakamonuina e Iehova e tau laliaga kaufakalataha ha tautolu he fakatupu e fonua vagahau kehe he tau matakavi he fakapotopotoaga ha tautolu, he manatu tumau e tautolu pete ne tau fakakaupāaga he tau vagahau he tau tagata, maeke he Atua ke fakatutupu ai!—1 Kori. 3:6-9.